1 CRÓNICAS 26

1Ax icx e baj pa'n tuj c'lojin ke xk'ukil ttzi ja, ex atzun ke jlu: Cyxol ke tiyjil Coré jaw sc'o'n Meselemías aju tcy'ajal Coré, atzunte Coré tcy'ajal Asaf. 2Ke tcy'ajal Meselemías atzun ke jlu: Zacarías aju tnejel c'wa'l, Jediael aju tcabin, Zebadías aju toxin, Jatniel aju tcyajin, 3Elam aju tjwe'yin, Johanán aju tkakin ex Elioenai aju twukin. 4Ke tcy'ajal Obed-edom atzun ke jlu: Semaías aju nej c'wa'l, Jozabad aju tcabin, Joa aju toxin, Sacar aju tcyajin, Natanael aju tjwe'yin, 5Amiel aju tkakin, Isacar aju twukin, Peultai aju twajxakin; porque cub cy'iwla'n Obed-edom tu'n Dios, cyja'tzun tzaj nim tc'wa'l. 6Ate Semaías aju tcy'ajal Obed-edom tzaj cabe tcy'ajal, ex e oc te nejenel cye ke cyerman, porque ke xinak lu attok nimxix cyipun ex cynabl. 7Ex ke tcy'ajal Semaías atzun ke jlu: Otni, Rafael, Obed, Elzabad, Eliú ex Samaquías; ke xinak lu at nimxix cyipun. 8Cycyakil ke jlu tiyjil Obed-edom ke; ake cyuc'ix ke cycy'ajal ex ke cyerman at nimxix cyipun ex cynabl tu'n cyajben tuj ak'untl. 62 cybaj tiyjil Obed-edom tu'n cycyakilx. 9Ke tcy'ajal Meselemías cyuc'ix ke terman, wajxaklaj cybaj tu'n tcyakil ex at nim cynabl ti'j ak'untl. 10Ke tcy'ajal Hosa aju tiyjil Merari, atzun ke jlu: Simri aju nejenel, masque mya nej c'wa'ltok, pero oc k'o'n toclen te tnejel tu'n tman, 11Hilcías tbi tcabin, Tebalías tbi toxin, Zacarías tbi tcyajin. Ke tc'wa'l Hosa cyuc'ix ke terman oxlaj cybet tu'n tcyakil. 12Atzun ke jlu e baj pa'n tuj c'lojin tu'n cyxk'ukin ttzi tja Kman. Tza'nx ke nejenel, ax icx ke cyerman, tuj cycwent cyaj tu'n cyajben tuj tja Kman. 13Jawtzun cyi'n swert cyxolx, tza'nx ke cu'xun icx ke tij xjal, tu'ntzun cylonte alcye c'loj cyiyjil tu'n tten ttzi' junjun pwert. 14Oc tz'ak swert ti'j Selemías tu'n t-xk'ukin ttzi ja tcub tuj tumlal tjawitz k'ij, atzunte Zacarías aju ba'n k'onte cynabl xjal ex aju ba'n tmod, ex ax tcy'ajal Selemías, oc tz'ak swert ti'j tu'n t-xk'ukin ttzi ja te jawni. 15Atzunte Obed-edom oc tz'ak swert ti'j tu'n t-xk'ukin ttzi ja tcub cubni; atzun ke tcy'ajal tuj cycwent cyaj ten tu'n cyxk'ukin ke ja c'ubl ti'xti tuj tja Dios. 16Atzunte Supim ex Hosa oc tz'ak swert cyi'j tu'n cyxk'ukin ttzi ja tcub tumlal telex k'ij, jatum ta' ttzi ja Salequet tbi, jatum in jax be twitz jawl. Ke ak'untl lu cyja'tzun e tenba: 17Tcyakil k'ij in che cub ten kak xk'ukil ttzi ja aju tcub tumlal tjawitz k'ij, ex cyaje in che cub ten ttzi ja tcub jawni, ex cyaje ttzi ja tcub cubni, ex cabe in che xk'ukin ti'j ju c'ubl twitz awal. 18Tuj ttxa'n pe'n aju tcub tumlal telex k'ij, attok cyaje in che cwentin tuj be ex cabe ax in che xk'ukin tuj ja. 19Cyja'tzun tten baj sipan ak'untl cye ke xk'ukil ttzi ja, akeju tiyjil Coré ex Merari. 