1 CRÓNICAS 21

1Oc ten Satanás k'ojlel cyi'j aj Israel ex oc ten to'yil te David tu'n tjaw ti'n jun cyajlal aj Israel. 2Xitzun tma'n David te Joab ex cye ke nejenel cye soldad: —Cyxi'ye ex cyi'n jawe cyajlal aj Israel, tzajx ke' cyu'ne tuj Beerseba ex tu'n tpon baj max tuj Dan, ex cyi'ntztzune tajlal wuc'ile tu'ntzun nbinteye jte' xjal at. 3Atzunte Joab xi ttzak'we'n: —Tu'nwt Kman chmet cyajlal ke xjal etzan tu'n, chmet-xwit jun syent maj ic tza'n at ja'lo. ¿Myapetzun cycyakil xjal lu tmajena, Tat Rey? ¿Titzun tajben jlu teya, Tat Rey? ¿Ex tiku'n in tzaj ti'na jun mya ba'n cyibaj aj Israel? Chi Joab. 4Masque icju, pero ate rey oc tk'o'n il ti'j tu'n tbinchet jlu, cyja'tzun xi' Joab, baj tbetin tuj tcyakil cytx'otx' aj Israel ex ultzun meltz'aj tuj Jerusalén. 5Xi tk'o'n Joab tajlal tuc'il David, ex japun jun cyajlal aj Israel te jun miyón ex jun syent mil xinak at cynabl tuj k'oj, ex cyaje syent tuc'il 70 mil xjal tuj Judá at cynabl tu'n cyk'ojin. 6Ex cyxol ke jlu minti' jaw cyajlal ke tiyjil Leví, ax icx ke tiyjil Benjamín, porque mya ba'n e'la tuj twitz Joab aju yol tzaj tma'n rey. 7Ax icx te Dios mya ba'n e'la tcyakil jlu tuj twitz, cyja'tzun tzaj tk'o'n jun castiw cyibaj aj Israel. 8Xitzun tma'n David te Dios: —Ma nbinchaye jun il ma'xix tu'nju ma nbinchaye jlu. Pero ja'lo in chin cubsane twitza Nman, tu'n tcub tnajsana wile akine tmajena, porque ma nbinchaye jlu ic tza'n jun xjal minti' tnabl, chi David. 9Tzajtzun tma'n Kman te Gad aju t-sanjel in ajben ttxlaj David: 10Txi'ya tuc'il David ex k'manxa te: Ox castiw cbel nk'o'ne twitza, sc'o'n jawa jun cyxol alcye tu'n nbinchanteye ti'ja, chi Kman, ma tzaj tma'n weye, chicuya te David. 11Xi'tzun Gad tuc'il David ex xi tma'n te: —Chitzun Kman ma tma cyja': 12Sc'o'n jawa jun cyxol oxe jlu: Ox abk'i we'yaj, ex ka ox xjaw tu'n tcub cyi'je cyu'n aj k'oj cyi'je ex tu'n cycub byo'ne tu'n cyspad, ex ka ox k'ij tu'n ttzaj tx'u'j yabil tu'n t-spad Kman tuj cytanmiye oc ttzaj t-anjel byol cye xjal tuj tcyakil cytx'otx' aj Israel. Ximana ti'j alcye ctzajel ttzak'we'na, tu'ntzun t-xi nma'ne teju ma tzaj samante weye, chi Gad. 13Xi ttzak'we'n David te Gad: —Atine tuj jun nintz bis, pero ja'lo maslo ba'n tu'n tcub ncastiwoye tu'n Kman, porque aju t-xtalbil Kman nimxix, ex mya tu'n ncub tz'ake tuj cyk'ab xjal. 14Tzajtzun t-sama'n Kman tx'u'j yabil cyibaj aj Israel ex bi'x e cyim 70 mil xjal. 15Ex tzaj t-sama'n Dios jun anjel tu'n cycyim ke xjal ate' tuj tnam Jerusalén. Pero tej otok tzyet tu'n cycyim, tzaj tque'yin Kman ex tzaj nim tbis ti'j ju mya ba'n otok bant, xitzun tmayo'n Kman aju anjel in byontok cye xjal, chi cyja': Acux jlu, mi'n cub tbyo'na mastl xjal, chi Dios te anjel. Tujxtzun or lu, tcubsa'ntok t-anjel Kman ttxlaj lugar jatum nne'l bujet ttxc'omil triw tu'n Ornán aju aj Jebusey. 