1 Kijtseè jngoaá ngajmiì xi̱tse̱ ko̱ nangui xi̱tse̱. Jè ngajmiì xi kisijna ítjòn ko̱ nangui xi kisijna ítjòn, jyeé kichijà; ti̱koa̱á kichijà jè ndáchikon. 2 Ti̱koa̱ kijtseè jè na̱xa̱ndá tsjeè xi Jerusalén xi̱tse̱ 'mì, nga tínchrobájen ngajmiì nga nguixko̱n Nainá. K'oa̱ás'ín tíjnandaà koni jngoò chjo̱ón xi ndaà bíndaà yijo-la̱ nga jye ki̱xan-ko̱ x'i̱n-la̱. 3 Kiì'nchré-la̱ 'én xi 'ñó chja̱, xi ngajmiì i̱nchrobá-ne, xi tsò: —Chítsejèn-là Ni'ya Tsjeè-la̱ Nainá, jyeé kòbitjojen; Nainá ya̱á kíjnako̱ jñà xi̱ta̱; xi̱ta̱ na̱xa̱ndá-la̱á ko̱ma, nga jè sobà xi Nainá ki̱tso̱-la̱. 4 Jè sobà Nainá si̱ìxìjno yije ndáxko̱n; mì ti̱ kiì s'e̱-ne kjoa̱biya; mì ti̱ kiì s'e̱-ne kjoa̱ba; mì ti̱ kiì yá ski̱ndàya-ne; mì ti̱ kiì s'e̱-ne xi ijòjno ijòt'aà yijo-la̱, koi kjoa̱-la̱ nga jye tsato kjoa̱ jchínga. 5 Jè xi tíjnasòn íxi̱le̱ ts'e̱ kjo̱tíxoma, kitsò: —Chítsejèn-la̱, 'aán sìxi̱tse̱ya yije tsojmì xi tjín. I̱kjoàn kitsò-na̱: —Chjí, xo̱jo̱n tít'ei jñà 'én koi; nga nguì k'oa̱á s'ín tjín nga ki̱tasòn; nguì 'én kixi̱-né. 6 I̱kjoàn kitsò-na: —Jyeé tsitason yije. 'An-ná xi tijna̱a ítjoàn skanda ta'tsen-la̱ kjoa̱ kó nga skanda fehit'aà-ne. 'An-ná xi tsibì'tsiaà ko̱ xi sikjehit'aà-na kjoa̱. Ngats'iì xi xíndá-la̱, 'aán tsjaà kjo̱tjò-la̱ nandá xi tíbitjo ya̱ i̱'nde ñánda mì kiì xìya nandá mé-ne ko̱ma kíjnakon-ne ini̱ma̱-la̱ ni̱ta̱kjé-ne. 7 Jñà xi si̱ìkijne, jñà skoé kjo̱tjò ngats'iì kjo̱ndaà koi. 'Aán kóti̱jna-koa̱a nga Nainá ki̱tso̱-na ko̱ jñà i̱xti-na̱ ko̱ma. 8 Ta̱nga jñà xi̱ta̱ xi tsakjón, jñà xi mì kiì mokjeiín-la̱, jñà xi 'ñó ch'o s'ín, jñà xi xi̱ta̱ sík'en, jñà xi kjoa̱ chijngui s'ín, jñà xi xi̱ta̱ t'je, jñà xi xkósòn beèxkón, ngats'iì xi 'én ndiso chja̱, ján ki̱xo̱jiìn ñánda títì ni'ín jnga̱ ko̱ azufre; jè xi ma-ne jò kjoa̱biyaà. 9 J'iìkon jngoò-na̱ àkja̱le̱ jñà xi itoò ma-ne, xi ti̱koa̱ itoò chi̱tsín tjín-la̱, xi jncha kitseè xi itoò kjo̱'in xi fehit'aà-ne. Kitsò-na̱: —Nchroboí, kokoò-lè jè xi ko̱ma chjo̱ón-la̱ Orrè. 10 I̱t'aà ts'e̱ Ini̱ma̱ Tsjeè-la̱ Nainá, jè àkja̱le̱ kiìko̱ ini̱ma̱-na̱ jngoò nindoò xi je kji ko̱ 'nga kji. Tsakó-na jè na̱xa̱ndá xi je kji, na̱xa̱ndá tsjeè Jerusalén nga tínchrobá-jen-ne ngajmiì nga nguixko̱n Nainá. 11 Jè na̱xa̱ndá tsjeè Jerusalén, oteé tsejèn xi kjoa̱ ts'e̱ kjoa̱jeya-la̱ Nainá. K'oa̱ás'ín ote kji koni ndo̱jo̱ chjí xi 'ñó ndaà kjoàn, koni ndo̱jo̱ xi jaspe 'mì nga ote kji koni chi̱tsín. 12 Nga jngoò itjandiì, jè na̱xa̱ndá, chrjó nda̱jo̱ tjíndiì-la̱ xi 'ñó je kji ko̱ 'ñó 'nga kji. Tejò xòhotjoa̱ tjín-la̱. Nga jngoò ìjngoò xòhotjoa̱, jngoò àkja̱le̱ síjnajto. Ti̱koa̱ ya̱ tjít'aà 'ín-la̱ nga tejò na̱xa̱ndá xi ya̱ inchrobát'aà-ne i̱xti-la̱ Israel. 