1 Cyja'tzun tten tzaj cyi'n cax c'ubl tley Dios, ex ocx cyk'o'n tuj ja xbalun, aju otok jaw tbincha'n David. Te tibajxi jlu xi cyk'o'n oyaj patun in cub, ex xi cyk'o'n chojbil te mojbabl tibil tuc'il Kman. 2 Tejtzun tbaj tk'o'n David ke chojbil, e cub tcy'iwla'n ke tnam xjal tuj tbi Kman, 3 ex xi tk'o'n cye cycyakil aj Israel, teyle te junjun, tza'nx ke xinak, ax icx ke xu'j, jun pan, jun piẍ chibj ex jun piẍ cylo' twitz uva tzkijsa'maj. 4 Atzunte David oc tk'o'n cyoclen junjun aj Leví tu'n cyajben twitz cax c'ubl tley Dios, tu'n ttzaj cyna'n tbi Kman, tu'n t-xi cyk'o'n chjonte te ex tu'n tjaw cynimsa'n tbi Cydios aj Israel. 5 Aju nejenel, atzun Asaf, atzun tcabin nejenel, atzun Zacarías, ex lepchix Jeiel, Semiramot, Jehiel, Matatías, Eliab, Benaía, Obed-edom, ex Jeiel; atzun ke jlu at cychinb quitar ex arpa. Atzunte Asaf nno'c k'ajtzante ke tal lak c'uxbil, 6 ex atzun ke pal Benaía, ex Jahaziel, cucxtok toc cyk'ajtza'n chun twitz cax c'ubl tley Dios. 7 Tujxtzun k'ij lu, xi tma'n David tnejel maj te Asaf ex cye mastl tuc'il tu'n t-xi cybitzan aju bitz lu te ak'bil chjonte te Kman. 8 Cyk'onxe chjonte te Kman ex che cubsane twitz. Cyk'manxe ke tbinchben cye tnam. 9 Che bitzane bitz te nimbil te ex che yoline cyi'j ke tbinchben ma' cyxilen. 10 Che tzalajxe ti'j tbi Dios Xjan, tzalajxwit cyanmi keju in che jyon ti'j Kman. 11 Ckaninxe onbil te Kman aju at tipumal; che lak'exe tuc'il, ex ax che tene. 12 Cyna'ntze ke tbinchben ma' cyxilen ex nim cyipumal, ex cyna'ntze ke tley tzaj tma'n. 13 Akeye tiyjil Israel aju tmajen Dios, ex akeye tc'wa'l Jacob, sc'o'maj keye tu'n, 14 atzun Kman jlu aju Kdios, ex a in cawin tibaj tcyakil twitz tx'otx'. 15 Masque ma tzic' jun mil c'loj cyiyjil xjal, pero mlay tzic' tna'l tu'n aju tyol cyaj bant ti'j cyuc'il. 16 Mlay tzic' tna'l tu'n aju tyol cyaj bant ti'j tuc'il Abraham, aju tyol axix toc xi ttziyan te Isaac, 17 ex cyaj tcyuwsa'n ju yol lu te Jacob, tu'n toc ic tza'n jun ley, ex cyaj tcyuwsa'n te jumajx te Israel. 18 Chi cyja': Teya cxel nk'o'ne aju tx'otx' Canaán tu'n toc te tetzbila. 19 Mya nim cybaj tej cyten tuj cytx'otx' aj Canaán, stranjer xjal ke, 20 nok in che betje' tuj cytx'otx' junjun nasyon ex tjak' cycawbil junjun rey, 21 pero minti' xi tk'o'n Dios ambil tu'n cyyajlanjtz cyu'n mastl xjal, nokpe xi tma'n cye rey cyja': 22 Mi'n tz'oc cyk'o'n cyk'abe cyi'j ke xjal sc'o'maj wu'ne, ex mi'n cybinchaye jun mya ba'n cyi'j ke nsanjele. 