1 CRÓNICAS 4

1Ke tcy'ajal Judá, atzun ke jlu: Fares, Hezrón, Carmi, Hur ex Sobal. 2Ate Sobal tman Reaía, atzunte Reaía tman Jahat ex atzunte Jahat tman Ahumai tuc'ix Lahad. Atzun ke jlu cyiyjil ke aj Zoratit. 3Ke tcy'ajal Etam, atzun ke jlu: Jezreel, Isma, ex Idbas, ex attok jun cyanb ke jlu, Haze-lelponi tbi. 4Ate Penuel cyxe'chel aj Gedor, ex atzunte Ezer cyxe'chel aj Husa. Atzun ke jlu tiyjil Hur aju nej tal Efrata, aju cyxe'chel ke aj Belén. 5Ate Asur aju tman Tecoa o ten cabe t-xu'jil, Hela tbi jun, ex Naara tbi juntl. 6Ate Naara cytxu' Ahuzam, Hefer, Temeni ex Ahastari. Atzun ke jlu tal Naara. 7Ke tal Hela, atzun ke jlu: Zeret, Jezoar ex Etnán. 8Ate Cos tman Anub ex Zobeba ex ax cyxe'chel ke tiyjil Aharhel, aju tcy'ajal Harum. 9Ate Jabes mas ma' toclen cywitz ke mastl terman. Jabes tbi oc tk'o'n ttxu' porque tma: Ax toc tuc'il nim c'ixc'oj ma tzul itz'j. 10Oc ten Jabes na'l Dios, aju Cydios aj Israel, ex tma: In chin cubsane twitza, Nman, tu'n ttzaj tk'o'na tcy'iwbila wibaje ex jun ntx'otx'e ma'xix; chin tonintza ex chin tcloma teju mya ba'n, tu'ntzun mi'n nc'isbisanjtze, chi Jabes. Ex tzaj tk'o'n Dios tcyakil aju otok txi tkanin. 11Ate Quelub aju terman Súa tman Mehir; atzunte Mehir tman Estón; 12atzunte Estón cyman Bet-rafa, Paseah ex Tehina, aju cub k'onte ju tnam Nahas. Atzun ke jlu najlke tuj tnam Reca. 13Ke tcy'ajal Cenaz, atzun ke jlu: Otoniel ex Seraías. Ke tcy'ajal Otoniel, atzun ke jlu: Hatat 14ex Meonotai aju tman Ofra. Ate Seraías tman Joab aju cyxe'chel ke xjal najlke tuj chk'ajlaj Carisim; atzun tbi chk'ajlaj oc cyk'o'n tu'nju at cynabl tu'n cybinchante tcyakil txcaj ak'untl tbanilxix. 15Ke tcy'ajal Caleb aju tcy'ajal Jefone, atzun ke jlu: Iru, Ela ex Naam. Ate Ela tman Cenaz. 16Ke tcy'ajal Jahalel, atzun ke jlu: Zif, Zifa, Tirías ex Asareel. 17Ke tcy'ajal Esdras, atzun ke jlu: Jeter, Mered, Efer ex Jalón. Ate Mered o moje' tuc'il Bitia aju tme'jel Rey Faraón, ex atzun ke cyc'wa'l jlu: María, Samai ex Isba. Ate Isba tman Estemoa. Ax icx cnet juntl t-xu'jil Mered cyxol ke tiyjil Judá, ex atzun ttxu' Jared aju tman Gedor, ex ax ttxu' Heber aju tman Soco ex ax ttxu' Jecutiel aju tman Zanoa. 19Ke tal t-xu'jil Hodías aju tanb Naham, aju tman Keila, atzun ke jlu: Dalia aju aj Garmit, ex Estemoa aju aj Maacatey. 20Ke tcy'ajal Simón, atzun ke jlu: Amnón, Rina, Ben-hanán ex Tilón. Ke tcy'ajal Isi, atzun ke jlu: Zohet ex Benzohet. 