1 Jè Ini̱ma̱ Tsjeè-la̱ Nainá kiìko̱ Jesús jngoò i̱nde i̱t'aà xìn nga jè xi̱ta̱ nei̱í skót'aà nga mejèn-la̱ nga kàtátsji jé. 2 Ichán na̱chrjein ko̱ ichán ni̱tje̱n tsibìjnachjan Jesús ko̱ k'e̱ nga ko̱ma i̱skan jye kjòhojò-la̱. 3 Jè xi̱ta̱ nei̱í xi ma-la̱ kona̱cha̱n ijchò kasìt'aà chrañà-la̱ ñánda tíjna Jesús, kitsò-la̱: —Tsà kixi̱í kjoa̱ nga ngaji̱ xi Ki'ndí-la̱ Nainá 'mì-lè, tjiì-la̱ o̱kixi̱ jñà ndo̱jo̱ koi nga i̱nchra̱jín kàtama. 4 Ta̱nga Jesús kitsò-la̱: —Tjít'aà Xo̱jo̱n-la̱ Nainá, nga tsò: Mì tsà tà koi tsojmì xi ma chine kítsa̱kon-ne xi̱ta̱, ti̱koa̱á kítsa̱kon-ne nga yije 'én xi chja̱ Nainá. 5 Jè xi̱ta̱ nei̱í kiìko̱ Jesús ya̱ Na̱xa̱ndá-la̱ Nainá xi xó kitjaàjiìn-ne [ñánda 'mì Jerusalén]; kisìkíjnasòn i̱ngo̱ ítjòn ñánda ìsa̱ 'nga kji. 6 Kitsò-la̱: —Tsà kixi̱í kjoa̱ nga ji̱ xi Ki'ndí-la̱ Nainá 'mì-lè, ti̱katje̱ngui yijo-lè, nga k'oa̱á s'ín tjít'aà Xo̱jo̱n-la̱ Nainá nga tsò: Nainá k'oií xá-la̱ àkja̱le̱-la̱ i̱t'aà tsi̱ji, nga ko̱ tsja tso̱ba̱'ñó-lè, mé-ne nga ni̱jngoò ndo̱jo̱ satíngui-ne ntso̱koi. 7 Jesús kitsò-la̱: —Ti̱koa̱á tjít'aà Xo̱jo̱n-la̱ Nainá, nga tsò: “Kiì k'oa̱á s'ín chít'iì Na̱'èn-ná xi Nainá.” 8 Ìjngoò k'a jè xi̱ta̱ nei̱í kiìko̱ Jesús i̱sòn nindoò xi 'ñó 'nga kji, koa̱ tsakó yije-la̱ ngats'iì na̱xa̱ndá xi tjín i̱sò'nde ko̱ kjoa̱jeya-la̱ jñà na̱xa̱ndá, 9 Kitsò-la̱: —Nga jií tsjaà yije-lè na̱xa̱ndá koi, tsà ko̱si̱xkónchit'aà-ná ko̱ jeya si̱kíjna-ná. 10 K'e̱é kitsò Jesús: —Ti̱xìn xi̱ta̱ nei̱í, ti̱si'taàxìn-ná. Nga k'oa̱á s'ín tjít'aà Xo̱jo̱n-la̱ Nainá nga tsò: “Jeya tikíjni Na̱'èn-ná xi Nainá 'mì-la̱; tà jè ta̱jngoò tikitasòn-la̱.” 11 K'e̱é kiì jè xi̱ta̱ nei̱í, tsasìt'aàxìn-la̱ Jesús. I̱kjoàn ijchò àkja̱le̱-la̱ Nainá xi kisìs'iìn-la̱ Jesús. 12 K'e̱ nga kiì'nchré Jesús nga jè Juan xi kis'iìn bautizar xi̱ta̱ nda̱yá tíjnaya, kiì ijngoò k'a-ne ya̱ i̱'nde-la̱ ñánda 'mì Galilea. 13 Ta̱nga mì ya̱ tsibìjna ñánda 'mì Nazaret; ján kiì kíjna ñánda 'mì Capernaum, jngoò na̱xa̱ndá xi kijnandi ndáchikon ya̱ i̱'nde xi chja̱-ne Zabulón ko̱ Neftalí. 