1 K'oa̱á ma-ne jñò 'ndí 'ntsè xi 'ñó matsjake̱-nò, ko̱ nga 'ñó makájno-na nga mejèn-na skoèxkon-nò, ko̱ nga nitsja-là ini̱ma̱-na̱, ko̱ jñò xi kjo̱tjò-na̱ ma i̱t'aà ts'e̱ xá-na, k'oa̱á xan-nò nga kixi̱ titsa̱jnako̱o Na̱'èn-ná, jñò xi 'ñó matsjake̱-nò. 2 Tìbìtsi'bà-la̱ jè Evodia ko̱ Síntique, nga ngásòn ndaà kàtjíko̱ xíkjín nga ndichja joó xi i̱t'aà ts'e̱ Na̱'èn-ná. 3 Ti̱koa̱ ngaji̱ ndí 'ntsè xi ngásòn ta̱ña nìxá, ti̱sijét'aà-le, ti̱chját'aà-la̱ íchjín koi; nga ndaà kisìxáko̱-na i̱t'aà ts'e̱ 'én ndaà-la̱ Nainá xi kjoa̱ ts'e̱ Cristo. Ko̱ jè Clemente ko̱ xi̱ta̱ xi i'nga ti̱koa̱á ndaà kisìxáko̱-na. Xi̱ta̱ koi, jye tjít'aà 'ín-la̱ xo̱jo̱n ts'e̱ kjoa̱bijnachon ján ngajmiì. 4 Tsja t'è-là ini̱ma̱-nò nga Na̱'èn-ná titsa̱jnako̱o. Ijngoò k'a k'oa̱ xan-nò: ¡Tsja t'è-là takòn! 5 Jñò, kàta'beè yije-nò xi̱ta̱ nga xi̱ta̱ ndaà 'mì-nò. Jyeé tímachraña nga kjoi̱í ìjngoò k'a Na̱'èn-ná. 6 Kiì mé kjoa̱ nìkájno. Ta isa̱á ti̱jét'aà-là Nainá k'e̱ nga mé xi mochjeén-nò. Ti̱koa̱ tjiì-là kjo̱ndaà. 7 K'oa̱á s'ín ko̱ma-ne nga tsjà-nò kjoa̱'nchán Nainá. Jè kjoa̱'nchán xi tsjá-nò fahatonè-la̱ koni s'ín bítsjeèn-la̱ xi̱ta̱. Kjoa̱'nchán jè, jè xi si̱ìkinda̱ ini̱ma̱-nò ko̱ kjo̱hítsjeèn-nò nga Cristo Jesús titsa̱jnako̱. 8 Ndí 'ntsè k'oa̱á xan-nò xi fehit'aà-ne. Ti̱kítsjeèn xi kjoa̱ kixi̱, kjoa̱ xi ndaà yaxkón, kjoa̱ xi ndaà tjín nga nguixko̱n Nainá, kjoa̱ xi tsjeè tjín, kjoa̱ xi ndaà sasèn-ná, ko̱ ngats'iì kjoa̱ xi ndaà na'yà-la̱. Ko̱ tsa tjín isa̱ kjoa̱ xi kj'ei̱í xi 'ñó nda tjín, xi ok'ín-la̱ nga 'nga kítsa̱jna, koií kjoa̱ ti̱kítsjeèn. 9 K'oa̱s'ín t'e̱en koni s'ín tsakoòya-nò, o̱kixi̱ xi an kitsjaà-nò, 'én xi kina'yá-ná, koni s'ín ki'ya-ná nga kis'ian, tákó k'oa̱s'ín t'e̱en. Nainá xi tsjaà-la̱ kjoa̱ 'nchán ini̱ma̱-ná, jè kíjnako̱-nò. 10 'Ñó matsja-na̱ koni síko̱-na Na̱'èn-ná nga ijchò na̱chrjein, ìjngoò k'a kinìkítsjeèn-ná. 