23 Che bitzane te Kman cycyakile akeye najl twitz tx'otx'; cyk'manxe tcyakil k'ij tkanil colbil tu'n, 24 che yoline ti'j tajwalil ex cyi'j ke tbinchben ma'xix cyxilen, cyk'manxe ke jlu cye cycyakil xjal ex cye cycyakil nasyon, 25 porque ate Kman ma' t-xilen ex ba'n tu'n tjaw nimset tbi. Mas tu'n kxob twitz cywitz ke mastl cydios xjal. 26 Ke tilbilal nno'c cydiosin xjal minti' cyajben, atzunte Kman, a o binchante cya'j, 27 txolin ti'j tu'n tajwalil ex tu'n t-spic'umal; at nim tipumal ex tzalajbil tuj tnajbil. 28 Cycyakile, akeye xjal najl twitz tx'otx', cynimsa'nctze tbi Kman, cynimsa'nctze tbi tu'nju at tipumal ex tajwalil. 29 Cyk'onxe nimbil te Kman tu'nju ma' t-xilen; cyi'ntz cyoyaje ex che lak'etze twitz; che c'ulune twitz Kman tu'nju tbanilxix te ex xjan te. 30 Cycyakile, akeye xjal najl twitz tx'otx', che lu'lune tu'n cyxobile twitz. Tu'n cub tk'o'n t-simyentil tx'otx' tu'n mi'n tyucch. 31 Ba'n tu'n ttzalaj cya'j ex tx'otx'; ba'n tu'n t-xi k'ma'n cyuj ke nasyon: Ate Kman Rey. 32 E tjulin mar tuc'ix tcyakilju at tuj. Ba'n tu'n cytzalaj ke cojbil tuc'ix tcyakilju at cyuj. 33 E cyjaw sch'in ke tze' tuj chc'ul tu'n tzalajbil twitz Kman, aju tzul tu'n tcawin twitz tx'otx'. 34 Cyk'onxe chjonte te Kman, porque puro ba'n te, ex aju tc'ujlalil cucx at te jumajx. 35 Ex cymanxe: Ko tcloma, aya Dios Clol keye. Ko tchmon oca ex k'in ajtza ko'ye cyuj ke nasyon, tu'ntzun tjaw knimsa'ne tbiya xjan ex tu'n tjaw knimsa'na tuc'il tzalajbil. 36 Nimanxwit tbi Kman aju Kdios ako' aj Israel, tuj tcyakil tabk'iyil. Che chi, baj cybitzan. Ex cycyakiltzun tnam xjal xi cytzak'we'n: Icxwitju, ex e octzun ten nimsal tbi Kman. 37 Cyja'tzun cyaj k'o'n Asaf tu'n David cyuc'ix mastl tuc'il, tu'n cyajben tcyakil k'ij twitz cax c'ubl tley Dios, nok alcyex jun ti'xti il ti'j tu'n tbant junjun k'ij, 38 ex cyaj k'o'n Obed-edom tu'n David cyuc'ix mastl tuc'il, 68 cybaj, tu'n cyajben junx cycyakil, tuc'ix juntl Obed-edom aju tcy'ajal Jedutún, ex tuc'ix Hosa. Atzun ke cabe lu e cyaj tk'o'n te cwentil ttzi tja Dios. 39 Ax icx aju pal Sadoc cyuc'ix ke mastl pal in che ajben tuc'il, e cyaj tk'o'n David twitz ja xbalun te Kman, tuj lugar te c'ulbil at tuj Gabaón, 40 tu'ntzun t-xi cyk'o'n te Kman aju oyaj patun in cub tibaj altar tcyakil k'ij, prim ex kale, ic tza'nx tz'ibamaj tuj tley Kman, aju cyaj tma'n tu'n tbant cyu'n aj Israel. 41 Ax icx cyaj tk'o'n David Hemán ex Jedutún cyuc'il, cyuc'ix ke mastl xjal otok che jaw sc'o'n, ex otok jaw t-sch'in cybi, tu'n cybitzan cyja': Cyk'onxe chjonte te Kman, tu'nju at tc'ujlalil te jumajx. 42 Atzun ke jlu in che k'ajtzantok chun ex ke tal lak c'uxbil, cyuc'ix mastl chnab te tmoj cybitz keju in che bitzan tbi Kman. Atzun ke tcy'ajal Jedutún cycyajsa'n ke te cwentil ttzi ja. 43 Te tibajxi jlu cycyakil aj Israel e aj cyja; ax icx te David aj tja tu'n cycub tcy'iwla'n keju ate' tuj tja.
