1 K'e̱ nga jye kiìchja̱ Jesús, kiì-ne ya̱ Galilea ján nangui Judea xi tíjna xijngoaà xajngá nandá Jordán. 2 'Ñó kjìn xi̱ta̱ kiìtji̱ngui-la̱ koa̱ ya̱á kisìndaà-ne i̱'nde jè jñà xi̱ta̱ xi xk'én. 3 Ijchò i'nga xi̱ta̱ fariseo ya̱ ñánda tíjna Jesús nga mejèn-la̱ skóna̱cha̱n-la̱. I̱kjoàn kiskònangui-la̱, kitsò-la̱: —¿A tjí'nde-la̱ xi x'i̱n nga tsjeiìn chjo̱ón-la̱ xi ni̱ta̱ mé kjoa̱-ne? 4 Jesús kitsò-la̱: —¿A kj'eè bìxke̱jñoò Xo̱jo̱n-la̱ Nainá nga tsò: Nainá, k'e̱ nga sa̱ tsibíndaà xi̱ta̱, tsibíndaà x'i̱n ko̱ chjo̱ón? 5 K'oa̱á kitsò: “K'oa̱á ma-ne nga jè x'i̱n si̱ìkíjna na̱'èn-la̱ ko̱ nea̱-la̱ nga kíjnako̱ chjo̱ón-la̱. Ta jngoò xi̱ta̱ ko̱ma-ne ingajò.” 6 Mì tsà ti̱ jò ma-ne, tà jngoò ko̱ma-ne. K'oi̱í kjoa̱-la̱ nga mì yá xi̱ta̱ tjí'nde-la̱ nga si̱ìtsjeiìn xíkjín xi Nainá kisìjngoò. 7 Jñà xi̱ta̱ fariseo kiskònangui-la̱ Jesús: —¿Mé-ne jè Moisés kitsjaà'nde-ne nga tsò: xo̱jo̱n kàtasindaà nga ko̱ma tsjeiìn xíkjín xi̱ta̱? 8 Jesús kitsò-la̱: —Koií-né nga tájaàjiìn tjín ini̱ma̱-nò, Moisés kitsjaà'nde-nò nga ki̱jnio̱o íchjín-nò, ta̱nga k'e̱ nga sa̱ tàts'en-la̱ kjoa̱, mì k'oa̱ás'ín tjín. 9 An k'oa̱á xán-nò, jè x'i̱n xi tsjeiìn chjo̱ón-la̱, tsà mì tsà kjoa̱ chijngui tísíko̱, ko̱ tsà kj'ei̱í chjo̱ón kixanko̱, jyeé kjoa̱ chijngui tís'ín jè x'i̱n. Ti̱koa̱á tsà jè x'i̱n xi kixanko̱ jngoò chjo̱ón xi kitsjeiìn x'i̱n-la̱, ti̱koa̱á kjoa̱ chijngui tís'ín. 10 Jñà xi̱ta̱ xi kota'yàt'aà-la̱ Jesús kitsò: —Tsà k'oa̱ás'ín iín tjín kjoa̱ ts'e̱ xi̱ta̱ xi bixan, ìsa̱á-la ndaà s'e tsà mì kì ki̱xan xi̱ta̱. 11 Jesús kitsò-la̱: —Tjín xi̱ta̱ xi mì kiì mokjeiín-la̱ kjo̱hítsjeèn jè; tà jñá xi̱ta̱ xi Nainá xó k'oa̱s'ín kitsjaà-la̱. 12 Tjín xi̱ta̱ xi mì kiì bixan nga xó k'oa̱s'ín kits'iìn-ne nga mì íchjín sísin-la̱; ti̱koa̱á tjín xi̱ta̱ xi xi̱ta̱ xíkjín o̱kisìko̱ nga mì íchjín sísin-la̱; ti̱koa̱á tjín xi̱ta̱ xi mì kiì bixan nga k'oa̱s'ín tsibìnè-la̱ yijo-la̱ nga mì íchjín sísin-la̱ nga mejèn-la̱ si̱ìxá i̱t'aà ts'e̱ kjo̱tíxoma-la̱ ngajmiì. Jñà xi̱ta̱ xi chíkjoa̱-la̱ nga mokjeiín-la̱ kjoa̱ koi, k'oa̱s'ín kàtasíkitasòn. 13 Jñà xi̱ta̱ j'iìko̱-la̱ ndí i̱xti ñánda tíjna Jesús nga mejèn-la̱ ko̱òt'aà-la̱ tsja ko̱ ki̱ìtsi'batji, ta̱nga jñà xi̱ta̱ xi kota'yàt'aà-la̱ Jesús tsohótiko̱ jñà xi̱ta̱ xi j'iìko̱ ndí i̱xti. 14 K'e̱é kitsò Jesús: —Tjiì'nde-là jñà ndí i̱xti nga kàtjanchrobákon-na. Kì binchahikon-là. Jñà xi k'oa̱ás'ín tjín ini̱ma̱-la̱ koni ts'e̱ ndí i̱xti, jyeé ts'e̱ ngats'iì kjo̱ndaà xi tjín ya̱ ñánda tíhotíxoma jè xi ngajmiì nchrobá-ne. 15 Jesús tsohósòn-la̱ tsja jñà ndí i̱xti; i̱kjoàn kiì-ne ya̱ i̱'nde jè. 16 Jngoò xi̱ta̱ ijchòkon Jesús, kiskònangui-la̱, kitsò-la̱: —Maestro, ¿Mé kjo̱ndaà xi s'iaàn nga s'e̱-la̱ kjoa̱bijnachon ini̱ma̱-na̱ ni̱ta̱ kjé-ne? 17 Jesús kitsò-la̱: —¿Mé-ne chjinangui-ná i̱t'aà ts'e̱ kjoa̱ xi ndaà tjín? Mì tsà yá tjín xi ndaà xi̱ta̱, tà jngoò Nainá. Tsà mejèn-lè nga s'e̱-lè kjoa̱bijnachon ni̱ta̱ kjé-ne, ti̱kit'aàsoín kjo̱tíxoma-la̱ Nainá. 