1 K'e̱ nga itjojen-ne Jesús ya̱ i̱sò'nga nindoò, kjìn xi̱ta̱ j'iìtji̱ngui-la̱. 2 Jngoò xi̱ta̱ xi tíbindojno chrjoa̱ yijo-la̱ ijchòkon koa̱ tsasixkónchit'aà-la̱, kitsò-la̱: —Na̱'èn, tsà mejèn-le, ti̱tsjeè-ná ch'in xi tjín-na. 3 Jesús, k'e̱é tsijmeé tsja nga tsohót'aà-la̱ yijo-la̱ xi̱ta̱ jè, kitsò-la̱: —Mejèn-na, kàtandaà-ne yijo-lè. K'e̱ nga o̱kitsò Jesús, ni̱to̱ón kjòndaà-ne. 4 K'e̱é kitsò-la̱ Jesús: —Ti̱ná'yi, kì yá xi̱ta̱ xi beèno̱jmí-la̱. T'in ñánda tíjna no̱'miì, ta̱kó-la̱ yijo-lè nga jye kjòndaà-ne; koa̱ jch'i̱i kjo̱tjò-lè, tsojmì xi síjé kjo̱tíxoma-la̱ Nainá xi kiskiì Moisés, mé-ne nga kàteè-ne jñà xi̱ta̱ nga jye kjòndaà-ne ch'in-lè. 5 K'e̱ nga jahas'en Jesús ya̱ na̱xa̱ndá Capernaum, jngoò xi̱ta̱ sko̱-la̱ soldado ts'e̱ Roma ijchòkon, kisìjé-la̱ kjo̱ndaà. 6 Kitsò-la̱: —Na̱'èn, xi̱ta̱ chi̱'nda-na̱ kijna-né ján ni'ya-na̱. Tsí 'ñó xk'én koa̱ tífaà kjo̱'in nga mì kiì ma síhiníyá yijo-la̱. 7 Jesús kitsò-la̱: —Ko̱ma kjísindaà-na. 8 Jè xi̱ta̱ sko̱-la̱ soldado kitsò: —Na̱'èn, mì kiì ok'ìn-na nga nga̱ji̱ k'oín sobi ni'ya-na̱, ta̱ sa̱á tjiì o̱kixi̱ nga kàtandaà-ne, koa̱ ko̱ndaà-ne chi̱'nda-na̱. 9 An, tíjiìn-na nga tjín-lè kjo̱tíxoma. Ti̱koa̱á an, tjín-na xi̱ta̱ ítjòn xi otíxoma-na, ti̱koa̱á tjín-na soldado xi an otiìxoma-la̱, k'e̱ nga xan jngoò-la̱: “t'in”, fì-né; xan-la̱ xi ìjngoò: “nchroboí”, nchrobá-né; koa̱ k'e̱ nga xan-la̱ jè xi chi̱'nda-na̱: “k'oa̱ t'i̱in”, síkitasòn-na. 10 K'e̱ nga kiì'nchré Jesús jñà 'én koi, tà kjòxkón-la̱. Kitsò-la̱ jñà xi̱ta̱ xi tji̱ngui-la̱: —O̱kixi̱í xi xan-nò, ya̱ Israel ni̱ saá jngoò xi̱ta̱ sakó-na xi k'oa̱s'ín ndaà mokjeiín-la̱ koni jè xi̱ta̱ jè. 11 K'oa̱á xan-nò, kjìn xi̱ta̱ kjoi̱í-ne nga ñijòn chrja̱ngui̱-la̱ i̱sò'nde xi ko̱kje̱nko̱ Abraham ko̱ Isaac ko̱ Jacob ya̱ ngajmiì ñánda tíhotíxoma Nainá. 12 Ta̱nga jñá xi̱ta̱ xi tjín-ne nga ya̱ kítsa̱jna ñánda ko̱tíxoma Nainá, ki̱tjokájiìn-né; ján kjoi̱ ndi̱tsin ñánda jñò chon, ko̱ ya̱á ski̱ndàya koa̱ si̱ìjts'in ni'ño. 13 K'e̱é kitsò-la̱ Jesús jè xi̱ta̱ sko̱-la̱ soldado: —Tin-ne ni'ya-lè; koni s'ín nga ndaà mokjeiín-lè, k'oa̱ás'ín ko̱ma. Jè chi̱'nda-la̱ ti̱k'e̱é kjòndaà-ne. 14 Jesús kiì ni'ya-la̱ Pedro koa̱ kijtseè na̱chíya-la̱ nga kijna xk'én; ch'in tìjnga tjín-la̱. 15 Jesús tsohót'aà-la̱ tsja jè chjo̱ón, ni̱to̱ón kjòndaà-ne ch'in tìjnga-la̱, tsasítje̱n-ne jè chjo̱ón, i̱kjoàn kisìs'in-la̱ Jesús. 16 K'e̱ nga jye kòjñò, kjìn xi̱ta̱ xk'én j'iìko̱-la̱ Jesús xi ini̱ma̱ ch'o-la̱ nei̱í tjín-la̱. Jesús tà jngoò o̱kixi̱ kitsjaà nga tsatíxoma-la̱ mé-ne nga itjokàjiìn-ne ini̱ma̱-la̱ jñà xi̱ta̱ ngats'iì ini̱ma̱ ch'o-la̱ nei̱í, koa̱ kjòndaà yije-ne xi̱ta̱ xk'én. 17 Kjoa̱ koi koni s'ín komà, koi̱í tsitasòn koni kitsò Isaías xi̱ta̱ xi kiìchja̱ ngajo-la̱ Nainá k'e̱ nga kitsò: “Jè jahaxin ch'in-ná ko̱ jè kisìkjeiín kjo̱'in nga kjòndaà-ne ñánda kitsì'on yijo-ná.” 18 K'e̱ nga kijtseè Jesús nga kjìn ma-ne xi̱ta̱ xi kitseèndiì-la̱, kitsjaà-la̱ o̱kixi̱ xi̱ta̱ xi kota'yàt'aà-la̱ nga kiì ján xijngoaà ndáchikon. 