1 CRÓNICAS 20

1Tejtzun tel jun abk'i, tuj tk'ijlalil oc in che etz ke rey k'ojlel ic tza'nx cycostumr, xi' Joab cyuc'ix nimcu soldad tuc'il, ex cub cyxitun ke cytanmi aj Amón, ex baj cytxolban cyib ke t-soldad ti'j tnam Rabá, oc tzokpaj ti'j ex bi'x baj t-xitun tcyakil. Atzunte David ax otok cyaj ten tuj Jerusalén. 2Tejtzun tpon David, el ti'n aju coron tjax tuj twi' ju rey cye aj Rabá. Aju coron lu k'an pwak ex toctok ke tal abj tbanil ti'j; aju talil 75 libr, ex jaxtzun cyk'o'n tuj twi' David. Ax icx etz ti'n David nimcu macbil tbanilxix ex wi'yilxix tuj tnam lu, 3cyuc'ix ke xjal otok che cyaj ank'in tuj tnam, ex e oc tk'o'n ak'nal cyi'j sier, cyi'j c'uxbil tu'n tel ttxc'omil triw, ex cyi'j ke si'wbil c'uxbil. Iclex o tbincha David cyi'j cycyakil tnam cye aj Amón. Te tibajxi ajtz meltz'aj tu'n tul tuj Jerusalén cyuc'ix cycyakil ke t-soldad. 4Te tibajxi jlu oc juntl k'oj cyuc'il aj Filistey tuj tnam Gezer. Atzun cub byo'n Sipai tu'n Sibecai aju aj Husa. Atzun elni tiyjil Sipai ti'j cyiyjil ke xjal ma' cywa'l; cyja'tzun tten cub cyi'j aj Filistey. 5Ex tuj juntl k'oj oc cyuc'il aj Filistey, cub byo'n ju xjal Lahmi tu'n Elhanán aju tcy'ajal Jair; ate Lahmi terman Goliat aju aj Gat, ex aju tlans k'i'n, matij tkan ex ma' tc'itz. 6Oc juntl k'oj tuj tnam Gat. Attok jun xinak ma' twa'l, kakchak tal tk'ab ti'j junjun tk'ab, ex kakchak tal tkan ti'j junjun tkan, 24 tu'n tcyakil. Ax elni tiyjil ti'j cyiyjil ke xjal ma' cywa'l. 7Ate xinak lu oc ten ic'lelte cye aj Israel, pero cub byo'n tu'n Jonatán aju tcy'ajal Simea, aju terman David. 8Akeju xjal ma' cywa'l lu, tiyjil Refa ke, aju aj Gat, pero e cub byo'n tu'n David ex cyu'n ke t-soldad.

will be added

X\