1 Jesús, k'e̱ nga kijtseè ngats'iì xi̱ta̱ xi kjín ma-ne, kiìmijìn-jno ya̱ i̱sò'nga nindoò koa̱ ya̱á tsibìjna. Jñà xi̱ta̱ xi kota'yàt'aà-la̱ ijchò kinchat'aà-la̱. 2 Jesús k'e̱é tsakóya-la̱ kitsò-la̱: 3 —Mé tà ndaà-la̱ jñà xi̱ta̱ xi machi̱ya-la̱ nga mochjeèn-la̱ kjo̱ndaà-la̱ Nainá; xi̱ta̱ koi, jyeé ts'e̱ ngats'iì kjo̱ndaà xi tjín ya̱ ñánda tíhotíxoma jè xi ngajmiì nchrobá-ne. 4 ’Mé tà ndaà-la̱ jñà xi̱ta̱ xi kjindáya; Nainá siìjetakòn-né. 5 ’Mé tà ndaà-la̱ jñà xi̱ta̱ xi indaàjiìn tjín ini̱ma̱-la̱; jñà tjoé-la̱ nangui xi Nainá jye k'oa̱s'ín kitsò nga jñà tsjá kjo̱tjo-la̱. 6 ’Mé tà ndaà-la̱ jñà xi̱ta̱ xi 'ñó mejèn-la̱ nga ki̱tasòn xi kjoa̱ kixi̱ xi Nainá síjé; Nainá ko̱si̱ko̱ nga ki̱tasòn kjoa̱ koi. 7 ’Mé tà ndaà-la̱ jñà xi̱ta̱ xi mahi̱ma̱keè xi̱ta̱ xi kj'ei̱í; Nainá ko̱hi̱ma̱keè ngajo-ne jñà xi̱ta̱ koi. 8 ’Mé tà ndaà-la̱ jñà xi̱ta̱ xi tsjeè tjín ini̱ma̱-la̱; jñà xi̱ta̱ koi, jñà-né xi skoe̱xkon Nainá. 9 ’Mé tà ndaà-la̱ jñà xi̱ta̱ xi síkijna'nchán kjoa̱; Nainá ki'ndí-la̱á ki̱tso̱-la̱. 10 ’Mé tà ndaà-la̱ jñà xi̱ta̱ xi kjo̱'in tjín-la̱ nga fìtji̱ngui kondra̱-la̱ xi̱ta̱, koi kjoa̱-la̱ nga ndaà síkitasòn xi kjoa̱kixi̱. Xi̱ta̱ koi, jyeé ts'e̱ ngats'iì kjo̱ndaà xi tjín ya̱ ñánda tíhotíxoma jè xi ngajmiì nchrobá-ne. 11 ’Mé tà ndaà-nò k'e̱ nga jñà xi̱ta̱ ch'o ki̱tso̱-nò nga ko̱tìt'aà-nò ko̱ k'e̱ nga ch'o si̱ìko̱-nò, ko̱ k'e̱ nga 'én ndiso tsjátin-nò xi kjoa̱ ts'a̱n. 12 Tsja jtè-là ini̱ma̱-nò, koa̱ tsja jtè-là takòn. Jñò, tseé kjo̱ndaà tjoé-nò ján ngajmiì. Mìtsà tà jñò xi otínìko̱-nò. K'oa̱á ti̱s'ín kinìko̱ jñà xi̱ta̱ xi kiìchja̱ ngajo-la̱ Nainá xi chinchima ítjòn-nò. 13 ’Jñò, k'oa̱á s'ín ngaya-nò koni tsà na̱xa̱ xi mochjeén-la̱ xi̱ta̱ i̱sò'nde. Ta̱nga tsà jè na̱xa̱ mì ti̱ kì si̱ìjnchra-ne tsojmì ¿kó ti̱ s'ín ko̱chjeén-ne? Mì ti̱ mé chjí-la̱; xíxteèn-ne ko̱ ya̱á ki̱nchanè xi̱ta̱. 