1 I̱t'aà tsa̱jòn sìnga̱tsja-nò jè tichjaá Febe, jè xi síchját'aà na̱xa̱ndá-la̱ Cristo xi ya̱ tíjna Cencrea; 2 ndaà chjoétjò xi̱ta̱ jè nga xinguiaá ma nga ti̱koa̱ mokjeiín-la̱ i̱t'aà ts'e̱ Na̱'èn-ná nga k'oa̱á s'ín ok'ìn-la̱ xi xi̱ta̱-la̱ Cristo. Tichját'aà-là ni̱ta̱mé xi ko̱chjeén-la̱ nga 'ñó kjín xi̱ta̱ tsasìko̱, ti̱koa̱ 'an kisìchját'aà-na. 3 Ti̱ìxat'eì jè Priscila ko̱ Aquila, jñà xi̱ta̱ xi tañà nìxákjòje̱n i̱t'aà ts'e̱ Cristo Jesús. 4 Jñà xi̱ta̱ koi kjo̱meè kinìk'en xi kjoa̱ ts'a̱n. Mìtsà tà 'an xi tsjaà-la̱ kjo̱ndaà ti̱koa̱ tsjá-la̱ kjo̱ndaà ngats'iì xi̱ta̱ na̱xa̱ndá-la̱ Cristo xi mìtsà xi̱ta̱ judío. 5 Ti̱koa̱ ti̱ìxat'eì jñà xi̱ta̱ na̱xa̱ndá-la̱ Cristo xi maxkóya ya̱ ni'ya-la̱ Priscila ko̱ Aquila. Ti̱ìxat'eì jè Epeneto xi 'ñó matsjakeè nga jè kòkjeiín ítjòn-la̱ i̱t'aà ts'e̱ Cristo ya̱ i̱'nde Acaya. 6 Ti̱ìxat'eì jè María, chjo̱ón xi 'ñó ndaà kisìxá i̱t'aà tsa̱jòn. 7 Ti̱ìxat'eì jè Andrónico ko̱ Junias, xi xinguiaá ma nga tañà tsitsa̱jnaya-je̱n nda̱yá. Jñà xi̱ta̱ xi tsibíxáya-la̱ Cristo 'ñó matsjakeè xi̱ta̱ koi. Ko̱ ìsa̱ ítjòn kijtseèxkon 'én-la̱ Cristo koni 'an. 8 Ti̱ìxat'eì jè Amplias, jè xi̱ta̱ xi 'an 'ñó matsjakeè i̱t'aà ts'e̱ Na'èn-ná. 9 Ti̱ìxat'eì jè Urbano xi tañà síxáko̱-na̱ i̱t'aà ts'e̱ Cristo Jesús ko̱ jè Estaquis xi 'an 'ñó matsjakeè. 10 Ti̱ìxat'eì jè Apeles xi ndaà kixi̱ mokjeiín-la̱ i̱t'aà ts'e̱ Cristo. Ti̱ìxat'eì jñà xi̱ta̱ xíkjín xi ya̱ títsa̱jna ni'ya-la̱ jè Aristóbulo. 11 Ti̱ìxat'eì jè Herodión xi xinguiaá ma. Ti̱ìxat'eì jñà xi̱ta̱ xíkjín xi ya̱ títsa̱jna ni'ya-la̱ Narciso xi Na̱'èn-ná títsa̱jnako̱. 12 Ti̱ìxat'eì jè Trifena ko̱ Trifosa jñà íchjín xi 'ñó síxá-la̱ Na̱'èn-ná, ko̱ tichjaá Pérsida xi 'ñó matsjachaá nga ti̱koa̱ ndaà síxá-la̱ Nainá. 13 Ti̱ìxat'eì jè Rufo xi xó jaàjiìn-ne Nainá. Ko̱ nea̱-la̱ xi 'an k'oa̱ ti s'ín beètakoàn koni tsà nea̱-na̱. 14 Ti̱ìxat'eì jè Asíncrito, jè Flegonte, jè Hermas, jè Patrobas, jè Hermes ko̱ xi̱ta̱ 'ntsé xi ya̱ títsa̱jnako̱. 15 Ti̱ìxat'eì jè Filólogo, jè Julia, jè Nereo ko̱ ndichja, ko̱ Olimpas, ngats'iì xi̱ta̱ xi mokjeiín-la̱ i̱t'aà ts'e̱ Cristo xi ya̱ títsa̱jnako̱. 