20Ex cyxol tiyjil Leví ate Ahías toctok te cwentil cye k'inumabl ate' tuj tja Kman ex ke c'ubl te oyaj xjansamaj. 21Atzun cyxol ke tcy'ajal Laadán, akeju elni cyiyjil ti'j Gersón, ate Jehiel nejenel cye, 22ex ke tcy'ajal Jehiel cyuc'ix ke tcy'ajal Zetam ex ke tcy'ajal Joel aju cyerman, tuj cycwent tcyajsa'ntok ke k'inumabl tuj tja Kman. 23Atzun cyxol ke tiyjil Amram, Izhar, Hebrón ex Uziel, 24oc k'o'n Sebuel tu'n tcwentin cyi'j ke k'inumabl. Ate Sebuel tiyjil Gersón aju tcy'ajal Moisés. 25Atzun ke terman Sebuel, akeju tiyjil Eliezer, atzun ke jlu: Rehabías aju tcy'ajal Eliezer, Jesaías aju tcy'ajal Rehabías, Joram aju tcy'ajal Jesaías, Zicri aju tcy'ajal Joram, ex Selomit aju tcy'ajal Zicri. 26Ate Selomit cyuc'ix ke terman, tuj cycwent tcyajsa'ntok cycyakil ke c'ubl macbil xjansa'maj, akeju otok tz'el tpa'n David ex otok txi tk'o'n te Kman, ex aju otok xi cyk'o'n ke nejenel cye junjun c'loj cyiyjil, cyuc'ix ke nejenel cye soldad, akeju at jun milchak soldad tuj cycwent ex keju at jun syentchak soldad tuj cycwent, ax icx ke mastl nejenel cye soldad. 27Akeju ti'xti lu otok tz'el cyi'n cye ke aj k'oj cyi'j oc nno'c k'oj, ex otok txi cyk'o'n tu'n tajben ti'j tja Kman. 28Ax icx axtok ta' tcyakil ti'xti aju otok tz'el tpa'n Samuel aju ba'n nabin tu'n Dios ex otok txi tk'o'n te Kman, tuc'ix aju otok txi cyk'o'n Saúl aju tcy'ajal Cis, Abner aju tcy'ajal Ner, ex Joab aju tal Sarvia. Cycyakil ke ti'xti xjansa'maj tcyajsa'ntok tuj tcwent Selomit ex tuj cycwent ke terman. 29Ex atzun cyxol ke tiyjil Izhar jaw sc'o'n Quenanías ex ke tcy'ajal tu'n cyoc te ajcal ex te jwes cyxol aj Israel. 30Atzun cyxol tiyjil Hebrón jaw sc'o'n Hasabías cyuc'ix ke terman; tu'n cycyakil japun jun mil tuc'il wuk syent cybaj at cyipun ex at cynabl, e oc k'o'n tu'n cycawin cyibaj aj Israel, akeju ate' tuj tumlal telex k'ij te nima Jordán. Tuj cycwent ta' tu'n tbant tcyakil tak'un Kman, ax icx tak'un rey. 31Tej otok bant 40 abk'i ttzyetlen tcawin David, baj jyet alcyechak ke tiyjil Hebrón, ex cyxol cycyakil e cnet ke xinak at cyipun ex at cynabl najlke tuj Jazer, aju at tuj tx'otx' Galaad. Aju nejenel cye tiyjil Hebrón, atzun Jerías, 32atzun ke terman at nim cyipun ex at cynabl, japun jun cyajlal tu'n cycyakil te cab mil tuc'il wuk syent cybaj, nejenel ke cye junjun c'loj cyiyjil. Atzunte rey David e oc tk'o'n tu'n cycawin cyibaj ke tiyjil Rubén, ax icx cyibaj tiyjil Gad, cyuc'ix mij tiyjil Manasés. Tuj cycwent ta' tu'n tbant tcyakil tak'un Kman, ax icx tak'un rey.

will be added

X\