14 ’Jñò, k'oa̱á s'ín ngaya-nò koni tsà ni'ín xi mochjeén-la̱ xi̱ta̱ i̱sò'nde. Tsà jngoò na̱xa̱ndá xi i̱sò'nga nindoò kijna, mìkì ko̱ma kíjna'ma. 15 K'e̱ nga jngoò ni'ín si̱t'aà'í, mìtsà ya̱ si̱jnangui kaxa̱. Ya̱á si̱jna ñánda 'nga choòn, mé-ne nga ko̱hiseèn yije-la̱ xi̱ta̱ xi títsajnaya ni'ya. 16 Koni ni'ín xi síhisen-la̱ xi̱ta̱, k'oa̱á s'ín ndaà ti̱jchá yijo-nò nguixko̱n xi̱ta̱ xi kj'eií mé-ne jñà xi̱ta̱ koi, jeya siìkíjna Na̱'èn-nò xi Nainá xi tíjna ngajmiì k'e̱ nga skoe̱-nò nga ndaà titsanè. 17 ’Jñò, kì k'oa̱á s'ín nìkítsjeèn: mì tsà koi xá j'iì-na an nga kochrjekànguia jè kjo̱tíxoma-la̱ Nainá xi kiskiì Moisés ko̱ jè xi tsakóya xi̱ta̱ xi kiìchja̱ ngajo-la̱ Nainá. Tà sa̱á j'i̱ sìjngo-ná 'én xi tjít'aà kjo̱tíxoma. 18 O̱kixi̱í xi xan-nò, koni tjín na̱chrjein kíjna ìsa i̱sò'nde ko̱ ngajmiì, nìmé xi tjáxìn-la̱ jè kjo̱tíxoma, ni̱ jngoò punto ko̱ ni̱ jngoò letra tjáxìn-la̱, skanda kóni nga ko̱jngoò yije kjoa̱ xi tjít'aà kjo̱tíxoma. 19 Jè xi̱ta̱ xi mìkiì síkitasòn koni s'ín tíchja̱ kjo̱tíxoma, na̱s'ín 'ñó chiba tíchja̱, ko̱ k'oa̱ás'ín okóya-la̱ xi̱ta̱, koa̱á ti̱ s'ín 'ñó chiba jcha̱-la̱ ya̱ i̱jiìn na̱xa̱ndá xi jè otíxoma-la̱ xi ngajmiì nchrobá-ne. Ko̱ jè xi̱ta̱ xi síkitasòn kjo̱tíxoma-la̱ Nainá ko̱ k'oa̱s'ín okóya-la̱ xi̱ta̱ xi kj'ei̱í, jè xi̱ta̱ jè, jè xi 'ñó 'nga kíjna ya̱ i̱jiìn na̱xa̱ndá xi jè otíxoma-la̱ xi ngajmiì nchrobá-ne. 20 O̱kixi̱í xi xan-nò, tsà mìkiì ìsa̱ ndaà sikitasòn kjoa̱kixi̱ koni jñà xi̱ta̱ fariseo ko̱ xi̱ta̱ xi okóya kjo̱tíxoma-la̱ Nainá xi kiskiì Moisés, mì kiì ki̱tjás'en-jñoò ñánda tíhotíxoma jè xi ngajmiì nchrobá-ne. 21 Jñò jye kina'yà koni s'ín ki'mì-la̱ jñà xi̱ta̱ jchínga-nò: “Kì xi̱ta̱ nìk'en; ni̱ta̱ yá-ne xi xi̱ta̱ si̱ìk'en, kjo̱'in s'e-la̱.” 22 Ta̱nga an k'oa̱á xan-nò, tsà jngoò xi̱ta̱ xi ko̱jtikeè 'ntse̱, s'e̱é-la̱ kjo̱'in. Jè xi ch'o ki̱tso̱-la̱ 'ntse̱, xi̱ta̱xá tsjá-la̱ kjo̱'in. Ko̱ jè xi 'ntse̱ ki̱tso̱-la̱, “Ngaji̱ nímé chjí-le”, ok'ìn-la̱ nga ján kjoi̱ i̱jiìn ni'ín ts'e̱ i̱'nde kjo̱'in. 23 ’Tsà k'e̱ nga kíkoi̱i tsojmì kjo̱tjò-le nga Nainá k'oi̱-la̱ ya̱ i̱'nde tsjeè-la̱ koa̱ ya̱ koi̱ítsjeèn-lè