1 ’Kì kjo̱'in 'bì-là xi̱ta̱ xinguioò kjoa̱ ts'e̱ jé-la̱ mé-ne nga mì kjo̱'in tjoé-nò kjoa̱ ts'e̱ jé-nò. 2 Koni s'ín k'oi̱-là kjo̱'in xi̱ta̱ xi kj'eií, k'oa̱á ti̱ s'ín tjoé ngajo-nò kjo̱'in. Jè chi̱ba̱ xi si̱chi̱ba̱ya-là xinguio̱o, ti̱ jè ko̱chi̱ba̱ ngajò-nò. 3 [¿Mé-ne jé-la̱ xingui̱i nìkinda̱-ne koa̱ tsi̱ji mì kiì nìkindi̱i?] ¿Mé-ne chìtsejèn-la̱ jè tjé xi kjinangui xko̱n xingui̱i, ko̱ jè yá chi̱so̱ xi kjinangui xkoiìn mìkiì chìtsejèn-la̱? 4 Tsà yá chi̱so̱ kjinangui xkoiìn, ¿a ko̱ma k'oín-la̱ xi̱ta̱ xingui̱i: “Tjiì'nde-ná nga kochrjekànguia tjé xi kjinangui xkoiìn”? 5 Ngaji̱ xi jò ma i̱sèn-lè, ítjòn ti̱na̱chrjekàngui chi̱so̱ xi kjinangui xkoiìn mé-ne nga ndaà ko̱tsejèn-lè, i̱kjoàn ti̱na̱chrjekàngui tjé xi kjinangui xko̱n xingui̱i. 6 ’Tsojmì tsjeè xi ts'e̱ Nainá, kì nañá 'biì-la̱ mé-ne nga mì ya̱ si̱ìkáfat'aà-lè ko̱ ya̱ ski̱ne̱-lè. Koa̱ jè ndáto̱n chjí xi nìkjiín, kì chi̱nga̱a nìka̱tje̱n-la̱ mé-ne nga mì ntso̱ko̱ ki̱nchanè-ne. 7 ’Ti̱jé mé xi mejèn-nò, jè Nainá tsjá-nò; ti̱nchátsjioò Nainá, sakó-nò; ti̱nókjoa̱t'aà-là Nainá mé xi mejèn-nò mé-ne skíxa̱'nde-nò koni jngoò xohotjoa̱. 8 Ngats'iì xi̱ta̱ xi síjé, tjoé-la̱, jè xi ótsji, sakò-la̱ ko̱ jè xi chja̱t'aà-la̱ Nainá, tjáxa̱'nde-la̱ koni jngoò xohotjoa̱. 9 ’Jñò xi xi̱ta̱ jchínga 'mì-nò, tsà i̱nchra̱jín si̱ìjé-nò i̱xti-nò, ¿a nda̱jo̱ó k'oi̱-là? Majìn. 10 Koa̱ tsà ti̱n si̱ìjé-nò, ¿a ye̱é k'oi̱-là? Majìn. 11 Jñò na̱s'ín xi̱ta̱ xi ch'o 'nè, ma-nò 'biì-là i̱xti-nò tsojmì xi ndaà kjoàn. Jè Na'èn-nò xi tíjna ngajmiì, ìsa̱á ni̱to̱n si̱ìs'in-nò nga tsjá-nò tsojmì xi ndaà kjoàn tsà jñò si̱jét'aà-là. 12 ’ Ni̱ta̱ mé kjo̱nda xi mejèn-nò nga si̱ìko̱-nò xi̱ta̱, k'oa̱ ti̱ s'ín ti̱ko̱ ngajo-nò. K'oa̱ás'ín tíchja̱ kjo̱tíxoma-la̱ Nainá xi kiskiì Moisés ko̱ xo̱jo̱n-la̱ xi̱ta̱ xi kiìchja̱ ngajo-la̱ Nainá. 13 ’Ti̱tjásio̱òn jè xòhotjoa̱ xi nchrèya kji. Jè xòhotjoa̱ ko̱ jè ndi̱yá xi 'ñó tiyà, ndi̱yá-la̱ kjo̱'in-né. Kjìn xi̱ta̱ xi ya̱ fahas'en. 14 Ko̱ jè xóhotjoa̱ ko̱ ndi̱yá xi nchrèya chon, ndi̱yá-la̱ kjoa̱bijnachon-né, ko̱ chiba xi̱ta̱ matsji-la̱. 