1 Ijchò i'nga xi̱ta̱ fariseo ko̱ xi̱ta̱ xi okóya kjo̱tíxoma-la̱ Nainá xi kiskiì Moisés xi inchrobà-ne Jerusalén nga kiskònangui-la̱ Jesús, kitsò-la̱: 2 —¿Mé-ne jñà xi̱ta̱ xi kota'yàt'aà-lè, k'e̱ nga kjèn, mì k'oa̱ás'ín oníjno-ne tsja koni s'ín síjé kjo̱tíxoma-la̱ xi̱ta̱ jchínga-ná? 3 Jesús k'e̱é kiskònangui-la̱ jñà xi̱ta̱ koi, kitsò-la̱: —¿Jñò, mé-ne mìkiì nìkitasòn-nò kjo̱tíxoma-la̱ Nainá nga koi onguítji̱ngui-là kjo̱tíxoma-la̱ xi̱ta̱? 4 Jè Nainá k'oa̱á kitsò: “Jcha̱xkoín na̱'èn-lè ko̱ nea̱-lè” ko̱ “jè xi chja̱jno-la̱ na̱'èn-la̱ ko̱ nea̱-la̱ tjínè-la̱ nga ki̱yá.” 5 Ta̱nga jñò bixón-nó: “Jngoò xi̱ta̱ ma ki̱tso̱-la̱ na̱'èn-la̱ o nea̱-la̱: Mì kiì ko̱ma siìchját'aà-lè; ngats'iì tsojmì xi tjín-na, jè Nainá jye kitsjaà-la̱.” 6 Bixón-nó nga mì ti̱ kiì tjí'nde̱-la̱ nga skoe̱xkón na̱'èn-la̱ ko̱ nea̱-la̱; mì ti̱ kiì ko̱ma ko̱siko̱-nò. K'oa̱á s'ín 'nè jñò nga nìkíjna kjo̱tíxoma-la̱ Nainá nga koi onguítji̱ngui-lá kjo̱tíxoma tsa̱jòn. 7 Jñò, xi̱ta̱ xi jò ma i̱sén-nò, ndaà kiìchja̱ i̱t'aà tsa̱jòn Isaías, xi̱ta̱ xi kiìchja̱ ngajo-la̱ Nainá k'e̱ nga kitsò: 8 Jñà xi̱ta̱ koi beèxkón-na xi tà 'én chja̱ ta̱nga jè ini̱ma̱-la̱ kjiìn tíjnat'aàxìn. 9 Nìmé chjí-la̱ nga beèxkón-na, nga kjo̱tíxoma-la̱ xi̱ta̱á okóya koni tsà kjo̱tíxoma-la̱ Nainá. 10 Jesús, k'e̱é kiìchja̱-la̱ ngats'iì xi̱ta̱, kitsò-la̱: —Ti̱ná'yaà ko̱ ndaà kàtachi̱ya-nò. 11 Jñà tsojmì xi tso'ba kine-ne xi̱ta̱, mì tsà jñà xi síkits'ón xi̱ta̱ nga nguixko̱n Nainá; jñà xi tso'ba bitjo-ne xi síkits'ón. 12 Jñà xi̱ta̱ xi kota'yàt'aà-la̱ Jesús ijchòkon, kiskònangui-la̱, kitsò-la̱: —¿A tíjiìn-le jñà xi̱ta̱ fariseo kòjti-la̱ k'e̱ nga kiì'nchré 'én koni s'ín kinokjoì? 13 Jesús kitsò-la̱: —Ni̱to̱n mé tsojmì tjè xi mìtsà jè Na̱'èn-na̱ xi tíjna ngajmiì tsibítje̱, tjánè-né skanda ko̱ i̱ma̱-la̱. 14 Kì kiì 'nè kinda̱; jñà xi̱ta̱ fariseo mejèn-la̱ okó-la̱ ndi̱yá jñà xi̱ta̱ xi mì kiì tsejèn-la̱, ta̱nga jñà, ti̱koa̱á mì kiì tsejèn-la̱. Tsà jngoò xi̱ta̱ xi mì kiì tsejèn-la̱, mì kiì ko̱ma ko̱kò-la̱ ndi̱yá ìjngoò xi ti̱koa̱ mìkiì tsejèn-la̱. Ingajò, ya̱á ki̱xo̱ya nga̱jo̱ ñánda ch'o choòn. 