1 CRÓNICAS 12

1Tej otok tz'el ok David twitz Saúl aju tcy'ajal Cis, at jun c'loj xjal cyuw cyc'u'j tuj k'oj e je'x onil te David tuj tnam Siclag. 2Akeju k'ojlel lu, k'i'ntok ke xobl plech cyu'n, ba'n che xo'n abj tu'n xobl abj, ex ba'n che xo'n plech tu'n xobl plech; ba'n che xo'n tu'n cybank'ab ex tu'n cynayaj. Tiyjil Benjamín ke, at cyxilen tuc'il Saúl, ex atzun ke jlu: 3Ahiezer aju nejenel, tuc'ix Joás; ake jlu tcy'ajal Semaa ke, ex atzun najlke tuj tnam Gabaa; Jeziel ex Pelet, ake jlu tcy'ajal Azmavet ke; Beraca ex Jehú aju aj Anatot, 4Ismaías aju aj Gabaón, a jlu jun cyxol ke 30 xinak cyuw cyc'u'j tuj k'oj, ax nejenel cye; Jeremías, Jahaziel, Johanán, Jozabad aju aj Gedera, 5Eluzai, Jerimot, Bealías, Semarías, Sefatías aju aj Haruf, 6Elcana, Isías, Azareel, Joezer, tuc'ix Jasobeam, tiyjil Coré ke, 7Joela ex Zebadías, ake jlu tcy'ajal Jeroham ke, aju aj Gedor. 8Ax icx aj cyk'on cyib junjun tiyjil Gad tuj tcwent David tej tten tuj lugar te tcolbil tib tuj tzkij tx'otx'. K'ojlel ke, cyuw cyc'u'j tuj k'oj ex xnak'tzamni ke tu'n cyk'ojin, ex k'i'mlex cymakbil tuc'ix cylans; jawni ke, minti' in che xob; ic cyten ic tza'n balun, ex cyuw che kelan cywi' ke witz ic tza'n masat. 9Ex atzun ke jlu: Ezer tbi tnejel, Obadías tbi tcabin, Eliab tbi toxin, 10Mismana tbi tcyajin, Jeremías tbi tjwe'yin, 11Atai tbi tkakin, Eliel tbi twukin, 12Johanán tbi twajxakin, Elzabad tbi tbelajin, 13Jeremías tbi tlajin, ex Macbanai tbi tjunlajin. 14Ake jlu tiyjil Gad ke toctok cyoclen te nejenel cye soldad; aju ch'in toclen toc, jun syent soldad at tuj tcwent, atzunju ma' toclen toc, jun mil soldad at tuj tcwent. 15Atzun ke jlu e ic'x tuj nima Jordán ttzi jbalil tej otok ch'iy nima ex otok baj noj tuj tbe, ex cycyakil keju ate' tuj chk'ajlaj ttzi nima Jordán tuj tjawitz k'ij ex tuj telex k'ij e je'l ok cyu'n. 16Ax icx at junjun xinak cyxol tiyjil Benjamín ex cyxol tiyjil Judá e je'x tu'n taj cyk'on cyib tuc'il David tuj lugar te tcolbil tib. 17Atzunte David ex canul cyi'j ex xi tma'n cye cyja': Ka ma che ule wuc'ile tu'n tten kmojbabl kib ex tu'n cyonine wuc'ile, jacu che c'mete wu'ne tu'n tcyakil wanmiye; katzun ma che ule nok tu'n cyoc meltz'aje wi'je ex tu'n nxi cyk'o'ne tuj cyk'ab aj k'oj wi'je, ex minti' jun wile ma nbinchaye, entons jacu til Cydios ktzan kxe'chel ti c'oquel cyi'je tu'n, chi David. 18Atzunte Amasai aju nejenel cye ke 30 xinak, ul T-xew Dios tuc'il, jaw tk'ajk'ajel twi' cyuwxix ex tma: Teya ko'ye, tat David, ex tuc'ila ato'ye, aya tcy'ajal Isaí. Cuchiwt tu'n ttena tuj txubtxaj, cuchiwt tu'n ttena tuj txubtxaj cyuc'ix keju onil teya, porque aju Tdiosa ma onin teya, chi Amasai. 19Ax icx aj cyk'on cyib junjun tiyjil Manasés tuj tcwent David tej t-xi' cyuc'il aj Filistey tu'n tk'ojin ti'j Saúl. Pero minti' xi' David onil cyuc'il aj Filistey, porque e yolin ke nejenel cye aj Filistey ti'j, ex bant ti'j cyu'n tu'n mi'n t-xi' cyuc'il ex cyma cyja': Jacu bant tz'oc meltz'aj David ki'j, mya yajcu tz'aj tk'on tib tuc'il Saúl aju tpatrón; ex jacu ko naj. 20Akeju xinak tiyjil Manasés aj cyk'on cyib tuj tcwent David tej t-xi' tuj Siclag, atzun ke jlu: Adnas, Jozabad, Jediaiel, Micael, Jozabad, Eliú ex Ziletai; ake jlu nejenel ke cye soldad tiyjil Manasés ex at jun milchak soldad tuj tcwent junjun. 