1 ’Chjí jngoò-la̱ xo̱jo̱n jè àkja̱le̱-la̱ na̱xa̱ndá-na̱ xi tíjna ján Éfeso: “Kií tsò jè xi itoò ni'ño tjíya tsja kixi̱, jè xi tsó'bajiìn osen-la̱ jñà candelero xi itoò ma-ne xi nguiì ki̱cha̱ oro, tsò-né: 2 Tìbe-ná xá-nò, 'ñó tìtsa̱nìxá ko̱ nga mì kiì bijta-nò. Ti̱koa̱á tìbe-ná nga mì ti̱ kiì chíkjoa̱ko̱-nò jñà xi̱ta̱ xi ch'o s'ín. Ti̱koa̱á tìbe-ná nga jye kichí'taà jñà xi̱ta̱ xi tsò-la̱ yijo-la̱ nga Cristo tsibíxáya-la̱, ta̱nga mìtsà kixi̱ kjoa̱. Jye ki'yaà nga xi̱ta̱ ndiso-né. 3 Kjit'aà na̱chrjein 'ñó tse kjo̱'in tìtsa̱nìkjioón, ko̱ 'ñó tìtsa̱nìxá xi kjoa̱ ts'a̱n. Mì kiì bijta-nò. 4 Ta̱nga tjín jngoò-nò kjoa̱ xi ch'o tjín xi mì kiì sasén-na nga mì ti̱ k'oa̱á s'ín tjín-nò kjo̱tjòcha koni nga sa̱ ítjòn. 5 Jñò, ti̱kítsjeèn kó ki'nè nga sa̱ ítjòn k'e̱ nga kj'eè jé bixòjñoò. Ti̱kájno jé-nò. Ìjngoò k'a Nainá tanguít'aà-là. K'oa̱ s'ín t'e̱en koni ki'nè nga sa̱ ítjòn. Tsà majìn-nò, 'a̱n kjián nga tsjaà-nò kjo̱'in ko̱ kjoa̱áxìn-nò ni'ín candelero-nò ya̱ i̱'nde ñánda síjna. 6 Ta̱nga tjín kjoa̱ xi ndaà titsa̱'nè nga majtichaà kjoa̱ xi s'ín jñà xi̱ta̱ nicolaítas. 'A̱n, ti̱koa̱á majtike-ná. 7 Ndaà ti̱ná'yaà koni tsò Ini̱ma̱ Tsjeè-la̱ Nainá nga tíchja̱-la̱ na̱xa̱ndá-na̱. Jñà xi si̱ìkijne, 'aán tsjaà-la̱ nga ski̱ne̱ jñà toò-la̱ jè yá xi síkíjnakon-ná xi síjna ya̱ i̱'nde-la̱ Nainá ñánda 'ñó ndaà choòn." 8 ’Chjí jngoò-la̱ xo̱jo̱n jè àkja̱le̱-la̱ na̱xa̱ndá-na̱ xi tíjna ján Esmirna: “Kií tsò jè xi tsibìjna ítjòn ko̱ xi fehit'aà-ne, jè xi k'en ko̱ jahaya-la̱, tsò-né: 9 'An beè-ná xá-nò ko̱ kjo̱'in xi titsa̱nìkjioón ko̱ nga xi̱ta̱ i̱ma̱ 'mì-nò (ta̱nga i̱t'aà ts'e̱ Nainá, xi̱ta̱ nchiná-nó jñò.) Beè-ná nga ch'o chja̱jnò-nò jñà xi̱ta̱ xi tsò nga xi̱ta̱ judío-né ta̱nga mìtsà kixi̱ kjoa̱ nga xi̱ta̱ judío. Jñà xi̱ta̱ koi, ya̱á chja̱-ne ya̱ ni'ya ñánda maxkóya xi̱ta̱-la̱ xi̱ta̱ nei̱í. 10 Kì tsakjon-jèn jè kjo̱'in xi sikjioón, jè xi̱ta̱ neií ski̱nìsen-nò nda̱yá mé-ne nga skót'aà-nò kjoa̱ xi mokjeiín-nò; te na̱chrjein s'e-nò kjo̱'in. 