16 Jñò nga jngoò ìjngoò, k'e̱ nga si̱ìxat'aà xinguio̱o, nguì ko̱ó ini̱ma̱-nò ti̱hixat'aà xinguio̱o nga ko̱ o̱kixi̱-nò. Ngats'iì xi̱ta̱ na̱xa̱ndá-la̱ Cristo xi i̱ títsa̱jna síhi̱xat'aà-nò. 17 Ndí 'ntsè k'oa̱s'ín bìtsi'bà-nò nga chítsejèn-là jñà xi̱ta̱ xi sijòya ko̱ xi sikitsón-jiìn koni s'ín mokjeiín-nò, jñà xi kondra̱ f'iì-la̱ kjo̱hítsjeèn koni s'ín kichíta'yà jñò. Ti̱nchat'aàxìn-là jñà xi̱ta̱ koi. 18 Jñà xi̱ta̱ koi, mìtsà Na̱'èn-ná Jesucristo síxá-la̱, tà yijo-la̱á síxátjì. 'Én sin 'én ndaà chja̱ nga kona̱cha̱n-la̱ xi̱ta̱ xi mì kiì ndaà machi̱ya-la̱. 19 'An matsjaà-na i̱t'aà tsa̱jòn nga jye ndaà na'yà-nò nga ndaà nìkitasòn. Ta̱nga 'an mejèn-na nga xi̱ta̱ chji̱ne̱e kàtama i̱t'aà ts'e̱ kjoa̱ xi ndaà tjín. Ko̱ jñà kjoa̱ xi ch'o tjín, kj'eè kiì nà'yà-nò. 20 Jè Nainá xi tsjá-ná kjoa̱'nchán, tà chibaá chija-la̱ nga ya̱ si̱kíjnangui ntso̱ko̱ò jè xi̱ta̱ nei̱í mé-ne nga ko̱ma ki̱nchanè. Kjo̱ndaà-la̱ Na̱'èn-ná Jesucristo kàtìjna-ko̱-nò. 21 Tísíhixat'aà-nò jè Timoteo xi tañà nìxákjo-je̱n, ko̱ Lucio, ko̱ Jasón ko̱ Sosípater jñà xi xi̱ta̱ xinguia̱a ma. 22 'An xi Tercio mì-na̱, xi tikji-nò xo̱jo̱n jè, i̱t'aà ts'e̱ Na'èn-ná, sìhixat'aà-nò. 23 Ti̱koa̱ tísíhixat'aà-nò Gayo; 'an i̱í tìjna i̱ ni'ya-la̱ nga ti̱koa̱ i̱ bixoña ngats'iì xi̱ta̱ na̱xa̱ndá-la̱ Cristo. Tísíhixat'aà-nò Erasto xi̱ta̱ xi bítjò to̱n ts'e̱ ni'ya osen, ti̱koa̱ síhixat'aà-nò jè 'ntsé xi 'mì Cuarto. 24 Ngats'io̱o, jè kàtìjna-ko̱-nò kjo̱ndaà-la̱ Jesucristo xi otíxoma-ná. 25 Jeya kàtíjna jè Nainá xi tíjnako̱-nò. Jè xi komà tsjá-nò nga'ñó ti̱koa̱ komà kixi̱ si̱ikítsa̱jna-nò koni tsò 'én ndaà-la̱ Nainá xi 'an okoòya-nò ko̱ jñà 'én xi nokjoàyajiìn-nò i̱t'aà ts'e̱ Na̱'èn-ná Jesucristo. Nga jyeé tí'ya-la̱ kjoa̱ xi tjí'ma-la̱ Nainá skanda sa̱ kjòtseè; 26 ta̱nga i̱'ndei̱ jye ki'ya-la̱ koni s'ín tíchja̱ Xo̱jo̱n-la̱ Nainá xi kiskiì jñà xi̱ta̱ xi kiìchja̱ ngajo-la̱ Nainá kjòtseè. K'oa̱s'ín tíchja̱ kjo̱tíxoma-la̱ Nainá xi tíjna ni̱ta̱ mé na̱chrjein-nè. Jè kjoa̱'ma-la̱ Nainá, jye kis'eèno̱jmí yije-la̱ ngats'iì xi̱ta̱ na̱xa̱ndá xi tjín nga tíjtsa̱ i̱sò'nde mé-ne nga kàtasíkitasòn-ne koni s'ín mokjeiín-la̱. 27 Jè Nainá xi ta̱jngoò ma-ne, xi tjín-la̱ kjoa̱chji̱ne̱, kàtas'e-la̱ kjoa̱ jeya i̱t'aà ts'e̱ Jesucristo ni̱ta̱ mé na̱chrjein-ne. K'oa̱s'ín kàtama.
