1 Corintios 11

1Cycano'mele wi'je, ic tza'n weye ma tz'el ncano'ne ti'j Crist. 2Cxel nk'o'ne chjonte cyeye erman porque tuj tcyakil in chin tzaj cyna'ne, ex tzyu'nx ju xnak'tzbil cyu'ne ic tza'n xi nk'o'ne cyeye. 3Porque waje tu'n cybinteye, ate Crist nejenel te tcyakil xinak, atzunte xinak nejenel te xu'j, ex ate Dios nejenel te Crist. 4Ka at jun xinak in na'n Dios ex ka in xi tchic'ba'n aju in tma'n Dios te ex tjax tpasbil tuj twi', jun ch'ixbajil jlu ti'j twi'. 5Pero ka at jun xu'j in na'n Dios ex in xi tchic'ba'n aju in tma'n Dios te ex minti' jun xbalun tjax tuj twi', jun ch'ixbajil jlu ti'j twi'; porque junx ta' mer ic tza'n otok tz'el tc'oẍin ti'j twi'. 6Porque ka minti' in jax tk'o'n xu'j jun xbalun tuj twi', matzo'mil ttzmal twi'; katzun at tch'ixwi xu'j ti'j tu'n tel tmatzo'n ttzmal twi' ex ka tu'n tel tc'oẍin ti'j twi', entons ba'n tu'n tjax tk'o'n jun xbalun tuj twi'. 7Ate xinak mi'n jax tk'o'n tpasbil tuj twi', porque tilbilal Dioste ex in tyec'un tajwalil Dios ti'j, atzunte xu'j in yec'unjtz tajwalil xinak ti'j. 8Porque ate xinak mya ti'j xu'j ela, ate xu'j el ti'j xinak. 9Ex mya tu'n tlaj xu'j o binchanjtz te xinak, ate xu'j o binchanjtz tu'n tlaj xinak. 10Cyja'tzun il ti'j tu'n tjax tk'o'n xu'j jun xbalun tuj twi', tu'n toc te jun techal ka at toclen tchmil ti'j, tu'n cylaj ke anjel. 11Pero ic tza'n cyaj bant ti'j tu'n Kajaw, ate xinak at tajben xu'j te, ex ate xu'j at tajben xinak te. 12Porque ic tza'n te xu'j ti'j xinak ela, ax icxtzun cye xinak ti'j xu'j in che el itz'j; ex tcyakil tuc'il Dios in tzaj. 13Ax keye che ximane ti'j jlu: ¿Ba'npe tu'n tna'n xu'j Dios mya tjax xbalun tuj twi'? 14¿Myapetzun ku'nx nne'l knic' ti'j, ka ma ch'iy ttzmal twi' xinak in tzaj tch'ixwi? 15Atzunte xu'j at tzalajbil te ka ma ch'iy ttzmal twi'; porque ma tzaj k'o'n ttzmal twi' xu'j tu'n tajben te txaybil ti'j twi'. 16Ka at jun taj tu'n tk'ojl tu'n tlaj jlu, ba'n tu'n tel tnic' ti'j, keye minti' in kbincha'ne juntl costumr, icx ke mastl ocslal tuj junjun iglesi etzan ke tu'n Dios. 17Cxel nma'ne juntl yol cyeye, pero mlay txi nma'ne ka ba'n in cybincha'ne; porque oc nno'c cychmon cyibe tuj c'ulbil, minti' jun ba'n in cyc'mo'ne ti'j, nok mas mya ba'n nne'la te cyeye. 18Tnejelxix, oc nno'c cychmon cyibe cycyakile ocslal keye, in nbi'ne ka at pabl tib cyxole, ex tuj nnable ax toc junjun yol. 19Porque il ti'j tu'n tten pabl tib cyxole, tu'ntzun tel cynic'e cyi'j keju axix toc ocslal ke cyxole. 20Porque oc toc cychmon cyibe minti' tumel tu'n cywa'ne ti'j ju wabj cyaj tma'n Kajaw. 21Porque oc in che wa'ne, teyle junjun nej in wa'n ti'j ju tex twa; cyja'tzun at junjun minti' in wa'n tu'nju minti' twa, atzun junjuntl bi'x in chyo'n cywi' tu'nju nim in xi' cyu'n. 22¿Titzun tten icju? ¿Minti'pe cyjaye jatum tu'n cywa'ne ex tu'n cyc'ane? ¿Myapetzun tu'n jlu nne'l cyic'une ke ocslal etzan ke tu'n Dios, ex in tzaj cych'ixwi keju minti' cye? ¿Titzun cxel nma'ne? ¿Ocpelo cxel nma'ne ka ba'n in cybincha'ne? Ti'j jlu mlay txi nma'ne ka ba'n in cybincha'ne. 23Porque aju xnak'tzbil tzaj tk'o'n Kajaw weye, axju xi nk'o'ne cyeye: Tzaj ttzyu'n Kajaw Jesús pan ax konic'an tej t-xi k'o'n tuj cyk'ab xjal; 24ex tbajlenxi tk'o'n chjonte, cub t-sipan ju pan cyxol ex tma: Cytzyunxe ex cywa'nxe; atzun nximlale jlu cjawil k'o'n twitz crus tu'n cyclete, cybinchame jlu te nabl weye. 25Ax icx tzaj ttzyu'n ju vas tbajlenxi wa'n ex tma: Aju tcu'x tuj vas lu, atzun ac'aj yolju tziyi'maj wu'ne tu'n nchc'ele; tcyakil maj oc t-xi cyc'ane jlu, cybinchame te nabl weye, chi Jesús cye. 26Cyja'tzun, tcyakil maj oc t-xi cywa'ne ju pan lu ex oc t-xi cyc'a'ne aju tcu'x tuj vas lu, in cyyec'une ti'j tcyimlen Kajaw; maxi cxel cycoline ocxi tul. 27Cyja'tzun, alcye jun ma wa'nte ju pan lu ex ma c'ante ju c'abj lu aju cyaj tma'n Kajaw, ka mya xo'n tu'n, at til tu'nju mya xo'n t-ximlal ex tchc'el Kajaw tu'n. 28Cyja'tzun, teyle junjun tu'n t-ximan ti'jx ka ba'n tten, tu'ntzun twa'n ti'j ju pan ex tu'n tc'an ti'j ju c'abj. 29Porque alcye jun in xi twa'n ex in xi tc'a'n, ka mya xo'n tu'n ex minti' nne'l tnic' ti'j ka atzun t-ximlal Kajaw jlu, tu'nx in tzaj ti'n jun castiw tibaj, tu'nju in xi twa'n ex in xi tc'a'n. 30Tu'ntzun tlaj jlu at nimcu yab cyxole ex nimcu minti' cyipun, ex at junjun o che cyim. 31Nokwit in ko ximan ki'jx tza'n kten, minti'wtlo in cub kcastiw tu'n Kajaw. 32Katzun ma ko oc tuj xjel tu'n Kajaw, in tzaj tk'o'n Kajaw ch'in kcastiw, tu'ntzun mi'n tcub ksentens tu'n knaj junx cyuc'il cycyakil xjal. 33Cyja'tzun akeye wermaniye, oc toc cychmon cyibe tu'n cywa'ne, che ayone cyi'j mastl. 34Ka at jun nne'l tc'u'j, ba'n tu'n twa'n tuj tja tu'ntzun mi'n ttzaj k'o'n cycastiwoye oc toc cychmon cyibe. Atzun mastl cbantel ti'j wu'ne oc npone cyuc'ile.

will be added

X\