1 Jñà na̱chrjein koi jñà xi̱ta̱ xi kota'yàt'aà-la̱ Jesús ijchòkon nga kiskònangui-la̱; kitsò-la̱: —Jñà xi̱ta̱ xi jè otíxoma-la̱ xi ngajmiì nchrobá-ne, ¿yá-ne xi tíjna ítjòn nga isa̱ 'ñó chjí-la̱? 2 Jesús kiìchja̱ jngoò-la̱ ndí ti. Kisìkasíjna jngoò osèn-la̱ jñà xi̱ta̱. 3 Kitsò: —O̱kixi̱í xi xan-nò, jñò, tsà mì kì si̱ìkátjiya-là kjo̱hítsjeèn-nò ko̱ tsà mì kì k'oa̱s'ín s'e̱en koni jñà ndí i̱xti mì kiì ki̱tjás'en-jñoò ñánda tíhotíxoma jè xi ngajmiì nchrobá-ne. 4 Jè xi si̱ìkjaàjen-la̱ ini̱ma̱-la̱ koni ndí ti jè, jè-né xi tíjna ítjòn-la̱ ngats'iì xi̱ta̱ xi jè tíhotíxoma-la̱ xi ngajmiì nchrobá-ne. 5 Ni̱ ta̱ yá-ne xi i̱t'aà ts'a̱n skoétjò jngoò ndí ti koni jè, 'aán xi skoétjò-na. 6 ’Ni̱ta̱ yá-ne xi jé ski̱nìjiìn jngoò ndí xi̱ta̱ i̱ma̱ xi mokjeiín-la̱ i̱t'aà ts'a̱n, ìsa̱á-la ndaà ko̱ma tsà si̱ngui'ñó jngoò nda̱jo̱ natsí ís'iìn, i̱kjoàn si̱katje̱n-jiìn ndáchikon ñánda nga 'ñó na̱nga̱ 'ncha nandá. 7 I̱ma̱ xó-ne jñà xi̱ta̱ i̱sò'nde nga tjín jchán xi̱ta̱ xi ótsji'nde-la̱ nga mejèn-la̱ nga sakó jé. Ta̱nga xó k'oa̱á ko̱ma-ne i̱sò'nde, ta̱nga i̱ma̱ xó-nè jè xi̱ta̱ xi ótsji-la̱ jé xi kj'ei̱í xi̱ta̱. 8 Tsà jè 'ntsa̱a ko̱ ntso̱koò ótsji jé-nò, ti̱chátjon koa̱ kjiìn ti̱katsjo. Ìsa̱á ndaà-nè tsà xkoán titsjoò nga ki̱tjáse̱en ñánda s'e̱-nò kjoa̱bijnachon, mì k'oa̱à-ne tsà jò ma 'ntsa̱a ko̱ ntso̱koò koa̱ ján onguió i̱jiìn ni'ín ts'e̱ i̱'nde kjo̱'in ni̱ta̱ mé na̱chrjein-ne. 9 Tsà jè xkoòn ótsji jé-nò, ti̱nachrjeè, kjiìn ti̱katsjo̱o. Ìsa̱á ndaà-nè tsà jngoò ma xkoòn nga ki̱tjáse̱en ñánda s'e̱-nò kjoa̱bijnachon mì k'oa̱á-ne tsà jò ma xkoòn koa̱ ján onguió i̱jiìn ni'ín ts'e̱ i̱'nde kjo̱'in. 10 ’Ni̱ jngoó ndí xi̱ta̱ koi xi na̱chrjenguioò; k'oa̱á xán-nò, ján ngajmiì, jñà àkja̱le̱-la̱ xi̱ta̱ koi, ya̱á títsa̱jna kjit'aà nga nguixko̱n Na'èn-na̱ xi tíjna ngajmiì. 11 'An xi Ki'ndí-la̱ Xi̱ta̱ xan-la̱ yijo-na̱ koií xá j'i̱-na nga j'i̱ kachrjekàjñaà kjo̱'in jñà xi̱ta̱ xi kichijà. 