'Ñó t'è-là takòn kóni skanda k'e̱ nga kiyá. Ko̱ 'aán tsjaà-nò jè kjoa̱bijnachoòn xi mì kiì fehet'aà koni jngo corona. 11 Ndaà ti̱ná'yaà koni tsò Ini̱ma̱ Tsjeè-la̱ Nainá nga tíchja̱-la̱ na̱xa̱ndá-na̱. Jñà xi si̱ìkijne, ni̱mé kjoa̱ xi ko̱matin i̱t'aà ts'e̱ kjoa̱biya xi ma-ne jò k'a." 12 ’Chjí jngoò-la̱ xo̱jo̱n jè àkja̱le̱-la̱ na̱xa̱ndá-na̱ xi tíjna ján Pérgamo: “Kií tsò jè xi tjín-la̱ ki̱cha̱ ndojò xi yijo kji nga ingajò ngobà, tsò-né: 13 An tìbeè-ná xá-nò, tìbeè-ná nga ya̱ titsa̱jnaà ñánda tíhotíxoma xi̱ta̱ nei̱í. Ta̱nga beè-ná nga kixi̱ titsa̱jnaà; mì kiì nìjchaàjiòn i̱t'aà ts'a̱n. Ti̱koa̱ beè-ná nga mì kiì bì'ma koni s'ín mokjeiín-nò i̱t'aà ts'a̱n, nas'ín k'e̱ nga k'en Antipas, xi̱ta̱ xi kixi̱ beèno̱jmí xi i̱t'aà ts'a̱n; nga ya̱á k'en i̱jiìn na̱xa̱ndá-nò ya̱ ñánda síxá xi̱ta̱ neií. 14 Ta̱nga tjín i'nga kjoa̱ xi mì kiì sasén-na nga ch'o titsa̱'nè, nga ya̱ títsa̱jnajiìn-nò xi̱ta̱ xi mokjeiín-la̱ koni s'ín tsakóya Balaam kjòtseé nga chinchá'a Balac nga mejèn-la̱ ko̱hótsji jé jñà xi̱ta̱ Israel nga kàtakine tsojmi xi xkóson kisinchat'aà-la̱; ti̱koa̱ kàtas'ín kjoa̱chijngui. 15 Ti̱koa̱á títsa̱jnajiìn i'nga-nò xi̱ta̱ xi mokjeiín-la̱ koni s'ín okóya jñá xi̱ta̱ nicolaítas. Jñà xi̱ta̱ koi, 'an majtike̱-ná. 16 K'oa̱á ma-ne ti̱kájno jé-nò, kì ti̱ jé binchaàtsji-nò. Tsà mì k'oa̱á s'e̱en, ni̱to̱ón kjián nga ska̱ànkoa̱a xi̱ta̱ koi. Jè sii̱kjeén ki̱cha̱ ndojò xi bitjo-ne ntso̱'ba. 17 Ndaà ti̱ná'yaà koni tsò Ini̱ma̱ Tsjeè-la̱ Nainá nga tíchja̱-la̱ na̱xa̱ndá-na̱. Jñà xi si̱ìkijne, 'aán tsjaà-la̱ tsojmì xi ski̱ne̱ xi 'mì manà xi 'a̱n tjí'ma-na; ti̱koa̱ tsjaà jngoò-la̱ ndí ndo̱jo̱ jtobá xi chroba kji; ya̱á tít'aà 'ín xi̱tse̱ xi mì yá beèxkon; tà jè skoe̱xkon xi tjoé-la̱." 18 ’Chjí jngoò-la̱ xo̱jo̱n jè àkja̱le̱-la̱ na̱xa̱ndá-na̱ xi tíjna ján Tiatira: "Kií tsò jè Ki'ndí-la̱ Nainá xi ko̱kjoàn xko̱n koni ni'ín, ko̱ jñà ntso̱ko̱, k'oa̱á kjoan koni ki̱cha̱ sinè xi 'mì bronce xi 'ñó ndaà kjochrja'i: 19 An, be-ná xá-nò ko̱ kjoa̱tjòchaà-nò, ko̱ kós'ín nga mokjeiín-nò koa̱ kós'ín titsa̱nìxá nga tíchíkjoa̱ko̱-nò xá xi titsa̱'nè. 