21Ke tiyjil Sela aju tcy'ajal Judá, atzun ke jlu: Er tbi jun, aju tman Leca, ex Laada tbi juntl, aju tman Maresa, cyuc'ix junjuntl c'loj tiyjil in che ak'nan ti'j xbalun lino tuj Bet-asbea, 22Joacim tbi juntl ex akeju najlketok tuj Cozeba; Joás tbi juntl ex Saraf tbi juntl, akeju e jaw moje' cyuc'il ke xu'j aj Moab ex e pon meltz'aj juntl maj tuj Belén, ic tza'n in tma'n tuj ojtxi tx'olbaben ti'j. 23Atzun ke jlu binchal xar ke; najlketok tuj Netaim ex tuj Gedera, ex in che ajbentok te rey. 24Ke tcy'ajal Simeón atzun ke jlu: Nemuel, Jamín, Jarib, Zera ex Saúl. 25Ate Saúl tman Salum; atzunte Salum tman Mibsam, ex atzunte Mibsam tman Misma. 26Ate Misma tman Hamuel, atzunte Hamuel tman Zacur, ex atzunte Zacur tman Simei. 27Ate Simei o tzaj kaklaj tcy'ajal ex kak tme'jel, atzun ke mastl terman mya nim cyc'wa'l o tzaj, cyja'tzun ke tiyjil Simeón minti' e chmet-xix ic tza'n ke tiyjil Judá. 28Atzun najlketok cyuj ke tnam Beerseba, Molada, Hazar-sual, 29Bilha, Ezem, Tolad, 30Betuel, Horma, Siclag, 31Bet-marcabot, Hazar-susim, Bet-birai ex Saaraim. Atzun ke tnam lu etzanx cyu'n tej ttzyet tcawin David. 32Ex attok jwe'tl tnam tzyu'n cyu'n, atzun ke jlu: Etam, Aín, Rimón, Toquén ex Asán, 33cyuc'ix ke aldey ate' cyi'jele, ex ponin baj max tuj tnam Baalat. Atzun ke lugar lu jatum e najan ex atzun cybi ke cyxe'chel. 34Atzun cybi junjun nejenel jlu: Mesobab, Jamlec, Josías aju tcy'ajal Amasías, 35tuc'ix Joel ex Jehú aju tcy'ajal Josibías, (ate Josibías tcy'ajal Seraías, ex atzunte Seraías tcy'ajal Asiel;) 36tuc'ix Elioenai, Jaacoba, Jesohaía, Asaías, Adiel, Jesimiel, Benaía, 37ex Ziza. (Ate Ziza tcy'ajal Sifi, atzunte Sifi tcy'ajal Alón, atzunte Alón tcy'ajal Jedaías, atzunte Jedaías, tcy'ajal Simri, atzunte Simri tcy'ajal Semaías.) 38Akeju ma jaw cybi lu, atzun ke nejenel cye junjun c'loj cyiyjil. Como o chmet nimxix cyiyjil, 39cyja'tzun e pon jyolte cywa cyẍne'l max ttxa'n tnam Gedor, tuj tumlal tjawitz k'ij te chk'ajlaj, 40ex atzun cnet tbanil c'ul cyu'n ma chixin, puro cha'x ex at nim, ex matij twitz tx'otx', segur ta', ex puro ba'n tten. Ex atzun e najan ke tiyjil Cam ojtxi ma chixin. 41Pero tuj tk'ijlalil tej tten Ezequías te rey tuj Judá, e ul keju ma jaw cybi ex cub cybyo'n ke tiyjil Cam ex cub cyxitun ke cyja, ex atzun ke e cyaj ten najal tuj cylugar, porque attok cywa ke cyẍne'l tuj. 42Ax icx attok jwe' syentl xinak ax tiyjil Simeón ke, e je'x tuj tiwitz tx'otx' Seir, ex atzun ke nejenel cye jlu: Pelatías, Nearías, Refaías ex Uziel, tcy'ajal Isi ke, 43ex cub cybyo'n ke tiyjil Amalec, akeju otok che cyaj ank'in. Atxixtzun cyponlen najal ma chixin ex ax ate'x ja'lo.

will be added

X\