13 Ya̱ kixi̱-la̱ ñánda bitjokàjiìn-ne ts'oí, jàn xòhotjoa̱ tjín-la̱, ya̱ kixi̱-la̱ ñánda kahátji-ne ts'oí, jàn xòhotjoà tjín-la̱. Ya̱ norte, tikoa̱á jàn xòhotjoa̱ tjín-la̱, ya̱ sur, tikoa̱ jàn xòhotjoa̱ tjín-la̱. 14 Jè chrjó nda̱jo̱ xi tjíndiì-la̱ na̱xa̱ndá, tejò chrjó nda̱jo̱ xi ya̱ tjít'aà nga tejò 'ín-la̱ xi̱ta̱ xi tejò ma-ne xi i̱t'aà ts'e̱ Orrè kisìxáya-la̱. 15 Jè àkja̱le̱ xi tíchja̱ko̱-na, jngoò ki̱cha̱ kjinaya tsja xi nguiì oro xi koni kji yá xi ma machi̱ba̱-ni. Jè kisìkjeén nga ma kisìchi̱ba̱ na̱xa̱ndá ko̱ xòhotjoa̱-la̱ ko̱ chrjó nda̱jo̱-la̱. 16 Jè na̱xa̱ndá k'oa̱ás'ín kijna nga ñijòn chrja̱ngui̱ tjín-la̱. Koni kji ndojò, k'oa̱á tikji tiyà-ne. Jè àkja̱le̱, k'e̱ nga kisìchi̱ba̱, jò jmì ko̱ jò sindo kilometro tjín-la̱. Ngàsòn chi̱ba̱ tjín-la̱ nga ndojò ko̱ nga tiyà ko̱ nga 'nga. 17 I̱kjoàn kisìchi̱ba̱ jè chrjó nda̱jo̱. Jngoò sindo̱ ko̱ ichàn ñijòn xkó tsja tjín-la̱ xi chi̱ba̱-la̱ xi̱ta̱ xi tísíkjeén jè àkja̱le̱, [jè xi ichán nanga tjín-ne]. 18 Jè chrjó nda̱jo̱ xi tjíndiì-la̱ na̱xa̱ndá, koií tjíndaà-ne nda̱jo̱ chjí xi 'mì jaspe. Ko̱ jè na̱xa̱ndá, nguiì oro sobà-né. K'oa̱ás'ín ote kji koni chi̱tsín tsjeè. 19 Jñà tatsen chrjó xi tjíndaà-ne nga tíchjoandiì-la̱ na̱xa̱ndá, ngui nda̱jo̱ chjí yijàjno xi 'ñó ndaà kjoàn. Jè xi ítjòn, jè nda̱jo̱ xi 'mì jaspe; xi ma-ne jò, nda̱jo̱ xi 'mì zafiro; xi ma-ne jàn, nda̱jo̱ xi 'mì ágata; xi ma-ne ñijòn, nda̱jo̱ xi 'mì esmeralda; 20 xi ma-ne 'òn, nda̱jo̱ xi 'mì ónice; xi ma-ne joòn, nda̱jo̱ xi 'mì cornalina; xi ma-ne itoò, nda̱jo̱ xi 'mì crisólito; xi ma-ne jiìn, nda̱jo̱ xi 'mì berilo; xi ma-ne ñijaàn, nda̱jo̱ xi 'mì topacio; xi ma-ne te, nda̱jo̱ xi 'mì crisoprasa; xi ma-ne tejngoò, nda̱jo̱ xi 'mì jacinto; xi ma-ne tejò, nda̱jo̱ xi 'mì amatista. 21 Jñà xòhotjoa̱ xi tejò ma-ne, tejò nda̱jo̱ perla tjíndaà-ne. Nga jngoò ìjngoò xòhotjoa̱ jngoò perla tjíndaà-ne. Ndi̱yá teè-la̱ na̱xa̱ndá, nguiì oro sobà-né koni chi̱tsín xi ma chítsejèn-ya. 22 Ya̱ i̱jiìn na̱xa̱ndá, ni̱jngoò i̱ngo̱ kijtseè; nga jè sobà xi ma i̱ngo̱-la̱ na̱xa̱ndá, jè Nainá xi tíjna ítjòn nga ta jè tajngoò-né xi 'ñó tsee nga'ñó tjín-la̱ ko̱ jè Orrè. 23 Jè na̱xa̱ndá, mì kiì mochjeèn-la̱ jè ts'oí ko̱ sá nga sihi̱sèn-la̱. Nga jè sobà kjoa̱ i̱sén-la̱ Nainá sihi̱sèn-la̱; ko̱ jè Orrè ma ni'ín-la̱. 24 Ngats'iì jñà xi̱ta̱ na̱xa̱ndá ts'e̱ i̱sò'nde kinchima iseèn-né i̱t'aà ts'e̱ ni'ín-la̱. Ko̱ jñà xi̱ta̱xá ítjòn xi tjín i̱sò'nde, kji̱ko̱ kjoa̱nchi̱ná-la̱ nga ya̱ si̱ìnga̱tsja. 25 Jñà xòhotjoa̱-la̱ na̱xa̱ndá, mì kiì si̱chjoájto nga kjit'aà na̱chrjein; nga ya̱ na̱xa̱ndá, mì kiì ko̱jñò. 26 Ngats'iì na̱xa̱ndá kjoi̱ko̱ ngats'iì kjoa̱ nchi̱ná-la̱ ko̱ ngats'iì tsojmì xi 'ñó chjí-la̱ nga ya̱ si̱ìnga̱tsja. 27 Ya̱ i̱'nde jè ni̱mé kjoa̱has'en xi tjé kjoàn xi ch'o s'ín ko̱ xi kjoa̱ ndiso. Tà jñà kjoa̱has'en xi tjít'aà 'ín-la̱ jè xo̱jo̱n-la̱ Orrè xi ts'e̱ kjoa̱bijnachoòn.
