1 Corintios 12

1Erman, waje tu'n cybinteye ti'j ju koclen in tzaj tk'o'n Xewbaj Xjan te teyle junjun ke. 2Bi'n cyu'ne, na'nxtok t-xi cyocsla'ne, xi cyk'on cyibe tu'n cyoc lpe'ye cyi'j ke tilbilal men ke. 3Cyja'tzun cxel nma'ne cyeye tu'n cybinteye, ka at jun xjal at T-xew Dios tuc'il, mlayx tma tu'n t-xi' Jesús tuj najen; ex mlayx tma jun xjal: Ate Jesús Wajawe, ka minti' Xewbaj Xjan tuc'il. 4Ja'lotzun, teyle junjun ke at junxilchak koclen pero axte Xewbaj Xjan in tzaj k'onte. 5Ex at junxilchak tumel tu'n kajben, pero o'cx jun Kajaw tu'n kajben te. 6Ex at junxilchak tumel tu'n kak'nan, pero axte Dios in ak'nan kuc'il kcyakil tu'n tbant tcyakil. 7Pero teyle junjun in tzaj k'o'n toclen tu'n Xewbaj Xjan tu'n tajben cye cycyakil. 8Porque at junjun in tzaj tk'o'n Xewbaj Xjan cyoclen tu'n cyyolin tuc'il nabl; atzun cye junjuntl in tzaj k'o'n nim cyojtzkibl tu'n cyyolin, axju Xewbaj Xjan in tzaj k'onte. 9Ex te junjuntl in tzaj k'o'n toclen tu'n tke'xix tc'u'j ti'j Dios, tu'nx ju Xewbaj Xjan; ex cye junjuntl in tzaj k'o'n cyoclen tu'nx ju Xewbaj Xjan tu'n cybanix ke yab cyu'n. 10Ex cye junjuntl in tzaj k'o'n cyoclen tu'n cybinchanjtz ke binchben nim tipumal; ex cye junjuntl in tzaj k'o'n cyoclen tu'n t-xi cychic'ba'n aju in tma'n Dios cye; ex cye junjuntl in tzaj k'o'n cyoclen tu'n tel cynic' ti'j cyyol ke xjal pacbal ka ax toc ex ka mi'n; ex cye junjuntl in tzaj k'o'n cyoclen tu'n cyyolin ti'j junxilchak yol; atzun cye junjuntl in tzaj k'o'n cyoclen tu'n tel pjet junxilchak yol. 11Pero tcyakil jlu axte Xewbaj Xjan in binchante junx te, in xi t-sipan toclen teyle junjun ic tza'nx tajbil. 12Porque ic tza'n tten kximlal nok junx ex nimcu toc ti'j, pero cycyakil keju ate'c ti'j kximlal masque nimcu cybet pero nok junx kximlal, icxtzun tten Cristju. 13Porque nok tu'n jun Xewbaj Xjan ma ko byan kcyakil tu'n koc te junx kximlal, masque judiy xjal ko' ex ka grieg xjal, masque tzyu'n ko' te majen ex ka tzokpi'n ko', ex junx Xewbaj Xjan ma kc'am kcyakil. 14Aju kximlal mya junx tten, nimcu toc ti'j. 15Ka ma tma kkan: Mya k'abaj kine cyja'tzun mya ti'j t-ximlal xjal atine, chiwt, ¿tu'npetzun jlu minti' toclen ti'j kximlal? 16Ex ka ma tma kẍcyin: Mya tbak' witzbaj kine cyja'tzun mya ti'j t-ximlal xjal atine, chiwt, ¿tu'npetzun jlu minti' toclen ti'j kximlal? 17Nokwit o'cx tbak' kwitz toc ti'j tcyakil kximlal, ¿tza'ntzun tten tu'n kbin? Nokwit o'cx kẍcyin toc ti'j tcyakil kximlal, ¿tza'ntzun tten tu'n tbant kskonte? 18Atzun ja'lo tcyakilju toc ti'j kximlal, ate Dios oc k'onte teyle junjun ic tza'nx tajbil. 19Akeju ate'c ti'j kximlal nokwit junx cyten, ¿tza'nwtlo tten kximlal? 20Atzun ja'lo nimcu toc ki'j, pero junx kximlal. 21Mlay bant tmante tbak' kwitz te kk'ab: Minti' tajbena weye, chiwt. Ex mlay bant tmante kwi' te kkan: Minti' cyajbene weye, chiwt. 22Akeju ate'c ti'j kximlal ch'in cyipun, alpe keju at-xix cyajben. 23Akeju nok ch'in cyoclen tuj knabl toc ti'j kximlal, mas xbalumi'nxix ku'n; ex akeju mya ba'nxix che que'yin, mas cwentinxix ke ku'n. 24Porque akeju ba'nxix che que'yin toc ki'j, minti' mastl at tajben cye. Bi'x cyaj bant tten tu'n Dios tcyakilju toc ti'j kximlal, ex aju ch'in toclen toc ti'j kximlal xi tk'o'n Dios mas toclen, 25tu'ntzun mi'n tel cyic'un cyib keju ate'c ti'j kximlal, o'cx tu'n toc cycwentin cyib cyxolx. 26Ka at jun toc ti'j kximlal ma c'ixbi, cycyakil keju ate'c ti'j kximlal nnic'x cyu'n junx tuc'il; ex ka at jun toc ti'j kximlal in tc'mo'n jun nimbil, cycyakil keju ate'c ti'j kximlal in che tzalaj junx tuc'il. 27Cyja'tzun cytene, t-ximlal Crist keye, ex teyle junjun cyeye toc ti'j t-ximlal Crist. 28Ex oc tk'o'n Dios cyoclen junjun cyxol cycyakil ocslal: Tnejelxix ke apostl, tcabin ke t-sanjel Dios, toxin ke xnak'tzal, ax icx keju in bant binchben nim tipumal cyu'n, ex keju in che banix ke yab cyu'n, ex keju in che onin, ex keju in che cawin, ex keju in che yolin ti'j junxilchak yol. 29¿Cycyakilpe apostl ke? ¿Cycyakilpe t-sanjel Dios ke? ¿Cycyakilpe xnak'tzal ke? ¿Cycyakilpe in che binchan binchben nim cyipumal? 30¿Cycyakilpe at cyoclen tu'n cybanix ke yab cyu'n? ¿Cycyakilpe in che yolin ti'j junxilchak yol? ¿Cycyakilpe in pjet yol cyu'n? 31Cyja'tzun cyk'o'nque tilil tu'n tten cyoclene mas ba'nxix. Pero cxel nyec'une cyeye jun tumel mas ba'nxix.

will be added

X\