1 Corintios 14

1Cyk'o'nque tilil tu'n tten cyc'ujlalile, ex cyk'o'nque tilil tu'n tten cyoclene aju in tzaj tk'o'n Xewbaj Xjan, pero aju mas il ti'j, tu'n t-xi cychic'ba'ne aju in tzaj tma'n Dios cyeye. 2Porque aju xjal in yolin tuj junxilchak yol, mya cyuc'il xjal in yolin, nok o'cx in yolin tuc'il Dios, porque mi jun xjal nne'l tnic' ti'j tyol. Aju yol in tzaj k'ma'n te tu'n Xewbaj Xjan mlay tz'el cynic' xjal ti'j alcye tnabl. 3Pero aju in chic'bante tyol Dios, in yolin cyuc'il xjal tu'ntzun cych'iy tuj cyocslabl, ex tu'n t-xi k'ot cynabl, ex tu'n tk'ukbanjtz cyc'u'j. 4Aju in yolin tuj junxitl yol, o'cx te in ch'iy tuj tocslabl; atzunju in chic'bante tyol Dios, in che ch'iy cycyakil ocslal tu'n tuj cyocslabl. 5Cyja'tzun wajbile tu'n cyyoline cycyakile tuj junxilchak yol, pero mas wajbile tu'n t-xi cychic'ba'ne tyol Dios; porque aju in chic'bante tyol Dios mas ma' toclen twitzju in yolin tuj junxilchak yol, ax ba'n tu'n tyolin tuj junxilchak yol, pero ka ma tz'el pjet ju yol tu'n, tu'ntzun cych'iy cycyakil ocslal tuj cyocslabl. 6Ja'lotzun erman, ka ma chin pone cyuc'ile in chin yoline tuj junxilchak yol, ¿ti tajben cyeye ka minti' ma txi nma'ne aju yol tzaj tma'n Dios weye, ex ka jun yol te ojtzkibl, ex ka jun yol te chic'babl ti'j tyol Dios, ex ka jun yol te xnak'tzbil? 7Cycyakil ke ti'xti in che k'ajt mya itz' ke, ic tza'n xux ex ka jun quitar, ka minti' in cyk'o'n t-sonil cywi' clarxix, ¿tza'ntzun tten tu'n tel knic' ti'j alcye bitz in tk'ajtza'n xux ex ka alcye bitz in tk'ajtza'n quitar? 8Ax icx oc toc k'ajtza'n chun, ka junxitl tbinx twi', ¿alcye cbantel tten tu'n t-xi' tuj k'oj? 9Icxtzun cyeye, ka minti' ma txi cyma'ne jun yol chic'lxix, ¿tza'ntzun tten c'elel cynic' xjal ti'j ju in cyma'ne? Mer ic tza'n minti' jun xjal in bin ti'j cyyole. 10Ela' txcaj cyyol xjal at twitz tx'otx', ex minti' jun yol minti'wt tnabl. 11Pero ka minti' ma tz'el nnic'e ti'j ti t-xilen ju yol, chin oquele ic tza'n stranjer xjal tuj twitz ju in yolin, ex aju in yolin c'oquel ic tza'n stranjer xjal tuj nwitze. 12Icxtzun cyeye, tu'nju cyajbile tu'n tten ela' cyoclene tu'n Xewbaj Xjan, cyk'o'nque tilil tu'n tten ela' cyoclene tu'ntzun cych'iy cycyakil ocslal tuj cyocslabl. 13Cyja'tzun, aju in yolin tuj junxilchak yol, kaninx tuj na'j Dios tu'n tel pjet ju yol tu'n. 14Porque ka ma chin na'ne Dios tuj junxitl yol minti' nne'l nic'baj ti'j, aju wanmiye in na'n Dios, pero aju nnable minti' ch'in in tcamba'n. 15¿Titzun oc nbincha'ye? Chin na'le Dios tuj wanmiye, pero icx chin na'le Dios tuj nnable; chin bitzale tuj wanmiye, pero icx chin bitzale tuj nnable. 16Porque ka ma txi tk'o'na chjonte te Dios tuj tanmiya ex in yolina tuj jun yol minti' nne'l nic'baj ti'j, ex ka at jun xjal in bin mya xnak'tzamni, ¿tza'n tten tu'n t-xi tk'o'n chjonte te Dios junx tuc'ila? Porque minti' nne'l tnic' ti'j ju in tma'na. 17Porque teya, ax toc ba'n in tbincha'na in xi tk'o'na chjonte te Dios; pero atzun juntl mlayx ch'iy. 18In xi nk'o'ne chjonte te Dios tu'nju ba'n chin yoline tuj junxilchak yol mas ic tza'n cyeye. 