1 ¿Kó kixoán? ¿A ndaà tjín nga ki̱nchátsji jé-isa̱ mé-ne nga isa̱ tsee kjo̱ndaà tsjá-ne Nainá? 2 Majìn, mì ti̱ kiì k'oa̱ s'e̱n-ná. Jyeé titsa̱jnat'aàxìn-lá kjoa̱ ts'e̱ jé koni tsà jye k'eén xi i̱t'aà ts'e̱; mì ti̱ kiì ko̱ma ya̱ ki̱tsajnajiìn-isaá kjoa̱ ts'e̱ jé. 3 ¿A mì tsà jyeé tíjiìn-nò k'e̱ nga komà bautizar i̱t'aà ts'e̱ Cristo ngats'iaá nga ti̱koa̱ ya̱ titsa̱kjòkoa̱á k'e̱ nga k'en? 4 K'e̱ nga ma bautizar xi̱ta̱, k'oa̱á s'ín ngaya-la̱ koni tsà ya̱ sijiìn-t'aà-là Cristo k'e̱ nga k'en. Koni s'ín jaháya-la̱ Cristo i̱t'aà ts'e̱ nga'ñó-la̱ Nainá xi 'ñó jeya tíjna, k'oa̱á ti̱ s'ín machjeén nga ko̱s'ín si̱jchá yijo-ná nga ki̱jnakon xi̱tse̱ ìjngoò k'aá. 5 Koni s'ín titsa̱kjòkoa̱á Cristo k'e̱ nga k'en, jñá k'oa̱á ti̱ s'ín kjoa̱áya-ná koni s'ín jaháya-la̱ jè. 6 Tíjiìn-ná nga jè kjoa̱ jchínga-ná koni s'ín ki'nèé nga ìsa kjòtseé ya̱á kisìt'aà krò-la̱ Cristo mé-ne nga kàtachija-ne nga'ñó-la̱ yijo jé-ná nga mì ti̱ jé kjo̱tíxoma ìsa-ná. 7 Jngoò xi̱ta̱ xi jye k'en, jyeé tíjnandeií kjoa̱ ts'e̱ jé. 8 Nga ya̱ k'en-koa̱á Cristo, mokjeiín-ná nga ti̱koa̱ ya̱ ki̱tsajnakoa̱á. 9 'Ya-ná k'e̱ nga jaáya-la̱ Cristo k'e̱ nga k'en, nì ti̱ jngoò na̱chrjein ki̱yá ìjngoò k'a-ne. Mì ti̱ mé nga'ñó tjín-la̱ kjoa̱biya nga jè ko̱tíxoma-la̱. 10 K'e̱ nga k'en Cristo, jngoò k'a k'en xi kjoa̱ ts'e̱ jé-ná; i̱'ndei̱ nga íjngoò k'a tíjnakon-né koií kjoa̱ tíjnakon-ne nga jeya síkíjna Nainá. 11 Jñò, k'oa̱á ti̱ s'ín ti̱kítsjeèn koni tsà jye k'eèn xi kjoa̱ ts'e̱ jé; ti̱tsajnakon-nò xi kjoa̱ ts'e̱ Nainá nga ya̱ titsa̱jnako̱ò Na̱'èn-ná Jesucristo. 12 Koií kjoa̱-la̱ mì ti̱ kiì biì'nde-là yijo jé-nò nga jè kjoa̱ ts'e̱ jé ko̱tíxoma-nò k'e̱ nga kjo̱'ñó s'ín-nò nga nikitasòn-là kjoa̱ xi ch'o tjín xi síjé yijo-nò. 13 Kiì ya̱ nìnga̱tsja yijo-nò kjoa̱ ts'e̱ jé nga jè jé síkjeén nga ch'o 'nè, ta̱ sa̱á jè Nainá ti̱nga̱tsjaà yijo-nò koni jngoò xi̱ta̱ xi jye jaáya-la̱ i̱t'aà ts'e̱ kjo̱biyà. Nainá ti̱nga̱tsjaà yijo-nò nga kàtasíkjeèn kjoa̱ xi kixi̱ tjín. 14 Kjoa̱ ts'e̱ jé, mì ti̱ mé nga'ñó tjín-la̱ nga jè ko̱tìxoma-nò nga mì tsà kjoa̱ ts'e̱ kjo̱tíxoma-la̱ Moisés titsa̱jnajñoò; kjo̱ndaà-la̱ Nainá titsa̱jnajñoò. 