18 Xi̱ta̱ jè kiskònangui: —¿Ñá-la̱ kjo̱tíxoma-ne? Jesús kitsò-la̱: —Kì xi̱ta̱ nìk'in; kì kjoa̱ chijngui 'nì; kì chijé 'nì; kì 'én ndiso nokjoì i̱t'aà ts'e̱ xi̱ta̱ xi kj'ei̱í; 19 jcha̱xkoín na̱'èn-le ko̱ nea̱-le; ti̱tsjachi xi̱ta̱ xingui̱i koni tsà ti̱ yijo tsi̱ji-ne. 20 —Ngats'iì kjo̱tíxoma koi jyeé tisìkitasoàn, —kitsò jè ti. —¿Mé xi chija ìsa̱-na̱? 21 Jesús kitsò-la̱: —Tsà mejèn-le nga nguiì kixi̱ ki̱jni, tiìn, tatìjni yije tsojmì xi tjín-le. Jè to̱n-le ti̱kabí-la̱ xi̱ta̱ i̱ma̱ mé-ne nga s'e̱-lè kjoa̱ machikon-tin ján ngajmiì. I̱kjoàn nchrobá-tji̱ngui-ná. 22 Xi̱ta̱ jè, k'e̱ nga kiì'nchré 'én koi, tà baá komà-la̱, koií kjoa̱-la̱ nga 'ñó kjìn tsojmì tjín-la̱. 23 K'e̱è kitsò-la̱ xi̱ta̱ xi kota'yàt'aà-la̱ Jesús: —O̱kixi̱í xi xan-nò. 'Ñó 'in ko̱ma-la̱ jñà xi̱ta̱ nchi̱ná nga kjoa̱s'en-jiìn ñánda tíhotíxoma jè xi ngajmiì nchrobá-ne. 24 Nguì jngoò k'a ko̱xan-nò, ìsa̱á mì 'in ko̱ma-la̱ jngoò cho̱ camello nga kjoa̱has'en xko̱n nindoò xi tjahaña-ne nikje, mì k'oa̱á-ne koni jngoò xi̱ta̱ nchi̱ná xi 'ñó tjín-la̱ tsojmì nga ko̱ma kjoa̱s'en-jiìn ñánda tíhotíxoma jè xi ngajmiì nchrobá-ne. 25 K'e̱ nga kiì'nchré 'én koi jñà xi̱ta̱ xi kota'yàt'aà-la̱ Jesús tà kjòxkón-la̱. K'e̱é kitsò: —¿Yá-né xi ki̱tjokàjiìn kjo̱'in kjoa̱ ts'e̱ jé-la̱? 26 Jesús kiskoò'an, kitsò-la̱: —Jñà xi̱ta̱ mì kiì ko̱ma-la̱ ko̱chrjekàjiìn kjo̱'in ini̱ma̱-la̱. Ta̱nga xi Nainá ko̱ma-la̱ ngats'iì kjoa̱. 27 K'e̱é kitsò Pedro: —Na̱'èn, ngaji̱n, jyeé kinìkítsa̱jna yije-je̱n ngats'iì tsojmì xi tjín-naje̱n koa̱ ji tjaàtji̱ngui-lèje̱n. ¿Mé xi tjoé-naje̱n? 28 Jesús kitsò-la̱: —Xi o̱kixi̱í xi xan-nò, k'e̱ nga ki̱jchò na̱chrjein nga ko̱xi̱tse̱ya ìjngoò k'a i̱sò'nde ko̱ 'an xi Ki'ndí-la̱ Xi̱ta̱ xan-la̱ yijo-na̱ k'e̱ nga kótijnasoàn íxi̱le̱ xi 'ñó jeya tíjna, jñò, xi jye an tjaàtji̱ngui-ná, ti̱koa̱á ya̱á ki̱tsa̱jnasòn íxi̱le̱ ts'e̱ kjo̱tíxoma xi tejò ma-ne, nga jñò kíndaàjiìn-là jñà xi̱ta̱ xi tejò tje̱-la̱ ts'e̱ na̱xa̱ndá Israel. 29 Ngats'iì xi kjoa̱ ts'a̱n kisìkíjna ni'ya-la̱, 'ntse̱, ndichja, na̱'èn-la̱, nea̱-la̱, chjo̱ón-la̱, i̱xti-la̱, nangui-la̱, jngoò sìndo̱ k'a k'oa̱ tjín tjoé ìsa̱-la̱. Ti̱koa̱á tjoé-la̱ kjoa̱bijnachon ni̱ta̱ kjé-nè. 30 I̱'ndei̱, kjìn xi̱ta̱ xi títsa̱jna ítjòn, k'e̱ nga ko̱ma i̱skan jñà kítsa̱jna tji̱ngui. Ko̱ xi títsa̱jna tji̱ngui i̱'ndei̱ k'e̱ nga ko̱ma i̱skan jñà kítsa̱jna ítjòn.
