1 K'e̱ nga kis'e i̱sén, ngats'iì xi̱ta̱ sko̱-la̱ no̱'miì, jñà xi̱ta̱ jchínga ts'e̱ xi̱ta̱ judío tsajoóya-ne nga kondra̱ kjoi̱-la̱ Jesús mé-ne nga ko̱ma si̱ìnga̱tsja-ne jñà xi̱ta̱ Romano nga si̱ìk'en. 2 Tsibít'aà'ñó, kiìko̱ nga kisìnga̱tsja Pilato xi xi̱ta̱xá gobernador tíjna ts'e̱ Roma. 3 Judas, jè xi tsatíjna Jesús, k'e̱ nga jye kijtseè nga jye kitjoòtin kjoa̱ nga ki̱yá, 'ñó kjòkájno-la̱ kjoa̱ xi kis'iìn koa̱ kisìkátjiì-ne to̱n chroba xi katé ma-ne jñà xi̱ta̱ sko̱-la̱ no̱'miì ko̱ xi̱ta̱ jchínga. 4 Kitsò-la̱: —Tseé jé tsoòtsji-la̱ yijo-na̱ nga kisìnga̱tsja-nò jngoò xi̱ta̱ xi nìmé jé tjín-la̱. Ta̱nga jñà xi̱ta̱ koi kitsò: —Ngaji̱n, mì kiì 'ya-je̱n. Kjoa̱ tsi̱ji-né. 5 Judas tsibítsjo to̱n ya̱ i̱ngo̱ ítjòn. K'e̱é kiì tsibítjoóngui yijo-la̱. 6 Jñà xi̱ta̱ sko̱-la̱ no̱'miì, kiskoé to̱n, kitsò: —Mì kiì ko̱ma ya̱ si̱jngoaá to̱n xi tjíya kaxa̱-la̱ to̱n kjo̱tjò-la̱ Nainá. To̱n jè, chjí-la̱ mik'en-né. 7 K'e̱é tsajoóya-ne nga jè to̱n jè, nanguií ko̱tse jngoò 'nde-ne, xi 'mì “i̱'nde ñánda mandaà ti̱jí”, mé-ne nga s'e̱-ne i̱'nde ñánda ko̱ma si̱ìjiìn xi̱ta̱ xi xìn na̱xa̱ndá-la̱. 8 K'oi̱í kjoa̱-la̱, skanda na̱chrjein i̱'ndei̱, tákó k'oa̱á 'mì i̱'nde jè nga “I̱'nde-la̱ Jní” 'mì. 9 K'oa̱á s'ín tsitàsòn koni s'ín kitsò Jeremías xi̱ta̱ xi kiìchja̱ ngajo-la̱ Nainá nga kitsò: “Kiskoé to̱n chroba xi katé ma-ne, koni tjín tsibíjna-la̱ chjí-la̱ jñà xi̱ta̱ Israel, 10 ko̱ k'oa̱á s'ín kisìkjeén to̱n jè nga tsatse i̱'nde-la̱ xi̱ta̱ xi ti̱jí bíndaà koni s'ín kitsjaà-na o̱kixi̱ Nainá.” 11 Jesús, k'e̱ nga síjna nguixko̱n jè xi̱ta̱xá gobernador kiskònangui-la̱, kitsò-la̱: —¿A ji-né xi xi̱ta̱xá ítjòn-la̱ jñà xi̱ta̱ Judío? Jesús kitsò: —Ngaji̱í xi k'oa̱ si nga an-ná. 12 K'e̱ nga nchihóngui Jesús jñà xi̱ta̱ sko̱-la̱ no̱'miì ko̱ xi̱ta̱ jchínga-la̱ xi̱ta̱ judío, Jesús ni̱ mé 'én kiìchja̱. 13 K'e̱é kitsò Pilato, jè xi xi̱ta̱xá gobernador: —¿A mì na'yà-la̱ koni tsò-lè? Kjìn 'én tsjá xi kondra̱ tsi̱ji. 14 Ta̱nga Jesús ni̱ jngoò 'én kiìchja̱. K'oi̱í kjoa̱-la̱ nga jè xi̱ta̱xá gobernador tà k'oa̱á komà-la̱. 15 Nga xki̱ nó k'e̱ nga bitjo s'eí Paxko̱, jè xi̱ta̱xá gobernador síkíjnandei̱í jngoò xi̱ta̱ xi títsa̱'ya nda̱yá, jè xi mejèn-la̱ xi̱ta̱ na̱xa̱ndá nga kíjnandei̱í. 16 Ti̱k'e̱é-ne tíjna'ya nda̱yá jngoò xi̱ta̱ xi 'ya-la̱ nga 'ñó ts'e̱n xi 'mì Barrabás. 