nga jè 'ntsì tjín-la̱ kondra̱ tsi̱ji, 24 tikítsajnei tsojmì kjo̱tjò-lè ya̱ i̱'nde tsjeè, i̱kjoàn tikìtsi'ba-la̱ 'ntsì koa̱ k'e̱é ko̱ma sikítsajnei tsojmì-lè. 25 ’Tsà tjín xi̱ta̱ xi ko̱òngui-lè nga kji̱ko̱-lè ni'ya osen, k'e̱ nga tjaàya ndi̱yá ni̱to̱n jchi̱bàndaà-nò, mé-ne nga mì ya̱á kji̱ko̱-lè nguixko̱n xi̱ta̱xá, ko̱ jè xi̱ta̱xá mì ya̱ tsjá-la̱ kinda̱ jñà policía nga mì nda̱yá kjoi̱iko̱-lè. 26 O̱kixi̱í xi xan-lè, mì ti̱ kì ko̱ma kitjo̱o-ne nda̱yá skanda k'e̱ nga kíchjítjì yijo-lè nga yije xi si̱ìjé-lè xi̱ta̱xá. 27 ’Jñò, jye kina'yà koni s'ín ki'mì-nò kjòtseé, “Kì kjoa̱ chijngui 'nè.” 28 Ta̱nga an k'oa̱á xan-nò, ni̱ta̱ yá-ne xi kotsejèn-jno jngoò chjo̱ón nga faajin-la̱, jye kjoa̱ chijngui tís'ín koni títsò i̱ni̱ma̱-la̱. 29 ’Tsà jñà xkoòn kixi̱ ótsji jé-nò, ti̱na̱chrjeè; kjiìn ti̱katsjoò. Ìsa̱á ndaà-ne tsà chija jngoò xkoòn mì k'oa̱á-ne tsà ya̱ ki̱xo̱jiìn yije yijo-nò ya̱ i̱jiìn ni'ìn ya̱ i̱'nde kjo̱'in. 30 Tsà jñà ntsei̱i kixi̱ ótsji jé-nò, ti̱chátjon; kjiìn ti̱katsjoò. Ìsa̱á ndaà-ne tsà chija jngoò ntsei̱i mì k'oa̱á-ne tsà ján kjoi̱ yijo-nò i̱jiìn ni'ìn ya̱ i̱'nde kjo̱'in. 31 ’K'oa̱á ti̱ s'ín kis'eno̱jmí kjòtseé, ni̱ta̱ yá xi̱ta̱-ne xi mejèn-la̱ tsjeiìn chjo̱ón-la̱, ítjòn tjáminga xo̱jo̱n xi tsjeiìn-ne xíkjín xi̱ta̱. 32 Ta̱nga an k'oa̱á xan-nò: tsà jngoò xi̱ta̱ x'i̱n xi tsjeiìn chjo̱ón-la̱, tsà mìtsà kjoa̱ chijngui tís'ín jè chjo̱ón, jè x'i̱n-la̱ tíbí'tin-la̱ nga kjoa̱ chijngui kàtas'ín chjo̱ón. Jè chjo̱ón, k'e̱ nga ki̱xan ìjngoò k'a-ne, jè x'i̱n xi ki̱xanko̱, tikoa̱á jye kjoa̱ chijngui tís'ín. 33 ’Ti̱koa̱á jye kina'yà koni s'ín ki'mì-la̱ jñà xi̱ta̱ jchínga-ná, “K'e̱ nga bixón: ‘tíbeè Nainá’, kì chona̱cha̱n-jèn, ti̱kitasòn én-nò.” 34 Ta̱nga an k'oa̱á xan-nò: K'e̱ nga 'bioò 'én-nò, jngoò k'a kì yá xi nìkíjna ítjòn. Kì k'oa̱s'ín bixón. “Tíbeè ngajmiì.” Nga jè ngajmiì, jè íxi̱le̱ kjo̱tíxoma-la̱ Nainá. 35 Ti̱koa̱á kiì bixón-jèn “Tíbeè i̱sò'nde”, nga jè nangui, ya̱á nchasòn ntso̱ko̱ Nainá. Ti̱koa̱á kiì bixón-jèn "Tíbeè na̱xa̱ndá Jerusalén", nga jè na̱xa̱ndá jè, ts'e̱é Xi̱ta̱xá Ítjòn xi Nainá. 