'Beè-ná nga jè na̱chrjein i̱'ndei̱ ìsa̱á ndaà titsa̱nìxá mi k'oa̱-ne koni nga sa̱ ítjòn. 20 Ta̱nga tjín i'nga kjoa̱ xi mì kiì sasén-na nga ch'o titsa̱'nè, nga biì'nde-là jè chjo̱ón Jezabel xi tsò-la̱ yijo-la̱ nga ma-la̱ beèno̱jmíya mé kjoa̱ xi i̱skan ko̱ma nga kona̱cha̱n ko̱ okóya-la̱ xi̱ta̱ chi̱'nda-na̱ mé-ne nga kjoa̱chijngui kátas'ín-ne ti̱koa̱ kàtakine tsojmì xi xkósòn sinchát'aà-la̱. 21 'An títsja ìsa̱-la̱ na̱chrjein nga kàtasíkájno jé-la̱ nga mì ti̱ jé ko̱ótsji-ne, ta̱nga majìn-la̱ tsjeìn takòn kjoa̱chjingui xi s'ín. 22 Ta̱nga 'aán tsja-la̱ ch'in nga 'ñó tse kjo̱'in si̱ìkjeiín ko̱ jñà xi̱ta̱ xi ngásòn s'ín kjoa̱chjingui, tsà majìn-la̱ nga si̱ìkájno jé-la̱ nga mì ti̱ jé ko̱ótsji-ne. 23 Jñà xi̱ta̱ xi ya̱ fìt'aà-la̱, jngoò k'aá sik'en. Ko̱ ngats'iì xi̱ta̱ na̱xa̱ndá-la̱ Cristo skoe̱-né nga 'an-ná xi be kó tsò kjo̱hítsjeèn-la̱ ko̱ ini̱ma̱-la̱ jñà xi̱ta̱. Jñò, nga jngoò ìjngoò, k'oa̱ás'ín tsja-nò kjo̱'in koni tjín kjoa̱ xi titsa̱'nè. 24 Ta̱nga jñò ko̱ xi̱ta̱ xi i'nga xi títsa̱jna Tiatira xi mì kiì kota'yà kjo̱hítsjeèn xi mì kiì ndaà tjín, ti̱koa̱ kj'eè kiì beè jè xi tsò-la̱ jñà xi̱ta̱ koi kjoa̱tí'ma-la̱ xi̱ta̱ neií. Jñò, k'oa̱á xan-nò mì tsà ti̱ mé kjoa̱ si̱ìjé isa̱-nò. 25 Ta̱nga jñò, koni s'ín tjín jè kjo̱hítsjeèn ndaà xi titsa̱'nè, k'oa̱á s'ín t'e̱en skanda k'e̱ nga an kjoia̱a ìjngoò k'a. 26 Jñà xi si̱ìkíjne-la̱ kjoa̱ ts'e̱ jé ti̱koa̱ si̱ìkitasòn xá-na̱ koni s'ín mejèn-na̱ skanda k'e̱ nga kjoe̱hit'aà na̱chrjein, 'aán tsjaà-la̱ xá nga jñà ko̱tìxoma-la̱ ngats'iì na̱xa̱ndá xi tjín i̱sò'nde. 27 Jñà xi̱ta̱ xi ko̱tìxoma, nguì ko̱ó ki̱cha̱ ko̱tìxoma-ne. K'oa̱á s'ín si̱ìxkoa̱ya koni ti̱jí ni'nde. 28 Jè kjo̱tíxoma jè, ti̱jé-ne xi kitsjaà-na Na̱'èn-na̱. 'An ti̱koa̱á tsjaà-la̱ jè ni'ño tse xi bitjokátji k'e̱ nga ta̱jñòya. 29 Ndaà ti̱ná'yaà koni tsò Ini̱ma̱ Tsjeè-la̱ Nainá nga tíchja̱-la̱ na̱xa̱ndá-na̱.”