14 K'oa̱ás'ín komà mé-ne nga tsitasòn-ne 'én xi kiskiì Isaías xi̱ta̱ xi kiìchja̱ ngajo-la̱ Nainá nga kitsò: 15 Jè nangui xi ts'e̱ Zabulón ko̱ jè nangui xi ts'e̱ Neftalí, ya̱ ndi̱yá xi fì i̱ndiì ndáchikon, ján xijngoaá xajngá nandá Jordán ya̱ nangui Galilea, ñánda tjín xi mìtsà xi̱ta̱ judío. 16 Jñà xi̱ta̱ na̱xa̱ndá koi xi tjíjñò kjo̱hítsjeèn-la̱, kijtseè jngoò ni'ín xi 'ñó tse kji, koa̱ jñà xi̱ta̱ xi ya̱ tjímaya ndiyá-la̱ kjoa̱biyaà, kjòhiseèn kjo̱hítsjeèn-la̱. 17 K'e̱é tsibíts'ia̱ Jesús nga kiìchja̱ya 'én ndaà-la̱ Nainá. Kitsò: —Ti̱kájno jé-nò, kì ti̱ jé binchaàtsji-nò nga jyeé kjòchrañàt'aà-nò na̱chrjein nga jcha̱a kós'ín otíxoma jè xi ngajmiì nchrobá-ne. 18 K'e̱ nga tífa Jesús ya̱ i̱ndiì ndáchikon ts'e̱ Galilea, kijtseè jò xi̱ta̱ xi 'ntse̱ ma, jngoò xi 'mì Simón ko̱ ti̱jè-ne xi 'mì Pedro, ko̱ xijngoò, jè xi 'mì Andrés. Jñà xi̱ta̱ koi xi sík'en ti̱n. K'e̱ nga nchisíkatje̱jiìnndá na'ya-la̱, 19 Jesús kitsò-la̱: —Nchrohótji̱ngui-ná, an tsjaà-nò xá nga kíxkóya xi̱ta̱ xi an kjìt'aà-na koni s'ín maxkóya ti̱n. 20 Jñà xi̱ta̱ koi ni̱to̱ón kisìkájna na̱'ya-la̱ nga kiìtji̱ngui-la̱ Jesús. 21 Ìsa̱ xijngoaà ìsa̱ Jesús kijtseè ngui jò xi̱ta̱ xi ti̱koa̱ 'ntse̱ ma-ne; jngoò xi 'mì Jacobo, ko̱ xi ìjngoò, Juan 'mì; i̱xti-la̱ Zebedeo. Ya̱á títsa̱ya chitso ko̱ na̱'èn-la̱. Nchibíndaya jñà na̱'ya-la̱. Jesús kiìchja̱-la̱ nga jñà ko̱jmeiíko̱. 22 Xi̱ta̱ koi ni̱to̱ón kisìkájna chitso-la̱ ko̱ na̱'èn-la̱ nga kiìtji̱ngui-la̱ Jesús. 23 Jesús tsajmeè kóho̱kji nangui Galilea, tsakóya 'én-la̱ Nainá ya̱ ni'ya i̱ngo̱ sinagoga nga íjngó íjngó na̱xa̱ndá. Kiìchja̱ya 'én ndaà-la̱ Nainá koni s'ín otíxoma Nainá; ti̱koa̱ kisìndaà-ne ngats'iì ch'in xi tjín-la̱ xi̱ta̱ nga xki xi ján ijòjno ijòt'aà yijo-la̱. 24 Kina'yà-la̱ Jesús kóho̱kji ya̱ i̱'nde ñánda 'mì Siria, koa̱ jiìko̱-la̱ xi̱ta̱ xk'én xi kjìn ska̱ya ch'in tjín-la̱, jñà xi ijòjno ijòt'aà yijo-la̱ ko̱ xi̱ta̱ xi ch'in nei̱í tíjiìn ini̱ma̱-la̱, ko̱ tjín xi ch'in biyaàxín tjín-la̱, ko̱ xi̱ta̱ xi mì kì ndaà ma síhiníyá yijo-la̱. Jesús kisìndaà-ne ngats'iì xi̱ta̱ koi. 25 Kjìn xi̱ta̱ xi ya̱ i̱'nde-la̱ Galilea kiìtji̱ngui-la̱, ko̱ jñà xi̱ta̱ na̱xa̱ndá xi te ma-ne (xi 'mì Decapolis), ko̱ jñà xi̱ta̱ na̱xa̱ndá Jerusalén ko̱ na̱xa̱ndá xi i'nga xi ya̱ chja̱-ne nangui Judea, ko̱ xi chja̱-ne xijngoaà xajngá nandá Jordán.
