1 Jñà xi̱ta̱ fariseo ko̱ xi̱ta̱ saduceo kiìkon Jesús ñánda tíjna nga mejèn-la̱ skót'aà tsà kixi̱ kjoa̱ nga Nainá kisìkasén. Kisìjé jngoò-la̱ seña xi jeya tjín xi i̱t'aà ts'e̱ Nainá nchrobá-ne. 2 Ta̱nga Jesús kitsò-la̱: —K'e̱ nga jye mahi̱xon, jñò, bixón-nò: “Ndaà choòn nchijòn-le, inì choòn ján ngajmiì”, 3 K'e̱ nga ta̱jñòya bixón-nò “mì kiì ndaà choòn na̱chrjein i̱'ndei̱; ngajmiì inì choòn ko̱ ifi kjiya.” Jñò xi jò ma i̱sén-nò, 'ya-nò kó choòn ngajmiì ta̱nga mì kiì fìya-nò kó tsòya-ne kjo̱xkón xi tíma na̱chrjein i̱'ndei̱. 4 Jñà xi̱ta̱ ts'e̱n ko̱ xi̱ta̱ xi mì kiì 'nchréñijon-la̱ Nainá, jngoò seña síjé xi jeya tjín; ta̱nga ni̱ mé seña skoe̱, tà jè skoe̱ ts'e̱ Jonás, xi̱ta̱ xi kiìchja̱ ngajo-la̱ Nainá. Jesús ya̱á kisìkítsa̱jna xi̱ta̱ koi; jè, kiì-né. 5 Jñà xi̱ta̱ xi kota'yàt'aà-la̱ Jesús, k'e̱ nga tsatot'aà xijngoaà nandá, kichàjiìn-la̱ mì kiì ts'a i̱nchra̱jín. 6 Jesús kitsò-la̱: —Chítsejèn-là koa̱ ti̱kinda̱a yijo-nò i̱t'aà ts'e̱ na̱'yo̱ san-la̱ xi̱ta̱ fariseo ko̱ xi̱ta̱ saduceo. 7 Xi̱ta̱ xi kota'yàt'aà-la̱ Jesús tsoóko̱ xíkjín, kitsò-la̱: —Koií ko̱tsò-ná nga mì kiì kich'à i̱nchra̱jín. 8 Jesús ni̱to̱ón kijtseèya-la̱, kitsò-la̱: —¿Mé-ne ko̱bixóon-nò nga tsjìn-nò i̱nchra̱jín? 'Ñó chi̱ba̱ mokjeiín-nò i̱t'aà ts'a̱n. 9 ¿A mì machi̱ya-nò, a mì bítsjeèn-nò k'e̱ nga kisìka'biá i̱nchra̱jín xi 'òn ma-ne koa̱ 'òn jmi xi̱ta̱ x'i̱n tsakjèn? ¿Kó tjín ni̱si̱yá tsibíxkó-ìsa? 10 ¿A mì tíjiìn-nò ti̱koa̱á k'e̱ nga kisìka'biá i̱nchra̱jín xi itoò ma-ne ko̱ ñijòn jmi xi̱ta̱ tsakjèn? ¿Kó tjín ni̱si̱yá tsibíxkó-ìsa? 11 ¿Mé-ne nga mì kiì machi̱ya-nò nga an mìtsà koi xi o̱tíxan-nò i̱t'aà ts'e̱ i̱nchra̱jín? Jè-né nga ti̱kinda̱a yijo-nò na̱'yo̱ san-la̱ xi̱ta̱ fariseo ko̱ xi̱ta̱ saduceo. 12 K'e̱é kjòchi̱ya-la̱ nga jè Jesús k'e̱ nga o̱kitsò-la̱ “ti̱kinda yijo-nò” mìtsà na̱'yo̱ san-la̱ i̱nchra̱jín xi tsibèno̱jmí-la̱, jñà kjo̱hítsjeèn xi okóya jñà xi̱ta̱ fariseo ko̱ xi̱ta̱ saduceo. 13 K'e̱ nga ijchò Jesús ya̱ i̱'nde ñánda 'mì Cesarea ts'e̱ Filipo kiskònangui-la̱ jñà xi̱ta̱ xi kota'yàt'aà-la̱. Kitsò-la̱: —¿Kó tsò jñà xi̱ta̱? ¿Yá-ná 'an xi Ki'ndí-la̱ Xi̱ta̱ xan-la̱ yijo-na̱? 14 Kitsò jñà xi̱ta̱ xi kota'yàt'aà-la̱: —Tjín xi tsò jè Juan xi kis'iìn bautizar xi̱ta̱, ko̱ tjín xi tsò jè Elías. Ti̱koa̱á tjín xi tsò, jè Jeremías ko̱ xi kj'ei̱í xi̱ta̱ tsò-né, jngoò xi̱ta̱ xi kiìchja̱ ngajo-la̱ Nainá. 15 K'e̱é kitsò Jesús: —¿Koa̱ jñò, kó bixón? ¿Yá-ná 'an? 16 K'e̱é kiìchja̱ Simón Pedro kitsò: —Ji-né xi Cristo [xi xó kisìkasén-ne Nainá], Ki'ndí-la̱ Nainá xi tíjnakon. 