1 Ji Filemón xi nda matsjake-lè xi ngásòn xá-la̱ Na̱'èn-ná titsa̱'né, 'an Pablo nga nda̱yá tijnaaya k'oi̱í kjoa̱-la̱ nga xá-la̱ Cristo tí'siaàn, tisìhixat'aà-lè ko̱ 'ntsè Timoteo. 2 Ti̱koa̱á tisìhixat'aà xi̱ta̱ na̱xa̱ndá-la̱ Cristo xi ya̱ bixoña ni'ya-lè ko̱ tichjaá Apia ko̱ 'ntsé Arquipo xi ti̱koa̱ xá-la̱ Nainá nchikjaán-tji koni 'a̱n. 3 Nainá xi Na̱'èn-ná, ko̱ jè Jesucristo xi otíxoma-ná kàtatsjá-nò kjo̱ndaà ko̱ kjoa̱'nchán ya̱ i̱jiìn ini̱ma̱-nò. 4 K'e̱ nga chjàt'aà-la̱ Nainá, kjit'aà na̱chrjein sìkítsjeèn i̱t'aà tsi̱ji, k'oa̱á ma-ne nga tsjaà-la̱ kjo̱ndaà Na̱'èn-ná, 5 K'oií kjoa̱-la̱ nga jye ki'nchrè nga ndaà mokjeiín-le i̱t'aà ts'e̱ Na̱'èn-ná Jesucristo ti̱koa̱ ndaà matsjachi ngats'iì xi̱ta̱-la̱ Nainá. 6 K'oa̱ás'ín sijét'aà-la̱ Nainá nga ndaà ki̱tasòn koni s'ín nokjoàkoi̱i xi̱ta̱ xi i'nga it'aà ts'e̱ kjoa̱ xi mokjeiín-le mé-ne nga isa̱ nda jcha̱xkoin ngats'iì kjo̱nda xi ko̱ma si̱kitasoán i̱t'aà ts'e̱ Cristo. 7 Ji̱ ndí 'ntsè, 'ñó tsja ma-na ko̱ ma'ñótakoàn i̱t'aà ts'e̱ kjoa̱tjòchaà xi tjín-le, nga i̱t'aà tsi̱ji-né, nga jye ndaà tinìjetakoìn ini̱ma̱-la̱ jñà xi̱ta̱-la̱ Nainá. 8 K'oa̱á ma-ne na̱s'ín i̱t'aà ts'e̱ Cristo tjí'nde-na̱ nga kinè-lè mé kjoa̱ xi s'i̱in, ta̱nga mì tsà ko̱s'ín tíbít'in-lè. 9 Ta jngoò kjo̱ndaà tísíjé-lè, nga̱ tíjiìn-ná nga tjòchaà 'yaá xinguia̱á. Ko̱ jyeé tíjiìn-le, 'an Pablo, jyeé xi̱ta̱ jchínga-ná, ti̱koa̱á nda̱yá tijnaa'ya xi jè nga̱tji-la̱ Cristo Jesús. 10 K'oa̱á ma-ne nga tísíjé jngoò-lè kjo̱ndaà nga ndaà chjoétjoi jè Onésimo xi koni ki'ndí-na̱ komà nga kòkjeiín-la̱ 'én ndaà-la̱ Nainá xi 'an tsibèno̱jmí-la̱ nga i̱ tijnaaya nda̱yá. 11 Nga sa̱ kjotseé, jè Onésimo, jngo xi̱ta̱ chi̱'nda xi mì kiì nda kjòchjeén-lè, ta̱nga i̱'ndei̱ jyeé nda ko̱chje̱én-ná ingajoá. 12 Tisìkasén ìjngoò k'a-lè, 'an nga 'ñó matsjake. 13 Ndaá-la s'e̱ tsa i̱ kíjnako̱-na mé-ne nga si̱ìchját'aà-na koni tsa ji tìnìchját'aà-ná, k'e̱ nga takó nda̱yá tijnaa'ya nga jè nga̱tji-la̱ 'én nda-la̱ Nainá xi kjoa̱ ts'e̱ Cristo. 14 Ta̱nga majìn-na nga kjo̱'ñó sikíjna tsà ngaji̱ mì kiì tíjngo takoìn, mé-ne jè kjo̱ndaà xi tísiíjé-le mì kjo̱'ñó ko̱ma-le; ini̱ma̱-le kji̱nchrobájiìn. 15 Tsà koi na̱chrjein, jè Onésimo, koií kjoa̱-la̱ tsasìt'aà xìn chiba na̱chrjein-lè mé-ne i̱'ndei̱ ko̱ma chjoétjò ijngoò k'a-ne nga ya̱ kíjnako̱ kjit'aà-lè. 16 Ta̱nga kì k'oa̱ás'ín ya takoìn koni tsà jngoò xi ta̱xki̱ chi̱'nda; ìsa̱ 'ñó ndaà cha̱takoìn koni tsà jngoò 'ntsì xi 'ñó ndaà matsjachi. 'An, 'ñó matsjakeè; ta̱nga ngaji̱ ìsa̱á 'ñó ti̱tsjachi mì tsà ta koi kjoa̱-la̱ nga chi̱'nda tsi̱ji ko̱ma, koi-né nga jye 'ntsè chibà i̱t'aà ts'e̱ Cristo. 17 Tsà kixi̱í kjoa̱ nga k'oa̱ s'ín yatakòn-ná nga 'ntsè chibá i̱t'aà ts'e̱ Cristo, chjoétjoi Onésimo koni tsà 'an xi tichjoétjò-ná. 18 Tsà tjín mé kjoa̱ xi ch'o kisìko̱-lè, koa̱ tsà mé xi kitje̱n-'tin-lè, 'aán tikíchjí-ná. 19 'An, Pablo, 'an sobá tíkji-lè xo̱jo̱n jè. 'An kíchjiá yije xi tje̱n-la̱. Mì kiì mochjeén nga 'an ko̱xán-lè, jyeé tíjiìn-lè nga 'a̱án kitje̱n-'tin-ná kjoa̱bijnachon-lè. 20 Ndí 'ntsè, k'oa̱ás'ín tisiíjé-le nga kàtasakó jngoò-na̱ kjo̱ndaà i̱t'aà tsi̱ji, koni s'ín o'kin-la̱ nga 'ntsé chibá i̱t'aà ts'e̱ Na̱'èn-ná; ti̱je takoìn ini̱ma̱-na̱ i̱t'aà ts'e̱ Cristo. 21 Be-ná nga si̱kitasòn-né; koa̱á ma-ne nga tisìkasén-le xo̱jo̱n jè; skanda 'beé-la̱ takoàn, nga ìsa̱á tsatoò s'i̱in koni s'ín tíxan-le. 22 K'oa̱á ti̱s'ín tíxan-le nga tikìjnandaà jngoò-ná i̱'nde ñánda ma síkjáya. K'oa̱ás'ín tikoña nga jè Nainá kji̱'nchré-né koni s'ín titsa̱nakjoàt'aà-là, nga tsjánde-na nga ko̱ma kjíkon-nò. 23 Tísíhixat'aà-le Epafras, xinguia̱á xi ngásòn nda̱yá titsa̱jna-je̱n nga jè nga̱tjì-la̱ Cristo Jesús. 24 Ti̱koa̱á tísíhixat'aà-le Marcos, Aristarco, Demas ko̱ Lucas, xi síchját'aà-na kjoa̱ ts'e̱ xá xi tìs'ia̱an. 25 Jè kàtìjnajiìn ini̱ma̱-nò kjo̱ndaà-la̱ Jesucristo xi otíxoma-ná.
