LUKAS 1

1Teofilus se molja, Ampon bannya' oreng se ngoddi noles kalaban tartep parkara pa-ponapa se kadaddiyan e antarana sampeyan sareng kaula sadaja. 2Reng-oreng gapaneka noles menorot se etotorragi ka sampeyan sareng ka kaula sadaja bi' reng-oreng se nengale dibi' sadajana kadaddiyan gapaneka dhari dha'-adha'na, sareng laju mabalattra kabar gapaneka. 3Saamponna kaula epatete nalektegi sadajana kadaddiyan gapaneka dhari dha'-adha'na, noro' pamanggi kaula sae manabi kaula noles sadajana sacara tartep kaangguy ngatore oneng ka sampeyan. 4Melana kaula ngalakone gapaneka sadajana sopaja sampeyan oneng ja' pa-ponapa se eajarragi ka sampeyan pajat lerres. 5E bakto Herodes jumenneng rato nagara Yudea, badha imam se asmana Zakhariya. Zakhariya jareya tamaso' golonganna mam-imam Abiya. Asmana rajina Elisabet, toronanna imam keya. 6Odhi'na se kadhuwa jareya masenneng panggaliyanna Allah. Lake' bine' padha ta'at ka sakabbiyanna papakon ban hokomma Pangeran kalaban gu-onggu. 7Se kadhuwa jareya ta' kaagungan pottra sabab Elisabet jubeng ban se kadhuwa jareya la padha towa. 8E settong are, e bakto giliranna golongan Abiya, Zakhariya alampa'agi lalakonna imam e ajunanna Allah. 9Saellana eellot, akantha se biyasana ejalannagi bi' mam-imam, Zakhariya kapele kaangguy maso' ka Padalemman Socce ban ngobbar mennyan. 10Sabatara opacara ngobbar mennyan ejalannagi, e lowar reng-oreng se bannya' padha adu'a. 11E bakto jareya malaekadda Pangeran ngaton ka Zakhariya. Malaekat jareya ngadek e kanganna meja pangobbaranna mennyan. 12E bakto Zakhariya ngoladi malaekat jareya, panggaliyanna arassa bingong ban tako'. 13Tape malaekadda Pangeran jareya adhabu, "Ella, ja' tako', Zakhariya! Allah la meyarsa du'ana ba'na. Binena ba'na Elisabet bakal rembi'a lalake'. Kana' jareya nyamae Yahya. 14Mon kana' jareya la lahir, ba'na tanto ce' peragga, bariya keya bannya' oreng laenna! 15Ana'na ba'na jareya bakal daddiya oreng raja e dhalem pangoladanna Pangeran, ban ta' ngenom anggur otabana nom-enoman kerras. Molae lahir kana' jareya bakal ekobasa'ana Errohna Allah. 16Bannya' oreng Isra'il bakal etontona abali ka Allah, Pangeranna. 17Ana'na ba'na jareya daddiya otosanna Pangeran se kowat ban kobasa akantha Eliya. Kana' jareya bakal marokona eppa' ban ana'na, oreng se ta' ta'at bakal etontona epabali ka jalanna pekkeran se bendher. Kalaban cara se kantha jareya ana'na ba'na jareya nyadhiya'agi ommat se la asadhiya narema'a Pangeran." 18Zakhariya mator ka malaekat jareya, "Kadi ponapa abdina se onenga ja' gapaneka bakal kadaddiyana? Abdina ampon towa, sapaneka jugan robiya abdina." 19"Sengko' reya Jibra'il," saodda malaekat jareya. "Sengko' aladine Allah se ngotos sengko' manapa' kabar bagus reya ka ba'na. 20Apa se ekabala sengko' ka ba'na reya bakal kalakona mon la napa' baktona. Tape sarrena ba'na ta' parcaja ka kabar se egiba sengko' reya, ba'na bakal ta' bisa'a acaca; ban ba'na bakal pagguna buwi sampe' apa se ekoca'agi sengko' ka ba'na reya la kalakon." 21Sabatara jareya reng-oreng se badha e lowar padha te'-nante'an Zakhariya; kabbi padha heran arapa ma' ce' abidda e dhalem Padalemman Socce. 