21Atzun ke jlu e onin tuc'il David tej tk'ojin cyi'j txkan elek', porque cycyakil ke jlu cyuw cyc'u'j tuj k'oj ex oc tk'o'n David cyoclen te nejenel cye soldad. 22Ex tcyakil k'ij in che ulxe mastl xinak onil tuc'il David, tejxi tchmet nimxix cyajlal soldad. 23Atzun jun cyajlal soldad jlu k'i'mlex cymacbil in che ajben tuj k'oj, banin cyten tu'n cyk'ojin, ex oc cymojban cyib tuc'il David tuj tnam Hebrón, tu'n toc cyk'o'n David te rey te t-xel Saúl, ic tza'nx otok tma Kman. 24Cyxol tiyjil Judá at kak mil tuc'il wajxak syent xinak k'i'mlex makbil cyu'n, tuc'ix cylans, ex banin cyten tu'n cyk'ojin. 25Cyxol tiyjil Simeón at wuk mil tuc'il jun syent xinak cyuw cyc'u'j tuj k'oj ex banin cyten tu'n cyk'ojin. 26Cyxol tiyjil Leví at cyaje mil tuc'il kak syent cybet. 27Ax icx at ox mil tuc'il wuk syent tiyjil Aarón, ex aju nejenel cye, Joiada tbi, 28tuc'ix Sadoc aju cu'xun cyuw tc'u'j tuj k'oj, tuc'ix 22 nejenel tuc'il, ax terman ke. 29Cyxol tiyjil Benjamín at ox mil aj cyk'on cyib tuj tcwent David, atzun tnimal cybet ax e cyaj ten cytxlaj tiyjil Saúl, porque ax tiyjil Benjamín te Saúl. 30Cyxol tiyjil Efraín at winkin mil tuc'il wajxak syent xinak cyuw cyc'u'j tuj k'oj, ex in che yolin cyxjalil cyi'j ka at-xix cynabl tu'n cyk'ojin. 31Cyxol mij tiyjil Manasés at wajxak laj mil xinak otok che jaw sc'o'n tu'n cyxi' k'olte toclen David tu'n toc te rey. 32Cyxol tiyjil Isacar at cab syent xinak nejenel ke cyi'j cyxjalil, atzun ke xjal lu at cynabl tu'n tel cynic' ti'j tk'ijlalil ex tu'n tel cynic' ti'j alcye tu'n cybinchante aj Israel. 33Cyxol tiyjil Zabulón at 50 mil soldad banin cyten tu'n cyxi' tuj k'oj, ex k'i'mlex tcyakil txcaj macbil cyu'n, akeju in che ajben tuj k'oj, ex cyk'on cyib tu'n cyonin ti'j David. 34Atzun cyxol tiyjil Neftalí at jun mil nejenel cyuc'ix 37 mil xinak k'i'mlex cylans tuc'ix cymakbil in che ajben tuj k'oj. 35Cyxol tiyjil Dan at 28 mil tuc'il kak syent soldad banin cyten tu'n cyk'ojin. 36Cyxol tiyjil Aser at 40 mil soldad at cynabl, banin cyten tu'n cyk'ojin. 37Ax icx cyxol keju ate' jlajxi nima Jordán at jun syent tuc'il winkin mil xinak; at junjun tiyjil Rubén ke, ex junjuntl tiyjil Gad, tuc'ix mijtl tiyjil Manasés, k'i'n tcyakil txcaj macbil cyu'n, akeju in che ajben tuj k'oj. 38Cycyakil soldad lu banin cyten tu'n cyxi' tuj k'oj. Tu'n tcyakil cyanmi e je'x tu'n cypon max tuj tnam Hebrón tu'n toc cyk'o'n toclen David te rey cyibaj cycyakil aj Israel, ax icx cye mastl aj Israel ax cyximbetz tu'n toc David te rey. 39Ox k'ij e ten tuc'il David ma chixin. E wa'n ex e c'an porque ke cyxjalil otok baj cybincha'n tcyakilju at tajben tu'n cywa'n ti'j. 40Ax icx ke cyvesin, cyuc'ix ke tiyjil Isacar, ke tiyjil Zabulón ex ke tiyjil Neftalí, pon cyi'n arin, tuc'ix twitz higo tzkijsa'maj, twitz uva tzkijsa'maj, ta'l twitz uva, ex chibj aseyt. Tcyakil jlu pon cyi'n cyibaj chej bur, camey, mul, ex cyibaj wacẍ. Ax icx pon cyi'n ke wacẍ ex ke ẍne'l te chibj. O chmet nimcu, tu'nju nimxix o che tzalaj ke aj Israel.

will be added

X\