17 K'e̱ nga chixaña xi̱ta̱ na̱xa̱ndá, jè Pilato kiskònangui-la̱, kitsò-la̱: —¿Yá-né xi mejèn-nò nga kíjnandei̱í? ¿A Barrabás-né, o xi Jesús-né xi Cristo 'mì-là? 18 Koií o̱kitsò-ne Pilato nga jyeé tíjiìn-la̱ nga tà kjoa̱ xitakòn-né nga ya̱ ijchò sínga̱tsja Jesús. 19 Jè Pilato k'e̱ nga tíjna ni'ya osen, jè chjo̱ón-la̱ kisìkasén xá-la̱, kitsò-la̱: “Kiì ji chingàjiìn kjoa̱-la̱ xi̱ta̱ kixi̱ jè. Na̱ti ni̱tje̱n, tsí 'ñó ch'o tsò nijñá xi kò'bi-na i̱t'aà ts'e̱.” 20 Ta̱nga jñà xi̱ta̱ sko̱-la̱ no̱'miì ko̱ xi̱ta̱ jchínga, chinchá'a xi̱ta̱ na̱xa̱ndá nga kàtasíjé nga kàtìjna̱ndei̱í Barrabás ko̱ kàtasík'en Jesús. 21 Jè xi̱ta̱xá gobernador ìjngoò k'a kiskònangui-la̱ jñà xi̱ta̱ na̱xa̱ndá; kitsò-la̱: —¿Ñá-la̱à nga ingajò xi̱ta̱ koi xi mejèn-nò nga sikíjnandia̱a? Jñà xi̱ta̱ na̱xa̱ndá kitsò: —Jè Barrabás. 22 Pilato kiskònangui-la̱ jñà xi̱ta̱ na̱xa̱ndá. Kitsò-la̱: —¿Mé xi si̱koa̱á Jesús xi Cristo 'mì-là? Ngats'iì xi̱ta̱ na̱xa̱ndá kitsò: —¡Kàtasit'aà krò! 23 K'e̱é kitsò Pilato: —¿Mé jé xi tsohótsji, mé-ne ki̱yá-ne? Jñà xi̱ta̱, ìsa̱á 'ñó kiìchja̱, kitsò: —¡Kàtasit'aà krò! 24 K'e̱ nga kijtseè Pilato nga nì mé kjoa̱ sindaàjiìn, tà ìsa̱á tímatse kjoa̱siì, kiskinìkjaà nandá nga tsaníjno tsja nga nguixko̱n xi̱ta̱ na̱xa̱ndá mé-ne nga skoe̱-ne jñà xi̱ta̱ nga nimé jé tjín-la̱. Kitsò: —Nì mé jé tjín-na xi i̱t'aà ts'e̱ xi̱ta̱ kixi̱ jè nga mejèn-nò nik'en. Kjoa̱ tsa̱jòn-nò. 25 Ngats'iì xi̱ta̱ kjìn kitsò: —Kjoa̱biyaà-la̱ xi̱ta̱ jè, kinda̱ tsa̱ji̱n-náje̱n ko̱ i̱xti-na̱je̱n. 26 Pilato, k'e̱é kisìkíjnandei̱í Barrabás; k'e̱ nga jye kitsjaà o̱kixi̱ nga tsajá-la̱ Jesús, i̱kjoàn kisìnga̱tsja nga si̱t'aà krò. 27 Jñà soldado-la̱ xi̱ta̱xá gobernador kiìko̱ Jesús ján ni'ya osen. I̱kjoàn kiìchja̱ yije-la̱ soldado xíkjín nga tsibìtsa̱jnandiì-la̱. 28 Tsachrje nikje-la̱ koa̱ kisiìkjá jngoò nikje xi inì kji. 29 I̱kjoàn tsibí'a sko̱ jngoò corona na'yá xi jñà xó tsibíndaà-ne, koa̱ jngoò yá tsoòya tsja kixi̱; k'e̱é chinchaxkónchit'aà-la̱ nga kis'ín sobà-la̱. Kitsò-la̱: —¡Viva xi̱ta̱xá ítjòn-la̱ xi̱ta̱ Judío! 30 Ti̱koa̱á tsibíchrájno koa̱ kiskoé yá xka̱nchra̱ xi kjiya tsja, tsatjì sko̱. 31 K'e̱ nga jye kisìsobà-la̱, jaàxìn-la̱ nikje inì xi íkjá. I̱kjoàn kisìkjákjá-ne xi nikje ts'e̱. K'e̱é kiìko̱ nga ko̱sit'aà krò. 32 K'e̱ nga jye nchifìko̱ Jesús, kiskaàkjoò jngoò xi̱ta̱ xi Cirene i̱'nde-la̱ xi 'mì Simón. Jñà soldado kjo̱'ñó kis'iìn-la̱ nga kisìk'aje̱n krò-la̱ Jesús. 