1 Corintios 1

1Akine Pablo, txco'maj kine tu'n woque apostl te Jesucrist nok tu'n tajbil Dios, ex tuc'ix erman Sóstenes at wuc'ile. 2In xi ntz'ibane cyeye, akeye ocslal ate'ye tuj tnam Corint, etzan keye tu'n Dios tu'nju cymojbabl cyibe tuc'il Jesucrist ex txco'maj keye o'cx tu'n cyajbene te Dios, cyuc'ix cycyakil keju in che cubsan twitz Kajaw Jesucrist nok jachak, ate Jesucrist Kajaw ex Cyajaw. 3Awt Kman Dios tuc'ix Kajaw Jesucrist che tzaj k'onte xtalbil cyeye ex tu'n tke'xix cyc'u'je. 4Cucx in xi nk'o'ne chjonte te Dios cyi'je tu'nju t-xtalbil Dios tzaj k'o'n cyeye tu'nju cymojbabl cyibe tuc'il Jesucrist. 5Porque ma che oque k'inun tuj tcyakil tu'n Crist, ma tz'aket-xix cynable, ex ma bant cypacbane ti'j tyol Dios. 6Cyja'tzun ma cyuwsanjtz ju yol cyu'ne, aju yol ax toc xi nchic'ba'ne ti'j Crist. 7Cyja'tzun ma cyc'ame tcyakil cyoclene, minti' jun atx taj cyeye, in che ayone ti'j tk'ijlalil tulel Kajaw Jesucrist; 8ex axte ccyuwsal cyeye tu'n cywe'xixe max te bajsbil, tu'ntzun cytene minti' cypaltile tuj tk'ijlalil oc tul Kajaw Jesucrist. 9Ate Dios in japunxix tyol ex mlay tzic'x ti'j, axte ma txcon cyeye tu'n cymojbante cyibe tuc'il Tc'wa'l aju Kajaw Jesucrist. 10Erman, tu'nju woclene ma tzaj tk'o'n Kajaw Jesucrist, chin cubsale cywitze, junxwit cyyole cycyakile ex tu'n mi'n tten jun pabl tib cyxole, nok o'cx tu'n cymojbante cyibe junx cynable ex junx cyximbetze. 11Porque at jun tkanil ma nbiye cyi'je erman cyu'n keju ate' tuj tja Cloé, at jun k'oj cyxole, che chi. 12Atzun jlu in xi nma'ne cyeye porque mya junx ta' cyyole. At junjun in tma'n: Te Pablo kine, ex junjuntl in tma'n: Te Apolos kine, ex junjuntl in tma'n: Te Pedro kine, ex junjuntl in tma'n: Te Crist kine. 13¿Baka tpa'n tib Crist? ¿Apelo Pablo jaw k'o'n twitz crus tu'n cyclete? ¿Ex baka tuj tbi Pablo o che byane tuj a'? 14Cxel nk'o'ne chjonte te Dios, mi jun cyeye o byan wu'ne, nok o'cx Crispo tuc'ix Gayo. 15Cyja'tzun, mi jun cyeye tu'n tmante ka tuj nbiye o byan. 16Ax icx wu'ne o che byan keju ate' tuj tja Estéfanas, pero minti' na'n wu'ne ka at juntl o byan wu'ne cyxol mastl. 17Porque minti' ma chin tzaj sama'ne tu'n Crist tu'n cybyan xjal wu'ne, nok o'cx tu'n t-xi npacba'ne tkanil colbil, ex mya tu'n nmak yol ma txi nma'ne, tu'ntzun mi'n tel wi'ne tipumal yol in xi nma'ne ti'j tcyimlen Crist twitz crus. 18Porque aju yol in xi nma'ne ti'j tcyimlen Crist twitz crus, minti' ttxolil yol lu nne'l tuj cywitz xjal in che'x tuj najen; atzun ke tuj kwitz, ako' ma ko clet, aju yol lu tipumal Dios te, 19porque in tma'n tuj Tu'jil: Cnajel aju nabl cye aj nabl wu'ne, ex c'elel wi'ne cynabl keju sac' cynabl, chi Tu'jil. 20¿Jatumtzun ta' ju aj nabl? ¿Jatumtzun ta' ju xnak'tzal ti'j ley? ¿Jatumtzun ta' ju xjal at nim tnabl in yolin ti'j ju at tuj tk'ijlalil ja'lo? ¿Myapetzun ma tz'oc cynabl xjal te tzcaj tu'n Dios? 21Porque nim te Dios tnabl, cyja'tzun cub t-ximan Dios tu'n mi'n tel cynic' xjal ti'j tu'n cyex cynabl; cyja'tzun mas ba'n ela tuj twitz Dios tu'n cyclet ke ocslal tu'nju yol in pacbanjtz, masque minti' ttxolil nne'l tuj cywitz mastl xjal. 22Porque ke xjal judiy in cykanin tu'n cybant ke señ, ex ke xjal grieg in che jyon cynabl; 23atzun keye in xi kpacba'ne tbi Crist aju jaw k'o'n twitz crus. Ke xjal judiy mya ba'n nne'la ju yol lu tuj cywitz, atzun ke txkantl xjal mya judiy ke, minti' ttxolil yol lu nne'la tuj cywitz; 24atzun tuj cywitz keju txco'maj ke tu'n Dios, ke xjal judiy ax icx ke xjal grieg, ate Crist tipumal Dios ex tnabl Dios. 25Porque aju cub t-ximan Dios mas at tnabl twitz cynabl xjal, masque in cyma'n xjal ka minti' ttxolil yol; ex aju tbincha Dios at mas tipun cywitz xjal, masque in cyma'n xjal ka minti' tipun. 26Porque cyximancuye erman, tej cytxconjtze mya nim at cyxole at cynabl ic tza'n in cyma'n xjal, ex mya nim at cyxole at cyipun, ex mya nim at cyxole cyc'wa'l xjal ma' cyoclen; 27nok o'cx e jaw t-sc'o'n Dios keju minti' cynabl tuj cywitz xjal tu'ntzun ttzaj cych'ixwi keju at cynabl; ex e jaw t-sc'o'n Dios keju minti' cyipun tuj cywitz xjal tu'ntzun ttzaj cych'ixwi keju at cyipun. 28Ex e jaw t-sc'o'n Dios ke tal meba xjal ex keju ic'un ke ex minti' cyajben tuj cywitz xjal, tu'ntzun cyex xo'n keju at cyoclen tuj cywitz, 29tu'ntzun mi a'l jun xjal tu'n tjaw tniman tib twitz Dios. 30Tu'n Dios ma che oc mojba'ne tuc'il Jesucrist, ex ma tzaj k'o'n tnabl Crist ke tu'n Dios, ex nok tu'n Crist ma ko oc k'o'n te tz'aklxix tu'n Dios, ex ma ko el tpa'n tu'n kajben o'cx te, ex ma ko colpet tu'n. 31Cyja'tzun: Alcye taj tu'n tjaw tniman tib, mas ba'n tu'n tjaw tnimsa'n tbi Kajaw, ic tza'n in tma'n tuj Tu'jil.

will be added

X\