1 CRÓNICAS 19

1Te tibajxi jlu cyim Nahas aju rey cye aj Amón, ex aju cyaj ten te cawil te t-xel, ax tcy'ajal. 2Ex tma David cyja': Cxel nyec'une nc'ujlalile te Hanún aju tcy'ajal ktzan Nahas, porque aju ktzan tman o ten ba'n wuc'ile, chi David. Xitzun t-sama'n junjun xjal at cyoclen ttxlaj tu'n cyxi' k'ukbalte tc'u'j Hanún tu'nju otok cyim tman, pero tej cypon ke xjal at cyoclen ttxlaj David tuj cytx'otx' aj Amón, 3xi cyma'n ke nejenel cye aj Amón te Hanún cyja': ¿Chipetzuna tat rey ka k'ukbal tc'u'ja ma che tzaj t-sama'n David ke xinak lu ex ka tu'n ttzaj na't ktzan tmana? ¿Myapetzun ma che ul ke xjal lu tuc'ila nok que'yilte alcye tumel tu'n cyoctz tuj tnam ex tu'n tcub cyxitun? Che chi nejenel. 4Atzunte Hanún xi tma'n tu'n cytzaj tzyu'n ke xjal at cyoclen ttxlaj David ex tu'n tel matzo'n cyxmaltzi', ax icx tu'n tel kesit mij cyxbalun tu'n tjapun max twi cyxix. Te tibajxi jlu e ajtz t-sama'n. 5Tejtzun tpon tkanil tuc'il David ti'j ju otok baj cyi'j ke xinak lu, xi tma'n tu'n cyxi canábaj, porque otok tzaj nim cych'ixwi, ex tu'n t-xi k'ma'n cye tu'n cycyaj ten max tuj Jericó, maxi tu'n cyajtz ocxi tch'iy cyxmaltzi'. 6Eltzun cynic' aj Amón ti'j ka otok tzaj tk'oj David cyi'j, cyja'tzun ate Hanún ex ke aj Amón xi cysama'n wuk syent tuc'il 40 quintal sak pwak cye aj Mesopotamia, cye aj Siria, cye aj Maaca ex cye aj Soba, te twi cyc'u'j carwaj tu'n cyajben tuj k'oj, ex te twi cyc'u'j soldad in che bet cyibaj chej, tu'ntzun cytzaj onil cye aj Amón. 7Banttzun ti'j tu'n cytzaj 32 mil carwaj in che ajben tuj k'oj, ax icx aju rey tuj Maaca cyuc'ix ke t-soldad. Ake jlu cub cychmon cyib twitz tnam Medeba. Ax icx ke aj Amón e je'tz tuj cytanmi ex oc cychmon cyib tu'ntzun ttzyet k'oj cyu'n. 8Pero o tbi David jlu, cyja'tzun xi t-sama'n David Joab cyuc'ix cycyakil soldad. 9E je'tztzun ke aj Amón, ex baj cytxolban cyib tu'n tbant cyten tuj k'oj nikayin ttzi tpwertil tnam, atzun ke rey otok che tzaj tuj mastl tnam max e cyaj ten tuj cojbil. 10Tejtzun tque'yinte Joab cyja'tok cyoc tzokpaj ke aj k'oj cyi'j, at cyja' cytzaj cywitz, ex at cyja' cytzaj cyi'jxi, e jawtzun t-sc'o'n ke soldad mas at cynabl tu'n cyk'ojin cyxol aj Israel, bajtzun cybinchan cyib tu'n cyoc tzokpaj cyi'j aj Siria. 11Atzun ke mastl soldad e je'x tk'o'n tuj tcwent Abisai aju terman, tu'n cyoc tzokpaj cyi'j aj Amón. 12Xitzun tma'n Joab te Abisai: Ka ma cub wi'je cyu'n aj Siria, bix txi'ya onil wuc'ile, ex katzun ma cub ti'ja cyu'n aj Amón, jacu chinxe onil tuc'ila. 13Cyuwx tc'u'ja ex kk'onc kipun tu'n tclet ktanmi ex tu'n cyclet tnam xjal etzan tu'n Dios. Ex bant-xwit tu'n Kman aju ba'n tuj twitz. 14Xi'tzun Joab cyuc'ix ke t-soldad tu'n cyoc tzokpaj cyi'j aj Siria, atzun cye aj Siria e je'l ok cywitz. 15Tejtzun cylonte aj Amón ka otok che el ok ke aj Siria, ax icx cye e el ok twitz Abisai aju terman Joab, ex axtzun e ocx ok tuj tnam. Atzunte Joab aj meltz'aj tu'n tpon tuj Jerusalén. 16Tejtzun cylonte aj Siria ka otok cub cyi'j cyu'n aj Israel, xitzun cysama'n ke sanjel tu'n cyxi k'ibaj ke aj Siria, akeju ate' jlajxi nima Éufrates, ex aju nejenel cye, atzun Sofac aju nejenel cye t-soldad Hadad-ezer. 17Pon tkanil jlu tuc'il David; cyja'tzun e oc tchmo'n cycyakil aj Israel, e jic'xtzun tuj nima Jordán ex e pon jatum ate' ke aj Siria, bajtzun ttxolba'n David ke t-soldad tu'n toc k'oj cyu'n, ex tzyettzun k'oj cyu'n aj Siria cyi'j aj Israel. 18Pero e el ok aj Siria cywitz aj Israel, ex cub tbyo'n David wuk mil xinak aj Siria ate'jx cyuj carwaj in che ajben tuj k'oj, ex 40 mil soldad in che bet tu'n cykan; ax icx cub tbyo'n David Sofac aju nejenel cye soldad aj Siria. 19Tej cylonte ke xjal uc'in tu'n Hadad-ezer ka otok cub cyi'j cyu'n aj Israel, bant ti'j jun cyyol tuc'il David ex e cyaj ten tjak' tcawbil. Atxixtzun tuj k'ij lu, minti'tl o cyajbe aj Siria tu'n cyonin cyuc'il aj Amón.

will be added

X\