22Ban e bakto kalowar, Zakhariya ta' bisa abu-dhabu ka reng-oreng jareya, daddi pera' terros ngangguy isyarat malolo. Daddi reng-oreng se badha e jadhiya padha tao ja' tantona Zakhariya la nengale pangatonan e dhalem Padalemman Socce. 23Saellana mare bakto giliranna se epalalakon e Padalemman Socce, Zakhariya pas gubar ka compo'na. 24Ta' saapa abidda dhari jareya Elisabet bubut pas, ta' kalowaran dhari compo'na lema bulan abidda. 25"Dhi-budhina Pangeran nolong sengko' ban mamosna tang kanespa'an e adha'na oreng bannya'," oca'na. 26E bakto Elisabet la bubut nem bulan, Allah ngotos malaekat Jibra'il ka Nazaret, settong kottha e dhaera Galilea. 27Jibra'il eotos ka settong paraban se anyama Miriyam. Paraban jareya bakalla Yusup, toronanna Rato Daud. 28Malaekat jareya manggi'i Miriyam, laju adhabu, "Salam, ba'na se eberkadi Pangeran sacara istimewa. Pangeran asarengnge ba'na!" 29Miriyam takerjat meyarsa kabar dhari malaekat jareya; ca'na panggaliyanna ba' apa maksodda ca'-oca' jareya. 30Malaekat jareya pas adhabu ka Miriyam, "Ella ja' tako', Miriyam, sabab ba'na ekasokane Pangeran. 31Ba'na bakal ngandhunga tor rembi'a, ban kana' jareya kodu enyamae Isa. 32Kana' jareya bakal agunga ban bakal esebbuda Pottrana Allah Se Mahatenggi. Bi' Allah ana'na ba'na jareya bakal epadaddiya rato, akantha Rato Daud, bangatowana. 33Ban pole kana' jareya bakal daddiya rato se marenta'a toronanna Yakub salanjangnga. Karaja'anna tadha' aherra." 34Miriyam mator ka malaekat jareya, "Abdina ka'dhinto' gi' paraban. Kadi ponapa se bisa'a kadi ka'dhinto'?" 35Dhabuna malaekat, "Errohna Allah bakal torona ka ba'na, ban ba'na bakal katotobana kobasana Allah. Jareya sababba kana' se bakal lahira jareya bakal esebbuda kana' se socce, Pottrana Allah. 36Kaenga'e, balana ba'na Elisabet rowa, sateya la ngandhung nem bulan, maske la towa, ban maske ca'na oreng jubeng. 37Sabab tadha' barang se mohal monggu ka Allah." 38Miriyam laju mator, "Abdina paneka abdiepon Pangeran; abdina narema ponapa se edhabuwagi panjennengngan." Malaekat jareya laju maelang adina'agi Miriyam. 39Ta' saapa abidda saellana jareya Miriyam laju meyos ka settong kottha e Yudea e dhaera pagunongan. 40E jadhiya Miriyam meyos ka compo'na Zakhariya, ban e bakto maso' laju aberri' salam ka Elisabet. 41E bakto Elisabet buru meyarsa salamma Miriyam, ana' e dhalem gindhu'anna Elisabet aguli. Elisabet ekobasae Errohna Allah, 42laju aera', "Ba'na se paleng eberkadi Errohna Allah e antarana sakabbiyanna oreng babine'! Ban mandar eberkadana ana' se elahirragiya ba'na jareya! 43Sapa sengko' reya me' ebuna Pangeran rabu manggi'i sengko'? 44Sengko' buru ngedhing salamma ba'na, ana' e tang gindhu'an reya aguli kaperagan. 45Pojur onggu ba'na polana ba'na parcaja ja' apa se edhabuwagi Pangeran ka ba'na bakal kalakona!" 46Dhabuna Miriyam, "Tang ate amolja'agi Pangeran, 47ban tang sokma kaperagan sabab Allah tang Panyalamet. 48Sengko' abdina se nespa, ekaemodi bi' Salerana! Molae sateya sakabbiyanna bangsa ngoca' ja' sengko' reya pojur parana. 49Sabab Allah Se Mahakobasa ngalampa'agi rang-barang se raja ka sengko' reya. Socce asmana; 50dhari toronan se settong ka settongnga Pangeran noduwagi kabellasanna ka reng-oreng se tako' ka Salerana. 