1 Corintios 13

1Ka ma ko yolin tuj junxilchak cyyol xjal ex ka tuj cyyol anjel, pero ka minti' kc'ujlalil, ko oquel ic tza'n c'uxbil in tzinun ex ka ic tza'n jun c'uxbil tmoj chnab nim in k'ajt. 2Ex ka at koclen tu'n t-xi kchic'ba'n aju in tzaj tma'n Dios, ex ka ma tz'el knic' ti'j tcyakilju yol at tuj ewaj, ex ka ojtzki'n tcyakil ku'n, ex ka at nim kocslabl tu'n tic' jun witz ku'n tu'n tpon tuj juntl lugar, pero ka minti' kc'ujlalil, minti' kajben. 3Ex ka ma txi ksipan tcyakilju at ke tu'n cywa'n ke meba, ex ka ma txi kk'on kib tu'n tcub patun kximlal, pero ka minti' kc'ujlalil, minti'lo tajben jlu ke. 4Aju xjal at tc'ujlalil at tpasens ex in tz'e'y tc'u'j ti'j tuc'il; aju xjal at tc'ujlalil minti' in tzaj tlo'ch tc'u'j ti'j juntl, ex minti' in jaw tniman tib, minti' in baj tyolin tib. 5At tchi tuj twitz, mya nok o'cx ti'jx toc tc'u'j; mya tx'u'j twi', ex minti' in xi tc'u'n k'oj. 6Minti' in tzalaj ti'j ju mya ba'n in cybincha'n xjal, o'cx in tzalaj ti'j ju yol ax toc. 7Tcyakil nnic'x tu'n, tcyakil niman tu'n, ex tuj tcyakil ayo'n tu'n, ex at tpasens tuj tcyakil. 8Aju c'ujlalil mlay baj; pero tzul tk'ijlalil tu'n mi'n t-xi kchic'ba'ntl aju in tzaj tma'n Dios ke, ex cwebel tu'n kyolin tuj junxilchak yol, ex cbajel ojtzkibl. 9Porque aju ojtzki'n ku'n nok ch'in, ex aju tyol Dios in xi kchic'ba'n nok ch'in. 10Octzun tul aju tz'aklxix, aju mya tz'aklxix cbajel. 11Tej c'wa'lxtok ko', in ko yolin ic tza'n ke c'wa'l, ic tten knabl ic tza'n cynabl c'wa'l, ex in ko ximan ic tza'n ke c'wa'l; pero tejtzun xko oc tij xjal, cyaj kk'o'n aju in cybincha'n c'wa'l. 12Ja'lo in xi kque'yin ic tza'n tuj jun espej myaxix k'ancha'l; pero tzul tk'ijlalil c'oquel kque'yin kwitz. Ja'lo nok ch'in ma tz'el knic' ti'j, pero tuj tk'ijlalil tzul c'elel baj knic' ti'j tcyakil, ic tza'n ke ma ko ojtzkinjtz tu'n Dios. 13Ja'lo cucx tten kocslabl, ex cucx tke' kc'u'j ti'j Dios, ex cucx tten kc'ujlalil; mlay che baj ox lu; pero aju mas ma' t-xilen cyxol jlu, aju kc'ujlalil.

will be added

X\