1 K'e̱ nga jahas'en Jesús jè chitso, jahatot'aà xijngoaà ndáchikon koa̱ ijchò-ne na̱xa̱ndá-la̱. 2 Ya̱ ijchòko̱ jngoò-la̱ xi̱ta̱ xi mì kiì ma síhiníyá yijo-la̱; kjinasòn-la̱ na̱chanyá. K'e̱ nga kijtseè Jesús nga jñà xi̱ta̱ koi mokjeiín-la̱ i̱t'aà ts'e̱, kitsò-la̱ jè xi̱ta̱ xk'én: —Ji̱ ndí na̱'èn, tjì-la̱ nga'ñó yijo-lè; jé-lè jye kichàhat'aà-lè. 3 Jñà xi̱ta̱ xi okóya kjo̱tíxoma-la̱ Nainá xi kiskiì Moisés, tjín i'nga xi kitsò kjo̱hítsjeèn-la̱: Xi̱ta̱ jè, Nainá chja̱jno-la̱. 4 Jesús ni̱to̱ón kijtseya-la̱ koni sín nchisíkítsjen, kitsò-la̱: —¿Méne ko̱tsò-ne kjo̱hítsjeèn-la̱ ini̱ma̱-nò nga ch'o tsò-ne? 5 ¿Mé xi ìsa̱ chiba 'in tjín, tsà xán-la̱ jè xi̱ta̱ xi xk'én: “Jé-lè jye kichàhat'aà-lè”, ko̱ tsà xán-la̱: “Ti̱sítji̱ìn koa̱ ti̱tjeí?” 6 Kokoò-nò nga 'an xi Ki'ndí-la̱ Xi̱ta̱ xan-la̱ yijo-na̱, tjí'nde-na nga si̱ìjcha̱hat'aà-la̱ jé-la̱ xi̱ta̱ i̱ i̱sò'nde. K'e̱é kitsò-la̱ jè xi̱ta̱ xk'én: —Ti̱sítji̱in, chjoí na̱chan-lè, tin-ne ni'ya-lè. 7 K'e̱é tsasítje̱n jè xi̱ta̱ xk'én, kii-ne ni'ya-la̱. 8 K'e̱ nga kijtseè jñà xi̱ta̱ nga tsasítje̱n-ne jè xi̱ta̱ xk'én, tà k'oa̱á ko̱ma-la̱; k'e̱é jeya kisìkíjna Nainá nga k'oa̱s'ín tse nga'ñó tsjá-la̱ xi̱ta̱ i̱sò'nde. 9 Jesús kiì-ne i̱'nde jè. K'e̱ nga tífì, kijtseè jngoò xi̱ta̱ xi 'mì Mateo xi tíjnat'aà ími̱xa̱ ya̱ ñánda síkíchjítji tsojmì, to̱n xi fì Roma; kitsò-la̱: —Nchrobàtji̱ngui-ná. K'e̱é tsasítje̱n Mateo, kiìtji̱ngui-la̱ Jesús. 10 K'e̱ nga tíjnat'aà ímixa Jesús nga tíkjèn ya̱ ni'ya-la̱ Mateo, kjìn xi̱ta̱ ji xi ti̱koa̱ tsojmì síkíchjítji ko̱ xi̱ta̱ xi jé tjín-la̱. Ti̱koa̱ tsibitsa̱jnat'aà ími̱xa̱, tsakjènko̱ Jesús ko̱ jñà xi̱ta̱ xi kota'yàt'aà-la̱. 11 Ta̱nga jñà xi̱ta̱ fariseo, k'e̱ nga kijtseè xi̱ta̱ koi, kiskònangui-la̱ xi̱ta̱ xi kota'yàt'aà-la̱ Jesús, kitsò-la̱: —¿Mé-ne k'oa̱s'ín-ne maestro-nò nga xi̱ta̱ xi síkíchjítji tsojmì ko̱ xi̱ta̱ jé kjènko̱-ne. 12 Kiì'nchré Jesús, k'e̱é kitsò-la̱: —Jñà xi̱ta̱ xi mì ch'in tjín-la̱, mì chji̱ne̱xkiì mochjeén-la̱, jñà-né xi̱ta̱ xi xk'én xi mochjeèn-la̱ chji̱ne̱xkiì. 13 Tanguió chíta'yàhìsa̱ kó tsòya-ne Xo̱jo̱n-la̱ Nainá xi tsò: “An mejèn-na nga kàtas'e-nò kjo̱hi̱ma̱takòn, kì ta̱ tsjaà cho̱ nìk'eèn kjo̱tjo xi an 'biì-ná.” Mìtsà koi xá j'i̱-na an nga