1 CRÓNICAS 15

1Jaw tbincha'n David ke tja tuj tnam toc tbi Ttanmi David; ax icx baj tbincha'n jun lugar jatum tu'n tcub ten cax c'ubl tley Dios, ex jaw tbincha'n jun ja xbalun tu'n tocx ten cax tuj. 2Atzunte David xi tma'n: O'cx ke aj Leví at cyoclen tu'n t-xi cyi'n cax c'ubl tley Dios, porque ate Kman jaw sc'onte cye tu'n t-xi cyi'n cax c'ubl tley ex tu'n cyajben te te jumajx. 3Octzun tchmo'n David cycyakil aj Israel tuj Jerusalén tu'n tic' lak'bat cax c'ubl tley Dios, tu'n tpon tuj lugar otok baj tbincha'n. 4Ax icx oc tchmo'n David cycyakil tiyjil Aarón ex ke aj Leví. 5Ke tiyjil Coat japun jun syent tuc'il winkin cybaj, ex aju nejenel cye, atzun Uriel. 6Ke tiyjil Merari japun cab syent tuc'il winkin cybaj, ex aju nejenel cye, atzun Asaías. 7Atzun ke tiyjil Gersón japun jun syent tuc'il 30 cybaj, ex aju nejenel cye, atzun Joel. 8Ke tiyjil Elizafán japun cab syent cybaj, ex aju nejenel cye, atzun Semaías. 9Atzun ke tiyjil Hebrón japun 80 cybaj, ex aju nejenel cye, atzun Eliel. 10Atzun ke tiyjil Uziel japun jun syent tuc'il cablaj cybaj, ex aju nejenel cye, atzun Aminadab. 11E tzajtzun ttxco'n David ke pal Sadoc ex Abiatar, ax icx e tzaj ttxco'n junjun aj Leví, ex atzun ke jlu: Uriel, Asaías, Joel, Semaías, Eliel ex Aminadab, 12ex xi tma'n cye: Como akeye nejenel cyxol junjun c'loj tiyjil Leví, cyxjansa'n baj cyibe, cyuc'ix ke cyermaniye, tu'ntzun tic' cylak'ba'ne cax c'ubl tley Kman, aju Kdios aj Israel ko', ex tu'n tul cyi'ne tuj lugar banimaj wu'ne; 13porque tnejel maj mya a keye e tzaj k'inte cax c'ubl tley Dios, cyja'tzun cub kcastiw tu'n Kman, ex tu'nju minti' xi kkanin te alcye mer tumel. 14Bajtzun cyxjansan cyib ke pal ex ke aj Leví tu'ntzun tic' lak'bat cax c'ubl tley Dios, aju Cydios aj Israel. 15Ex atzun ke aj Leví e tzaj k'inte cax c'ubl tley Dios, ex cyk'o'n ke tze' cyuj ke argoy ate'c ttxlaj cax ex tzaj cyikan cax twi cysemil, ic tza'nx otok cyaj tma'n Moisés, aju k'mamaj te tu'n Kman. 16Ax icx xi tma'n David cye nejenel cye aj Leví tu'n tjaw cysc'o'n junjun cyerman ex tu'n t-xi k'ot cyoclen tu'n cybitzan, ex tu'n cychimban cyi'j chnab, quitar, arpa ex ke tal lak c'uxbil, ex tu'n toc cyk'ajtza'n in che tzalaj wen. 17Atzun cye aj Leví oc cyk'o'n toclen Hemán aju tcy'ajal Joel, tuc'ix Asaf aju tcy'ajal Berequías, aju at t-xilen tuc'il Hemán; ex cyxol ke tiyjil Merari oc cyk'o'n toclen Etán aju tcy'ajal Cusaías, ax at t-xilen tuc'il Hemán ex Asaf. 18Ax icx oc k'o'n cyoclen juntl c'loj te onil, ax at cyxilen cyuc'il keju otok che oc k'o'n tnejel, ex atzun ke jlu: Zacarías, Jaaziel, Semiramot, Jehiel, Uni, Eliab, Benaía, Maasías, Matatías, Elifelehu, Micnías, tuc'ix Obed-edom ex Jehiel, akeju xk'ukil ttzi ja. 19Akeju bitzal, Hemán, Asaf ex Etán, tuj cycwent ta' tu'n toc cyk'ajtza'n ke tal lak k'an c'uxbil, 20atzun cye Zacarías, Aziel, Semiramot, Jehiel, Uni, Eliab, Maasías ex Benaía, k'i'mlex quitar cyu'n tu'n toc cyk'ajtza'n tk'ajk'ajel tzinin twi'. 21Atzun cye Matatías, Elifelehu, Micnías, Obed-edom, Jeiel ex Azazías, k'i'ntok arpa cyu'n tu'n toc cyk'ajtza'n tk'ajk'ajel julin twi' te tmoj cybitz keju in che bitzan. 22Atzunte Quenanías nejenel cye ke bitzal aj Leví, ex ax tcyajsa'n te nejenel tu'n tjaw juc'et bitz, porque attok nim tnabl ti'j. 23Atzunte Berequías tuc'ix Elcana, cwentil te cax c'ubl tley Kman. 24Atzun ke pal Sebanías, Josafat, Natanael, Amasai, Zacarías, Benaía ex Eliezer, atzun ke in che k'ajtzan chun twitz cax c'ubl tley Dios. Ax icx cye Obed-edom tuc'ix Jehías, cwentil cax ke. 25Atzunte David cyuc'ix ke tij xjal cyxol aj Israel ex ke nejenel cye jun milchak soldad, e je'x tja Obed-edom tuc'il nim tzalajbil k'ilte cax c'ubl tley Dios. 26Ex tu'nju ate Dios onin cyi'j aj Leví tej tic' lak'bat cax c'ubl tley Dios, cyja'tzun xi cyk'o'n wuk tal tor ex wuk tman ẍne'l te chojbil. 27Ex toctok jun tcapiäy David tbanilxix, ax icx cye cycyakil aj Leví, akeju k'i'n cax cyu'n, ex ke bitzal, ax icx te Quenanías aju nejenel ti'j bitz cyxol ke bitzal; cycyakil ke jlu toc cyxbalun ẍjo'w tbanilxix, ax icx toctok jun tcapiẍay David tbanilxix banin ti'j xbalun lino. 28Cyja'tzun tten xi cyi'n aj Israel cax c'ubl tley Dios, in che sch'in tu'n tzalajbil, ex nno'c cyk'ajtza'n tcach ẍne'l ex chun ex ke tal lak c'uxbil, tuc'ix quitar ex arpa. 29Tejtzun tpon cax c'ubl tley Dios tuj tnam toc tbi Ttanmi David, ate Mical aju tme'jel Saúl etz tque'yin ttzi ventan, ex o til lu rey David in bixantok tuc'il tzalajbil, ex tzajtzun jun ic'bil tuj tanmi ti'j David.

will be added

X\