1 CRÓNICAS 25

1Ate David cyuc'ix ke nejenel cye soldad jaw cysc'o'n ke tcy'ajal Asaf, ke tcy'ajal Hemán ex ke tcy'ajal Jedutún, tu'n cyajben tuj c'ulbil, tu'n ttzaj cyma'n tkanil aju in tzaj tma'n Dios cye tuc'il tk'ajk'ajel cywi chnab arpa, quitar ex ke tal lak c'uxbil. Atzun cybi ke xinak jlu, akeju in che ajben tuj ak'untl: 2Cyxol ke tcy'ajal Asaf, atzun ke jlu: Zacur, José, Netanías ex Asarela. Aju nejenel cye, atzun Asaf aju cyman, aju oc k'o'n toclen tu'n rey tu'n ttzaj tma'n tkanil aju in tzaj tma'n Dios te. 3Ke tcy'ajal Jedutún kak cybet ex atzun ke jlu: Gedalías, Zeri, Jesaías, Simei, Hasabías ex Matatías. Aju nejenel cye, atzun Jedutún aju cyman, aju in tzaj tma'n tkanil aju in tzaj tma'n Dios te, tuc'il tk'ajk'ajel twi arpa te ak'bil chjonte te Dios ex tu'n tjaw nimset tbi. 4Ke tcy'ajal Hemán atzun ke jlu: Buquías, Matanías, Uziel, Sebuel, Jeremot, Hananías, Hanani, Eliata, Gidalti, Romanti-ezer, Josbecasa, Maloti, Hotir ex Mahaziot, 5cycyakil ke jlu tcy'ajal Hemán ke. Ate Hemán ba'n nabin tu'n Dios ex in ajben ttxlaj rey, tzaj tk'o'n Dios cyajlaj tcy'ajal ex oxe tme'jel, ic tza'n otok tzaj ttziyan te tu'ntzun tten mas nim tipun. 6Oc cybitzan tuj c'ulbil tuj tja Kman tuc'ix ju tmoj cybitz ke tal lak c'uxbil, ke chnab arpa ex quitar. Aju nejenel cye, atzun Hemán, aju cyman. Ate Asaf, Jedutún ex Hemán in cybincha'n aju in tma'n rey cye. 7Aju cyajlal keju at cynabl tu'n cychimban, cyuc'ix ke cyerman xnak'tzamnike tu'n cybitzan tbi Kman, attok cab syent tuc'il 88 cybet. 8Ex jaw cyi'n swert cyi'j cycyakil tu'n cyak'nan tuj c'lojin, tza'nx ke tij xjal ax icx ke cu'xun, tza'nx ke xnak'tzal, icx keju ma in baj cyxnak'tzan cyib. 9Tej tjaw cyi'n swert cyi'j e cyajtzun ten ke c'loj tuj ttxolil, xi ke' tuj tnejel ex pon baj tuj 24 c'loj, ex akeju nejenel cye, atzun ke jlu: José, Gedalías, Zacur, Izri, Netanías, Buquías, Jesarela, Jesahías, Matanías, Simei, Azareel, Hasabías, Subael, Matatías, Jeremot, Hananías, Josbecasa, Hanani, Maloti, Eleata, Hotir, Gidalti, Mahaziot, ex Romanti-ezer. Ex teylex te junjun cye cyuc'ix ke cyerman ex ke cyc'wa'l, cablaj cybet tuj junjun c'loj.

will be added

X\