j'i̱kjaàjña xi̱ta̱ kixi̱, jñà-né xi̱ta̱ xi tjín-la̱ jé nga kàtasíkájno jé-la̱ nga mì ti̱ jé ko̱ótsji-ne. 14 Jè Juan xi kis'iìn bautizar xi̱ta̱, jñà xi̱ta̱ xi kota'yàt'aà-la̱ j'iìkon Jesús ñánda tíjna koa̱ kiskònangui-la̱, kitsò: —Nga̱je̱n ko̱ xi̱ta̱ fariseo kjit'a na̱chrjein bitsa̱jnachjan-je̱n. ¿Mé-ne jñà xi̱ta̱ tsi̱ji mìkì bitsa̱jnachjan-ne? 15 Jesús kitsò-la̱: —¿A baá bìtsa̱jna xi̱ta̱ k'e̱ nga s'eí tjín k'e̱ nga títsa̱jna osen xi kòbixan? Ta̱nga ki̱jchò na̱chrjein k'e̱ nga tjáxìn-la̱ x'i̱n xi kòbixan, k'e̱-né nga kítsa̱jnachjan xi̱ta̱. 16 ’Jngoò nikje i̱baà mì kiì ma sijto-ne ko̱ nikje xi̱tse̱; nga jè nikje xi̱tse̱, kjeènyó-né koa̱ ko̱tejnda-né jè nikje i̱baà. Ìsa̱ tse ko̱ma ñánda kixajnda kji. 17 Ti̱koa̱á mì kiì ma sinchá xán ixiì jè chrjoa̱ jchínga, jè xán ixiì ko̱tijnda-né jè chrjoa̱ jchínga koa̱ xíxteèn jè xán. Ti̱koa̱á chi̱ja jè chrjoa̱. Jè xán ixiì, chrjoa̱ xi̱tse̱é si̱nchá. K'oa̱ás'ín ndaà si̱nchá ingajò. 18 Ti̱k'e̱è-ne nga tíchja̱ Jesús, ijchò jngoò xi̱ta̱ sko̱-la̱ jñà xi̱ta̱ judío, tsasìxkónchit'aà-la̱, kitsò-la̱: —Ndí tsòti-na̱, sa̱ kò jye k'en; ta̱nga tsà ji̱ k'oín ko̱ tsà kjòt'aà-la̱ 'ntsei̱i, kíjnakon ìjngoò k'a-ne. 19 Tsasítje̱n Jesús, kiìko̱ jè xi̱ta̱ sko̱-la̱ ko̱ jñà xi̱ta̱ xi kota'yàt'aà-la̱. 20 K'e̱ nga nchifì, jngoò chjo̱òn ijchòtji̱ngui-la̱; chjo̱òn jè, jye ko̱ tejò nó xk'én nga tíxíxten-la̱ jní. Kiì kasìt'aà chraña-la̱ Jesús ya̱ i̱jto̱n íts'i̱ín nga kitsobà'ñó i̱tjòn nikje-la̱. 21 K'oa̱á s'ín tíhóko̱ ini̱ma̱-la̱: “Tsà tà jè sìkoa̱a nikje-la̱, ko̱ndaá-na.” 22 Jè Jesús kisíkáfaya, kijtseè chjo̱ón jè, kitsò-la̱: —Ndí nea̱, tjì-la̱ nga'ñó yijo-lè. Kòmandaà-ne koií-né nga mokjeiín-lè i̱t'aà ts'a̱n. Ti̱jè-ne hora kjòndaà-ne chjo̱òn jè. 23 K'e̱ nga i̱jchò Jesús ya̱ ni'ya-la̱ jè xi̱ta̱ sko̱-la̱ xi̱ta̱ judío, kijtseè músika̱ xi nchisíkjane nga jye ki̱ijiìn mik'en koa̱ kijtseè nga fìjen fìkjá xi̱ta̱ nga 'ñó nchikjindáya. 24 Kitsò-la̱: —Títjoò ni'ya; jè tsòti mìtsà kòbiyaà, tà kijnafè-né. Jñà xi̱ta̱, tà tsijnòkeè-né k'e̱ nga o̱kitsò Jesús. 