1 CRÓNICAS 24

1Ax icx ke tiyjil Aarón e baj pa'n tuj c'lojin. Ke tcy'ajal Aarón atzun ke jlu: Nadab, Abiú, Eleazar ex Itamar. 2Pero nej e cyim Nadab ex Abiú twitz cyman, ex minti' jun cycy'ajal tzaj; tu'ntzun jlu ate Eleazar ex Itamar e cyaj ten te pal. 3E cub tpa'n David ke tiyjil Aarón tuj c'lojin tu'ntzun cyak'nan ti'j ak'untl at tuj cycwent; tuc'ix Sadoc aju tiyjil Eleazar ex Ahimelec aju tiyjil Itamar e onin tuc'il tu'n tbant jlu. 4El cynic' ti'j, akeju xinak tiyjil Eleazar mas nim cyajlal cywitz ke tiyjil Itamar, cyja'tzun e bje'l cypa'n ex e cyaj ten kaklaj nejenel cyxol tiyjil Eleazar, ex wajxak nejenel cyxol tiyjil Itamar. 5Jaw swert cyi'j tu'n cybaj pa'n tuj c'lojin, tza'nx cyxol ke tiyjil Eleazar ax icx cyxol ke tiyjil Itamar, porque at ke at cyoclen tuj tja Dios, ex at ke at cyoclen tu'n cyajben te Dios. 6Ate Semaías aju aj tz'ibal ex tcy'ajal Natanael, aju tiyjil Leví, cub tz'ibante cybi twitz rey, cywitz ke nejenel, twitz pal Sadoc, twitz Ahimelec aju tcy'ajal Abiatar, cywitz ke nejenel te junjun c'loj pal, ex cywitz aj Leví. Jaw swert cyi'j jtoj tu'n tajben junjun c'loj. Nej jaw swert ti'j jun c'loj tiyjil Eleazar ex te tibajxi jaw swert ti'j jun c'loj tiyjil Itamar, ex iclex e tenba tejxi cyex baj cycyakil c'loj. 7Tej tjaw cyi'n swert cyi'j, e cyajtzun ten ke c'loj tuj ttxolil, xi ke' tuj tnejel ex pon baj tuj 24 c'loj, ex akeju nejenel cye, atzun ke jlu: Joiarib, Jedaías, Harim, Seorim, Malquías, Mijamín, Cos, Abías, Jesúa, Secanías, Eliasib, Jaquim, Hupa, Jesebeab, Bilga, Imer, Hezir, Afses, Petaías, Hezequiel, Jaquín, Gamul, Delaía, ex Maazías. 19Cyja'tzun tten e baj pa'n ke tuj c'lojin tu'n cyajben tuj tja Kman, ic tza'nx otok cyaj tma'n Kman aju Cydios aj Israel te Aarón aju ktzan cyxe'chel. 20Ke mastl c'loj tiyjil Leví ex ke nejenel cye atzun ke jlu: Subael aju tiyjil Amram, ex Jehedías aju tiyjil Subael; 21Isías aju nejenel cyi'j tiyjil Rehabías; 22Selomot aju tiyjil Izhar; Jahat aju tiyjil Selomot. 23Ke tcy'ajal Hebrón atzun ke jlu: Jerías tbi tnejel, Amarías tbi tcabin, Jahziel tbi toxin, Jecamán tbi tcyajin. 24Ax icx Micaía aju tcy'ajal Uziel; Samir aju tcy'ajal Micaía; 25Isías aju terman Micaía ex Zacarías aju tcy'ajal Isías. 26Akeju tiyjil Merari atzun ke jlu: Jaazías tbi tcy'ajal; atzun ke tcy'ajal Jaazías atzun ke jlu: Mahli, Musi, Soahm, Zacur ex Ibri. 28Ke tcy'ajal Mahli atzun ke jlu: Eleazar ex Cis. Ate Eleazar minti' tcy'ajal tzaj; aju tcy'ajal Cis atzun Jerameel. 30Ke tcy'ajal Musi atzun ke jlu: Mahli, Edar ex Jerimot. Atzun ke tiyjil Leví jlu, ic tza'nx junjun c'loj cyiyjil. 31Ax icx cye e baj pa'n ke tuj swert, ic tza'nx otok che tenba ke cyerman akeju tiyjil Aarón. A jlu o bant twitz rey David, twitz Sadoc, twitz Ahimelec, cywitz ke nejenel te junjun c'loj pal, ex cywitz ke nejenel te junjun c'loj aj Leví. Cycyakil xi k'o'n cyoclen, tza'nx ke tzicbaj ax icx ke tz'inbaj.

will be added

X\