19Pero cyxol ocslal mas wajbile tu'n t-xi nma'ne jwe' yol aju nne'l nic'baj ti'j tu'ntzun t-xi nk'o'ne xnak'tzbil cye mastl, ex mya tu'n t-xi nma'ne laj mil yol tuj junxitl yol aju minti' nne'l nic'baj ti'j. 20Erman, aju cynable mi'n tz'oc ic tza'n tnabl jun c'wa'l, nok o'cx ic tza'n tnabl jun tij xjal; ex mi'n che ximane ti'j ju mya ba'n, ic tza'n ke tal c'wa'l minti' in che ximan ti'j ju mya ba'n. 21At jun yol tz'iban tuj Tu'jil in tma'n: Cxel k'met nyole cye xjal lu tuj cyyol junxitl xjal ex tuj cyyol stranjer xjal; masque icju, pero mlay txi cybi'n nyole, chi Kman, chi tuj Tu'jil. 22Cyja'tzun, aju oclenj tu'n kyolin tuj junxilchak yol in tzaj k'o'n te jun techal cye xjal mya ocslal, ex mya te cye ocslal. Atzunju koclen tu'n t-xi kchic'ba'n aju in tzaj tma'n Dios ke in tzaj k'o'n te jun techal cye ocslal, mya te cye keju mya ocslal ke. 23Katzun ma tz'oc cychmon cyib ke ocslal tuj jun lugar, ex ka ma che yolin cycyakil tuj junxilchak yol, ex ka ma che ocx ke xjal minti' ch'in nne'l cynic' ti'j ex ka mya ocslal ke, ¿mlaypelo cyma ka tuj cywitze ma tzaj? 24Pero ka cycyakile in xi cychic'ba'ne aju in tzaj tma'n Dios cyeye, ex ka ma tz'ocx jun xjal mya ocslal ex minti' ch'in ba'n tu'n, cbeltzun ti'j tnabl cyu'ne cycyakile, ex cbel ten ximal ti'j ka aj il oc tbinte cyyole. 25Aju ewan tuj tanmi c'elel tuj k'ancha'l; cyja'tzun cbel ẍmeje' tu'n tc'ulun twitz Dios, oc tma' ka ax toc at Dios cyxole. 26¿Titzun c'oquel erman? Oc toc cychmon cyibe, teyle junjun ctzajel tma'n jun salmo, ex ka jun xnak'tzbil, ex ka junxitl yol, ex ka jun yol alcye ctzajel tyec'un Dios te, ex ka tu'n tel pjet junxitl yol. Cybinchame tcyakil tu'ntzun cych'iy ke mastl ocslal. 27Ka at ma yolin tuj junxitl yol, ba'n tu'n cyyolin cabe ex ka ox, pero junjun tu'n tyolin, ax icx il ti'j tu'n tten jun pjulte cyyol. 28Pero ka minti' jun pjulte yol, ba'n tu'n mi'n tyolin cyxol ocslal, ba'n tu'n tyolin texte ex te Dios. 29Ax icx ke pacbal, ba'n tu'n cyyolin cabe ex ka ox, atzun ke mastl tu'n cyximan ti'j. 30Ex ka at juntl k'ukl, ka at jun yol ma tzaj tma'n Dios te, ba'n tu'n twe' tyolin aju in yolin, tu'ntzun tyolin juntl. 31Porque ba'n tu'n t-xi cychic'ba'ne cycyakile aju in tzaj tma'n Dios cyeye, junjun tu'n tyolin, tu'ntzun tel cynic' cycyakil ti'j ex tu'n t-xi k'ot cynabl cycyakil. 32Ex akeju in che pacban, tuj cycwent-x ta' tu'n cyyolin ex ka tu'n twe' cyyolin. 33Porque ate Dios tcyakil in bant tu'n tuj ttxolil ex tu'n tten kmojbabl kib kxolx. Ic tza'n in bant cyxol ocslal cyuj cycyakil iglesi, 34ax icx cyxole, ba'n tu'n mi'n cyk'ajt ke xu'j oc toc cychmon cyibe tuj c'ulbil, porque mya k'o'n permis cye tu'n cyyolin, o'cx tu'n cycub txule' ic tza'n in tma'n tuj tley Dios. 35Ex ka cyaj tu'n tel cynic' ti'j ti t-xilen jun yol, cykaninx cye cychmil max cyja; porque jun ch'ixbil tu'n tyolin jun xu'j cyxole oc toc cychmon cyibe. 36¿Baka cyxole ma tz'etz tyol Dios? ¿Ex baka o'cx cyuc'ile ma pon tyol Dios? 37Ka at jun ocslal tuj tnabl ka pacbal ex ka at toclen tu'n Xewbaj Xjan, tz'elx tnic' ti'j aju ma txi ntz'ibane cyeye, te Kajaw tmandamyent. 38Pero ka at jun minti' nne'l tnic' ti'j jlu, icxlo te mlay c'met ju tyol. 39Cyja'tzun erman, tz'oc tililx cyu'ne tu'n tten cyoclene tu'n t-xi cychic'ba'ne aju in tzaj tma'n Dios cyeye, ex mi'n txi cymayo'ne ke erman tu'n cyyolin tuj junxitl yol. 40Pero cybinchame tcyakil tuj tumel ex tuj ttxolil.

will be added

X\