1 CRÓNICAS 22

1Cyja'tzun tma David: Atzun cbantel tja Dios tzalu, tuc'ix ju altar jatum tu'n tcub cypatun aj Israel cyoyaj. 2Te tibajxi jlu xi tma'n David tu'n toc cychmon cyib ke stranjer xjal, akeju najlke cyxol aj Israel, ex e oc tk'o'n te xpe'lil abj, tu'n tajben tu'n tjaw binchet tja Dios. 3Ax icx baj tchmo'n David txkan c'uxbil nimxix tu'n cybaj clawsyit ke tlamel, ex tu'n cybaj mojbet tz'lom, ax icx baj tchmo'n nim k'an c'uxbil minti' bant tmalonjtz, 4tuc'ix nimxix tze' wi'ten, porque ke xjal najlke tuj Sidón ex tuj Tiro otok tzul cyi'n nimcu tze' wi'ten tuc'il David. 5Ex tma David: Aju tja Kman cjawil binchet, il ti'j tu'n toc tbanilxix que'yin ex minti' juntl cpol ic tza'n te, ex aju ncy'ajale Salomón ma cu'xunx ta', na'nx toc tnabl. Tu'ntzun jlu, bi'x cyjel nchmo'ne tcyakil aju c'ajbel tu'n tbant tja Dios, chi David. Cyja'tzun, tej na'nxtok tcyim David, cyaj tchmo'n tcyakil aju at tu'n tajben. 6Tzajtzun ttxco'n David aju tcy'ajal, Salomón tbi, ex xi tcyuwsa'n te tu'n tjaw tbincha'n tja Kman aju Cydios aj Israel. 7Xitzun tma'n te cyja': Ncy'ajal, ximantok wu'ne tu'n tjaw nbincha'ne jun ja te nimbil te Kman aju Ndiose. 8Pero tzaj tma'n Kman weye: Ma wile nimcu xjal o tz'el cychc'el tu'na, ex nimcu k'oj o tz'oc tu'na; tu'ntzun jlu mya aya cjawil binchante jun ja tu'n tjaw nimsa'n nbiye tuj. 9Pero tzul itz'j jun tcy'ajala, ex oc tcawin tcy'ajala lu, minti' k'oj c'oquel, porque wu'ne ctel tuj txubtxaj ex mlay che tzaj ke aj k'oj k'ojlel ti'j; cyja'tzun Salomón c'oquel tbi k'a lu, ex tuj tk'ijlalil oc tcawin che tel aj Israel tuj txubtxaj ex tuj tzalajbil. 10Ate Salomón cjawil binchante jun ja te nimbil weye. Ate c'oquel te nc'wa'le, ex atzun weye chin oquele te tman, ex cyxol ke tiyjil cucx che jawil nsc'o'ne ke rey tu'n cycawin cyibaj aj Israel, chi Kman. 11Ja'lotzun ncy'ajal, awt Kman Dios ten tuc'ila ex onin teya tu'n tjaw binchet tja Dios aju Tdiosa, ic tza'nx o tzaj ttziyan tu'n tbinchanteya. 12Ex awt Kman tzaj k'onte tojtzkibla ex tnabla oc tcawina cyibaj aj Israel, tu'ntzun tjapun tu'na aju tley Kman aju Tdiosa. 13Tcyakil ba'n c'elel te teya ka ma tz'oc tilil tu'na tu'n cyjapun ke tley ex ke t-xnak'tzbil, akeju e tzaj tma'n Kman te Moisés tu'n tajben cye aj Israel. Tenx tipuna ex cyuwx tc'u'ja, mi'n xoba ex mi'n tzaj baj tc'u'ja. 14Bintza, ma tz'oc tilil wu'ne tu'n tbaj nchmo'ne aju c'ajbel ti'j tja Kman; ma chmet 75 mil quintal k'an pwak wu'ne, wuk syent tuc'il 50 mil quintal sak pwak, ex nimxix k'an c'uxbil, ex c'uxbil mlay bant tmalonjtz. Ax icx ma baj nchmo'ne tze' ex abj, ex ba'n tu'n toc ttz'aksa'na mastl. 15Ex nimcu ak'nal at tuc'ila, ke xjal xpe'lil abj, ke albañil, ke calpinter, ex nimcu xinak at cynabl tu'n cybinchante tcyakil txcaj ak'untl 16ti'j k'an pwak, ti'j sak pwak, ti'j k'an c'uxbil, ex ti'j c'uxbil. Cyja'tzun, tzyuma ak'untl ex awt Kman onil teya, chi David te Salomón. 17Ax icx xi tma'n David cye cycyakil nejenel cye aj Israel tu'n cyonin tuc'il Salomón aju tcy'ajal, ex xi tma'n cye: 18A Kman at cyuc'ile, ya minti'tl in che k'ojin ke mastl nasyon cyi'je, porque a Kman o onin weye tu'n tcub cyi'j wu'ne ex cycyakil keju najlke cyuj o che cyaj tk'o'n Kman tjak' ncawbile, ex akeju tnam lu ma che cyaj ten tjak' tcawbil Kman ex tjak' cycawbil xjal etzan tu'n. 19Cyja'tzun, ja'lo cynimanxe Kman aju Cydiose tu'n tcyakil cyc'u'je; cybincham cytene tu'n tjaw cybincha'ne tja Kman tu'ntzun ttzaj k'it ju cax c'ubl tley ex ke macbil xjansa'maj, tu'n cyul k'it tuj ja aju cjawil binchet te nimbil te Kman.

will be added

X\