1 Ngats'iì xi̱ta̱ kàtasíkitasòn-la̱ xi xi̱ta̱xá titsa̱jna, nga Nainá kitsjaà-la̱ kjo̱tíxoma. Jñà xi xi̱ta̱xá títsa̱jna, Nainá kitsjaà-la̱ xá. 2 Jñà xi̱ta̱ xi bitsa̱jna tájaà-la̱ kjo̱tíxoma-la̱ xi̱ta̱xá, kondra̱á bitsa̱jna-la̱ jñà xi̱ta̱ xi Nainá kitsjaà-la̱ xá. Jñà xi̱ta̱ koi, ti̱ yijo-la̱á tibinè-la̱ kjo̱'in. 3 Jñà xi̱ta̱xá mìtsà koi xá títsa̱jna-ne nga jñà ki̱nchaxkón-la̱ xi̱ta̱ xi ndaà s'ín, jñà-né xi̱ta̱ xi ch'o tjín kjoa̱ xi s'ín. Tsà mejèn-lè nga mì kiì ki̱skón-la̱ xi̱ta̱xá, ndaà t'i̱in, ko̱ jñà xi̱ta̱xá ndaà si̱ìkíjna-lè. 4 Jñà xi xi̱ta̱xá tjín-la̱, xá ts'e Nainá nchisíkitasòn, mé-ne nga ndaà ki̱jna-ne. Ta̱nga tsà ch'o tjín kjoa̱ xi ti'nì, ti̱skón-la̱ xi xi̱ta̱xá tjín-la̱, nga tjí'nde-la̱ nga tsjaà-le kjo̱'in. Nga xá-la̱ Nainá nchis'ín k'e̱ nga bìndajiìn kjoa̱ ko̱ nga tsjá-la̱ kjo̱'in jñà xi̱ta̱ xi ch'o s'ín. 5 K'oa̱á ma-ne nga mochjeèn-né nga ndaà si̱kitasòn-lá jñà xi xi̱ta̱xá títsa̱jna, mìtsà tà koi-ne nga kjo̱'in tsjá-ná; koi-né nga xó k'oa̱s'ín beè-la̱ takoán nga tjínè-ná nga si̱ki̱tasoán. 6 Koií kjoa̱-la̱ nga tikoa̱ machjí to̱n sá, nga jñà xi̱ta̱xá k'oa̱á s'ín nchisíkitasòn-la̱ Nainá ko̱ kjit'aà na̱chrjein k'oa̱tjín xá xi nchis'ín. 7 Tíchjió yije mé xi kitje̱n-nò. Jè xi kitje̱n-la̱ to̱n sá, kàtichjí. Jè xi kitje̱n-la̱ tsojmì xi machjítji, kàtichjítji. Jè xi̱ta̱ xi mochjeèn-la̱ nga jcha̱xkón, kàtayaxkón. Jè xi̱ta̱ xi mochjeèn-la̱ nga ndaà kíjna, ndaà ti̱kíjnaà. 8 Kì mé xi jmeè'tioòn yijo-nò. Ta̱nga kitjeén-nò ts'e̱ kjoa̱tjòcha i̱t'aà ts'e̱ xi̱ta̱ xinguio̱o. Nga jè xi matsjakeè xíkjín jye kisìkitasòn yije Kjo̱tíxoma. 9 Jñà kjo̱tíxoma tsò-ne: "Kì kjoa̱ chijngui 'nì, kì xi̱ta̱ nìk'iìn, kì chijé 'nì, kì 'én ndiso nokjoì, kì maxìtakòn-chiì xingui̱i". Ngats'iì kjo̱tíxoma koi, ko̱ xi kjeií, ya̱á mangásòn yije jè kjo̱tíxoma xi tsò: "Ti̱tsjachi xi̱ta̱ xingui̱i koni tsà ti yijo tsi̱ji-ne." 10 Jè xi matsjakeè xíkjín, mìtsà ch'o síko̱ xi̱ta̱ xíkjín. Jè xi matsjakeè xíkjín, jye ndaà tísíkitasòn Kjo̱tíxoma. 11 K'e̱ nga koa̱s'ín s'eén yijeé kjoa̱ koi, jcha̱-ná na̱chrjein i̱'ndei̱ mé kjoa̱ xi tíma nga jye ijchò chi̱ba̱-la̱ nga sikjaà-lá yijo-ná nga titsafè. Jye 'ñó kjòchrañàt'aà na̱chrjein nga ki̱tsa̱jna'ndia̱á kjoa̱ ts'e̱ jé-ná, mì k'oa̱á-ne koni k'e̱ nga sa kòkjeiín-ná. 12 Ni̱tje̱n jye tífahato, jye tímachrañà na̱chrjein nga s'e̱ i̱sén nga ki̱tjojen ìjngoò k'a Na'èn-ná. Ki̱nachrjenguiaá nga'tsiì kjoa̱ xi ma ñánda nga jñò chon ko̱ chjoé nga'ñó-la̱ Nainá koni s'ín machjeén ñánda iseèn choòn koni tsà ki̱cha̱ ts'e̱ soldado. 13 K'oa̱á s'ín iseèn ki̱tjá koni na̱chrjein nga ndaà si̱jchá yijo-ná. Mì kì mochjeén nga taxki̱ chji̱neé tsojmì ko̱ nga ma'chiaá. Mì kiì mochjeèn nga íchjín kjóhijtakoa̱á, ko̱ mì kì ma taxki̱ si̱koaá yijo-ná. Mì kiì mochjeèn nga xi̱ta̱ kixkaànkoa̱á ko̱ mì kiì mochjeèn nga kjoa̱xìtakòn kichjà-lá xinguia̱á. 14 K'oa̱á s'ín ti̱jchá yijo-nò koni s'ín kis'iìn jè Na̱'èn-ná Jesucristo, kì kì nìkitasòn-là yijo-nò kjoa̱ ch'o xi síjé.
