1 ’K'e̱ nga ndaà tjín kjoa̱ xi 'nè, ti̱kindaàko̱-nò yijo-nò; kì tà k'e̱é k'oa̱ 'nè k'e̱ nga nguixko̱n xi̱ta̱, tsà tà jè xi mejèn-nò nga skoe̱-nò xi̱ta̱ xi kj'ei̱í. Tsà k'oa̱s'ín s'e̱en, Na̱'èn-ná xi tíjna ngajmiì mì kiì si̱ìchikon-tin-nò. 2 K'e̱ nga jngoò kjo̱ndaà k'oi̱i-là xi̱ta̱ i̱ma̱, kì kiì beèno̱jmí-la̱ ngats'iì xi̱ta̱ xi kj'ei̱í, koni s'ín xi̱ta̱ xi jò i̱sén tjín-la̱ ya̱ ni'ya i̱ngo̱ sinagoga ko̱ ya̱ ndi̱yá nga tsjá ko̱tjò-la̱ tsojmì xi̱ta̱; tà jé xi mejèn-la̱ nga skoe̱ yije xi̱ta̱. Ta̱nga o̱kixi̱í xi xan-nò, jñà xi̱ta̱ xi k'oa̱s'ín s'ín, jyeé tjín-la̱ chjí-la̱ [nga nguixko̱n xi̱ta̱. Mì ti̱ mé si̱ìchikon-tin-ne Nainá.] 3 K'e̱ nga tsà tsojmì k'oi̱ kjo̱tjò-là xi̱ta̱ i̱ma̱, machjeén-né nga mì yá xi̱ta̱ xi skoe̱; ni̱ jè skoe̱ xi 'ñó amigo chibá. 4 Tjà'ma-là jè kjo̱ndaà-nò; k'e̱ nga jè Na̱'èn-ná skoe̱ jè xi kjoa̱'ma, jè tsjá-nò chjí-nò. 5 ’K'e̱ nga bìtsi'baà, kì k'oa̱á 'nè koni s'ín xi̱ta̱ xi jò i̱sén tjín-la̱. Jñà xi̱ta̱ koi, k'e̱ nga bítsi'ba-la̱ Nainá, tsjakeè-né nga bincha kixi̱ ya̱ ni'ya i̱ngo̱ sinagoga ko̱ ya̱ chrjangui-la̱ ndi̱tsi̱n ñánda kjìn xi̱ta̱ kotsején-la̱ nga Nainá bítsi'ba-la̱. Xi o̱kixi̱ k'oa̱á xan-nò, jñà xi̱ta̱ koi, jye tjín-la̱ chjí-la̱ [nga nguixko̱n xi̱ta̱. Mì ti̱ mé si̱ìchikon-tin-ne Nainá.] 6 Ta̱nga k'e̱ nga mejèn-lè nga kítsi'ba-la̱ Na̱'èn-ná, ti̱tjás'i̱in ni'ya-lè, tíchjoì xòhotjoa̱-la̱ ni'ya-lè, i̱kjoàn ti̱jé-la̱ kjo̱ndaà-la̱ Na̱'èn-ná xi ya̱ ta̱jngo tíjna'mako̱-lè. Jè Na̱'èn-ná tsjá-lè chjí-lè nga jè tíbeè xi kjoa̱'ma. 7 ’K'e̱ nga bítsi'ba, kì ta̱xki̱ kjìn 'én nokjoà, koni sín xi̱ta̱ xi mì kiì beèxkon Nainá. K'oa̱ás'ín síkítsjeèn nga kjìn 'én ki̱chja̱-la̱ Nainá, ìsa̱á ndaà kji̱'nchré-la̱. 8 Kì k'oa̱á 'nè koni sín jñà xi̱ta̱ koi̱; jè Na̱'èn-ná jye tíjiìn-la̱ mé xi machjeèn-nò k'e̱ nga ti̱kj'eè nìjét'aà-là. 9 K'e̱ nga kítsi'ba, ki̱í s'ín tinókjoa̱a: Na'èn-na̱je̱n xi tijni ngajmiì, kàtayaxkón-la̱ kjoa̱jeya-lè nga tsjeè tijni. 