1 CRÓNICAS 23

1Tej otok ten David nim abk'i ex otok tijin wen, octzun tk'o'n toclen Salomón aju tcy'ajal tu'n toc te rey cye aj Israel. 2Ex e oc tchmo'n cycyakil ke nejenel cye aj Israel, ax icx ke pal ex ke aj Leví, 3ex e baj ajla'n ke aj Leví, akeju otok japun 30 abk'i cyu'n ex ka mastl, ex japun jun cyajlal tu'n tcyakil te 38 mil xinak. 4Cyxol ke jlu e el pa'n 24 mil tu'n cyajben tuj ak'untl tuj tja Kman, kak mil tu'n cyoc te ma' cyoclen ex te jwes, 5cyaje mil tu'n cyoc ten cwentil ttzi tja Dios, ex juntl cyaje mil tu'n tjaw cynimsa'n tbi Kman ex tu'n cyajben ke chnab cyu'n, akeju otok che baj chmet tu'n David tu'n cyajben te nimbil tbi Kman. 6E bajtzun pa'n ke tu'n David tuj ox c'loj, ic tza'n cyiyjil ox tcy'ajal Leví, ex atzun ke jlu: Gersón, Coat ex Merari. 7Ke tcy'ajal Gersón, atzun ke jlu: Laadán ex Simei. 8Ke tcy'ajal Laadán ox cybet ex atzun ke jlu: Jehiel tbi tnejel, Zetam tbi tcabin ex Joel tbi toxin. 9Ex ke tcy'ajal Simei ax icx ox cybet ex atzun ke jlu: Selomit, Haziel ex Harán. Atzun ke jlu e oc te nejenel cyxol ke tiyjil Laadán. 10Ke tcy'ajal Simei cyaje cybet ex atzun ke jlu: Jahat, Ziza, Jeús ex Bería. 11Aju tnejel, atzun Jahat, ex atzun tcabin, atzun Ziza, pero ate Jeús ex Bería, mya nim cyc'wa'l tzaj, cyja'tzun e je'x ajla'n mer ic tza'n jun ja xjal ke. 12Ke tcy'ajal Coat cyaje cybet ex atzun ke jlu: Amram, Izhar, Hebrón ex Uziel. 13Ke tcy'ajal Amram, atzun ke jlu: Aarón ex Moisés. Ate Aarón jaw sc'o'n tu'n Dios tu'n t-xi tk'o'n ke oyaj xjansa'maj, tu'n tcub tpatun storac twitz Kman, tu'n tajben te, ex cucx tu'n tkanin cy'iwbil cyibaj xjal. Aju ak'untl lu, tu'n Aarón tu'n tbant ex cyu'n tiyjil te jumajx. 14Atzunte Moisés aju xinak sc'o'maj tu'n Dios, cyuc'ix ke tcy'ajal, ax xi k'i'n cyajlal cyuc'il ke tiyjil Leví. 15Ke tcy'ajal Moisés atzun ke jlu: Gersón ex Eliezer. 16Ate Sebuel tcy'ajal Gersón ex nejenel cyxol terman. 17Ate Eliezer junx tcy'ajal tzaj, atzun Rehabías, ex minti' mastl tc'wa'l tzaj, atzunte Rehabías nim tcy'ajal tzaj. 18Ate Selomit tcy'ajal Izhar ex nejenel cyxol terman. 19Ke tcy'ajal Hebrón atzun ke jlu: Jeraías tbi tnejel, Amarías tbi tcabin, Jahaziel tbi toxin, ex Jecamán tbi tcyajin. 20Ke tcy'ajal Uziel atzun ke jlu: Micaías tbi tnejel, ex Isías tbi tcabin. 21Ke tcy'ajal Merari atzun ke jlu: Mahli ex Musi. Ke tcy'ajal Mahli atzun ke jlu: Eleazar ex Cis. 22Ate Eleazar cyim minti' jun tcy'ajal tzaj, nok o'cx ke tme'jel e tzaj, ex e baj najan cyuc'il ke tcy'ajal Cis aju terman cyman. 23Ke tcy'ajal Musi ox cybet ex atzun ke jlu: Mahli, Edar ex Jeremot. 24Cycyakil ke jlu tiyjil Leví ke. Tej tjaw cyajlal, cu'x tz'iban cybi keju otok japun winkin ex ka mastl abk'i cyu'n. Nejenel ke te junjun c'loj cyiyjil, ex in che ak'nantok tuj tja Kman. 25Otok tma David: Tu'n Kman aju Cydios aj Israel ma cub cyi'j aj k'oj, tu'ntzun cyten ke xjal etzan tu'n tuj txubtxaj, ex axtzun tu'n tnajan te jumajx tuj Jerusalén. 26Cyja'tzun ya mlay tzic' cylak'ba'n aj Leví aju ja xbalun te mojbabl tibil tuc'il Dios, ax icx ke macbil in che ajben tuj c'ulbil, chi David. 27Cyja'tzun, ic tza'nx ju yol cyaj tma'n David tej na'nxtok tcyim, jaw jun cyajlal aj Leví, akeju otok japun winkin ex ka mastl abk'i cyu'n, 28ex e cyaj ten tjak' cycawbil pal akeju tiyjil Aarón, tu'n tbant ak'untl cyu'n tuj tja Kman, cyuj ke ttxa'n pe'n ex cyuj ke tal cwart, ex tu'n tbaj cytx'jo'n cyi'j ke macbil xjansa'maj ke, ax icx ti'j mastl ak'untl tuj tja Kman. 29Tuj cycwent ta' ke pan xjansa'maj, akeju in che cub k'o'n tuj txolin, ax icx aju arin tu'n tajben te oyaj, ex ke tal pan xaxj minti' t-samel cyuj tu'n tjaw mal cyc'u'j, ex ke oyaj tzk'ajsa'maj tuj sartén ex tuj xc'o'n. Ax icx cycyakil txcaj malbil ex echbil tuj cycwent ta' cycyakil. 30Ax icx il ti'j tu'n cyten tuj tja Kman cycyakil k'ij te prim ex te kale, tu'n t-xi cyk'o'n chjonte te Kman ex tu'n tjaw cynimsa'n tbi, 31ex tu'n t-xi cyk'o'n te Kman ke oyaj patun in che cub cyuj ke k'ij te ojlabl, cyuj ke nink'ij, oc ttzaj que'yin juntl ac'aj xjaw, ex cyuj ke nink'ij nim cyoclen; cucx tu'n cyajben te Kman ic tza'n cyajlal ex tumel cyajni bant ti'j. 32Ex tuj cycwent ta' tu'n toc cycwentin ja xbalun te mojbabl tibil tuc'il Dios, ax icx ju Lugar Xjan ex tu'n cyonin cye ke cyerman akeju tcy'ajal Aarón ti'j ak'untl tuj tja Kman.

will be added

X\