1 ’Koni s'ín otíxoma jè xi ngajmiì nchrobá-ne, k'oa̱ás'ín ngaya-la̱ koni tsà jngoò xi̱ta̱ xi tjín-la̱ nangui. Kiì nga ta̱jñòya nga kiì kátsji chi̱'nda xi si̱ìxáko̱ ñánda tjín-la̱ toò uva. 2 K'e̱ nga jye tsibíndaàjiìnko̱ nga koi̱ìchjí-la̱ koni tjín síkijne xi̱ta̱ chi̱'nda nga jngoò na̱chrjein, ikjoàn kisìkasén ñánda nga kisìxá. 3 ìjngoò k'a kiì jè nei-la̱ xá koni xi ñijaàn-la nga ta̱jñòya. Kijtseè ìsa̱ chi̱'nda xi tíyijòjiìn ndi̱tsi̱n xi tsjìn-la̱ xá. 4 Kitsò-la̱: “Ta̱nguió ti̱xáko̱-ná. A̱n kìchjí-nò koni tjín machjí-nò.” Kiì chi̱'nda koi nga kisìxá. 5 Jè nei-la̱ xá, kiì ìjngoò k'a k'e̱ nga ijchò nchisen. Ti̱koa̱á kiì ìjngoò k'a k'e̱ nga ijchò xi jàn nga kjòo̱xòn. 6 Jye-la ijchò tsà xi 'on nga kjòo̱xòn, itjo ìjngoò k'a jè nei-la̱ xá; koa̱ kisakò ìsa̱-la̱ chi̱'nda xi tà jyò títsa̱jna. Kitsò-la̱: “¿Mé-ne tà jyò títsa̱jna-nò kó nga kò'ba-nò na̱chrjein nga mì nìxá-nò?” 7 Jñà chi̱'nda koi kitsò: “Koií-né nga mì yá tsjá xá-na̱je̱n.” K'e̱é kitsò-la̱: “Tanguió ndaà tsa jño, ta̱ngui ti̱xá ján i̱jiìn tsojmì tjè-na̱.” 8 K'e̱ nga jye kòjñò, jè nei-la̱ xá kitsò-la̱ jè xi̱ta̱ xi síkinda̱ chi̱'nda-la̱: “Ti̱nókjoa̱-la̱ ngats'iì chi̱'nda. Tíchjí-la̱. Títs'ia̱ko̱-ne jñà xi i̱skan kòfahas'en xá-la̱; koa̱ jñà xi ítjòn kòfahas'en, tikjet'aà-ne. 9 K'e̱é kiìchja̱-la̱ jñà chi̱'nda xi jahas'en xi 'òn nga kjòoxòn; k'oa̱á tjín tsibíchjí-la̱ koni tjín chjí-la̱ nga jngoò na̱chrjein nga jngoò ìjngoò. 10 K'e̱ nga kjòchjì-la̱ jñà chi̱'nda xi jahas'en ta̱jñòya, k'oa̱á komà-la̱ tsà ìsa̱á tse ko̱chjí-la̱. Ta̱nga tà ngásòn tjín kjòchjí-la̱ koni tjín machjí-la̱ nga jngoò na̱chrjein nga jngoò ìjngoò. 11 K'e̱ nga jye kjòchjí-la̱ chi̱'nda koi i̱kjoàn tsibíts'ia̱ nga tsatít'aà jè nei-la̱ xá. 12 Kitsò-la̱: “Jñà chi̱'nda xi i̱skan kòbijchó, tà jngoò hora kásíxá, koa̱ ngaje̱n kànìxá-náje̱n nga kò'ba na̱chrjein koa̱ kànìkjeiín-la̱je̱n ndobá nga kò'ba na̱chrjein. Tà ngásòn tjín tíbíchjí-náje̱n.” 13 Ta̱nga jè nei-la̱ xá kitsò jngoò-la̱ jñà chi̱'nda: “Ji amigo mìtsà mé xi ch'o tìsìko̱-le; k'oa̱á tjín tìbìchjí-lè koni tjín chjí-la̱ nga jngoò na̱chrjein nga k'oa̱á s'ín kàchibá. 14 Chjoí chjí-le koa̱ t'in-ne. K'oa̱á s'ín mejèn-na nga k'oa̱ ti̱ tjín tsjaà-la̱ jè xi i̱skan kàsíxá koni tjín titsjaà-le. 15 Nga ko̱ to̱n-na̱ ¿A mì tjí'nde-na nga k'oa̱s'ín s'iaàn koni s'ín mejèn-na? ¿A maxítakón-né nga 'an ndaà xi̱ta̱?” 16 Jesús kitsò ìsa̱: —K'oa̱s'ín ko̱ma jñà xi̱ta̱ xi títsa̱jna tji̱ngui na̱chrjein i̱'ndei̱, nga ko̱ma i̱skan, jñà kítsa̱jna ítjòn; koa̱ jñà xi títsa̱jna ítjòn i̱'ndei̱ nga ko̱ma i̱skan jñà kjoe̱hit'aà-ne. [Kjìn ma-ne xi xó chja̱-la̱ Nainá ta̱nga chiba ma-ne xi tjájiìn.] 