1 An Pablo, xi chi̱'nda-la̱ Nainá ma. Ti̱koa̱ an tsibíxáya-na Na̱'èn-ná Jesucristo mé-ne nga ko̱kjeiín-la̱ i̱t'aà ts'e̱ Cristo jñà xi̱ta̱ xi xó jè Nainá jaàjiìn-ne, ti̱koa̱ skoe̱ xi kjoa̱kixi̱ nga ko̱ma-la̱ skoe̱xkón Nainá. 2 Xi̱ta̱ koi k'oa̱á s'ín ko̱matin nga tíjngoò ikon nga nchikoña-la̱ nga kítsa̱jnakon ini̱ma̱-la̱ ni̱ta̱ kjé-ne koni s'ín kitsjaà tso'ba Nainá skanda k'e̱ nga ti̱kj'eè sindaà i̱sò'nde. Nainá mì kiì kona̱cha̱n. 3 K'e̱ nga jye ijchò na̱chrjein, Nainá kisìkatsejèn 'én-la̱ i̱t'aà ts'e̱ 'én ndaà-la̱ Nainá xi kjoa̱ ts'e̱ Cristo xi an chjàya. Na̱'èn-ná kisìnga̱tsja-na xá jè nga k'oa̱á s'ín tsatíxoma Nainá xi ochrjekàjiìn-ná kjo̱'in. 4 Ngaji̱, Tito, koni tsà ki'ndí ts'a̱n xan-lè nga ngásòn mokjeiín-ná i̱t'aà ts'e̱ Cristo, tísíkasén-lè xo̱jo̱n jè. Nainá xi Na̱'èn-ná ko̱ Na̱'èn-ná Jesucristo xi ochrjekàjiìn-ná kjo̱'in kàtatsjá-lè kjo̱ndaà-la̱, kàtahi̱ma̱keè-lè, ti̱koa̱ 'nchán kàtasíkíjna ini̱ma̱-lè. 5 Koií xá kisìkíjna-lè ján nangui Creta nga si̱kixi̱yi xá xi chijat'aà-ìsa. K'oa̱á ti̱ s'ín tsatíxoma-lè nga ki̱nchandeiì xi̱ta̱ jchínga xi si̱ìkinda̱ na̱xa̱ndá-la̱ Nainá nga jngoò ìjngoò na̱xa̱ndá. 6 Xi̱ta̱ jchínga xi si̱ìkitasòn xá, jñà-né xi ndaà nchisíjchá yijo-la̱ nga mì yá xi ch'o ki̱tso̱-la̱; xi jngoò ma chjo̱ón-la̱. Ko̱ jñà i̱xti-la̱ mochjeèn-né nga ndaà mokjeiín-la̱ i̱t'aà ts'e̱ Cristo nga mìtsà yá xi̱ta̱ ónè-la̱ kjoa̱ nga kjoa̱ská tjímajiìn ko̱ nga mì kiì 'nchréñijon. 7 Jè xi̱ta̱ xi si̱ìkinda̱ na̱xa̱ndá-la̱ Nainá xi xá-la̱ Nainá síkitasòn, machjeén-né nga ndaà s'iìn mé-ne nga nì yá xi ch'o ki̱tso̱-la̱. Mì kiì mochjeèn nga 'nga ikon ko̱ma; mì ta̱xki̱ ko̱jti-la̱; mì xán koa̱hijtako̱; mì xi̱ta̱ ska̱àn-ko̱; ko̱ mì to̱n chijé ko̱tsjakeè. 8 Ta̱ sa̱á ndaà kàtasís'in-la̱ xi̱ta̱ xi bijchókon. Kàtamatsjakeè kjoa̱ xi ndaà tjín. Indaà kàtìjna ikon. Kixi̱ kàtìjnako̱ xi̱ta̱. Tsjeè kàtasíjchá yijo-la̱ nga nguixko̱n Nainá, ndaà kàtasíkinda̱ yijo-la̱ nga mì ta̱xki̱ s'iìn-jèn. 9 Ndaà kàtíjiìn ikon 'én kixi̱ koni s'ín kis'eno̱jmí-la̱ mé-ne nga i̱t'aà ts'e̱ 'én ndaà xi ko̱kòya ko̱ma ki̱ìtin-la̱ xi̱ta̱ nga 'ñó kàteè-la̱ ikon ti̱koa̱ ko̱ma si̱ìkixi̱ya xi kondra̱ fìtji̱ngui-la̱ xi kjoa̱kixi̱. 10 Koií kjoa̱-la̱ tjín jchán xi̱ta̱ xi tájaàjiìn nga okóya 'én xi nìmé chjí-la̱ ti̱koa̱ kona̱cha̱n-la̱ xi̱ta̱ xi kj'ei̱í; jñà kó xi̱ta̱ xi 'ñó bìnè-la̱ xi̱ta̱ xi kj'ei̱í nga kjo̱'ñó si̱t'aà chi̱ba̱-la̱ yijo-la̱ kjoa̱ ts'e̱ circuncisión. 11 Jñà xi̱ta̱ koi mochjeèn-né nga kíchjoa'a nga sískáya-la̱ ngats'iì xi̱ta̱ xi títsa̱jna nga jngoò ìjngoò ni'ya. Tà jè xi mejèn-la̱ nga to̱n síchíjet'aà-la̱ xi̱ta̱ nga k'oa̱ tjín 'én xi okóya xi nìmé chjí-la̱. 12 Jngoò xi̱ta̱ chji̱ne̱ xi ti̱ ya-ne i̱'nde-la̱ Creta k'oa̱á kitsò-la̱ xi̱ta̱ xíkjín: “Jñà xi̱ta̱ Creta, xi̱ta̱ ndiso-né, xi̱ta̱ ts'e̱n-né koni tsà cho̱ ijñá, xi̱ta̱ chrjá'a-né, xi̱ta̱ ts'eè-né.” 13 'Én kixi̱í xi kiìchja̱ xi̱ta̱ jè; ngaji̱, Tito, koií kjoa̱-la̱ 'ñó ti̱nákjoa̱koi̱i mé-ne nga ndaà kítsa̱jnako̱-ne koni s'ín mokjeiín-la̱ i̱t'aà ts'e̱ Cristo, 14 koa̱ mé-ne nga mì jñà si̱ìs'in-la̱ cuento xi nìmé chjí-la̱ xi fìtji̱ngui i'nga-la̱ xi̱ta̱ judío ti̱koa̱ mì jñà si̱ìs'in-la̱ kjo̱tíxoma ts'e̱ xi̱ta̱ xi binchat'aàxìn-la̱ kjoa̱kixi̱. 15 Jñà xi̱ta̱ xi tsjeè tjín kjo̱hítsjeèn -la̱ tsjeè yije ma-la̱ ni̱ta̱ mé-ne. Ta̱nga jñà xi̱ta̱ xi mì tsjeè tjín kjo̱hítsjeèn-la̱ koa̱ mì kiì mokjeiín-la̱ i̱t'aà ts'e̱ Cristo, sa̱á tjé yije ma-la̱ ni̱ta̱ mé-ne; skanda jè ini̱ma̱-la̱ ko̱ kjo̱hítsjeèn-la̱ tjé tjín. 16 K'oa̱á tsò nga beèxkon Nainá ta̱nga jñà kjoa̱ xi s'ín 'ya-la̱ nga mì tsà kixi̱ kjoa̱. Xi̱ta̱ koi, 'ñó ch'o s'ín, mì kiì 'nchréñijon, ti̱koa̱ nì mé chjí-la̱ nga ni̱ jngoò ma-la̱ síkitasòn xá xi ndaà tjín.