15 ’Ndaà ti̱ki̱nda̱ yijo-nò i̱t'aà ts'e̱ xi̱ta̱ ndiso xi tsò nga 'én-la̱ Nainá síka'bí. K'e̱ nga 'fiìkon-nò jñà xi̱ta̱ koi, i̱ma̱ kjoa̱á s'ín koni órré ta̱nga ini̱ma̱-la̱, tse̱jén ts'e̱én 'ya. 16 Jñò jcha̱xkoòn xi̱ta̱ koi i̱t'aà ts'e̱ xá xi s'ín. K'oa̱á ngaya-la̱ koni jngoò yá xi ndaà toò ojà-la̱; jè toò uva mìtsà jè majchá-la̱ yá na'yá; ti̱koa̱á jè toò iko̱ mìtsà jè majchá-la̱ yá na'yá. 17 Ngats'iì yá xi ndaà kjoàn, ndaà toò ojà-la̱, ta̱nga jè yá xi mìkiì ndaà kjoàn, mìkiì ndaà toò xi ojà-la̱. 18 Jngoò yá xi ndaà kji, mìtsà ch'o kjoàn toò xi ojà-la̱; koa̱ jè yá xi ch'o kji, mìkiì ojà-la̱ toò xi ndaà kjoàn. 19 Nga yije yá xi mìkiì ojà-la̱ toò xi ndaà, sa̱téson-la̱ i̱kjoàn si̱nchájiìn ni'ín nga ki̱ti̱. 20 K'oa̱ás'ín jcha̱xkoòn xi̱ta̱ koi i̱t'aà ts'e̱ xá xi s'ín. 21 ’Mì tsà tà ngats'iì xi̱ta̱ xi tsò-na “Na̱'èn, Na̱'èn”, kjoa̱has'en-jiìn jè kjo̱tíxoma-la̱ ngajmiì. Tà jñà xi̱ta̱ xi kjoa̱s'enjiìn xi síkitasòn koni s'ín mejèn-la̱ Na'èn-na xi tíjna ngajmiì. 22 K'e̱ nga ki̱jchò na̱chrjein, kjìn xi̱ta̱ ki̱tso̱-na, “Na̱'èn, Na̱'èn, ngaji̱n kinokjoàya-náje̱n 'én-lè xi i̱t'aà tsi̱ji. Nga ko̱ 'ín-lè kinachrjekajiìn-náje̱n ini̱ma̱ ch'o-la̱ neií xi mì kiì ndaà, ti̱koa̱á kjìn kjo̱xkón ki'nè-je̱n xi ndaà tjín.” 23 K'e̱é k'oa̱ xán-la̱: “Mìkiì bexkon-nò. Ti̱nchat'aàxìn-ná jñò xi ch'o ki'nè.” 24 ’Jè xi 'nchré ko̱ síkitasòn 'én-na̱ koni xan-la̱, k'oa̱ás'ín ngaya-la̱ koni jngoò xi̱ta̱ xi tjín-la̱ kjo̱hítsjeèn; ya̱à bìndaàsòn ni'ya-la̱ ñánda na̱xi̱ chon. 25 'Ba jtsí; 'ba tjo̱xkón; f'iì xa̱jngá nandá xi faanè ni'ya; nì mé xi ma-la̱ nga ndaà tjínda jè ni'ya, ya̱á kijnasòn ñánda na̱xi̱ chon. 26 Ta̱nga ni̱ta̱yá-ne xi 'nchré 'én-na̱ ko̱ mìkiì síkitasòn, k'oa̱á ngaya-la̱ koni jngoò xi̱ta̱ xi tsjìn-la̱ kjo̱hítsjeèn; ya̱á bìndaàsòn ni'ya ñánda jncha tsomì. 27 'Ba jtsí; 'ba tjo̱xkón; f'iì xa̱jngá nandá ya̱á bixòña ni'ya jè; mì tà k'oa̱á kji kjoa̱ xi ma k'e̱ nga bixòña. 28 K'e̱ nga jye kiìchja̱ Jesús, ngats'iì xi̱ta̱ xi títsa̱jna, tà k'oa̱á komà-la̱ koni tsò 'én xi tsakóya. 29 K'oa̱á s'ín tsakóya koni jngoò xi̱ta̱ xi 'ñó tjín-la̱ kjo̱tíxoma, mìtsà k'oa̱s'ín tsakóya koni xi̱ta̱ xi okóya kjo̱tíxoma-la̱ Nainá xi kiskiì Moisés.