33 K'e̱ nga ijchòko̱ ya̱ i̱'nde ñánda 'mì Gólgota 'én xi tsòya-ne i̱'nde sko̱ mik'en, 34 ya̱á kitsjaà-la̱ vino xi tsjájiìn-la̱ ndá chikitsja. K'e̱ nga kiskoòt'aà Jesús mì kiì kits'iì. 35 K'e̱ nga jyeé tsasìt'aà krò, jñà soldado kisìskáko̱ nikje-la̱ Jesús nga kisìka'bí-la̱ xíkjín yá ts'e̱ ko̱ma. K'oa̱á s'ín tsitasòn 'én-la̱ jè xi̱ta̱ xi kiìchja̱ ngajo-la̱ Nainá nga kitsò: “Kisìka'bí nikje-na̱ koa̱ kisìskáko̱ yá ts'e̱ ko̱ma.” 36 Ikjoàn ya̱á tsibìtsa̱jna nga kisìkinda̱ Jesús. 37 Ya̱ i̱sòn sko̱ krò tsibít'aà 'én xi k'oa̱ kitsò mé jé xi komà-la̱ nga kinìk'en. Jñà 'én koì, tsò: “Jè jèhe̱ xi Jesús xi Xi̱ta̱xá Ítjòn-la̱ xi̱ta̱ Judío.” 38 Ti̱koa̱á kisit'aà krò jò xi̱ta̱ chijé. Jngoò kisit'aà nga kixi̱-la̱ koa̱ jngoò kisit'aà nga ngaskón-la̱. 39 Jñà xi̱ta̱ xi ya̱ ja, síkatji sko̱ nga kiìchja̱jno-la̱, 40 kitsò-la̱: —Ji, k'oaá kisi nga si̱ixòñi i̱ngo̱ ítjòn-la̱ Nainá ko̱ jàn na̱chrjein kínda ngajò-ne, ti̱kíjna-ndei̱í yijo-lè. Tsà kixi̱í kjoa̱ nga ji̱ xi Ki'ndí-la̱ Nainá, chjínáje̱nt'ì yijo-lè krò. 41 K'oa̱á ti̱ s'ín kisìsobà-la̱ jñà xi̱ta̱ sko̱-la̱ no̱'miì, ko̱ xi̱ta̱ xi okóya kjo̱tíxoma-la̱ Nainá xi kiskiì Moisés, ko̱ xi̱ta̱ jchínga ts'e̱ xi̱ta̱ Judío. Kitsò: 42 —Xi̱ta̱ jè, tsachrjekàjiìn kjo̱'in xi kj'ei̱í xi̱ta̱, ta̱nga jè xi yijo-la̱, mì kiì ma ochrjekàjiìn kjo̱'in. Tsà kixi̱ kjoa̱ nga jè Xi̱ta̱xá Ítjòn-la̱ Israel, kàtitja̱je̱nt'aà krò mé-ne nga ko̱kjeiín-iná it'aà ts'e̱. 43 Xi̱ta̱ jè, i̱t'aà ts'e̱ Nainá kjò'ñót'aà ikon. Tsà kixi̱í kjoa̱ nga tsjakeè Nainá, i̱'ndei̱, jè kàtasìko̱. Nga̱ k'oa̱á ti̱ kitsò nga Ki'ndí-la̱ Nainá ma. 44 Skanda jñà xi̱ta̱ chijé xi ti̱koa̱ ya̱ kjit'aà krò ti̱koa̱á tsatít'aà. 45 K'e̱ nga ijchò nchisen skanda xi jàn nga kjòhoxòn, kóho̱kji nga tíjtsa i̱sò'nde kòjñò. 46 Ti̱jè-ne hora Jesús 'ñó kiìchja̱ nga kitsò: “Elí, Elí, ¿lama sabactani?” 'Én jè tsòya-ne: “Nainá, Nainá, ¿mé-ne kàjneiìtakòn-ná?” 47 Tjín i'nga xi̱ta̱ xi ya̱ títsa̱jna xi ki̱ìnchré-la̱, kitsò: —Xi̱ta̱ jè, jé chja̱-la̱ Elías. 