25 Ta̱nga Jesús tsachrje ni'ya ngats'iì xi̱ta̱ xi títsa̱jna; k'e̱é jahas'en ni'ya, kiskoé tsja jè tsòti, koa̱ jè tsòti tsasítje̱n. 26 Nga kijndà i̱'nde jè, tsabísòn 'én i̱t'aà ts'e̱ kjoa̱ xi ko̱ma. 27 K'e̱ nga itjo-ne Jesús i̱'nde jè, jò xi̱ta̱ xi mì kiì tsejèn-la̱ kiìtji̱ngui-la̱; 'ñó kiìchja̱, kitsò-la̱: —¡Jcha̱hi̱ma̱takòn-náje̱n, ngaji̱ xi ya̱ nchrobàt'aà-ne tje̱-la̱ xi̱ta̱xá ítjòn David [nga ji tijna ngajo-la̱]! 28 K'e̱ nga jahas'en ni'ya Jesús, jñà xi̱ta̱ xi mì kiì tsejèn-la̱ i̱jchòkon. Jesús, kiskónangui-la̱, kitsò-la̱: —¿A mokjeiín-nò nga ko̱ma-na sindaà-nò? K'e̱é kitsò jñà xi̱ta̱ xi mì kiì tsejèn-la̱: —Jon, Na̱'èn. Ko̱maá-lè. 29 Jesús k'e̱é kisiko̱ jñà xko̱n, kitsò-la̱: —Jñò, koni s'ín mokjeiín-nò, k'oa̱s'ín kàtandaà-nò. 30 Jñà xi̱ta̱ xi mì kiì tsejèn-la̱, kitáxa̱-ne xko̱n koa̱ kjòndaà-ne. Jesús 'ñó tsibínè-la̱ nga kitsò-la̱: —Ndaà t'e̱en kinda̱ nga mì yá xi̱ta̱ xi skoe̱ kjoa̱ koi. 31 Ta̱nga jñà xi̱ta̱ koi, k'e̱ nga itjo-ne ni'ya, ti̱k'e̱é tsibíts'ia̱ nga tsibèno̱jmì nga kijndà i̱'nde jè, kós'ín kis'iìn Jesús. 32 K'e̱ nga jye nchifì-ne jñà xi̱ta̱ xi mì kiì tsejèn-la̱, j'iìko̱ jngoò-la̱ Jesús xi̱ta̱ xi mìkì ma chja̱ nga ini̱ma̱ ch'o-la̱ nei̱í tijiìn ini̱ma̱-la̱. 33 Jesús k'e̱ nga jye tsachrjekájiìn ini̱ma̱ ch'o-la̱ nei̱í xi tíjiìn ini̱ma̱-la̱ jè xi̱ta̱ xi mì kiì ma chja̱, ti̱k'e̱é komà kiìchja̱-ne. Ngats'iì xi̱ta̱ xi ya̱ títsa̱jna tà kjòxkón-la̱. Kitsò: —Kj'eè kiì 'yaá kjoa̱ xi k'oa̱s'ín ma i̱ i̱'nde Israel. 34 Ta̱nga jñà xi̱ta̱ fariseo kitsò: —Jè sobà xi̱ta̱ sko̱-la̱ xi̱ta̱ nei̱í tsjá-la̱ nga'ñó nga ma-la̱ ochrjekájiìn ini̱ma̱ ch'o-la̱ nei̱í xi tjín-la̱ xi̱ta̱. 35 Jesús tsajmeèjiìn ñánda na̱xa̱ndá i ko̱ na̱xa̱ndá jtobá nga tsakóya 'én-la̱ Nainá ya̱ ni'ya i̱ngo̱ sinagoga ts'e̱ na̱xa̱ndá koi. Kiìchja̱ya 'én ndaà-la̱ Nainá koni s'ín otíxoma Nainá; ti̱koa̱ kisìndaà-ne ngats'iì ch'in xi tjín-la̱ xi̱ta̱ nga xki xi ján ijòjno ijòt'aà yijo-la̱. 36 K'e̱ nga kijtseè Jesús nga kjìn ma xi̱ta̱, kjòhi̱ma̱keè nga 'ñó makájno-la̱ ko̱ mì yá xi osìko̱ nga jye títsjohoya k'oa̱á ngaya-la̱ koni orrè xi tsjìn-la̱ paxtò xi ko'ndà. 37 K'e̱é kitsò-la̱ xi̱ta̱ xi kota'yàt'aà-la̱: —Xi o̱kixi̱, 'ñó tse xá tjín xi i̱t'aà ts'e̱ 'Én-la̱ Nainá koni s'ín ma k'e̱ nga kjìn tsojmì majchá ta̱nga jñà xi̱ta̱ chi̱'nda xi síxá, chiba ma-ne; 38 tìtsi'ba-là jè Nei-la̱ xá, kàtasíkasén-ìsa xi̱ta̱ chi̱'nda xi koi̱ìxkó tsojmì koi.