'An k'oa̱ás'ín síkítsjeèn nga mìtsà kinìjcha̱ajñoò xi i̱t'aà ts'a̱n, tà jè-né nga mì kiì xátí kitjoò'nde-nò nga kinìchját'aà-ná. 11 Mìtsà koi kjoa̱-la̱ nga k'oa̱tíxan-nò tsà mé tsojmì xi chijat'aà-na̱. Jyeé kjò'nga-na nga majngoò takoàn mé xi tjín-na. 12 'Beè-ná kó ma nga i̱ma̱ tísíjchá yijo-na̱. Ti̱koa̱á be-ná kó ma k'e̱ nga tjín-na tsojmì. Jye tí'beè ni̱ta̱mé kjoa̱ xi tímat'ian. Te̱jé-na̱ tsà skiì tíjna i̱ntso'bà, ko̱ tsà kji̱'nchrá tìbiyaà, tsà ningui-na̱ tsojmì ko̱ tsà nìmé tsojmì tjín-na̱. 13 Ko̱ma yijeé-na ni̱ta̱mé kjoa̱-ne nga jé Cristo tsjá-na nga'ñó. 14 Ta̱nga jñò, tákó ndaà ki'nè-nò nga kinìjchát'aà-ná k'e̱ nga kjoa̱ tijna̱jñaà. 15 Jñò xi na̱xa̱ndá Filipo tsajòn, tíjiìn-nò nga ta jñò-nò xi kinìjchát'aà-ná mé xi kjòchjeén-na, jè na̱chrjein k'e̱ nga k'iaà nangui Macedonia k'e̱ nga sa tsibits'ia̱a nga kichjàko̱-nò 'én ndaà-la̱ Nainá xi kjoa̱ ts'e̱ Cristo. Ni̱ jngoò na̱xa̱ndá-la̱ Cristo xi kjei̱í xi ma-la̱ kisìjchát'aà-na. 16 Ti̱koa̱á k'e̱ nga tsohóti̱jna na̱xa̱ndá Tesalónica, jngoò jò k'a kanìkasén-ná kjo̱tjò xi kjòchjeèn-na. 17 Mìtsà mé kjo̱tjò tsa̱jòn xi mejèn isa̱-na, ta jè xi mejèn-na nga isa̱ nda kàtasíchikon-tin-nò Nainá. 18 Jyeé kiskat'aà yije-na ngats'iì xi kinìkasén-ná. Jyeé tjín yije-na xi mochjeén-na skanda ninguií-na nga jyeé j'iìko̱-na nga'ñó xi kinìkasén-ná ko̱ Epafrodito. Kjo̱tjò xi kinìkasén-ná k'oa̱ás'ín ngaya-la̱ koni chrjongó-la̱ Nainá xi 'ñó ndaà jne̱, jñà kjo̱tjò xi 'ñó ndaà sasén-la̱ Nainá. 19 K'oa̱á ma-ne, jè Nainá xi 'an kjit'aàtakoàn, tsjá yije-nò ni̱ta̱mé xi chijat'aà-nò koni s'ín jeya tjín kjoa̱ nchi̱ná xi tjín-nò nga Cristo Jesús titsa̱jnako̱o. 20 Jè Nainá xi Na̱'èn-ná, jeya katíjna ni̱ta̱ mé na̱chrjein-ne, ni̱ta̱ mé nó-ne. K'oa̱s'ín kàtama. 21 I̱t'aà ts'a̱n, ti̱ixat'aà yije jñà xi̱ta̱ na̱xa̱ndá-la̱ Cristo xi ya̱ títsa̱jna. Jñà xi̱ta̱ 'ntsé xi i̱ títsa̱jnako̱-na, ti̱koa̱á nchisíhixat'aà-nò. 22 Ngats'iì xi̱ta̱-la̱ Cristo síhixat'aà-nò. Jñà nchisíhixat'aà ítjòn-nò xi títsa̱jna ni'ya-la̱ César xi xi̱ta̱xá ítjòn ts'e̱ Roma. 23 Ngats'io̱o, jè kàtìjna-ko̱-nò kjo̱ndaà-la̱ Jesucristo xi otíxoma-ná. K'oa̱s'ín kàtama.
