1 Tsà k'oa̱á s'ín tjín, ¿mé kjo̱ndaà xi isa̱ tsee tjín-la̱ nga xi̱ta̱ judío 'mì? ko̱ ¿mé chjí-la̱ nga tjít'aà chi̱ba̱-la̱? 2 Kjìn sko̱ya chjí-la̱. Jè xi tíjna ítjòn, jè-né nga jñà xi̱ta̱ judío kjònga̱tsja 'én-la̱ Nainá. 3 Jñà xi̱ta̱ judío, na̱s'ín tjín i'nga xi mì kiì síkitasòn 'én xi kjònga̱tsja, ¿a ko̱ma si̱kjaatjìya-la̱ kjoa̱kixi̱-la̱ Nainá nga mì kiì kitasòn koni s'ín kitsja tso'ba? 4 Majìn, mì kiì ko̱ma. Nainá, xi̱ta̱ kixi̱-né, na̱s'ín xi̱ta̱ ndiso ngats'iì xi̱ta̱ xi tjín i̱sò'nde; koni s'ín tíchja̱ xo̱jo̱n nga tsò: Mé-ne nga kàta'ya-la̱ nga kixi̱ kjoa̱ 'én xi nokjoì Si̱kijne-né k'e̱ nga yá xi ko̱òngui-lè. 5 Tjín i'nga xi̱ta̱ xi tsò: K'e̱ nga ch'o 'nè, ìsa̱à ndaà 'ya-la̱ kjoa̱kixi̱-la̱ Nainá. Tsà k'oa̱ s'ín tjín, ¿kó ki̱xoán? ¿a ki̱xón-ná nga mì kjoa̱ kixi̱ tís'ín Nainá nga kjo̱'in tsjá-ná? (Tsà ko̱s'ín kixoán, jngoò kjo̱hítsjeèn-la̱ xi taxki̱ xi̱ta̱ titsa̱nìkjeén.) 6 Ta̱nga majìn, mì k'oa̱á s'ín tjín. Tsà mì tsà kixi̱ s'ín Nainá nga kjo̱'in tsjá-ná, ¿kós'ín ko̱ma koi̱índaàjiìn-la̱ xi̱ta̱ i̱sò'nde? 7 Ti̱koa̱á tsà k'oa̱ ki̱tso̱ xi̱ta̱ koi: Ta̱nga tsà kjoa̱ndiso-na̱ okó nga jè kjoa̱ kixi̱-la̱ Nainá isa̱ jeya kíjna, ¿mé-ne k'oa̱ s'ín tísinè-na nga xi̱ta̱ jé tíyatakòn-na? 8 Tik'oa̱á-ne ch'o s'eén mé-ne nga kàtasakò isa̱-ná kjo̱ndaà-la̱ Nainá. Tjín xi̱ta̱ xi ko̱tsò nga k'oa̱á tjín 'én xi okoòya; jè xi mejèn-la̱ nga ch'o síkíjna-na. Jñà xi̱ta̱ xi ko̱tsò, o'kiín-la̱ nga tjoé-la̱ kjo̱'in xi Nainá tsjá. 9 ¿Kó s'ín nìkítsjeèn?, jñá xi xi̱ta̱ judío 'mì-ná, ¿a ìsa̱à ndaà xi̱ta̱á koni jñà xi̱ta̱ xi kj'eií? Majìn, jyeé k'oa̱á kixan-nò, tà ngásòn jé titsa̱jnajñaá ngats'iaá xi xi̱ta̱ judío 'mì-ná ko̱ xi ta̱xki̱ xi̱ta̱. 10 Koni s'ín tíchja̱ Xo̱jo̱n-la̱ Nainá nga tsò: Ni̱ jngoò xi̱ta̱ tjín xi xi̱ta̱ kixi̱, ni̱ tsà tà jngoò. 11 Ni̱ jngoò tjín xi machi̱ya-la̱, ni̱ jngoò tjín xi ótsji Nainá. 12 Ngats'iì xi̱ta̱ sa̱à xìn ndi̱yá kiì; ngats'iì nìmée chjí-la̱ kjoa̱ xi s'ín; ni̱ jngoò xi ndaà s'ín, ni̱ tsà tà jngoò. 13 Na̱xájta̱-la̱, k'oa̱á kjoàn koni ngajo-la̱ mik'en k'e̱ nga táxa̱jto; ni̱je̱n-la̱ nguiì 'én ndisoó chja̱; 'én xi chja̱, k'oa̱á ngaya-la̱ koni tsà xán-la̱ ye̱. 14 Chja̱jno-la̱ xi̱ta̱ ko̱ nguiì koi 'én chja̱ xi 'òn ma-la̱ i̱ni̱ma̱-ná. 15 Mì kiì koña kjoa̱, ni̱to̱ón sík'en xi̱ta̱. 16 Ni̱ta̱ ñánda nga fì, síhi̱ma̱ ko̱ síkjesko xi̱ta̱ xi kj'eií. 17 Mì kiì beèxkon ndi̱yá ñánda tjín kjoa̱'nchán. 18 Mì kiì tsakjón-keè Nainá i̱t'aà ts'e̱ kjoa̱ xi s'ín. 19 Jyeé 'yaá nga ngats'iì 'én xi tjít'aà kjo̱tíxoma ts'e̱ Moisés, jñá chja̱-la̱ ngats'iì xi̱ta̱ xi ya̱ fìt'aà-la̱, mé-ne nga ngats'iì xi̱ta̱, mì kiì ko̱ma ki̱chja̱ nga ki̱nchako̱ yijo-la̱ nga nguixko̱n Nainá; ngats'iì xi̱ta̱ xi tjín i̱sò'nde koi̱ìndaàjiìn-la̱ Nainá nga jcha̱-la̱ nga jé tjín-la̱. 