1 Jesús ko̱ xi̱ta̱ xi kota'yàt'aà-la̱ ijchò ján xijngoaà ndáchikon ya̱ nangui-la̱ xi̱ta̱ Gadareno. 2 K'e̱ nga itjojen chitso Jesús ijchò kasìt'aà jngoò-la̱ xi̱ta̱ xi ini̱ma̱ ch'o-la̱ nei̱í tíjiìn ini̱ma̱-la̱. Jè xi̱ta̱ jè ya̱á itjo-ne itsjó nga̱jo̱ mik'en. 3 Xi̱ta̱ jè ya̱ bìjnaya ya̱ i̱tsjó nga̱jo̱ mik'en. Mì yá xi ma bít'aà'ñó na̱s'ín na'ñó ki̱cha̱ cadena. 4 Kjìn k'a okis'iìko̱ nga tsibít'aà'ñó ntso̱ko̱ ko̱ tsja na'ñó ki̱cha̱ cadena. Ni̱ yá xi chíkjoa̱-la̱ nga kis'iìn'nchré; otejtso xó cadena. 5 Ko̱ na̱chrjein ko̱ ni̱tje̱n ya̱á ojmesòn nindoò ñánda tjín itsjó nga̱jo̱-la̱ mik'en. Kjindáya tsò kjindáya ská nga kjaán ko̱ yijo-la̱, 'beé-la̱ ndo̱jo̱ yijo-la̱. 6 K'e̱ nga kijtseè nga kjiìn tínchrobá Jesús, tsangachikon. Kiì kasìt'aà chrañà-la̱, tsasèn-xkó'nchi-t'aà-la̱. 7 'Ñó kiìchja̱, kitsò: —Mé xi tjín-lè ko̱ an, Jesús, Ki'ndí-la̱ Nainá xi 'ñó 'nga tíjna? Bìtsi'bà-lè nga nguixko̱n Nainá, kì yaton-ná. 8 Koi̱í k'oa̱s'ín kiìchja̱-ne nga jè Jesús kitsò-la̱: —Ngaji̱ ini̱ma̱ ch'o-la̱ nei̱í, titjo̱jiìn ini̱ma̱-la̱ xi̱ta̱ jè. 9 Jesús kiskònangui-la̱. Kitsò-la̱: —¿Kó 'mì-lè? Jè kitsò: —Legión 'mì-na, koií-né nga kjìn jchán ma-naje̱n. 10 Jñà ini̱ma̱ ch'o-la̱ nei̱í, 'ñó tsibítsi'ba-la̱ Jesús nga mì it'aà xìn ski̱nì ya̱ i̱'nde jè. 11 Ko̱ ya̱ chrañà i̱t'aà nindoò, kjìn chi̱nga̱ nchikjènjno. 12 Jñà ini̱ma̱ ch'o-la̱ nei̱í tsibítsi'ba-la̱ Jesús. Kitsò-la̱: —Ya̱á tikàsén-náje̱n ñánda tjín chi̱nga̱; ya̱á kitjàsenjiìn-je̱n yijo-la̱. 13 Jesús kitsjaà'nde-la̱; jñà ini̱ma̱ ch'o-la̱ nei̱í itjojiìn ini̱ma̱-la̱ xi̱ta̱ jè; i̱kjoàn jahas'en-jiìn yijo-la̱ chi̱nga̱. Ma-la̱ tsà jò jmiì jñà chi̱nga̱ xi tsanga; tsatíkjájen-jno ya̱ na̱xi̱ skanda i̱jiìn ndáchikon, ya̱á k'en yije i̱jiìn ndáchikon. 14 Jñà xi̱ta̱ xi kondà chi̱nga̱ tsanga. Kiì ke̱èno̱jmí-la̱ xi̱ta̱ na̱xa̱ndá ko̱ xi̱ta̱ rancho̱ jè kjoa̱ xi komà. Jñà xi̱ta̱ na̱xa̱ndá ijchò katsejèn-la̱ kjoa̱ xi komà. 15 Kjìn xi̱ta̱ ijchò ñánda tíjna Jesús, kijtseè jè xi̱ta̱ xi ini̱ma̱ ch'o-la̱ nei̱í tíjiìn ini̱ma̱-la̱ nga sa ítjòn. Jyò tíjna. Íkjá-ne nikje-la̱. Ndaà tjín-ne kjo̱hítsjeèn-la̱. Xi̱ta̱ xi ijchò, ta kitsakjòn-la̱. 