1 Jè àkja̱le̱ tsakó jngoò-na xa̱jngá nandá xi kijna tsjeè tsjeè, jè nandá xi bítsa̱jnakoòn-ná ni̱ta̱mé na̱chrjein-ne. K'oa̱s'ín tsjeè kji koni chi̱tsín. Ya̱á tíbitjo ñánda síjna íxi̱le̱-la̱ Nainá nga tíhotíxoma ko̱ ya̱á tíbitjo ñánda tíjna jè Orrè. 2 Ya̱ jngoò osen ndi̱yá-la̱ na̱xa̱ndá tífa nandá. Ko̱ ya̱ ngobà ngobà xa̱jngá nandá, ya̱ síjna jè yá xi tsjá kjo̱bijnachon ni̱ta̱mé na̱chrjein-ne. Tejò k'a ojà-la̱ toò nga jngoò nó. Jngoò jngoò k'a ojà-la̱ toò nga ìjngoò ìjngoò sá. Jñà xka̱-la̱, k'oa̱ás'ín mochjeèn nga maxkiì-la̱ na̱xa̱ndá ts'e̱ i̱sò'nde. 3 Mì ti̱ mé kjoa̱ ch'o s'e̱-ne xi mì kiì sasén-la̱ Nainá. Ya̱á sasíjna jè íxi̱le̱-la̱ Nainá ko̱ ts'e̱ Orrè nga ko̱tìxoma. Ko̱ ngats'iì xi̱ta̱ chi̱'nda-la̱, ya̱á si̱ìxá-la̱. 4 Ngats'iì xi xi̱ta̱-la̱ ma, skoe̱xkon-né kó kji i̱sén-la̱ Nainá; ko̱ jè 'ín-la̱ Nainá ya̱á si̱t'aà i̱tjòn tjen-la̱. 5 Ya̱ i̱'nde jè, mì ti ko̱jñò-ne. Jñà xi̱ta̱ xi ya̱ títsa̱jna, mì ti̱ ni'ín ko̱chjeén-la̱ xi si̱ìhiseèn-la̱, ti̱koa̱á mì ti̱ ts'oí ko̱chjeén-la̱; nga jè sobá Na̱'èn-ná xi Nainá si̱ìhiseèn-la̱. Jñà xi̱ta̱ ko̱tìxoma ni̱ta̱ mé na̱chrjein-ne. 6 Jè àkja̱le̱ kitsò-na: —'Én koi, nguì k'oa̱á s'ín tjín nga ki̱tasòn; nguì 'én kixi̱-né. Jè Na̱'èn-ná xi Nainá xi síkíhichi̱ya-la̱ jñà xi̱ta̱ xi chja̱ ngajo-la̱, koií xá kisìkasén-ne àkja̱le̱-la̱ nga ko̱kò-la̱ xi chi̱'nda-la̱ ma jñà kjoa̱ xi ta ni̱to̱ón o̱ko̱ma. 7 —Ti̱ná'ya-ná. 'An, kjoi̱ ni̱to̱ón ìjngoò k'a. Mé tà ndaà-la̱ jñà xi síkitasòn jñà 'én xi kitsjaà Nainá koni s'ín tíchja̱ xo̱jo̱n jè. 8 'An-ná xi 'mì-na Juan, 'aán ki'nchré koa̱ kijtseè kjoa̱ koi. K'e̱ nga jye ki'nchré koa̱ jye kijtseè, tsohósijna xkó'nchi niniat'aà-la̱ jè àkja̱le̱ xi tíhokó-na̱ kjoa̱ koi, nga mejèn-na skoe̱xkoán. 9 Ta̱nga jè àkja̱le̱ kitsò-na̱: —Kì k'oa̱á 'nì. Jè Nainá jcha̱xkoín. An, ti̱koa̱á chi̱'nda-la̱ Nainá ma, koni ngaji̱, ko̱ xi̱ta̱ xingui̱ì xi chja̱ ngajo-la̱ Nainá, ko̱ ngats'iì xi̱ta̱ xi síkitasòn 'én xi tjít'aà xo̱jo̱n jè. 10 K'oa̱á ti̱s'ín kitsò-na̱: —Kì bìjna'ma jñà 'én xi Nainá kitsjà xi tjít'aà xo̱jo̱n jè, nga jyeé nchrobá machrañà na̱chrjein nga ki̱tasòn. 