1 Jesús itjojiìn-ne ya̱ i̱'nde jè, kiì-ne nangui-la̱ Nazaret, tji̱ko̱ xi̱ta̱ xi kota'yàt'aà-la̱. 2 K'e̱ nga jye ijchò na̱chrjein nìkjáya, tsibíts'ia̱ nga tsakóya 'én ndaà-la̱ Nainá ya̱ ni'ya i̱ngo̱ sinagoga. Kjìn jchán ma xi̱ta̱ xi kiì'nchré-la̱ koni s'ín tsakóya. Jñà xi̱ta̱, tà k'oa̱á komà-la̱, kjònangui-la̱ xíkjín, kitsò: —Xi̱ta̱ jè, ¿ñánda komà-la̱ ngats'iì 'én xi okóya? ¿Ñánda ochrje kjoa̱chji̱ne̱ koi ko̱ kjo̱xkón xi s'ín? 3 ¿A mìtsà jè xi chji̱ne̱yá xi ti-la̱ María, xi 'ntse̱ ma Jacobo, José, Judas ko̱ Simón? ¿A mìtsà ti̱koa̱ i̱ títsa̱jnajiìn-ná íchjín ndichja? Xi̱ta̱ koi mì kiì ko̱kjeiín-la̱ i̱t'aà ts'e̱ Jesús. 4 Ta̱nga jè Jesús kitsò-la̱: —Jngoò xi̱ta̱ xi chja̱ ngajo-la̱ Nainá, ni̱ta̱ ñá na̱xa̱ndá-ne yaxkón-né, ta̱nga ya̱ na̱xa̱ndá-la̱ ko̱ ni'ya-la̱ ko̱ i̱t'aà ts'e̱ xi̱ta̱ xíkjín mì kiì yaxkón. 5 Jesús nímé kjo̱xkón xi ndaà tjín kis'iìn nangui-la̱, tà chiba xi̱ta̱ xk'én xi tsohót'aà-la̱ tsja nga kisìndaà-ne. 6 Tà kjòxkón-la̱ Jesús, nga jñà xi̱ta̱ koi, mì kiì mokjeiín-la̱ i̱t'aà ts'e̱. Jesús ya̱á tsajmeè na̱xa̱ndá jtobá xi chrañat'aà kjihijo nga tsakóya. 7 Nga komà i̱skan, Jesús kiìchja̱-la̱ xi̱ta̱-la̱ xi tejò ma-ne xi jè tsibíxáya-la̱; jò jò kisìkasén, kitsjaà-la̱ o̱kixi̱ nga ko̱chrjekàjiìn ini̱ma̱ ch'o-la̱ nei̱í xi tíjiìn ini̱ma̱-la̱ xi̱ta̱. 8 'Koa̱á ti̱ s'ín kitsjaà-la̱ o̱kixi̱ nga nìmé tsojmì k'oa̱ k'e̱ nga kjoi̱ ndi̱yá. Kitsò-la̱: —Tà k'oa̱ás'ín tanguió. Tà jngoò yá garrote ch'aà. Kì na̱'yaá ch'aà, kì i̱nchra̱jín ch'aà, kì to̱n ch'aà. 9 Ko̱ma tsjayaà xo̱jté-nò. Tà jngoò na̱chro̱ ch'aà. Kì jò ch'aà. 10 Jesús kitsò-ìsa-la̱: —K'e̱ nga ki̱jchò jngoò na̱xa̱ndá, jngoò ni'ya títsa̱jna skanda k'e̱ nga ko̱nguí-nò. 11 Tsà tjín na̱xa̱ndá ñá nga mì kiì skoétjò-nò, tsà majìn-la̱ nga 'nchré-nò, titjo̱jñoò, tìtsajneè chijo-la̱ ntso̱koò mé-ne nga skoe̱-ne nga jñà tjín-la̱ jé nga mì kiì 'nchréñijon. Xi nguiì o̱kixi̱ k'oa̱á xan-nò k'e̱ nga ki̱jchò na̱chrjein-la̱ jñà na̱xa̱ndá koi, ìsa̱á tse kjo̱'in s'e-la̱ koni s'ín komàtin na̱xa̱ndá Sodoma ko̱ Gomorra. 12 Xi̱ta̱ koi, kiì nga tsibeèno̱jmíya-la̱ xi̱ta̱ nga kàtasíkájno jé-la̱ nga mì ti̱ jé ko̱ótsji-ne. 13 Kjìn ini̱ma̱ ch'o-la̱ nei̱í tsachrjekàjiìn ini̱ma̱-la̱ xi̱ta̱, ti̱koa̱ kjìn xi̱ta̱ kisìndaà-ne xi xk'én nga kisìkaàjno-la̱ asìti̱. 