1 Corintios 10

1Wajbile tu'n cybinteye erman, cycyakil ke kxe'chel e ten tjak' muj, ex cycyakil e jic'tz tuj mar Cyak Que'yin. 2Cyja'tzun cycyakil e oc mojba'n tuc'il Moisés ic tza'n otok che byan tjak' muj ex tuj mar. 3Ex axju wabj tzaj tk'o'n Dios xi cywa'n cycyakil, 4ex axju c'abj tzaj tk'o'n Dios, xi cyc'a'n cycyakil, porque cucx in che c'an ti'j a' etz tuj jun abj tzaj tk'o'n Dios cye. Aju abj lu atzun Cristju in bettok cyuc'il. 5Pero minti' o tzalaj Dios cyi'j mas mijcu xjal, cyja'tzun e cyaj tx'aye' cyimni ke tuj lugar minti' cynajbil xjal tuj. 6Atzun jlu o baj tu'n toc te jun yec'bil te ke, tu'n mi'n tpon kc'u'j ti'j mya ba'n, ic tza'n cye pon cyc'u'j ti'j. 7Ex mi'n che c'ulune cywitz ke tilbilal ic tza'n cybincha junjun cye, ic tza'n in tma'n tuj Tu'jil: E cub ke' xjal tu'n cywa'n ex tu'n cyc'an, ex e jaw we' tu'n cybixan, chi tuj Tu'jil. 8Ex mi'n ko yaẍin, ic tza'n junjun cye e yaẍin, ex tuj junx k'ij e cyim 23 mil xjal. 9Ex mi'n tz'oc kk'o'n Kman Dios tuj joybil ti'j, ic tza'n junjun cye, oc Kman Dios tuj joybil ti'j cyu'n, ex e naj cyu'n lobaj. 10Ex mi'n txi' cyyole ti'j Dios, ic tza'n junjun cye tzaj cyyol ti'j Dios, ex e cub byo'n tu'nju anjel k'ol camic. 11Tcyakil jlu o baj cyi'j kxe'chel tu'n toc te jun yec'bil te ke, ex o tz'ibanjtz te k'obl knabl, porque ma ko canun tuj mancbil tk'ijlalil. 12Cyja'tzun tten, ka at jun wa'lxix ta' tuj tnabl, cwentim tib tu'n mi'n tcub tz'ak. 13Aju joybil cyi'je in tzaj, axju in tzaj cyi'j cycyakil xjal; pero ate Dios ba'n tu'n tke' kc'u'j ti'j, mlay che cyaj k'o'ne tu'n Dios tu'n cyoque tuj joybil cyi'je nimxix, aju mlay tzic'x cyu'ne. Oc cyoque tuj joybil cyi'je, ctzajel tyec'un Dios jun tumel tza'n tten tu'n cyexe tuj, tu'ntzun tic'x cyu'ne. 14Cyja'tzun erman, akeye at nc'u'je cyi'je, cyel oke tu'n mi'n cyc'ulune cywitz ke tilbilal. 15In chin yoline cyuc'ile tu'nju at cynable; che ximane ti'j aju cxel nma'ne cyeye. 16Aju c'abj tcu'x tuj vas, aju in xi kk'o'n chjonte ti'j, ¿myapetzun tu'n jlu at koclen ti'j tchc'el Crist? Ex aju pan in cub ksipan kxol, ¿myapetzun tu'n jlu at koclen ti'j t-ximlal Crist? 17Porque junx pan at, atzun ke masque nimcu kbet pero junx kximlal, porque kcyakil at koclen ti'j junx pan. 18Che ximane ti'j tnam Israel; akeju in xi cychyo'n cychibjal alumaj in che'x k'ot te chojbil, ¿minti'pelo cyoclen ti'j altar? 19¿Alcyetzun in xi nma'ne? ¿Apetzun in xi nma'ne ka at toclen ju tilbilal ex ka at toclen aju in cub k'o'n te oyaj cywitz tilbilal? 20Mi'n, pero atzun jlu in xi nma'ne, aju oyaj in cub cyk'o'n ke xjal mya nimal Dios, cywitz ke ju'ẍ in cub cyk'o'n ju oyaj, ex mya twitz Dios; ex mi'n wajbile tu'n tten cyoclene cyuc'il ju'ẍ. 21Mlay bant tu'n cyc'ane tuj tvas Kajaw ex tuj cyvas ju'ẍ; mlay bant tu'n cywa'ne ti'j tmes Kajaw ex ti'j cymes ju'ẍ. 22¿Ba'npelo tu'n ttzaj tk'oj Kajaw ku'n? ¿Maspelo at kipun twitz? 23At jun yol in cyma'n xjal cyja': Ba'n tu'n tbant ku'n nok alcye kajbil, che chi. Ax toc jlu, pero mya tcyakil jacu tz'el ba'n te cye. Jacu bant ku'n nok alcye kajbil, pero mya tcyakil jacu ko ch'iy tu'n tuj kocslabl. 24Mya nok o'cx tu'n cyximane ti'j ju ba'n te cyeye, ax icx tu'n cyximane ti'j alcyeju ba'n cye mastl. 25Tcyakilju in c'ayinjtz tuj c'aybil chibj ba'n tu'n t-xi cychyo'ne, pero mi'n baj cykanine ti'j, tu'n tlaj at junjun ch'in cyocslabl in jawje' cyc'u'j ti'j ka ba'n ex ka mi'n. 26Porque tete Kman Dios tcyakil twitz tx'otx' tuc'ix tcyakilju at twitz. 27Ka ma che txconjtze tu'n jun xjal mya ocslal tu'n cyxi'ye wa'l tuc'il ex cyajbile tu'n cyxi'ye, tcyakilju cbel k'o'n cywitze cychyonxe, pero mi'n baj cykanine ti'j, tu'n tlaj at junjun in jawje' cyc'u'j ti'j ka ba'n ex ka mi'n. 28Pero ka at jun ma k'mante cyeye: Ate chibj lu ma cub k'o'n te jun oyaj cywitz ke tilbilal, mi'ntzun txi cychyo'ne, tu'n mi'n tajtz jetpaj tnabl xjal aju ctzajel k'mante jlu cyeye, ex tu'n tlaj in jawje' cyc'u'j junjun ti'j; porque tete Kajaw tx'otx' tuc'ix tcyakilju at twitz. 29Minti' in chin yoline ti'ja, alcye in t-ximana tuj tanmiya; nok o'cx in chin yoline ti'j juntl, alcyeju in t-ximan tuj tanmi. Ka tzokpi'n kine, chilo jun, ¿tiku'ntzun tu'n woque tuj xjel tu'n t-ximbetz tanmi juntl? 30Ex ka ma txi nk'o'ne chjonte ti'j ju in xi nchyo'ne, ¿tiku'ntzun tu'n woc ic'le'ne tu'n tlaj nchi'ye in xi nk'o'ne chjonte ti'j? Chilo. 31Cyja'tzun, ka ma che chyo'ne, ex ka ma che c'ane, ex ka ma cybinchaye juntl, cybinchame tcyakil tu'ntzun tjaw nimsa'n tbi Dios. 32Mi'n che oque te jun tolsabl cye xjal judiy, mi cye txkantl xjal, mi cye cycyakil ocslal etzan ke tu'n Dios. 33Ic tza'n weye, tuj tcyakil nno'c tilil wu'ne tu'n wajbene cye cycyakil xjal, minti' nno'c tilil wu'ne aju ba'n te weye, nok o'cx aju ba'n cye nimcu, tu'ntzun cyclet.

will be added

X\