11 Jñà xi̱ta̱ xi mì tsà kixi̱ titsa̱jna nguixko̱n Nainá nga ch'o s'ín, ta k'oa̱s'ín katitsa̱jna. Ko̱ jñà xi tjín-la̱ kjoa̱kixi̱ ko̱ tsjeè títsa̱jna nga nguixko̱n Nainá, k'oa̱ ti̱ s'ín kàtasíkitasòn xi kjoa̱kixi̱ ko̱ kjoa̱tsjeè. 12 —Ti̱ná'ya, 'an, kjoi̱ ni̱to̱ón ìjngoò k'a. Ya̱á kjoi̱ikoa̱a chjí-la̱ xi tsjaà-la̱ xi̱ta̱ koni s'ín kis'iìn nga ìjngoò ìjngoò. 13 'An-ná xi tijna̱a ítjoàn skanda ta'tsen-la̱ kjoa̱ ko̱ nga skanda fehit'aà-ne. 'An-ná xi tsibì'tsiaà ko̱ xi sikjehit'aà-na kjoa̱. An-ná xi tijna̱a ítjoàn ko̱ xi fehit'aà-ne. 14 Mé ta ndaà-la̱ jñà xi̱ta̱ xi [jní-la̱ Orrè] sítsjeè-ne nikje-la̱ mé-ne nga tjó'nde-la̱ nga ski̱ne̱ toò-la̱ yá xi tsjá kjo̱bijnachon, ti̱koa̱ ko̱ma kjoa̱has'en xòhotjoa̱-la̱ jè na̱xa̱ndá. 15 Ta̱nga ndi̱tsiaán kítsa̱jna, ngats'iì jñà xi̱ta̱ xi ch'o s'ín, ko̱ jñà xi xi̱ta̱ tj'e, ko̱ jñà xi kjoa̱ chijngui s'ín, ko̱ jñà xi xi̱ta̱ sík'en, ko̱ jñà xi xkósòn beèxkón ko̱ ngats'iì xi tsjake kjoa̱ ndiso nga 'én ndiso chja̱. 16 —'An xi 'mì-na Jesús, 'aán kisìkasén-nò àkja̱le̱-na̱ nga tsjá-nò 'én i̱t'aà ts'e̱ kjoa̱ koi, jñò xi xi̱ta̱ na̱xa̱ndá-na̱ ma. 'An-ná jè jts'én xi itjot'aà-ne tje̱-la̱ xi̱ta̱xá ítjòn xi ki'mì David. 'An-ná ni'ño tsee xi 'ñó ote kji xi bitjokàtji k'e̱ nga ta̱jñòya. 17 Jè Ini̱ma̱ Tsjeè-la̱ Nainá ko̱ chjo̱ón-la̱ Orrè, tsò-né: —Nchroboí [Na̱'èn Jesús]. Jñà xi nchi'nchré, k'oa̱ ti̱ kàtatsò: —Nchroboí [Na̱'èn Jesús]. Jñà xi xíndá-la̱ ko̱ xi mejèn-la̱ nandá, kàtjanchrobá, kàt'iì kjo̱tjò nandá xi tsjá kjo̱bijnachon. 18 'An, k'oa̱á xan-nò, ngats'iò xi na'yà-là jñà 'én xi kitsjaà Nainá xi tjít'aà xo̱jo̱n jè: Tsà yá xi ki̱hit'aàsòn kjoa̱ xi tjít'aà xo̱jo̱n jè, Nainá k'oa̱á ti̱ s'ín tsjásòn-la̱ kjo̱'in koni s'ín tjít'aà xo̱jo̱n jè. 19 Tsà yá xi kjoa̱àxìn jngo-la̱ 'én xi kitsjaà Nainá xi tjít'aà xo̱jo̱n jè, Nainá, ti̱koa̱á kjoa̱àxìn kjo̱ndaà xi tjí'nde-la̱ nga ski̱ne̱ toò-la̱ yá xi tsjá kjoa̱binachon ko̱ mì kiì tsjá'nde-la̱ nga ya̱ kítsa̱jna na̱xa̱ndá tsjeè-la̱ Nainá koni s'ín tjít'aà xo̱jo̱n jè. 20 Jè xi beèno̱jmí kjoa̱ koi, k'oa̱á tsò: —Jon, kjoi̱ ni̱to̱ón ìjngoò k'a. K'oa̱ás'ín kàtama. Nchroboí Na̱'èn Jesús. 21 Kjo̱ndaà-la̱ Na̱'èn-ná Jesucristo kàtìjna-ko̱-nó ngats'ioò. K'oa̱ás'ín kàtama.