15 Pedro kitsò-la̱ Jesús: —Tèno̱jmíya-náje̱n jè kjoa̱ koi koni s'ín kasi. 16 Jesús kitsò: —¿Jñò, a ti̱koa̱á mì kiì machi̱ya-nò kó tsòya-ne? 17 ¿A mì fiya-nò ngats'iì tsojmì xi ntso̱'baá chine-ná, i̱ntso'bá fìs'en, i̱kjoàn bitjojiìn-ne yijo-ná? 18 Ta̱nga ngats'iì 'én xi ntso̱'baá nokjoàa-ná, ini̱ma̱-ná bitjojiìn; jñà 'én koi, jñà-né xi síkits'ón xi̱ta̱ nga nguixko̱n Nainá. 19 Nga ya̱á bitjokàjiìn ini̱ma̱-la̱ xi̱ta̱ kjo̱hítsjeèn xi ch'o tsò, koni jñà xi xi̱ta̱ sík'en, ko̱ xi kjoa̱ chijngui s'ín ts'e̱ xi̱ta̱ xi kj'eè kì bixan ko̱ xi jye chixàn, ko̱ kjoa̱ chijé, ko̱ kjoa̱ ndiso ko̱ kjoa̱ nga chja̱jno-ná. 20 Ngats'iì kjoa̱ koi xi ini̱ma̱-la̱ bitjokàjiìn-ne xi̱ta̱, jñà-nè xi síkits'ón xi̱ta̱; ta̱nga k'e̱ nga bichiaá, na̱s'ín mì kiì onìjnoá ntsa̱á, mì kiì síkits'ón-ná. 21 Jesús itjokàjiìn ya̱ i̱'nde jè, kiì i̱'nde ñánda 'mì Tiro ko̱ Sidón. 22 Jngoò chjo̱ón xi xi̱ta̱ Cananea xi ya̱ i̱'nde-la̱, inchrobà-ne ijchòkon Jesús, 'ñó kiìchja̱, kitsò-la̱: —¡Na̱'èn, nga ya̱ nchrobàt'aà-ne tje̱-la̱ xi̱ta̱xá ítjòn David [nga ji tijna ngajo-la̱] jcha̱hi̱ma̱-ná! Ndí tsòti-na̱ ch'in nei̱í tíjiìn ini̱ma̱-la̱, tseé kjo̱'in tísíkjeiín. 23 Ta̱nga Jesús nì mé 'én kiìchja̱-la̱ jè chjo̱ón. Ko̱ jñà xi̱ta̱ xi kota'yàt'aà-la̱ Jesús, kitsò: —Ko̱tìn-la̱ chjo̱ón jè, kàtjì-ne; tsí ch'o kjindáya tji̱ngui-ná. 24 K'e̱é kitsò Jesús: —Nainá kisìkasén-na, tà jñà j'iì kátsjiá xi̱ta̱ na̱xa̱ndá Israel nga kichijà koni orrè. 25 Ta̱nga jè chjo̱ón tsasixkónchit'aà-la̱ Jesús, kitsò-la̱: —Na̱'èn, ti̱chját'aà-ná. 26 Jesús kitsò-la̱: —Mì kiì ndaà tjín nga chja̱àn'an-lá ni̱ño̱ jñà i̱xti, i̱kjoàn k'oi̱-lá nañá. 27 Ta̱nga jè chjo̱ón kitsò: —Jon, Na̱'èn, ta̱nga jñà nañá kineé xi̱-la̱ tsojmì xi bixòngui ími̱xa̱-la̱ nei̱-la̱. 