16Jawtzun tque'yin David twitz cya'j ex o til jun t-anjel Kman wa'l twitz cya'j, tuc'ix jun spad tocx tuj tk'ab, otok jatz ti'n tuj tjayil ex xi tyec'un tibaj tnam Jerusalén. Atzunte David cyuc'ix ke tij xjal ate' ttxlaj toctok cyxbalun ch'i'x twitz, e cub ẍmeje' tejxi tpon tacl tibaj cywitz twitz tx'otx', 17ex xitzun tma'n David te Dios: —Wu'ne xi nma'ne tu'n tjaw cyajlal xjal. Akine ma chin binchan il ex ma nbinchaye mya ba'n, pero ke xjal lu minti' jun mya ba'n ma cybincha. Aya Nman Dios, in chin cubsane twitza, k'oncuya castiw lu wibaje ex cyibaj keju ate' tuj njaye, ex mi'n tzaj tk'o'na tx'u'j yabil cyibaj ke xjal etzan tu'na. 18Xitzun tma'n t-anjel Kman te Gad cyja': K'manxa te David tu'n tjaw tbincha'n jun altar te Kman tuj lugar jatum nne'l ttxc'omil triw tu'n Ornán aju aj Jebusey. 19Xi'tzun David binchalte aju otok tzaj tma'n Gad te, ic tza'nx otok tzaj tma'n Kman. 20Nne'ltok ttxc'omil triw tu'n Ornán, ex tej tajtz tque'yin, o til aju anjel; atzun keju cyaje tcy'ajal ate'tok tuc'il xi cyewan cyib. 21Tejtzun tpon lak'e' David jatum ta' Ornán, o ilwaj David tu'n, etztzun tuj lugar jatum nne'l ttxc'omil triw tu'n, cub ẍmeje' twitz David ex pon tacl tibaj twitz max twitz tx'otx'. 22Xitzun tma'n David te Ornán: —K'ontza te weye aju lugar jatum nne'l ttxc'omil triw tu'na, tu'n tjaw nbincha'ne jun altar te Kman tuj, tu'ntzun tmayet tx'u'j yabil cyi'j tnam xjal, ex c'ayintza te weye ic tza'nx twi' cabal. 23Xi ttzak'we'n Ornán te David: —K'inxa, aya Tat Rey, ex binchama alcye ba'n tuj twitza, jacu che'x nk'o'ne ke tor tu'n tcub tpatuna te oyaj, ex atzun ke tze' in che ajben tu'n tel ttxc'omil triw jacu che ajben te si', ex atzun twitz triw jacu tz'ajben te oyaj. Tcyakil jlu jacu txi nk'o'ne teya, chi Ornán. 24Atzunte rey David xi ttzak'we'n te Ornán: —Chjonteya tu'n jlu, pero il ti'j tu'n ttzaj nlak'o'ne teya ic tza'nx twi' cabalxix, porque mlay tz'el wi'ne nok cucx aju at teya, tu'n t-xi nk'o'ne te Kman, ex mlay txi nk'o'ne jun chojbil te Kman aju mya ncwesteye. 25Cyja'tzun tten, xi tchjo'n David te Ornán kak syent k'an pwak, twi' ju lugar lu. 26Ex atzun jaw tbincha'n David jun altar te Kman, e cubtzun tpatun ke oyaj patun in che cub, ex xi tk'o'n ke chojbil te mojbabl tibil. Octzun ten cubsal twitz Kman, ex tzaj ttzak'we'n Kman tu'n tkan k'ak' tzaj twitz cya'j, ex cubil jucpaj tibaj oyaj tcub tibaj altar. 27Atzunte Kman tzaj tma'n te anjel tu'n tcu'x tc'u'n t-spad tuj tjayil. 28Tejtzun tque'yinte David ka otok tzaj tzak'we'n tu'n Kman tuj lugar jatum nne'l ttxc'omil triw tu'n Ornán aju aj Jebusey, atzun xi tk'o'n ke chojbil. 29Aju ja xbalun te mojbabl tibil tuc'il Dios, aju otok jaw tbincha'n Moisés tuj tzkij tx'otx', tuc'ix ju altar jatum in che cub patit ke oyaj, max ate'tok tuj lugar te c'ulbil tuj tnam Gabaón, 30pero minti' xi' David tuj Gabaón tu'n t-xi tkanin te Dios, porque otok tzaj nim t-xobil tu'nju otok til ju spad k'i'n tu'n t-anjel Kman.

will be added

X\