51Kalaban astana se kowat kobasa reng-oreng se angga' epasalebbudan, epasalbut sakabbiyanna sajjana. 52To-rato epatoron dhari tahtana, reng-oreng se nespa epatenggi bi' Salerana. 53Oreng se lapar epakennyang bi' sakabbiyanna kabecce'an, se sogi eojuk ta' epangeba pa-apa. 54Isra'il abdina eparenge partolonganna, menorot janjina ka bangatowana sengko' ban ba'na. 55Pangeran ta' kalep ka janjina, salanjangnga noduwagi kabellasanna, ka Ibrahim ban ka toronanna." 56Miriyam alenggi ban Elisabet ra-kera tello bulan abidda, pas buru gubar. 57Saellana napa' baktona, Elisabet babar lalake'. 58Ga-tatanggana ban la-balana padha ngedhing saapa saena Pangeran ka Elisabet jareya, daddi kabbi padha noro' arassa gumbira. 59E bakto babaji' jareya aomor ballung are, ga-tatangga ban la-balana padha dhateng; kana' jareya esonnada ban enyama'ana. Bi' reng-oreng kana' jareya enyama'ana Zakhariya noro' nyamana eppa'na, 60tape ebuna adhabu, "Bunten! Kana' paneka kodu enyamae Yahya." 61"Tadha' settonga balana sampeyan se anyama kantha ganeka," ca'na ga-tatanggana ban la-balana ka Elisabet. 62Reng-oreng jareya laju ngangguy isyarat atanya ka Zakhariya enyama'ana sapa pottrana jareya. 63Zakhariya menta papan bato kene', laju nyerrat, "Nyamana Yahya." Reng-oreng se badha e jadhiya padha heran kabbi! 64E bakto jareya keya Zakhariya laju bisa abu-dhabu pole sarta amolja'agi Allah. 65Ga-tatanggana padha katako'en, ban kabar jareya balattra ka saantero dhaera Pagunongan Yudea. 66Sakabbiyanna oreng se ngedhing jareya atanya e dhalem atena, "Ba' daddiya apa kana' reya pagi'?" Sabab la terrang Pangeran asarengnge kana' jareya. 67Zakhariya, ramana Yahya ekobasae Errohna Allah ban manapa' dhabuna Pangeran, dhabuna: 68"Mara padha amolja'agi Pangeran, Allahna bangsa Isra'il! Pangeran rabu nolong ommadda ban mabebas bangsana. 69Ba'na ban sengko' eparenge Panyalamet se kowat kobasa dhari toronanna Daud, abdina. 70Gi' jaman lamba' kalaban parantara'anna bi-nabbina, Pangeran la apareng janjina 71masalamedda sengko' ban ba'na dhari moso ban dhari kobasana reng-oreng se baji' ka ba'na ban sengko'. 72Kaangguy noduwagi kamora'anna ka bangatowana sengko' ban ba'na, Allah bakal neptebbana janjina se socce jareya. 73- 74Allah asompa ka Ibrahim bangatowana sengko' ban ba'na, ajanji masalamedda sengko' ban ba'na dhari moso, me' olle sengko' ban ba'na abakte ka Salerana ta' kalaban andhi' rassa tako', 75ngabdi ka Salerana salanjangnga, tor masenneng panggaliyanna saomorra. 76Ba'na, na', bakal esebbuda nabbina Allah Se Mahatenggi. Ba'na eotos ajangadha'i Pangeran ababat jalan kaagem Salerana, 77kaangguy aberta'agi ka ommadda, ja' kabbi padha epasalamedda mon sa-dusana la esapora bi' Allah. 78Pangeranna ba'na ban sengko' reya bellas ase; kaangguy masalamet sengko' ban ba'na Salerana rabu. Akantha are se moncar e baja laggu, 79Salerana nyonare sakabbiyanna oreng se odhi' e dhalem papetteng ban katako'en. Nonton sengko' ban ba'na e jalan se nojju ka kataremtemman." 80Pottrana Zakhariya jareya badanna atamba raja ban errohna atamba kowat. Sarta laju alenggi e ra-ara sampe' napa' baktona kalowar anyata'agi aba'na ka ra'yat Isra'il.

will be added

X\