48 K'e̱é tsangachikon jngoò xi kiìkjaá tsa̱nga̱; kisìkanchi-la̱ ko̱ vinagre; i̱kjoàn tsibísko̱-la̱ ína̱xo̱; kitsjaà-la̱ Jesús nga kàt'iì. 49 Ta̱nga kitsò xi̱ta̱ xi i'nga: —Kiì k'oa̱ nìko̱, chítsejèn-lá, ¿a kjoi̱í Elías nga skónáje̱n-t'aà krò. 50 Jesús ìjngoò k'a 'ñó kiskindàya. I̱kjoàn k'en. 51 Jè nikje velo xi tjo̱hóya jngoò osen i̱ngo̱ ítjòn kixajndá. Jòya komà skanda i̱t'aà nangui; ts'a ch'ón koa̱ tsakjan na̱xi̱ 52 nga kitáx'a̱ jñà i̱tsjó-la̱ mik'en. Kjìn xi̱ta̱ tsjeè-la̱ Nainá jaàya-la̱ xi kjotseè k'en. 53 Jñà xi̱ta̱ mik'en xi itjo-ne i̱tsjó-la̱, k'e̱ nga ko̱ma i̱skan nga jaàya-la̱ Jesús, xi̱ta̱ koi, jahas'en ya̱ na̱xa̱ndá tsjeè Jerusalén; kjìn xi̱ta̱ kijtseèxkon. 54 Jñà xi̱ta̱ xi nchisíkinda̱ Jesús ko̱ jé xi̱ta̱ sko̱-la̱ soldado, k'e̱ nga kijtseè nga ts'a ch'ón, ngats'iì kjoa̱ xi komà, tsí ndaà kitsakjòn. K'e̱é kitsò: —Kixi̱í-là kjoa̱, xi̱ta̱ jèhe̱, Ki'ndí-la̱ Nainá-né. 55 Ti̱koa̱á kjìn íchjín títsa̱jna xi kjiìn nchikotsejèn-ne xi inchrobà-tji̱ngui-la̱ Jesús skanda ján Galilea nga kisìchját'aà-la̱. 56 Ya̱á títsa̱jna xi 'mì María Magdalena, María xi nea̱-la̱ ma Jacobo ko̱ José, ko̱ nea̱-la̱ i̱xti-la̱ Zebedeo. 57 K'e̱ nga jye kòjñò, j'iì jngoò xi̱ta̱ nchi̱ná xi 'mì José. Ya̱á i̱'nde-la̱ jè na̱xa̱ndá xi 'mì Arimatea. Xi̱ta̱ jè ti̱koa̱á ya̱á kiskota'yàt'aà-la̱ Jesús. 58 K'e̱é kiìchja̱-la̱ Pilato nga kisìjé-la̱ yijo-la̱ Jesús. Jè Pilato kitsjaà o̱kixi̱ nga kàtatjoé-la̱. 59 José kiskoé yijo-la̱ Jesús; kisìkájté jngoò nikje sábana tsjeè. 60 Kiì kìhi̱jiìn ya̱ nangui-la̱ xi ts'e̱ José. Kiskinìsingui jngoò nga̱jo̱ i̱tsjó xi̱tse̱ xi xó tsibíndaà-ne ya̱ i̱ngui nguijo. I̱kjoàn tsohòjtsa xòhotjoa̱-la̱ nga̱jo̱ jngoò ndo̱jo̱ teè; i̱kjoàn kiì-ne. 61 Jè María Magdalena ko̱ María xi ìjngoò, ya̱á tsibìtsa̱jnat'aà chrañà-la̱ ñánda kisihi̱jiìn Jesús. 62 K'e̱ nga komà inchijòn, jè na̱chrjein nìkjáya, jñà xi̱ta̱ sko̱-la̱ no̱'miì ko̱ xi̱ta̱ fariseo kiìkon Pilato. 63 Kitsò-la̱: —Na̱'èn, bítsjeèn-na̱je̱n, jè xi̱ta̱ ndiso jèhe, k'e̱ nga sa̱ tsibíjnakon kitsò-né: “K'e̱ nga ki̱jchò jàn na̱chrjein kjoa̱áya-na.” 64 K'oi̱í kjoa̱-la̱ kàtamàkìnda i̱tsjó-la̱ skanda k'e̱ ko̱ma jàn na̱chrjein nga mì ya̱á ki̱jchò xi̱ta̱-la̱ xi kota'yàt'aà-la̱ k'e̱ nga ni̱tje̱n nga kji̱ko̱ chijé yijo-la̱. I̱kjoàn ki̱tso̱ jñà xi̱ta̱-la̱ nga ke̱èno̱jmí-la̱ jñà xi̱ta̱ na̱xa̱ndá “jyeé jaàya-la̱ xi i̱t'aà ts'e̱ kjoa̱biyaà.” Koa̱ ìsa̱á ch'o komà 'én ndiso koi koni jñà xi ítjòn. 65 Kitsò Pilato: —Ya̱ títsa̱jna soldado. Tanguió ti̱kinda̱a. 'Ñó tichjoa jè i̱tsjó nga 'ñó kàtas'e. 66 K'e̱é kiì nga tsibíchjá'ñó jè i̱tsjó koa̱ tsasén jngoò-la̱ sello ya̱ i̱sò'nga-la̱ ndo̱jo̱ xi kijtsa. I̱kjoàn kisìkítsa̱jna soldado xi kisìkinda̱.