10 Katjinchrobà kjo̱tíxoma-lè, k'oa̱s'ín kàtama i̱ i̱t'aà nangui koni s'ín mejèn-lè nga ko̱ma, koni s'ín ma ján ngajmiì. 11 Tjiì-náje̱n i̱'ndei̱ jè ni̱ño̱ xi machjeén-naje̱n nga na̱chrjein inchijòn. 12 Ti̱jchat'aà-náje̱n jé-na̱je̱n koni s'ín nìjchaàhat'aà-la̱je̱n jñà xi̱ta̱ xi ch'o síko̱-na̱je̱n. 13 Kì kiì biì'ndi yá xi mejèn-la̱ nga kot'aà-naje̱n nga ki̱nchátsji jé-je̱n. Ti̱kinda̱-náje̱n xi i̱t'aà ts'e̱ xi̱ta̱ nei̱í. Nga̱ tsi̱jií kjo̱tíxoma, tsi̱jií nga'ñó ko̱ tsi̱jií kjoa̱jeya ni̱ta̱kjé-ne. K'oa̱ s'ín kàtama. 14 ’Tsà jñò si̱jchat'aà-là jé-la̱ xi̱ta̱ xi kj'eií, ti̱koa̱á jè Na'èn-ná xi tíjna ngajmiì si̱ìjchat'aà-nò jé-nò. 15 Ta̱nga tsà jñò mìkiì si̱jchat'aà-là jé-la̱ xi̱ta̱, ti̱koa̱á Na'èn-ná mìkiì si̱ijchat'aà-nò jé-nò. 16 ’K'e̱ nga bitsa̱jnachjaàn, kì k'oa̱á 'nè koni s'ín jñà xi̱ta̱ xi jò i̱sén tjín-la̱ nga síkatjiya i̱sén-la̱, mé-ne nga skoe̱-ne xi̱ta̱ nga ba tjín-la̱ nga títsa̱jnachjan. Xi o̱kixi̱, k'oa̱á xan-nò, jñà xi̱ta̱ koi, jyeé kitjoé-la̱ chjí-la̱ [nga nguixko̱n xi̱ta̱. Mì ti̱ mé si̱ìchikon-tin-ne Nainá.] 17 Ta̱nga jñò, k'e̱ nga bìtsa̱jnachjaàn, kì k'oa̱á 'nè. Ta̱ sa̱á ta̱nìjno i̱sén-nò ko̱ tasí'a tsja̱skoò, 18 mé-ne nga mì kiì skoe̱-nò xi̱ta̱ tsà titsa̱jnachjaàn, ko̱ jè Na̱'èn-ná xi tíjna'mako̱-nò, ta̱ jè xi tíbeè. Jè si̱ìchikon-tin-nò. 19 ’Jñò, kiì tsojmì kjìn binchajtión i̱ i̱sò'nde; bits'on-né ko̱ makixo-né ko̱ jñà xi̱ta̱ síchijé. 20 Ta sa̱á ján ngajmiì tinchajtiòn tsojmì. Ján ngajmì mìkiì bits'ón ko̱ mìkiì makixo tsojmì; ti̱koa̱á tsjìn xi̱ta̱ chijé. 21 Ya̱ ñánda ki̱nchajtión tsojmì-nò, ti̱koa̱á ya̱á si̱ìkítsjeèn ini̱ma̱-nò. 22 ’Jñà xkoaán, jè ma ni'ín xi síhiseèn-la̱ yijo-ná. Koií kjoa̱-la̱ k'e̱ nga ndaà tsejèn-ná, iseèn chon yije-la̱ yijo-ná; 23 ta̱nga tsà mìkiì ndaà tsejèn-la̱ xkoiìn, ti̱koa̱á kóho̱kji yijo-lè, tà jñò chon-la̱. Nga tíjñò-la̱ kjo̱hítsjeèn-lè ti̱koa̱á nguì tà jñò chon-la̱ yijo-lè. 24 ’Ni̱jngoó xi̱ta̱ xi jò ko̱ma nei-la̱ nga si̱ìxá-la̱. Tsà jò ko̱ma nei-la̱, jngoò ko̱jtikeè koa̱ jngoò ko̱tsjakeè; jngoò ndaà kjit'aà-la̱ koa̱ ch'o si̱ìko̱ xijngoò. Jñò, tsà kjoa̱ nchi̱ná si̱ìs'in-là, mìkiì ko̱s'in-la̱ kjoa̱ ts'e̱ Nainá. 