1 CRÓNICAS 28

1Octzun tchmo'n David tuj Jerusalén cycyakil ke aj sanjelal cyxol aj Israel ex atzun ke jlu: Ke nejenel cye cycyakil c'loj cyiyjil aj Israel, ke nejenel cye junjun c'loj soldad akeju in che ajben te rey, ke nejenel at jun milchak soldad tuj cycwent ex ke nejenel at jun syentchak soldad tuj cycwent, ke mayordom cwentil tcyakil ttx'otx' rey cyuc'ix ke twacẍ ex cytx'otx' ke tcy'ajal, ke xjal mas ma' cyoclen ttxlaj rey ex cycyakil ke soldad at nim cyipun ex cyuw cyc'u'j tuj k'oj. 2Atzunte David cub we' ex tma cyja': Chin cybintze akeye wermaniye ex nxjalile: Ximantok wu'ne tu'n tjaw nbincha'ne jun ja jatum tu'n tcub ten aju cax c'ubl tley Dios tu'ntzun mi'n tyucch, ex atzunju lugar lu jatum tu'n tcub ten tk'ukbil Kdios. Otok bant tten tcyakil wu'ne tu'n tjaw nbincha'ne ja lu, 3pero tzaj tma'n Dios weye cyja': Mya aya cjawil binchante jun ja te weye, porque nim k'oj o tz'oc tu'na ex nim xjal o che cub tbyo'na tuj k'oj. 4Masque icju, ate Kman aju Cydios aj Israel ma jaw sc'onte weye cyxol cycyakil tc'wa'l nmane tu'n woque te cyrey aj Israel te jumajx. Ate Kman ma jaw sc'onte cye tiyjil Judá tu'n cycawin, ex cyxol tiyjil Judá ma jaw t-sc'o'n Kman ke tcy'ajal nmane, ex cyxol tcy'ajal nmane, ma chin jaw t-sc'o'n Kman tu'n woque te rey cyibaj cycyakil aj Israel. 5O tzaj tk'o'n Kman ela' ncy'ajale, ex cyxol ke jlu ma jaw t-sc'o'n ncy'ajale Salomón tu'n tcub ke' tuj tk'ukbil Kman tu'n tcawin cyibaj aj Israel. 6Ax icx o tma Kman weye: Aju tcy'ajala Salomón, atzunju cjawil binchante jun njaye cyuc'ix ke ttxa'n tpe'n, porque ma jaw nsc'o'ne tu'n toc te ncy'ajale ex atzun weye chin oquele te tman, 7ex te jumajx ccyuwsetel tcawbil wu'ne, ka cucx ma tz'oc tilil tu'n tu'n cyjapun ke nmandamyente ex ke nleye tu'n, ic tza'n in bant tu'n tuj tk'ijlalil ja'lo. 8Ja'lotzun twitz Kdios aju in binte ke, ex cywitze cycyakile akeye aj Israel akeju etzan tu'n, cxel ncyuwsa'ne cyeye: Tz'oc tililx cyu'ne tu'n cyjapun cycyakil tmandamyent Kman cyu'ne, aju Cydiose, tu'ntzun cucx tu'n toc te cyeye aju tbanil tx'otx' lu, ex tu'ntzun tcyaj cyk'o'ne te cyetzbil cyc'wa'le te jumajx. 9Ex atzun teya ncy'ajal Salomón, tz'elx tnic'a ti'j Ndiose, akine tmana, ex tz'ajbena te tu'n tcyakil tanmiya ex tu'n tcyakil tc'u'ja, porque ate Kman in baj tque'yin tuj cyanmi xjal ex nne'l tnic' ti'j nok alcyex cyximbetz. Cyja'tzun, ka ma jyona ti'j, cnetel tu'na, pero ka ma tz'el tpa'n tiba ti'j, bi'x c'elel ic'una tu'n te jumajx. 10K'onc tcwenta ti'j, ate Kman ma jaw sc'onte teya tu'n tjaw tbincha'na jun nintz ja tu'n tajben te tja. Cyja'tzun k'onc tipuna ex tzyuma ak'untl, chi David te Salomón. 