28 Jesús k'e̱é kitsò-la̱: —Ji chjo̱ón, 'ñó ndaà mokjeiín-lè i̱t'aà ts'a̱n. K'oa̱s'ín kàtama koni s'ín mejèn-lè. Ko̱ jè tsòti-la̱ chjo̱ón, ti̱k'e̱é kjòndaà-ne nga ti̱jè-ne hora. 29 Jesús kiì-ne ya̱ i̱'nde ñánda 'mì Tiro ko̱ Sidón koa̱ tsotot'aà i̱ndiì nandá Galilea. K'e̱é kiìmijìn-jno jngoò nindoò ko̱ ya̱á tsibìjna. 30 Kjìn jchán xi̱ta̱ ijchòtji̱ngui-la̱ ñánda tíjna; ijchòko̱-la̱ xi̱ta̱ xi tsá'yá kjoàn, xi̱ta̱ xi mì kiì tsejèn-la̱, xi̱ta̱ xi kótó tsja kjoàn, xi̱ta̱ xi mì kiì ma chja̱ ko̱ xi̱ta̱ xi kj'ei̱í ch'in tjín-la̱; ya̱á kisíkítsonangui ntso̱ko̱ Jesús. Ngats'iì xi̱ta̱ koi kisindaà-ne. 31 Tà kjòxkón-la̱ jñà xi̱ta̱ k'e̱ nga kijtseè nga komà kiìchja̱-ne jñà xi mì kiì ma chja̱; koa̱ jñà xi mì kiì ndaà síxá tsja, kjòndaà-ne; xi mì ma fì, komà kiì-ne; koa̱ jñà xi mì kiì tsejèn-la̱, kjòtsejèn-la̱. K'e̱é jeya kisìkíjna Nainá koni kisìko̱ jñà xi̱ta̱-la̱ na̱xa̱ndá Israel. 32 Jesús kiìchja̱-la̱ xi̱ta̱ xi kota'yàt'aà-la̱, kitsò-la̱: —Mahi̱ma̱keè-ná jñà xi̱ta̱ koi. Jye kò jàn na̱chrjein tjín-la̱ nga títsa̱jnako̱-na, koa̱ nìmé tjín tsojmì xi kine. Majìn-na nga tà k'oa̱s'ín sìka̱sén chjan-na ni'ya-la̱ tsà ya̱ ko̱hindaàya ndi̱yá. 33 Jñà xi̱ta̱ xi kota'yàt'aà-la̱ Jesús kitsò: —Jngoò i̱'nde i̱t'aà xìn ñánda nìmé tsojmì tjín, ¿kós'ín ko̱ma sakó-ná tsojmì xi ko̱kje̱n jñà xi̱ta̱ koi nga 'ñó kjìn ma-ne? 34 Jesús kiskònangui-la̱, kitsò-la̱: —¿Kó tjín ma i̱nchra̱jín xi tíyijò-nò? Jñà xi̱ta̱ xi kota'yàt'aà-la̱ kitsò: —Itoò ma-ne i̱nchra̱jín, ko̱ tjín chiba-najen ti̱n jtobá. 35 K'e̱é kitsò Jesús: —K'oa̱ tìn-la̱ kàtitsa̱jnat'aà nangui jñà xi̱ta̱. 36 Jesús kiskoé i̱nchra̱jín xi itoò ma-ne ko̱ jñà ti̱n jtobá, kitsjaà-la̱ kjo̱ndaà Nainá, i̱kjoàn kisìxkoa̱ya, kjònga̱tsja jñà xi̱ta̱ xi kota'yàt'aà-la̱ mé-ne nga kitsjaà-la̱ jñà xi̱ta̱ xi kjìn ma-ne. 37 Tsakjèn yije xi̱ta̱ kóho̱tjín skanda kó nga kjòskiì. K'e̱ nga tsibíxkó-ne xi tsiningui-ne, ngui itoò ni̱si̱yá ko̱ma. 38 Jñà xi̱ta̱ xi tsakjèn, ñijòn jmi ma-ne xi xi̱ta̱ x'i̱n, mì kiì kjòxke̱ya jñà íchjín ko̱ i̱xti. 39 Jesús kisìhixat'aà xi̱ta̱, i̱kjoàn jahas'en chitso koa̱ kiì ya̱ i̱'nde ñánda 'mì Magdala.