17 I̱kjoàn kiìchja̱ Jesús; kitsò-la̱: —Mé tà ndaà-lè nga ji Simón, ki'ndí-la̱ Jonás. Jè Nainá xi tíjna ngajmiì tsakó-lè ngats'iì kjoa̱ koi; mì tsà xi̱ta̱ i̱sò'nde tsibeèno̱jmí-le. 18 An, k'oa̱á xán-lè nga Pedro 'mì-lè [nga ndo̱jo̱ tsò-ne]; ya̱á i̱sòn ndo̱jo̱ jè kìndaàsoàn na̱xa̱ndá-na̱; na̱s'ín jè nga'ñó-la̱ kjoa̱biyaà mì kiì si̱ìkijne-la̱ jñà xi̱ta̱ na̱xa̱ndá-na̱. 19 An, tsjaà-lè ibi̱-la̱ xòhotjoa̱-la̱ na̱xa̱ndá xi jè otíxoma-la̱ jè xi ngajmiì nchrobá-ne; ngats'iì kjoa̱ xi koi̱'ndiì i̱ i̱sò'nde, ti̱koa̱á ján ngajmiì Nainá tsjá'nde-né; ko̱ jñà kjoa̱ xi mì kiì koi̱'ndiì i̱ i̱sò'nde, ti̱koa̱á ján ngajmiì, Nainá mì kiì tsjá'nde. 20 Jesús kitsò-la̱ jñà xi̱ta̱ xi kota'yàt'aà-la̱: —Kì yá xi beèno̱jmì-la nga 'an-ná xi Cristo [nga 'aán kisìkasén-na Nainá]. 21 Ti̱koi̱-ne na̱chrjein Jesús tsibíts'ia̱ nga tsibeèno̱jmíya-la̱ xi̱ta̱ xi kota'yàt'aà-la̱ nga jè, ján kjoi̱ Jerusalén, koa̱ jñà xi̱ta̱ jchínga ko̱ xi̱ta̱ sko̱-la̱ no̱'miì ko̱ xi̱ta̱ xi okóya kjo̱tíxoma-la̱ Nainá xi kiskiì Moisés, tse kjo̱'in tsjá-la̱. Si̱ìk'en-né. Ta̱nga k'e̱ nga ki̱jchò jàn na̱chrjein, kjoa̱áya-la̱. 22 Jè Pedro k'e̱é kiìko̱ Jesús ñánda i̱t'aà xìn nga kiìchja̱ko̱ nga mì kiì ndaà tjín koni tsò. Kitsò-la̱: —Na̱'èn, kì k'oa̱á s'ín nìkítsjiìn. Mì k'oa̱á tsò Nainá nga k'oa̱ s'ín ko̱matin. 23 Ta̱nga Jesús kisìkáfaya, kitsò-la̱ jè Pedro: —Ti̱si̱t'aàxín-ná ji xi̱ta̱ nei̱í. Tà mejèn-le nga jé binchaàtsji-ná. Mìtsà k'oa̱s'ín nìkítsjiìn koni s'ín tjín kjo̱hítsjeèn-la̱ Nainá. Ngaji̱ tà k'oa̱s'ín nìkítsjiìn koni s'ín tjín kjo̱hítsjeèn-la̱ xi̱ta̱. 24 Jesús k'e̱é kitsò-la̱ xi̱ta̱ xi kota'yàt'aà-la̱: —Tsà yá xi mejèn-la̱ nga xi̱ta̱ ts'a̱n ko̱ma, kàtatsjeiìn-takòn mé xi mejèn-la̱ yijo-la̱; koni jngoò xi̱ta̱ xi 'yajen krò-la̱, kàtìjnandaà nga si̱ìkjeiín kjo̱'in xi kjoa̱ ts'a̱n; ndaà kàtjìt'aà-na. 25 Nga ni̱ ta yá xi̱ta̱ xi mejèn-la̱ ko̱chrjetjì yijo-la̱ nga mì mé kjo̱'in sa̱kò-la̱, tà sa̱á si̱ìchija-né ko̱ kjo̱'in kíjnajiìn; ta̱nga jè xi tíjnandaà nga tsjá yijo-la̱ xi kjoa̱ ts'a̱n, sa̱kó-la̱ kjoa̱bijnachon nga i̱t'aà ts'a̱n nda kíjna. 26 ¿Mé xi si̱ìkijne jngoò xi̱ta̱ na̱s'ín tjoé yije-la̱ i̱sò'nde tsà si̱ìchja ini̱ma̱-la̱? Ni̱mé. ¿A ko̱ma koi̱ìchjí kjoa̱biya jngoò xi̱ta̱ xi majìn-la̱ nga ki̱yá? Majìn. 27 'An xi Ki'ndí-la̱ Xi̱ta̱ xan-la̱ yijo-na̱ ki̱tjoje̱en ìjngoò k'a-na nga kjoi̱koa̱a kjoa̱jeya-la̱ Na̱'èn-na̱ ko̱ àkja̱le̱-la̱ nga sìchikon-tian nga jngoò ìjngoò xi̱ta̱ koni s'ín kisìkitasòn. 28 O̱kixi̱í xi xan-nò, títsa̱jnajiìn i'nga i̱jndé xi̱ta̱ xi mì kì ki̱yá skanda k'e̱ nga skoe̱-na xi Ki'ndí-la̱ Xi̱ta̱ xan-la̱ yijo-na̱ nga ki̱tjo̱jen ìjngoò k'a nga ko̱tiìxoma.