17 Jesús k'e̱ nga nchifì ján na̱xa̱ndá Jerusalén, kiìchja̱t'aàxìn-la̱ jñà xi̱ta̱ xi kota'yàt'aà-la̱ xi tejò ma-ne, kitsò-la̱: 18 —I̱'ndei̱ nga titsa̱honguiá na̱xa̱ndá Jerusalén, an xi Ki'ndí-la̱ Xi̱ta̱ xan-la̱ yijo-na̱ ya̱á tsobà'ñó-na xi̱ta̱ sko̱-la̱ no̱'miì ko̱ xi̱ta̱ xi okóya kjo̱tíxoma-la̱ Nainá xi kiskiì Moisés nga koi̱ì'nè-na kjoa̱biyaà, 19 i̱kjoàn si̱ìnga̱tsja-na jñà xi mìtsà xi̱ta̱ Judío nga siìsobà-na, ko̱jà-na, ko̱òt'aà-na krò. Ta̱nga xi ko̱ma jàn na̱chrjein kjoa̱áya-na. 20 Nea̱-la̱ Jacobo ko̱ Juan i̱xti-la̱ Zebedeo ijchòkon ñánda tíjna Jesús. Tji̱ko̱ i̱xti-la̱. Tsasìxkónchit'aà-la̱ Jesús nga kisìjé jngoò-la̱ kjo̱ndaà. 21 Jesús kiskònangui-la̱, kitsò-la̱: —¿Mé xi mejèn-le? Jè chjo̱ón kitsò: —Ya̱ ñánda ko̱ti̱xomai, tjiì o̱kixi̱ nga ya̱ kàtiyijòt'aà-le i̱xti-na̱. Jngoò kàtíjnakixi̱-le koa̱ jngoò katíjnat'aà-le xi ngaskón-le. 22 Jesús kitsò-la̱: —Mì kiì yaà mé xi nìjé. ¿A ki̱chikjoaà-nò nga ko̱tojñò jè kjo̱'in xi an ko̱tojñaà? Xi̱ta̱ koi kitsò: —Ki̱chìkjoa̱à-na̱je̱n. 23 K'e̱é kitsò-la̱ Jesús: —O̱kixi̱-né, k'oa̱á ti̱ s'ín ko̱tojñò kjo̱'in koni an, ta̱nga xi an tsjaà-nò nga ya̱ ki̱tsa̱jnat'aà-ná ya̱ kixi̱-na̱ ko̱ ngaskón-na̱ mì tsà an oko̱-na nga tsjaà-nò. Jñà i̱'nde koi, jñà tjoé-la̱ xi̱ta̱ xi Nainá títsa̱jnandaà-la̱ nga tsjá-la̱. 24 K'e̱ nga kiì'nchré jñà xi̱ta̱-la̱ Jesús xi i'nga xi te ma-ne, kòjtì-la̱ it'aà ts'e̱ xi̱ta̱ xi jò ma-ne. 25 Jesús kiìchja̱-la̱, kitsò: —Jyeé tíjiìn-nò nga jñà xi̱ta̱ sko̱-la̱ na̱xa̱ndá, nangui sìkítsa̱jna xi̱ta̱-la̱ xi jñà otíxoma-la̱. Ti̱koa̱á jñà xi̱ta̱ xi 'nga xá tjín-la̱, jñà xi beè nga otíxoma-la̱ xi̱ta̱. 26 Ta̱nga jñò mì kiì k'oa̱s'ín s'e̱en. Tsà jngoò xi̱ta̱ xinguio̱o mejèn-la̱ 'nga kíjna, jè xi kàtasìxá-la̱ xi̱ta̱ xi i'nga. 27 ko̱ jè xi mejèn-la̱ kíjna ítjòn, chi̱'nda-nò kàtama. 28 'An xi Ki'ndí-la̱ Xi̱ta̱ xan-la̱ yijo-na̱, mì tsà koi xá j'iì-na nga 'an ko̱si̱in-na, tà sa̱á 'an siìxá-la̱ xi̱ta̱ xi i'nga ko̱ tsjaà yijo-na̱ nga ki̱yá mé-ne nga kjìn xi̱ta̱ ki̱tjokájiìn-ne kjo̱'in xi kjoa̱ ts'e̱ jé-la̱. 29 K'e̱ nga jye nchifì-ne ya̱ na̱xa̱ndá Jericó, kjìn xi̱ta̱ kiìtji̱ngui-la̱ Jesús. 30 Ya̱ i̱ndiì ndi̱yá koni s'ín tífì Jesús, jò xi̱ta̱ xi mì kiì tsejèn-la̱ títsa̱jna. K'e̱ nga kiì'nchré nga jè Jesús tífahaya ndi̱yá, 'ñó kiìchja̱-la̱ kitsò-la̱: —¡Na̱'èn, nga ya̱ nchrobàt'aà-ne tje̱-la̱ xi̱ta̱xá ítjòn David [nga ji tijna ngajo-la̱] jcha̱hi̱ma̱-náje̱n! 31 Jñà xi̱ta̱ xi tji̱ko̱ Jesús tsohótiko̱-ne nga jyò kàtìtsa̱jna, ta̱nga jñà xi̱ta̱ xi mì kiì tsejèn-la̱, ìsa̱á 'ñó kiìchja̱, kitsò: —¡Na̱'èn, xi tje̱-la̱ David, jcha̱hi̱ma̱-náje̱n! 32 K'e̱é tsasíjna Jesús koa̱ kiìchja̱-la̱, kiskònangui-la̱, kitsò-la̱: —¿Mé xi mejèn-nò nga si̱ìko̱-nò? 33 Jñà xi̱ta̱ koi, kitsò: —Na̱'èn, mejèn-naje̱n nga kàtatsejèn-naje̱n. 34 Jesús kjòhi̱ma̱keè jñà xi̱ta̱ koi. Tsohót'aà-la̱ tsja xko̱n koa̱ ni̱to̱ón kjòtsejèn-la̱. I̱kjoàn kiìtji̱ngui-la̱ Jesús.