12 ’¿Kó bixón? Tsà jngoò xi̱ta̱ xi jngoò sindo ma orrè-la̱ koa̱ tsà si̱ìjchaya jngoò ján i̱jiìn ijñá ¿a mì tsà si̱ìkítsa̱jna jñà xi ñijònkaàn ko̱ chrj'oòn ñijòn ma nga kjoi̱ kátsji jè orrè xi kichijà jngoò? 13 Tsà ko̱tsji-la̱, o̱kixi̱í xi xan-nò, ìsa̱á tsja ko̱ma-la̱ nei-la̱ jè orrè xi jngoò ma, mì k'oa̱á-ne jñà xi kjìn ma xi mì kì kichijà. 14 K'oa̱á s'ín mejèn-la̱ Nainá xi tíjna ngajmiì nga ni̱ jngoò xi̱ta̱ si̱ìchja ini̱ma̱-la̱. 15 ’Tsà jè 'ntsì ch'o tísíko̱-le, ti̱nókjoa̱-la̱ k'e̱ nga tà jè ta̱jngoò tíjna; tíndaàjiìnkoi̱ì jè kjoa̱-la̱; tsà kji̱nchré-le, jyeé ndaà kichiba-nò 'ntsì. 16 Ta̱nga tsà mì kiì kji̱nchré-le, k'e̱é ti̱nókjoa̱-la̱ tsà jngoò ko̱ tsà jò xi̱ta̱ mé-ne nga kji̱nchré yije-ne 'én xi chibà koni s'ín tíchja̱ Xo̱jo̱n-la̱ Nainá nga tsò: Machjeén-né tsà jò ko̱ tsà jàn xi̱ta̱ xi tsjá 'én nga ko̱ma sindaàjiìn ni̱ ta̱ mé kjoa̱-ne mé-ne nga chjí-la̱. 17 Tsà mì kiì 'nchrénijon-la̱ jñà xi̱ta̱ koi, koa̱tín-la̱ xi̱ta̱ na̱xa̱ndá-la̱ Nainá; koa̱ tsà mì kiì 'nchrénijon-la̱ jñà xi̱ta̱ na̱xa̱ndá-la̱ Nainá, tà k'oa̱s'ín jcha̱t'aàkoin koni tsà jngoò xi̱ta̱ xi mì kiì beèxkon Nainá, koni tsà jngoò xi̱ta̱ xi tsojmì síkíchjítjì. 18 ’O̱kixi̱í xi xan-nò, jñò, ngats'iì kjoa̱ xi koi̱'ndeè i̱ i̱sò'nde, ti̱koa̱á ján ngajmiì Nainá tsjá'nde-né; koa̱ jñà kjoa̱ xi mì kiì koi̱'ndeè i̱ i̱sò'nde, ti̱koa̱á ján ngajmiì Nainá mì kiì tsjá'nde. 19 ’Ìjngoò k'a koa̱ xan-nò: tsà jò ma-nò i̱ i̱sò'nde xi tíjngoò takòn nga si̱jét'aà-là Na̱'èn-na xi tíjna ngajmiì ni̱ ta̱ mé kjoa̱-ne, tsjá-nò. 20 Ya̱ ñánda títsa̱jna jò jàn xi̱ta̱-na̱ xi i̱t'aà ts'a̱n bixoña, ya̱á tijna̱jiìn osen-la̱. 21 K'e̱é kiì kasìt'aà chraña-la̱ jè Pedro, kiskònangui-la̱ Jesús, kitsò-la̱: —Na̱'èn, ¿kó tjín k'a siìjcha̱at'aà-la̱ xinguia̱a k'e̱ nga tsà ch'o tísíko̱-na? ¿A skanda itoò k'a? 22 Jesús kitsò-la̱: —Mì tsà xan-le itoò k'a; xaán-le itoò k'a xi jànkàn ko̱ te. 23 ’Koni s'ín otíxoma jè xi ngajmiì nchrobá-ne, k'oa̱á s'ín tjín koni kis'iìn jngoò xi̱ta̱xá ítjòn xi kisìjé-la̱ kinda̱ xi̱ta̱ chi̱'nda-la̱. 