36 Ti̱koa̱á kì skoò nìkíjna ítjòn k'e̱ nga mé 'én xi 'bioò. Nga mìkiì ko̱ma-nò nga si̱jmà o si̱chroba jngoò tsja̱ skoò. 37 Tà k'oa̱ás'ín tinókjoa̱á: “Jon” o xi “Majìn.” Jñà 'én xi kjisòn, ya̱á nchrobá-ne i̱t'aà ts'e̱ xi̱ta̱ nei̱í. 38 ’Jye kina'yà koni s'ín ki'mì-nò kjòtseé: “Tsà yá xi ko̱chrje jngo xkoiìn, tinachrje ngajo-ne ts'e̱. Ko̱ tsà yá xi skoe̱ton-lè nga skónáje̱n jngoò niñoi, chjínáje̱n ngajo-ne ts'e̱.” 39 Ta̱nga an, k'oa̱á xan-nò: Ti̱kjeiín-là xi̱ta̱ ts'e̱n. Tsà jngoò xi̱ta̱ xi si̱ìjtsiìn-t'aà kjioòn kixi̱, ti̱koa̱á tjiì-là xi ngobà nga katè-la̱. 40 Tsà jngoò xi̱ta̱ ko̱òngui-nò nga mejèn-la̱ skoé na̱chro̱-nò, ti̱koa̱ tjiì-là na̱chro̱kison-nò nga kàtakjoé. 41 Tsà jngoò xi̱ta̱ xi kjò'ñó s'i̱n-nò nga sikaje̱n jngoò hora-nò ch'á-la̱ nga onguíko̱-là, jò hora ìsa̱ kjiìn tanguíko̱-là. 42 Tsà yá xi̱ta̱ xi síjé-nò tsojmì, tjiì-là; ko̱ tsà jngoò xi̱ta̱ xi mejèn-la̱ ski̱ñat'aà-nò tsojmì, kì 'mì-là: mìkiì ko̱ma. 43 ’Ti̱koa̱á jye kina'yà koni ki'mì-nò kjòtse̱è: “ Ti̱tsjachaà xi̱ta̱ xinguio̱o ko̱ ti̱jtichaà kondra̱-nò.” 44 Ta̱nga an k'oa̱á xan-nò: Ti̱tsjachaà jñà xi kondra̱-nò, ti̱chikon-tioòn jñà xi chja̱'on-ko̱-nò, ndaà tiko̱o jñà xi jtik'eè-nò, tìtsi'batjiò jñà xi ch'o tsò-nò ko̱ jñà xi ch'o síko̱-nò. 45 Tsà k'oa̱s'ín s'e̱én, ki'ndí-la̱ Nainá xi tíjna ngajmiì ko̱ma; Nainá síhi̱seèn-la̱ ndobá-la̱ ts'oí xi̱ta̱ xi ndaà ko̱ xi mì kì ndaà; ti̱koa̱á Nainá sík'a-la̱ jtsí jñà xi̱ta̱ kixi̱ ko̱ xi mìtsà xi̱ta̱ kixi̱. 46 Jñò, tsà tà jñà matsjachaà xi̱ta̱ xi matsjakeè-nò, nì mé kjo̱ndaà xi s'e̱-nò; nga koa̱á ti̱ s'ín jñà xi̱ta̱ xi síkíchjítjì tsojmì ts'e̱ Roma. 47 Tsà tà jñà xi̱ta̱ xinguio̱o xi 'ntsè chiba si̱xat'aà, ¿a k'oa̱á ma-nò nga 'ñó ndaà titsa̱'nè?; nga ti̱koa̱á jñà xi̱ta̱ xi mì kiì beèxkon Nainá, k'oa̱á tis'ín. 48 Jñò, nguì kjoa̱kixi̱í t'e̱en, koni jè Na̱'èn-ná xi tíjna ngajmiì nga nguì kjoa̱kixi̱í s'ín.