11Xitzun tk'o'n David te Salomón aju tcy'ajal ke yec'bil tza'n tten tu'n ttenba twitz tja Dios, ex tza'n tu'n ttenba ke mastl ja, ex ke ja te c'ubl ke ti'xti, ex tza'n tu'n ttenba ke tal cwart te tcabin col, ex ke tal cwart te tujxi ex ju Lugar Mas Xjanxix jatum tu'n tnajset cyil xjal. 12Ax icx xi tk'o'n David jun yec'bil ti'j tcyakilju otok cub t-ximan tu'n tbant cyi'j ke ttxa'n tpe'n tja Dios, ex cyi'j ke tal cwart ti'jele tja Dios, ex cyi'j ke tal cwart tu'n cyajben te c'ubl oyaj ti'j tja Dios ex cyi'j ke tal cwart tu'n cyajben te c'ubl tcyakil oyaj xjansa'maj. 13Ax icx xi tma'n David tza'n tten tu'n cybaj pa't ke pal ex ke aj Leví tuj c'lojin, tu'n cyak'nan ti'j tcyakil ak'untl in bant tuj tja Dios, ex cyi'j cycyakil ke macbil in che ajben tuj c'ulbil tuj tja Kman. 14Ax icx xi tk'o'n nimxix tajlal k'an pwak ex sak pwak tu'n cybant cycyakil ke macbil k'an pwak ex sak pwak cytx'otx'il, akeju at tu'n cyajben tuj c'ulbil, 15ex tu'n tajben tu'n cybant ke tcubil candil ex ke candil, tza'nx keju k'an pwak ttx'otx'il ax icx keju sak pwak ttx'otx'il, xi tk'o'n cabalxix ic tza'nx talil junjun cye tu'n tbant. 16Ax icx xi tk'o'n k'an pwak ex sak pwak tu'n cybant ke mes jatum tu'n cycub txolbet ke pan twitz Kman, at k'an pwak cytx'otx'il ex at sak pwak cytx'otx'il. 17Ax icx xi tk'o'n k'an pwak tu'n cybant ke jacbil twitz chibj ti'j, cyuc'ix ke lak matij ex ke xar, ax icx xi tk'o'n k'an pwak ex sak pwak tu'n cybant ke vas ti'j; xi tk'o'n ic tza'nx cyalil teyle junjun tu'n tbant. 18Ax icx xi tk'o'n k'an pwak tbanilxix tu'n tbant altar jatum tu'n tcub patit storac, ax icx xi tk'o'n k'an pwak tu'n tbaj binchet jun carwaj cye ke tilbilal querubín, akeju lic'un tten cyxic' tibaj cax jatum c'u'n tley Dios. 19Tcyakil jlu tu'n Kman cub ttz'iban ex ma tzaj tk'o'n nnable tu'n tel nnic'e ti'j tza'n tten tu'n tbant tcyakil ak'untl, ic tza'nxju yec'bil o tzaj k'o'n weye, chi David. 20Ax icx xi tma'n David te Salomón aju tcy'ajal: Tenx tipuna ex cyuwx tc'u'ja, ex tzyuma ak'untl. Mi'n tzaj baj tc'u'ja ex mi'n xoba, porque ctel Kman Dios tuc'ila. Mlay cyaj k'o'na ex mlay cyaj colina tu'n, ocxi tbaj bant tcyakil ak'untl ti'j tja Kman. 21Ex lutzun ke c'loj pal lu ex ke aj Leví cyk'on cyib tu'n cyak'nan ti'j tja Kman; tuj tcyakil ak'untl ate' ke onil teya ex jacu che ak'nan tuc'ila nok tu'n cyex cygan, ex atlex cynabl ti'j tcyakil txcaj ak'untl; ex ke nejenel ex cycyakil xjal cbantel cyu'n aju cxel tma'na cye, chi David.

will be added

X\