19 K'e̱é j'iì jngoò xi̱ta̱ xi okóya kjo̱tíxoma-la̱ Nainá xi kiskiì Moisés, ijchòkon Jesús, kitsò-la̱: —Maestro, kjítji̱ngui-lè ni̱ta̱ ñánda nga k'oín. 20 Jesús kitsò-la̱: —Jñà ni̱nda̱ tjín-la̱ nguijo ñánda oyijó, koa̱ jñà ni̱se tjín-la̱ tjé, ta̱nga 'an xi Ki'ndí-la̱ Xi̱ta̱ xan-la̱ yijo-na̱, tsjìn-na i̱'nde ñánda síkjáya. 21 Ìjngoò xi̱ta̱ xi kota'yàt'aà-la̱ kitsò-la̱: —Na̱'èn, tjiì'nde-ná nga ítjòn kjián kìhijñaà na̱'èn-na̱. 22 Jesús kitsò-la̱: —Ji̱, nchrobátji̱ngui-ná, jñà mik'en kàtìhijiìn mik'en-la̱. 23 Jahas'en Jesús jè chitso; kjihijtako̱ jñà xi̱ta̱ xi kota'yàt'aà-la̱. 24 Tà ni̱to̱ón tsatsejèn jngoò tjo̱xkón ko̱ jtsí ya̱ i̱jiìn ndáchikon, ko̱ jè ndáchikon taxki̱ komà-né, mejèn bíjtsa'ma jè chitso. Ta̱nga jè Jesús kjinafè-né. 25 Jñà xi̱ta̱ xi kota'yàt'aà-la̱ k'e̱é kiìkon nga kisìkjaá-la̱ Jesús, kitsò-la̱: —Na̱'èn, ti̱kinda̱-náje̱n. Jye titsa̱bixònguindá. 26 Kiìchja̱ Jesús kitsò: —¿Mé-ne tsakjòon-nò? 'Ñó chiba mokjeiín-nò xi it'aà ts'a̱n. K'e̱é tsasítje̱n Jesús, tsohótiko̱ tjo̱xkón ko̱ ndáchikon koa̱ ni̱to̱ón kisijyo-ne tjo̱ koa̱ kjòndaàya-ne. 27 Koa̱ jñà xi̱ta̱ xi kota'yàt'aà-la̱ tà kjòxkón-la̱, kitsò: —Yá xi̱ta̱-ne jè skanda jè tjo̱ ko̱ ndáchikon síkitasòn-la̱. 28 K'e̱ nga ijchò Jesús ján xijngoa ndáchikon ya̱ nangui Gadara, jò xi̱ta̱ ijchò kinchat'aà-la̱ xi ya̱ itjo-ne ya̱ ñánda sihijiìn mik'en. Ini̱ma̱ ch'o-la̱ nei̱í tjín-la̱. 'Ñó jchán ts'e̱n, kjaán-ko̱-ne tsa yá xi ya̱ kjoa̱haya ndi̱yá. 29 'Ñó kiìchja̱ nga kitsò: —¿Mé xi mejèn-lè ko̱ ngaje̱n, ji̱ xi Ki'ndí-la̱ Nainá 'mì-le? ¿A koií xá kòf'i-né nga jcha̱ton-náje̱n k'e̱ nga ti̱kj'eè bijchó na̱chrjein-la̱ kjo̱'in? 30 Ya̱ chrañat'aà-la̱ kjìn jchán chi̱nga̱ nchikjènjno, 31 koa̱ jñà ini̱ma̱ ch'o-la̱ nei̱í tsibítsi'ba-la̱ Jesús, kitsò-la̱: —Tsà ki̱nachrjekajiìn-náje̱n, tjiì'nde-náje̱n nga ki̱tjásenjiìn-je̱n yijo-la̱ chi̱nga̱ koi. 32 Jesús kitsò-la̱: —Ndaà tjín, tanguió. I̱kjoàn itjojiìn yijo-la̱ jñà xi̱ta̱ koi, k'e̱é jahas'enjiìn yijo-la̱ jñà chi̱nga̱, koa̱ ngats'iì chi̱nga̱ tsatikjájen-jno ya̱ na̱xi̱ skanda i̱jiìn nandá chikon ko̱ ya̱á k'en. 33 Jñà xi̱ta̱ xi kondà chi̱nga̱ tsanga; k'e̱ nga i̱jchò i̱jiìn na̱xa̱ndá, tsibeèno̱jmí yije kjoa̱ xi komà ko̱ kjoa̱ xi komàtin jñà xi̱ta̱ xi ini̱ma̱ ch'o-la̱ nei̱í tíjiìn ini̱ma̱-la̱. 34 K'e̱é ijchò ngats'iì xi̱ta̱ na̱xa̱ndá ñánda tíjna Jesús; k'e̱ nga kijtseèxkon tsibítsi'ba-la̱ nga xìn nangui kàtjì.