15 ¿Kó bixoán? ¿A ndaà tjín nga ki̱nchátsji jé ìsa̱á nga kjo̱ndaà-la̱ Nainá titsa̱jnajñaá nga mì tsà kjoa̱ ts'e̱ kjo̱tíxoma titsa̱jnajñaá? Majìn, mì kiì ndaà tjín. 16 Ndaà tíjiìn-nò tsà ya̱ si̱nga̱tsja yijo-nò ts'e̱ xi̱ta̱ xi bítje̱ chi̱'nda nga jè nìkitasòn-là, chi̱'nda-la̱ ko̱maà ts'e̱ xi̱ta̱ jè. Kjo̱'ñó tjín-ne nga jè si̱kitasòn-là. K'oa̱á s'ín tjín, tsà chi̱'nda-la̱ jé ko̱ma nga jè si̱kitasòn-là, ki̱yà-nò; ta̱nga tsà chi̱'nda-la̱ Nainá ko̱ma nga jè si̱kitasòn-là, kixi̱í ki̱tsa̱jna nguixko̱n jè. 17 Jñò, nga isa̱ kjòtseè, k'oa̱á s'ín kinìkitasòn-là kjoa̱ ts'e̱ jé koni tsà jngoò chi̱'nda, ta̱nga i̱'ndei̱, ndaà chjí-la̱ Nainá nga ko̱ i̱ni̱ma̱-nò ndaà nìkitasòn koni s'ín nguì ndaà tjín 'én kixi̱ xi kiseno̱jmí-nò. 18 I̱'ndei̱ jyeé titsa̱jnandeií-là kjoa̱ ts'e̱ jé; chi̱'nda ts'e̱ kjoa̱kixi̱-nò; tjíné-nò nga si̱kitasòn koni s'ín síjé kjoa̱kixi̱. 19 Koi 'én tíchjako̱-nò xi mì tsà 'in chja̱ koií kjoa̱-la̱ nga indaà tjín takòn; mì kiì ndaà machi̱ya-nò kjoa̱ ts'e̱ Nainá. Koni s'ín ki'nè nga isa̱ kjòtseè nga ya̱ kinìnga̱tsja yijo-nò i̱t'aà ts'e̱ ngats'iì kjoa̱ch'o xi tjín nga jè tsatíxoma-nò koni xi̱ta̱ chi̱'nda; i̱'ndei̱ k'oa̱á ti̱ s'ín ti̱nga̱tsja yijo-nò i̱t'aà ts'e̱ kjoa̱ kixi̱ mé-ne jè kjoa̱ kixi̱ kàtatíxoma-nò koni chi̱'nda xi tsjeè títsa̱jna nga nguixko̱n Nainá. 20 K'e̱ nga kjoa̱ ts'e̱ chi̱'nda-la̱ jé titsa̱jnajñoò, mì kiì titsa̱nìkitasòn-là kjoa̱kixi̱-la̱ Nainá. 21 Ta̱nga ¿mé xi kisakò-nò kjoa̱ ts'e̱ jé? I̱'ndei̱ tà masobà-nò kjoa̱ koi; tà ya̱á fìko̱-ná ñánda tjín kjoa̱biya. 22 I̱'ndei̱ nga jye titsa̱jnandeií-là xi kjoa̱ ts'e̱ jé, chi̱'nda-la̱ Nainá ma; kjo̱ndaà xi sakò-nò jè-né nga tsjeè titsa̱jnaà nga nguixko̱n Nainá. Xi feit'aà-ne, s'e̱-nò kjoa̱bijnacho̱n ni̱ta̱ mé na̱chrjein-ne. 23 Chjí xi tjín-la̱ kjoa̱ ts'e̱ jé, kjoa̱biya-né. Ta̱nga kjo̱tjò xi tsjá Nainá, kjoa̱bijnachon-né ni̱ta̱ mé na̱chrjein-ne nga ya̱ titsa̱jnakoa̱á Cristo Jesús xi Na̱'èn-ná ma.