14 Jè Herodes xi xi̱ta̱ xá ítjòn tíjna, kiì'nchré i̱t'aà ts'e̱ Jesús nga jye xki̱ xi ján na̱xa̱ndá kina'yà-la̱. Tjín xi̱ta̱ xi kitsò: —Jè Juan xi kis'iìn bautizar xi̱ta̱ jye jaàya-la̱. K'oa̱á ma-ne nga tjín-la̱ nga'ñó nga ma-la̱ s'ín kjo̱xkón xi ndaà tjín. 15 Tjín xi̱ta̱ xi kitsò: —Jè Elías. Ti̱koa̱ tjín xi kitsò: —Jngoò xi̱ta̱ xi kiìchja̱ ngajo-la̱ Nainá kjòtseé. 16 Jè Herodes, k'e̱ nga kiì'nchré kitsò-né: —Jè Juan xi jaàya-la̱ xi 'an tsatesian sko̱. 17 Nga ìsa̱ kjòtseè, Herodes kisìkasén xi̱ta̱ nga kitsobà'ñó Juan nga kiskinìs'en nda̱yá, koi kjoa̱-la̱ ts'e̱ chjo̱ón Herodías xi chjo̱ón-la̱ Felipe nga jè Herodes chixàn-ko̱ xi chjo̱ón-la̱ 'ntse̱. 18 Nga jè Juan xi kis'iìn bautizar xi̱ta̱, kjìn k'a o̱kitsò-la̱ Herodes: Mì kiì tjiì'nde-lè nga ji tijnakoi̱i chjo̱ón-la̱ 'ntsì. 19 Jè chjo̱ón Herodías, kòjtikeè Juan, mejèn-la̱ nga si̱ìk'en ta̱nga mì kiì ma xi síko̱. 20 Nga jè Herodes, beèxkón Juan ko̱ síkinda̱-ne nga jye tíjiìn-la̱ nga xi̱ta̱ kixi̱-né ko̱ xi̱ta̱ tsjeè-né. Herodes k'e̱ nga chja̱-ko̱ Juan, matsja-la̱ nga 'nchré-la̱, ta̱nga mì kiì beè mé xi s'i̱ìn, a si̱ìkitasòn-né, a xi majèn. 21 Ijchò jngoò na̱chrjein xi ndaà ts'e̱ chjo̱ón Herodías k'e̱ nga tsachrje s'eí-la̱ jè Herodes jè na̱chrjein nga kits'iìn. Ijchò xi̱ta̱-la̱ xi̱ta̱xá ítjòn, ko̱ xi̱ta̱ sko̱-la̱ soldado, ko̱ xi̱ta̱ nchiná xi tjín kóhokji Galilea nga tsakjèn-ko̱ Herodes. 22 Ti̱koa̱ ijchò tsòti-la̱ Herodías, jahas'en ni'ya; kitè. Jè Herodes ko̱ xi̱ta̱ xi títsa̱jna, ndaà jchán kisaseèn-la̱ koni s'ín kitè jè tsòti. Herodes, xi xi̱ta̱ xá ítjòn tíjna, kitsò-la̱: —Ti̱jé-ná mé xi mejèn-lè, tsjaà-lè. 23 K'oa̱á s'ín kitsjaà-la̱ tso'ba nga tsjá yije-la̱ ni̱ta̱ mé xi mejèn-la̱ na̱s'ín os'en nangui xi jè otíxoma-la̱. 24 Jè tsòti, itjo ni'ya, kiskònangui-la̱ nea̱-la̱. Kitsò-la̱: —¿Mé xi siìjé-la̱? Jè nea̱-la̱. Kitsò: —Ti̱jé-la̱ sko̱ Juan xi s'ín bautizar xi̱ta̱. 25 Jè tsòti, ni̱to̱ón jahas'en ìjngoò k'a ni'ya ñánda tíjna xi̱ta̱xá ítjòn. Kitsò-la̱: —I̱'ndei̱ mejèn-na nga ni̱to̱n tjiì-ná sko̱ Juan xi s'ín bautizar xi̱ta̱; tinaya-ná chro̱ba̱ teè. 26 Jè Herodes, xi xi̱ta̱xá ítjòn tíjna, 'ñó kjòba-la̱ k'e̱ nga kiì'nchré-la̱ jè tsòti. Ta̱nga koií kjoa̱-la̱ nga jye kitsjaà-la̱ 'én-la̱ nga nguixko̱n xi̱ta̱ xi títsa̱jna s'eí, kjo̱'ñó kisìkitasòn-la̱. 