1 CRÓNICAS 5

1Ke tcy'ajal Rubén aju nej tcy'ajal Israel, atzun ke jlu: Hanoc, Falú, Hezrón ex Carmi. Axix toc ate Rubén nej c'wa'lbaj, pero naj toclen te nej c'wa'lbaj tu'nju cub tan tuc'il t-xu'jil tman, ex aju oclenj te nej c'wa'lbaj xi k'o'n cye ke tcy'ajal José, aju juntl tcy'ajal Israel. Masque icju, pero te tibajxi, ate Judá oc masxix tipun cywitz ke terman, ex ti'j tiyjil Judá etz jun nejenel; pero aju oclenj te nej c'wa'lbaj te José xi k'o'n. 4Ke tiyjil Joel, atzun ke jlu: Ate Joel tman Semaías, atzunte Semaías tman Gog, atzunte Gog tman Simei, 5atzunte Simei tman Micaía, atzunte Micaía tman Reaía, atzunte Reaía tman Baal, 6ex atzunte Baal tman Beera. Ate Beera aju nejenel cye aj Rubén xi k'i'n pres tu'n Tiglat-pileser aju rey cye aj Asiria. 7Ke terman Beera e oc te nejenel cye junjun c'loj cyiyjil ex cu'x tz'iban cybi tuj libro, ex atzun ke jlu: Jeiel, Zacarías, 8tuc'ix Bela aju tcy'ajal Azaz ex tal tchman Sema aju tcy'ajal Joel. Ate Bela o najan tuj tnam Aroer ex aju ttx'otx' pon baj max tuj tnam Nebo ex tuj tnam Baal-meón. 9Ex o najan tuj tumlal tjawitz k'ij ex pon baj ttx'otx' max ttxa'npun tzkij tx'otx', aju tzkij tx'otx' in tzaj ke' max ttzi nima Éufrates, porque otok chmet nimxix twacẍ tuj tx'otx' Galaad. 10Tuj tk'ijlalil tej tcawin Saúl oc k'oj cyu'n ke tiyjil Rubén cyuc'il aj Agaren, cub cyi'j aj Agaren cyu'n, ex atzun e cub ten ke tiyjil Rubén tuj tumlal tjawitz k'ij tuj tx'otx' Galaad. 11Ke tiyjil Gad, atzun e najan tuj tx'otx' Basán, tibaj cytx'otx' ke aj Rubén, ex pon baj cytx'otx' max tuj tnam Salca. 12At cyaje nejenel cyxol ex atzun ke jlu: Aju tnejel Joel tbi, ex atzunju mas ma' toclen, atzunju tcabin Safán tbi, atzunju toxin Jaanai tbi, ex atzunju tcyajin Safat tbi. 13Ex atzun ke cyerman jlu: Micael, Mesulam, Seba, Jorai, Jacán, Zía ex Heber. Wuk cybaj tu'n tcyakilx ex nejenel ke cye junjun c'loj cyiyjil. 14Atzun ke jlu tcy'ajal Abihail, ate Abihail tcy'ajal Huri, atzunte Huri tcy'ajal Jaroa, atzunte Jaroa tcy'ajal Galaad, atzunte Galaad tcy'ajal Micael, atzunte Micael tcy'ajal Jesisai, atzunte Jesisai tcy'ajal Jahdo, ex atzunte Jahdo tcy'ajal Buz. 15Ate Ahí aju tcy'ajal Abdiel ex tal tchman Guni oc te nejenel cye ke tiyjil. 16Cycyakil ke jlu atzun e najan tuj tx'otx' Galaad, ex tuj tx'otx' Basán, ex cyuj ke aldey ate' tuj, ex cyuj ke cywabl alumaj tuj lugar Sarón tbi, max jatum ponin baj. 17Cycyakil ke jlu cu'x tz'iban cybi tuj libro jatum cu'x tz'ibet cybi cycyakil c'loj cyiyjil tuj tk'ijlalil tej tten Jotam te rey tuj Judá, ex tej tten Jeroboam te rey cyxol aj Israel. 18Ke xinak tiyjil Rubén ex tiyjil Gad cyuc'ix mij tiyjil Manasés cyuw cyc'u'j tuj k'oj, k'i'mlex ke macbil in che ajben tuj k'oj cyu'n tuc'ix spad ex xobl plech, ex xnak'tzamnixix ke wen tu'n cyk'ojin. Attok 44 mil tuc'il wuk syent tuc'il 60 xinak otok bant tu'n cyxi' tuj k'oj. 19Ex e k'ojin cyi'j aj Agaren, cyi'j tiyjil Jetur, cyi'j tiyjil Nafis ex cyi'j tiyjil Nodab, 20ex o tz'onin Dios cyi'j; cub cyi'j aj Agaren cyu'n, cyuc'ix keju mojl cyyol cyuc'il e cub tz'ak ke tuj cyk'ab, porque tej ate'tok tuj k'oj xi cykanin te Dios tu'n cytzaj onin ke tu'n. O onin Dios cyi'j porque oc ke' cyc'u'j ti'j. 21Ex tzaj cyi'n cywacẍ ke aj k'oj cyi'j, tzaj cyi'n 50 mil chej camey tuc'ix cab syent 50 mil ẍne'l ex cab mil chej bur, ex jun syent mil xjal tzaj cyi'n pres. 22Nimcu aj k'oj e cyim, porque ate Dios o onin cyi'j tu'n toc k'oj. Ex axtzun e cyaj ten ke aj Rubén najal cyuj ke lugar lu tejxi tpon tk'ijlalil tej cyxi k'i'n tuj juntl tx'otx' najchak. 23Ke mij tiyjil Manasés e najan tuj tx'otx' tzajni tuj Basán ex ponin baj max tuj Baal-hermón, Senir, ex twi witz Hermón, porque nimcu cybaj. 24Akeju nejenel cye junjun c'loj cyiyjil, atzun ke jlu: Efer, Isi, Eliel, Azriel, Jeremías, Hodavías ex Jahdiel. Cycyakil ke xinak lu cyuwxix cyc'u'j tuj k'oj, najchak pon baj tkanil cyi'j, ex nejenel ke cye junjun c'loj cyiyjil. 25Pero el cypa'n cyib ti'j Tdios cyxe'chel, cyaj cycolin Kman, ex e oc ten c'ulul cywitz ke cydios tnam xjal otok che naj tu'n Dios ex otok che ex tlajo'n cywitz. 26Tu'ntzun jlu oc ten Cydios aj Israel to'yil teju xjal Pul tbi, aju rey te Asiria, ex ax juntl tbi Tiglat-pileser, tu'n cyxi tpresin ke aj Rubén ex ke aj Gad, cyuc'ix mij tiyjil Manasés, ex tu'n cyxi ti'n tu'n cypon cyuj ke lugar Halah, Habor, Hara ex ttzi nima Gozán, ex axtzun ate'x ja'lo.

will be added

X\