25 ’K'oa̱á xan-nò, kì makájno-nò mé tsojmì xi chji̱ne̱e, xi s'io̱o, nga si̱jchá yijo-nò, ko̱ mé nikje xi chi̱kjá. ¿A mì 'ya-jèn k'e̱ nga titsa̱jnakoaán i̱ i̱sò'nde tjín ìsa kjoa̱ xi ìsa̱ 'ñó chjí-la̱ mì k'oa-ne koni tsojmi xi ma chine? Ti̱koa̱á yijo-ná, tjín isa kjoa̱ xi ìsa̱ 'ñó chjí-la̱ mì k'oa̱-ne koni jè nikje xi chíkjá. 26 Chítsejèn-là ni̱se xi tjíma i̱jiìn i̱sén; mì jno̱ó 'beé; mì ni̱ji̱n mojchá-la̱ koa̱ mì ni'nga tjín-la̱ ñánda binchaxkò ni̱ji̱n-la̱; ta̱nga jè Na̱'èn-ná xi tíjna ngajmiì tsjá-la̱ tsojmì xi kine; koa̱ jñò, ìsa̱á chjí-nò mì k'oa̱a-ne jñà ni̱se. 27 Jñò, na̱s'ín ta̱kó 'ñó si̱kájnoò, ni̱ i̱tsé ko̱ma si̱katonè-là na̱chrjein-nò koni s'ín tjíndaà-la̱ Nainá. 28 ’¿Mé-ne nìkájno-nò xi i̱t'aà ts'e̱ nikje xi chi̱kjá? Chítsejèn-là naxó lirio xi mojchá i̱jiìn ijñá; mìkiì síxá ko̱ mìkiì ma-la̱ faña nikje. 29 Ta̱nga a̱n k'oa̱á xan-nò, ndaà tsà jè Salomón xi xi̱ta̱xá ítjòn tsibìjna nga 'ñó xi̱ta̱ jeya, mì k'oa̱á kjoàn nikje xi tsohókjá koni kjoàn jñà naxó nga ndaà kjoàn. 30 Nainá, k'oa̱á s'ín ndaà kjoàn s'ín xka̱ ijñá, xi jngoò na̱chrjein títsa̱jnakon ko̱ xi ma nchijòn ko̱tsjoojiìn ni'ín. Jñò xi xi̱ta̱ 'mì-nò xi mì kiì ndaà mokjeiín-nò, ¿a mì tsà ìsa̱ ni̱to̱n tsjá-nò Nainá nikje xi mochjeén-nò nga chi̱kjá? 31 Kì makájno-nò, kì bixón-jèn: “¿Mé xi chji̱ne̱é? ko̱ ¿mé xi s'ioa̱á? ko̱ ¿mé nikje xi chi̱kjá?” 32 Nga yije tsojmì koi k'oa̱tjín xi ótsji jñà xi̱ta̱ xi mìkiì mokjeiín-la̱ i̱t'aà ts'e̱ Nainá, ta̱nga jñò tíjnaá-nò Na'èn xi tíjna ngajmiì xi jyeé tíjiìn-la̱ nga machjeèn-nò ngats'iì tsojmì koi. 33 Ítjòn ti̱nchátsjioò kjoa̱ ts'e̱ Nainá koni s'ín otíxoma ko̱ kjoa̱kixi̱-la̱; ngats'iì tsojmì xi mochjeèn-nò tà tjoésòn-nò. 34 Kì makájno-nò mé kjoa̱ xi s'e̱ nchijòn-le; nga nchijòn-le, s'e̱é-nò kjoa̱ xi ko̱kájno-nò; tà koií kjoa̱ tikájno xi tjín na̱chrjein i̱'ndei̱.