27 Jè Herodes, ti̱ k'e̱é-ne kisìkasén jngoò soldado, kitsjaà o̱kixi̱ nga kàtanchroóko̱ sko̱ Juan. 28 Jè soldado kiì ján nda̱yá nga tsatesin Juan; i̱kjoàn j'iìko̱ sko̱ Juan; tjíya-la̱ chro̱ba̱ nga kitsjaà-la̱ jè tsòti; ko̱ jè tsòti kisìnga̱tsja nea̱-la̱. 29 K'e̱ nga kiì'nchré xi̱ta̱ xi kota'yàt'aà-la̱ Juan nga jye k'en, kiìkjaá yijo-la̱ nga kiskinìsengui jngo nga̱jo̱ i̱tsjó-la̱ mik'en. 30 K'e̱ nga j'iì ìjngoò k'a-ne jñà xi̱ta̱ xi tsibíxáya-la̱ Jesús, tsibeèno̱jmí ngats'iì kjoa̱ xi kis'iìn ko̱ xi tsakóya ñánda kiì. 31 Jesús kitsò-la̱: —Nchrobá. Tíkjiaán nga si̱kjáya í'ñoá jngoò i̱'nde i̱t'aà xìn. Koií k'oa̱ kitsò-la̱ nga kjìn jchán ma xi̱ta̱, koa̱ tjín bijchó, koa̱ tjín nchrobá-ne. Jesús ko̱ xi̱ta̱ xi tsibíxáya-la̱ skanda mì ti̱ kiì ma'a-la̱ nga kjèn. 32 Tsibítsa̱jnaya chitso nga ta jñà kiì jngoò i̱'nde i̱t'aà xìn ñánda tsjìn xi̱ta̱. 33 Ta̱nga kjìn xi̱ta̱ kijtseè k'e̱ nga kiì. Kijtseèxkon nga jè Jesús. I̱kjoàn kiìtji̱ngui-la̱ ngats'iì xi̱ta̱ na̱xa̱ndá xi ya̱ chrañàt'aà-la̱ nga kiì-ne ntso̱ko̱; skanda ìsa̱ ítjòn ijchò jñà xi̱ta̱ koi. 34 Jesús, k'e̱ nga itjojen chitso, kijtseè nga 'ñó kjìn ma xi̱ta̱ xi títsa̱jna; kjòhi̱ma̱keè-né. K'oa̱á ngaya-la̱ koni jñà orrè xi tsjìn-la̱ paxtò xi ko'ndà. I̱kjoàn tsibíts'ia̱ko̱ nga kjìn 'én tsibeèno̱jmí-la̱. 35 K'e̱ nga jye 'ñó kjòhoxòn, jñà xi̱ta̱ xi kota'yàt'aà-la̱ Jesús ijchò kinchat'aà-la̱, kitsò-la̱: —Jye kjòhoxòn, jè i̱'nde jè, i̱t'aà xìn-né, nìmée tjín. 36 Ko̱'tìn-la̱ jñà xi̱ta̱ kàtjì-ne nga kàtatse tsojmì xi ski̱ne̱ ya̱ na̱xa̱ndá ko̱ tsà jñà ni'ya ñánda nga chrañàt'aà. 37 Kiìchja̱ Jesús, kitsò-la̱: —Tjiì-là jñò xi ko̱kje̱n xi̱ta̱ koi. Kitsò jñà xi̱ta̱: —¿A mejèn-lè nga konguí kindaà-je̱n i̱nchra̱jín koni tjín síkijne xi̱ta̱ nga jò sindo na̱chrjein síxá? 38 Kitsò Jesús: —Chítsejèn-là kó tjín ma i̱nchra̱jín-nò. K'e̱ nga kijtseè kó tjín ma-ne, kitsò-la̱: —'Òn ma i̱nchra̱jín ko̱ jò ma ti̱n. 39 K'e̱é kitsjaà o̱kixi̱ Jesús nga kàtìtsa̱jnajtín jñà xi̱ta̱ ya̱ i̱jiìn ijñá ñánda sase chon. 40 Íjngó íjngó sìndo̱ tsibìtsa̱jnajtín-ne jñà xi̱ta̱; ko̱ tjín ñánda icháte icháte tsibìtsa̱jnajtín-ne. 41 Jesús kiskoé jñà i̱nchra̱jín xi 'òn ma-ne ko̱ jñà ti̱n xi jò ma-ne; i̱kjoàn kiskoòtsejèn ngajmiì; kitsjaà-la̱ kjo̱ndaà Nainá; i̱kjoàn kisìxkoa̱ya i̱nchra̱jín; k'e̱é kitsjaà-la̱ jñà xi̱ta̱ xi kota'yàt'aà-la̱ nga kisìka'bí-la̱ ngats'iì xi̱ta̱ kjìn xi títsa̱jna. Ti̱koa̱ kisìjòya ti̱n xi jò ma-ne. Kitsjaà-la̱ ngats'iì xi̱ta̱. 