1 CRÓNICAS 17

1Tej otok pon bant rey David tuj tja, xi tma'n te Natán aju t-sanjel Dios: —Bintza, akine najl kine tuj jun ja puro tbanil tze' wi'ten, atzunju cax c'ubl tley Dios tocxsa'n tuj jun ja xbalun. 2Atzunte Natán xi ttzak'we'n: —Binchama tcyakil ic tza'nx ma cub t-ximana, porque a Dios tuc'ila. 3Pero tujx konic'an lu, tzaj tma'n Dios te Natán cyja': 4Txi'ya tuc'il nmajene David ex k'manxa te: Chitzun Kman in tma'n teya: Mya aya cjawil binchante jun njaye tu'n ntene tuj. 5Atxix tuj k'ij tej cyetz wi'ne aj Israel tuj Ejipt, ex cucx ja'lo, mi jun maj ma chin tene tuj jun ja tbanil; nok o'cx ma chin tene tuj ja xbalun ex nok ma chin betje'ye. 6Atxix ojtxi o chin bete cyuc'il aj Israel, oc nk'o'ne ke nejenel cyxol tu'n cycawin cyibaj, pero mi jun maj o txi nma'ne cye tu'n tjaw cybincha'n jun ja te c'ulbil weye, aju puro tbanil tze' wi'ten. 7Cyja'tzun, k'manxa te nmajene David: Akine Dios aju Tajaw Tcyakil in xi nma'ne jlu te: Ma tz'el wi'ne tu'n mi'n tpastorintla cyi'j ẍne'l tuj cojbil, tu'n toca te nejenel cye aj Israel, akeju etzan wu'ne, 8ma chin bete junx tuc'ila nok alcyex lugar jatum ma tzic'a tuj; ax icx o che cub baj nbyo'ne ke aj k'oj, akeju e oc tzokpaj ti'ja, ex c'elel tkanila wu'ne tu'n cybinte xjal ka ma' toclena, ic tza'n ke xjal ma' cyoclen ate' tuj tcyakil twitz tx'otx'. 9Ax icx o baj nbincha'ne jun lugar jatum tu'n cynajan aj Israel tuj, akeju etzan wu'ne, ex ax ma che cub nk'o'ne tu'n cynajan tuj cyex cytx'otx', tu'ntzun mi jun tu'n tlabt cyi'j, ex mlay che yajlanjtz juntl maj cyu'n ke xjal binchal mya ba'n, ic tza'n nej, 10tej cyoc nk'o'ne ke nejenel tu'n cycawin cyibaj ke xjal etzan wu'ne, akeju aj Israel. Wu'ne cbel cyi'j cycyakil aj k'oj ti'ja ex che cyjel ten tjak' tcawbila. Ax icx cxel nma'ne teya, cchmetel cybaj ke tiyjila wu'ne. 11Octzun ttijina ex oc tcyima, akine chin oquel k'onte jun tcy'ajala te rey, ex ccyuwsetel tcawbil wu'ne, 12ex atzunte cjawil binchante jun ja te c'ulbil weye, ex akine chin cyuwsalte tcawbil te jumajx. 13Akine chin oquel te tman ex atzunte c'oquel te nc'wa'le. Ex mlay tz'el npa'ne nc'ujlalile ti'j ic tza'n o bant wu'ne ti'j rey ten nej twitza; 14nok o'cx ccyuwsetel wu'ne tuj njaye te jumajx ex tuj ncawbile, ex cyxol ke tiyjil cucx cjawil nsc'o'ne jun tu'n toc te rey te jumajx, chi Kman, tzaj tma'n te Natán. 15Xi ttx'olba'n Natán tcyakil jlu te David cabalxix ic tza'nx otok til ex otok tbi. 16Atzunte rey David ocx yolil tuc'il Kman ex tma cyja': Nman Dios, ¿alcyetzun kine ex ti cyoclen ke wiyjile, tu'nju ma tzaj tk'o'na woclene te rey? 17Ex mya ma' ma tz'ela jlu tuj twitza, Nman Dios; ax icx ma tzaj tma'na aju cbajel cyi'j ke wiyjile tuj tk'ijlalil tzul, ka che oquel te rey. Ma chin oc tk'o'na ic tza'n jun xjal ma' toclen. 18¿Alcye mas yol ba'n txi nma'ne teya tu'nju ma chin oc tk'o'na te jun xjal ma' toclen? Porque ba'n tu'na alcye kine, akine tmajena. 19Aya Nman, nok tu'nju at tc'ujlalila wi'je, ex ic tza'nx tajbila, ma tbinchaya tcyakil tbinchbena ma'xix cyxilen tu'n tel nic'baj cyi'j. 20Aya Nman Dios, mi a'l juntl ic tza'n teya, ex mi a'l juntl Dios at, nok o'cx aya, ic tza'n tcyakilju o kbiye ti'ja, 21ex minti' juntl nasyon ic tza'n cye aj Israel, akeju etzan tu'na, porque o'cxcu junx nasyon lu sc'o'maj tu'na tuj tcyakil twitz tx'otx'. Tu'na ma che tzokpet tu'n cyoc te jun tnam etzan tu'na, ex ma tz'el tkanil cyi'j ke tbinchbena nim cyipumal ex ma'xix cyxilen. Tej cyetz tcolpi'na tuj Ejipt e ic' tlajo'na ke mastl nasyon cywitz, 22porque tu'na ma che oc ke aj Israel te jun tnam etzan tu'na te jumajx; atzun teya, Nman, ma tz'oca te Cydios. 23Cyja'tzun Nman Dios, cyuwsama ju yol ma tzaj ttziyana weye ex cye ke wiyjile che ul itz'j te tibajxi, ex japunx tu'na aju ma tmaya. 24Ex aju yol tzaj ttziyana, cuchiwt tu'n tjapun tu'na, ex aju tbiya cuchiwt cucx tu'n tjaw nimset te jumajx ex tu'n tk'manjtz cyja': Ate Kman aju Tajaw Tcyakil, atzun Cydios aj Israel, ex atzunju axix toc Cydios aj Israel. Ex cuchiwt tu'n mi'n cycub yupj ke wiyjile che ul itz'j te tibajxi. 25Aya Nman Dios, ma tzaj tma'na weye ka che cyuwsetel ke wiyjile tu'na tu'n cyoc te rey; tu'ntzun jlu, masque tmajena kine, ma nnimarin wibe tu'n ncubsane twitza. 26Ja'lo Nman, aya Dios ma tzaj ttziyana tu'n ttzaj tk'o'na nimxix t-xtalbila weye, 27cuchiwt ba'n ma tz'ela tuj twitza tu'n tcub tcy'iwla'na ke wiyjile che oquel te rey te tibajxi, ex cucx tu'n cyten twitza. Aya Nman, ma che cub tcy'iwla'na, ex cucx che cbel cy'iwla'n te jumajx.

will be added

X\