20 Ni̱ jngoò xi̱ta̱ xi kixi̱ kíjna nga nguixko̱n Nainá tà koi kjoa̱-la̱ nga ndaà tisíkitasòn Kjo̱tíxoma ts'e̱ Moisés. Nga jè Kjo̱tíxoma, tà k'oa̱á s'ín mochjeèn nga beèno̱jmíya-ná nga jé tjín-ná. 21 Ta̱nga i̱'ndei̱, Nainá okó-ná kós'ín s'ín Nainá nga xi̱ta̱ kixi̱ beètakón-ná. Ko̱ mì tsà kjoa̱ ts'e̱ Kjo̱tíxoma nga bitasòn. Jñà xo̱jo̱n jchínga ts'e̱ kjo̱tíxoma-la̱ Nainá ko̱ ts'e̱ xi̱ta̱ xi kiìchja̱ ngajo-la̱ Nainá k'oa̱á ti̱ s'ín beèno̱jmíya-ná, 22 nga jñà xi̱ta̱ k'e̱ nga mokjeiín-la̱ i̱t'aà ts'e̱ Cristo, kixi̱í bìtsa̱jna nguixko̱n Nainá. K'oa̱á s'ín síko̱ yije kóhotjín xi mokjeiín-la̱. Nga ngats'iì xi̱ta̱ ngásòn jé tjín-la̱, 23 nga ngásòn ótsji jé-né; kjiìn titsa̱jnat'aà xìn-la̱ Nainá ñánda nga jeya tíjna. 24 Ta̱nga Nainá, nga ndaà xi̱ta̱, kitsjaà ko̱tjò-ná kjo̱ndaà-la̱ mé-ne nga kixi̱ ki̱tsa̱jnaá nguixko̱n jè. Jè Jesucristo tsibìchjítjì ngajo-ná jé-ná mé-ne nga ki̱tsa̱jnandeií-ná xi kjoa̱ ts'e̱ jé. 25 Nainá kitsjaà ki'ndí-la̱ koni jngoò kjo̱tjò xi faàxìn jé-ná nga nguixko̱n Nainá k'e̱ nga mokjeiín-ná i̱t'aà ts'e̱ Jesucristo, nga jè tsibíxteèn jní-la̱ k'e̱ nga k'en. Nainá k'oa̱á s'ín okóya-ná kós'ín tjín kjoa̱kixi̱-la̱. Koií kjoa̱-la̱ nga ngasa̱ kjòtseè, Nainá, tíkoña kjoa̱-né, mì kiì ni̱to̱n kitsjaà-la̱ kjo̱'in xi̱ta̱ koni s'ín ok'ìn-la̱ jé xi tsohótsji. 26 Ta̱nga i̱'ndei̱ tí'ya-la̱ nga i̱t'aà ts'e̱ Jesucristo tísindaàjiìn-la̱ xi̱ta̱ jñà kjoa̱-la̱ jé xi kisichróbá mé-ne nga kàta'ya-la̱ Nainá nga xi̱ta̱ kixi̱-né ko̱ ti̱koa̱á ti̱jè-ne Nainá xi kixi̱ síkítsa̱jna xi̱ta̱ xi mokjeiín-la̱ i̱t'aà ts'e̱ Jesús. 27 ¿A 'ngaá ko̱ma tàkoán nga kixi̱ titsa̱jnaá nguixko̱n Nainá? Majìn, mì kiì 'nga ko̱ma tàkoán. Nga mì tsà koi kjoa̱-la̱ nga kjo̱tíxoma nìkitasoán. Jè-né nga mokjeiín-ná i̱t'aà ts'e̱ Jesús nga kixi̱ síkítsa̱jna-ná Nainá. 28 K'oa̱á tsòya-ne ngats'iì kjoa̱ koi nga Nainá síkixi̱ xi̱ta̱ k'e̱ nga mokjeiín-la̱ i̱t'aà ts'e̱ Jesús; mì tsà koi nga kjo̱tíxoma ts'e̱ Moisés síkitasòn. 29 ¿A tà ts'e̱é xi xi̱ta̱ judío Nainá? ¿A mì tsà ti̱koa̱ ts'e̱ xi ta̱xki̱ xi̱ta̱? Kjoa̱ kixi̱-né, ti̱koa̱á ts'e̱-né xi ta̱xki̱ xi̱ta̱ xi mì tsà xi̱ta̱ judío. 30 Nainá, tà jngoò ma xi kixi̱ síkítsa̱jna ngats'iì xi̱ta̱ k'e̱ nga mokjeiín-la̱ i̱t'aà ts'e̱ Jesús. Ngásòn síko̱ jñà xi̱ta̱ judío xi tjít'aà chi̱ba̱-la̱ ko̱ xi ta̱xki̱ xi̱ta̱ xi mi kiì tjít'aà chi̱ba̱-la̱. 31 Jè kjoa̱ nga mokjeiín-ná i̱t'aà ts'e̱ Jesucristo, ¿a tíchahingui-né kjoa̱ ts'e̱ Kjo̱tíxoma? Majìn, mì tsà tíchahingui; ta̱ sa̱á tímajngoò-ne koni jè xá xi tjín-la̱.