24 K'e̱ nga tís'ín kinda̱ j'iì jngoò chi̱'nda-la̱ xi 'ñó kjìn millon to̱n kitje̱n-la̱. 25 Chi̱'nda jè tsjìn-la̱ to̱n xi koi̱ìchjí-la̱. Jè nei-la̱ kitsjaà o̱kixi̱ nga kàtasatíjna osen jè chá, ko̱ chjo̱ón-la̱ ko̱ i̱xti-la̱, ngats'iì tsojmì xi tjín-la̱ mé-ne nga ko̱chjí-la̱ to̱n xi kitje̱n-la̱. 26 Chi̱'nda jè tsasìxkónchit'aà-la̱ jè nei-la̱; tsibítsi'ba-la̱, kitsò-la̱: “Na̱'èn, tjín-le kjo̱ndaà, chíñakjoa̱-ná; kíchjí yije-le ngats'iì xi kitje̱n-na.” 27 Jè nei-la̱ kjòhi̱ma̱keè chi̱'nda-la̱, kisìjchat'aà-la̱ nga yije kinda̱ xi kitje̱n-la̱ koa̱ kisìkíjnandei̱í-ne. 28 Ti̱ k'e̱-ne nga itjo ni'ya chi̱'nda jè, kisatiìkjoò jngoò chi̱'nda xíkjín xi ti̱koa̱ to̱n kitje̱n chiba-la̱ xi ts'e̱. Kitsobà'ñó ís'iìn nga mejèn-la̱ ki̱nchájta̱-la̱, kitsò-la̱: “Tíchjí-ná xi kitje̱n-le.” 29 Koa̱ jè chi̱'nda xíkjín tsasíxkónchit'aà-la̱, tsibítsi'ba-la̱. Kitsò-la̱: “Chíñakjoa̱-ná, kíchjí yije-le xi kitje̱n-na̱.” 30 Ta̱nga jè mì kiì kòkjeiín-la̱. Ta̱ saà nda̱yá kiskinisen skanda k'e̱ nga koi̱ìchjí yije-la̱ kóho̱tjín xi kitje̱n-la̱. 31 K'e̱ nga kijtseè jñà chi̱'nda xíkjín xi i'nga, baá ko̱ma-la̱. K'e̱é kiì tsibèno̱jmí-la̱ nei-la̱ ngats'iì kjoa̱ xi ko̱ma. 32 Jè xi̱ta̱xá ítjòn xi nei-la̱, k'e̱é kiskinìkjaá chi̱'nda jè, kitsò-la̱: “Ji chi̱'nda xi ch'o 'nì. An kisìjchat'aà-le ngayije xi kitje̱n-le k'e̱ nga tsibítsi'ba-ná. 33 Ti̱koa̱á ngaji̱ tjí'nde-le nga jcha̱hi̱ma̱chiì chi̱'nda xingui̱i koni s'ín kisìko̱-lè nga kjòhi̱ma̱ke-lè. 34 Jè nei-la̱ kojti-la̱, k'e̱é kitsjaà o̱kixi̱ nga kat'i-la̱ kjo̱'in ska̱nda k'e̱ nga koi̱ìchjí yije xi kitje̱n-la̱. 35 Jesús kitsò: —Jñò k'oa̱á ti̱ s'ín si̱ìko̱-nò nga jngoò ìjngoò Na̱'èn-na̱ xi tíjna ngajmiì tsà nga mì ko̱o ini̱ma̱-nò si̱ìjcha̱at'aà-là jé-la̱ xinguio̱o.
