1 K'e̱é kijtseè jè Orrè nga jaàxìn ítjòn jngoò sello. I̱kjoàn kiì'nchré jngoò-la̱ jñà xi ñijòn ma-ne xi títsa̱jnakon nga kiìchja̱. K'oa̱á kitsò koni ma ch'o̱n nga one, kitsò: —Nchroboí. 2 Kiskoòtsejèn, k'e̱é kijtseè jngoò kohòyo̱ xi chroba kji; jè xi tíjnakjá-la̱ kohòyo̱, kjina'ya tsja jngoò arco xi mochjeén k'e̱ nga tjín kjo̱jchán; i̱kjoàn kitjoé jngoò-la̱ corona xi si'a sko̱ xi̱ta̱ k'e̱ nga síkijne; kiì nga jye kisìkijne mé-ne nga si̱ìkijne ìsa̱-ne. 3 Jè Orrè, k'e̱ nga jaàxìn sello xi ma-ne jò, kì'nchrè-la̱ jè xi ma-ne jò xi títsa̱jnakon nga kitsò: —Nchroboí. 4 Ko̱ ìjngoò kohòyo̱ itjo xi inì kji; jè xi tíjnakjá-la̱, kitjoé jngoò-la̱ ki̱cha̱ ndojò xi 'ñó je kji, ti̱koa̱ kitjoé-la̱ nga'ñó nga katjaháxìn kjoa̱'nchán xi tjín i̱t'aà nangui mé-ne nga katasík'en-ne xíkjín jñà xi̱ta̱. 5 Jè Orrè, k'e̱ nga jaàxìn sello xi ma-ne jàn, kì'nchrè-la̱ jè xi ma-ne jàn xi títsa̱jnakon nga kitsò: —Nchroboí. K'e̱ nga kiskoòtsejèn, kijtseè íjngoò kohòyo̱ xi jmà kji; jè xi tíjnakjá-la̱ kohòyo̱, jngoò libra tjíya tsja jè xi machi̱ba̱ya-ne tsojmì. 6 Kì'nchrè jngoò-la̱ jta̱ ya̱ jngoò osèn-la̱ jñà xi ñijòn ma-ne xi títsa̱jnakòn nga kitsò: —Nga jngoò niso trigo, jngoò na̱chrjein chjí-la̱ chi̱'nda tjín-ne. Ko̱ nga jàn niso cebada, ti̱koa̱á jngoò na̱chrjein chjí-la̱ chi̱'nda tjín-ne. Kì tà nìkitsòn-jen jè asìti̱ ko̱ vino. 7 Jè Orrè, k'e̱ nga jaàxìn sello xi ma-ne ñijòn, kì'nchrè jta̱-la̱ jè xi ma-ne ñijòn xi títsa̱jnakon nga kitsò: —Nchroboí. 8 Kiskoòtsejèn, kijtseè jngoaà kohòyo̱ xi sinè kji. Jè xi tíjnakjá-la̱ “Kjoa̱biyaà” 'mi 'ín-la̱; ìjngoò tji̱ngui-la̱ xi “I̱'nde ts'e̱ mik'en” 'mì. Kitjoé-la̱ kjo̱tíxoma nga ngats'iì xi̱ta̱ xi tjín i̱sò'nde, xi ñijòn xi̱ta̱, jngoò ki̱yá xi kjoa̱ ts'e̱ kjo̱jchán, kjoa̱ ts'e̱ kji'nchrá, kjoa̱ ts'e̱ ch'in ko̱ kjoa̱ ts'e̱ cho̱ ts'e̱n xi tjín i̱jiìn ijñá si̱ì'ken 9 Jè Orrè, k'e̱ nga jaàxìn sello xi ma-ne 'òn, 'an kijtseè ya̱ i̱ngui ímixa̱ tsjeè-la̱ Nainá títsa̱jna ini̱ma̱-la̱ jñà xi̱ta̱ xi kinìk'en nga koiì kjoa̱-la̱ 'én-la̱ Nainá, ti̱koa̱ koiì kjoa̱-la̱ nga kixi̱ kitsjá 'én-la̱ Nainá. 10 'Ñó nchichja̱ nga tsò: —Na̱'èn xi ji̱ sabà tìhotíxomoi, ji̱ xi nguì tsjeè tijni ko̱ nguiì kjo̱kixi̱, skanda mé na̱chrjein kíndaàjiìn-la̱ nga k'oi̱-la̱ kjo̱'in jñà xi̱ta̱ xi tjín ján i̱sò'nde, jñà xi kisìk'en-naje̱n. 11 K'e̱é kits'iì-la̱ nikje xi chroba kjoàn, ki'mì-la̱ nga kàtasíkjáya chiba na̱chrjein ìsa̱ skanda k'e̱ nga ko̱jngoò jñà xi 'ntse̱ joó i̱t'aà ts'e̱ Cristo xi ti̱koa̱ ngásòn xá-la̱ Nainá ki̱yájiìn-ne." 12 Jè Orrè, k'e̱ nga jaàxìn sello xi ma-ne joòn, kiskoòtsejèn nga j'iì jngoò ch'ón xi 'ñó ts'a. Jè ts'oí, jmà kji komà koni nikje jmà, ko̱ jè sá inì kji komà koni jní. 13 Jñà ni'ño xi tjín ngajmiì chixòt'aà nangui koni ma jñà toò iko̱ xkoén nga bixòngui k'e̱ nga 'ñó 'ba tjo̱. 14 Jè ngajmiì k'oa̱ás'ín kichijà koni jngoò xo̱jo̱n xi ma maxkóya; ngats'iì jñà nindoò ko̱ nanguijiìn ndá xi tjín i̱jiìn ndáchikon jaatjìya-la̱ ya̱ i̱'nde ñánda títsa̱jna. 15 Jñà xi̱ta̱xá ítjòn xi tjín i̱sò'nde, ko̱ xi̱ta̱ xi 'ñó ndaà yaxkon-la̱, ko̱ xi̱ta̱ nchi̱ná, ko̱ xi̱ta̱ sko̱-la̱ soldada, ko̱ xi̱ta̱ xi tse nga'ñó tjín-la̱, ko̱ xi̱ta̱ chi̱'nda, ko̱ xi̱ta̱ xi títsa̱jnandei̱í nga mìtsà nei̱ tjín-la̱, ya̱á tsibìtsa̱jna 'ma ñánda tjín nguijo ko̱ na̱xi̱ xi tjín-la̱ nindoò. 16 Kitsò-la̱ jñà nindoò ko̱ jñà na̱xi̱: —Ti̱katsjònè-náje̱n yijo-nò, tijtsa'ma-náje̱n mé-ne nga mì kiì skoe̱-naje̱n jè xi tíjnasòn íxi̱le̱ nga tíhotíxoma ko̱ ti̱koa̱ ki̱tsa̱jna'ma-la̱je̱n kjoa̱jti-la̱ ko̱ kjo̱'in xi tsjá jè Orrè. 17 Nga jye ijchò na̱chrjein-la̱ Nainá ko̱ Orrè nga ko̱ kjo̱jti-la̱, 'ñó tsee kjo̱'in tsjá. ¿Yá xi ko̱ma ki̱chíkjoa̱ko̱-la̱?
