1 CRÓNICAS 10

1E oc tzokpaj aj Filistey k'ojlel cyi'j aj Israel, ex atzun cye aj Israel e el ok cywitz, ex nimcu e cyim twi witz Gilboa. 2Atzun cye aj Filistey e oc lpe' k'ojlel ti'j Saúl ex cyi'j ke tcy'ajal. Cub byo'n Jonatán cyu'n, tuc'ix Abinadab ex Malquisúa. 3Te tibajxi e oc tzokpaj ti'j Saúl, ex ch'ixtok cypon canun ti'j oc cyc'ixbisa'n tu'n cyplech. 4Cyja'tzun xi tma'n Saúl teju onil te: K'in jatz t-spadiya ex chin t-xayuncuya tu'n, tu'ntzun mi'n cyul ke xjal mya nimal Dios wi'je ex tu'n mi'n cyxmayin wi'je. Pero aju onilte minti' cub tuj twitz tu'n tbinchante icju, tu'nju tzaj nim t-xobil ti'j. Jatztzun ti'n Saúl t-spad ex xi tmutzk'in tib tibaj twi t-spad. 5Tejtzun tque'yinte ju onilte ka otok cyim Saúl, ax icx te xi tmutzk'in tib tibaj twi t-spad ex cyim. 6Cyja'tzun, tuj k'ij lu cyim Saúl cyuc'ix ke oxe tcy'ajal ex cycyakil keju at cyoclen ttxlaj. 7Ex tej cylonte cycyakil aj Israel akeju najlke tuj chk'ajlaj, ka otok che el ok ke cysoldad ex otok cyim Saúl cyuc'ix ke tcy'ajal, cyajtzun cycolin ke cytanmi, ax icx cye e je'l ok. E pon aj Filistey cyuj ke cytanmi ex axtzun e cyaj ten najal cyuj. 8Tuj juntl k'ij, tej cyxi' aj Filistey tu'n tel cyi'n tcyakil ti'xti k'i'n cyu'n ke cyimni, cnet Saúl cyu'n, cyuc'ix ke tcy'ajal, cyimni ke twi witz Gilboa. 9Eltzun cyi'n t-xbalun Saúl ex el cytamtz'u'n twi', ex xi cyi'n cyuc'ix ke tmacbil in che ajben tuj k'oj, ex xi cysama'n ke sanjel cyuj cycyakil cytanmi tu'ntzun t-xi k'ot tkanil cye xjal, ax icx cye cydios. 10Ex oc cyyoban ke tmacbil Saúl in che ajben tuj k'oj tuj tja cydios, ex atzunju twi' jaw cyyoban tuj tja juntl cydios Dagón tbi. 11Ex tej cybinte ke aj Jabes, aju tnam at tuj tx'otx' Galaad, ti'j ju otok cybincha aj Filistey ti'j Saúl, 12bant ti'j cyu'n cycyakil xinak cyuw cyc'u'j, tu'n cyxi' k'ilte t-ximlal Saúl ex cyximlal ke tcy'ajal, ex pon cyi'n max tuj tnam Jabes. Atzun cu'x cymaku'n cyximlal t-xe' jun wi' tze' c'ol. Te tibajxi cub cyyo'n wuk k'ij we'yaj. 13Cyja'tzun tten cyim Saúl tu'n tlaj ju mya ba'n otok bant tu'n, o binchan il tu'nju minti' xi tniman tcawbil Kman ex tu'nju xi tkanin t-xjel te jun xu'j ba'n k'ijin, 14ex minti' xi tkanin te Kman. Cyja'tzun cyim Saúl tu'n Kman, ex aju cawbil xi tk'o'n Kman te David aju tcy'ajal Isaí.

will be added

X\