42 Tsakjèn yije kóho̱tjín xi̱ta̱ kó nga kòskiì. 43 K'e̱é tsibíxkó-ne i̱nchra̱jín ko̱ ti̱n xi kjòxkoa̱ya jñà xi tsiningui-ne; nguì tejò ni̱si̱yá komà. 44 Jñà xi̱ta̱ xi tsakjèn, 'òn jmiì ma-ne xi xi̱ta̱ x'i̱n. 45 Nga komà i̱skan, Jesús kisìkjahas'en xi̱ta̱ xi kota'yàt'aà-la̱ ya̱ i̱ya chitso mé-ne nga ìsa̱ ítjòn ki̱jchò-ne ján na̱xa̱ndá Betsaida ya̱ xijngoaà ndáchikon; koa̱ jè Jesús k'e̱é tísíhixat'aà xi̱ta̱ xi kjìn ma-ne nga jye nchifì-ne. 46 K'e̱ nga jye kisìhixat'aà xi̱ta̱, Jesús kiìmijìn-jno jngoò nindoò nga kiì kiìchja̱t'aà-la̱ Nainá. 47 K'e̱ nga jye kòjñò, jè chitso, jye ya̱ síjna jngoò osen ndáchikon. Jesús, nga ta̱jngoò tsibíjnat'aà nangui. 48 Kijtseè chitso nga mì kiì ma fì. Nga jè tjo̱ bíchjoàhikon-la̱. K'e̱ nga ta̱jñòya ìsa̱, Jesús kiìtji̱ngui-la̱ xi̱ta̱ xi kota'yàt'aà-la̱ nga kiì-ne ntso̱ko̱ ya̱ i̱sòn nandá. Ta̱nga k'oa̱á kis'iìn koni tsà mejèn-la̱ nga kjoi̱ ítjòn-la̱ chitso. 49 Jñà xi̱ta̱ xi kota'yàt'aà-la̱, k'e̱ nga kijtseè nga tífìsòn nandá, k'oa̱á s'ín kisìkítsjeèn, kitsò, tsà ini̱ma̱ ch'o-né; kiskindàya xkón 50 nga kitsakjòn-la̱ k'e̱ nga kijtseè kóhotjín. Ta̱nga Jesús ni̱to̱ón kiìchja̱-la̱, kitsò-la̱: —'Ñó teè-là takòn, kì tsàkjoòn-jèn, 'a̱n-ná. 51 K'e̱ nga jahas'en chitso Jesús, ni̱to̱ón kisijyò-ne tjo̱. Tà k'oa̱á komà-la̱ jñà xi̱ta̱ xi kota'yàt'aà-la̱, 52 nga kj'eè kì ndaà fahas'en-jiìn-la̱ jè kjo̱xkón xi kis'iìn Jesús ts'e̱ i̱nchra̱jín, koi-né nga tájaàjiìn tjín ini̱ma̱-la̱. 53 K'e̱ nga jye tsotojiìn ndáchikon, ijchò ján nangui Genesaret; ya̱á tsibít'aà-'ñó chitso-la̱ ya̱ i̱ndiì ndáchikon. 54 K'e̱ nga tsitajen yije chitso, jñá xi̱ta̱ xi ya̱ titsa̱jnaà, ni̱to̱ón kijtseèxkon nga jè Jesús. 55 Ti̱koa̱á ni̱to̱ón kiì kóho̱kji nga jngoò itjandiì i̱'nde jè. I̱kjoàn tsibíts'ia̱ xi̱ta̱ nga j'iìko̱-la̱ ngats'iì xi̱ta̱ xi xk'én; kjisòn-la̱ na̱chanyá ya̱ i̱'nde ñánda nga 'nchré xi̱ta̱ nga bijchò Jesús. 56 Ni̱ta̱ ñánda na̱xa̱ndá nga jahas'en Jesús, tsà na̱xa̱ndá jtobá-né, na̱xa̱ndá 'iì-né, i̱jnchi̱ya-né, ko̱ tsà rancho̱-né, jñà xi̱ta̱ ya̱á sikáyijo jñà xi̱ta̱ xi xk'én ya̱ jngohosen ndi̱yá; i̱kjoàn bítsi'ba-la̱ na̱s'ín tà jè i̱tjòn nikje-la̱ tsobà'ñó nga kàtandaà-ne. Ngats'iì xi̱ta̱ xi kitsobà'ñó nikje-la̱ kjòndaà yije-ne.