16 Jñá xi̱ta̱ xi kijtseè koni s'ín komàtin jè xi̱ta̱ xi ini̱ma̱ ch'o-la̱ nei̱í tíjiìn ini̱ma̱-la̱ nga kjòndaà-ne ko̱ chi̱nga̱ xi tsatíkjá, tsibeèno̱jmí-la̱ jñá xi̱ta̱ xi ijchò xi mì kiì kijtseè. 17 Jñà xi̱ta̱ xi ijchò tsibítsi'ba-la̱ Jesús nga xìn i̱'nde kàtjì. 18 K'e̱ nga jahas'en chitso Jesús, jè xi̱ta̱ xi ini̱ma̱ ch'o-la̱ nei̱í kisijiìn ini̱ma̱-la̱, tsibítsi'ba-la̱ Jesús nga mejèn-la̱ kji̱ko̱. 19 Ta̱nga jè Jesús mì kiì kitsjaà'nde-la̱. Kitsò-la̱: —Tin-ne ni'ya-lè, tèno̱jmí yije-la̱ xi̱ta̱ xingui̱i jè kjo̱ndaà xi kisìko̱-lè Nainá; kós'ín kijtseè i̱ma̱-lè. 20 Xi̱ta̱ jè, kiì; I̱kjoàn tsibíts'ia̱ nga tsibeèno̱jmí-la̱ jñà xi̱ta̱ na̱xa̱ndá Decapolis jè kjo̱ndaà xi kisìko̱ Jesús. Ngats'iì xi̱ta̱ xi kis'eno̱jmí-la̱ tà k'oa̱á komà-la̱. 21 Jesús tsibìjna'ya chitso, inchrobà ìjngoò k'a-ne ján xijngoaà ndáchikon, kjìn jchán xi̱ta̱ chixoña-t'aà ìjngoò k'a-la̱, koa̱ ya̱á tsibìjnandiì ndáchikon. 22 Ijchòkon jngoò xi̱ta̱ xi 'mì Jairo xi xi̱ta̱ ítjòn ts'e̱ ni'ya i̱ngo̱ sinagoga. K'e̱ nga kijtseè Jesús tsasèn-xkó'nchi-t'aà-la̱. 23 'Ñó tsibítsi'ba-la̱, kitsò-la̱: —Ndí tsòti-na̱ jye kjo̱meè biyaà; nchrobí, tíkjiaán, tjat'aà-la̱ ntsei̱i nga kàtandaà-ne, méne nga kíjnakon-ne. 24 Jesús kiìko̱, kjìn jchán xi̱ta̱ kiìtji̱ngui-la̱; chi̱ba̱-la̱ ó'nchó'ñó-né. 25 Ya̱ tsóhojiìn jngoò chjo̱ón xi kjò tejò nó xk'én, ch'in jní tjín-la̱. 26 Kjòtseé tísíkjìn kjo̱'in i̱t'aà ts'e̱ chji̱ne̱xkiì; jye xó kisìkje yije to̱n-la̱; mì kiì mandaà-ne, ta̱ saà tíma'ñó ch'in-la̱. 27 Chjo̱ón jè, k'e̱ nga kiì'nchré i̱t'aà ts'e̱ Jesús, kiìjiìn-la̱ ngats'iì xi̱ta̱ kjìn; i̱jto̱n íts'i̱n kitsobà-ne nikje-la̱ Jesús. 28 K'oa̱s'ín tísíkítsjeèn, kitsò: “Tsà tà jè nikje-la̱ si̱ìkoa̱, ko̱ndaà-na.” 29 K'e̱ nga kitsobà'ñó nikje-la̱, ni̱to̱n kisijyò-la̱ jní, koa̱ kijtseèya-la̱ yijo-la̱ nga jye kjòndaà-ne ch'in-la̱. 30 Jesús ni̱to̱n kijtseèya-la̱ nga nga'ñó-la̱ itjojiìn; kisíkatji, kiskoòtsejèn-jiìn-la̱ xi̱ta̱ kjìn, kitsò: —¿Yá xi kàtsobà'ñó nikje-na̱? 31 Jñà xi̱ta̱ xi kota'yàt'aà-la̱ Jesús kitsò-la̱: —¿A mì tsà 'yi nga jñà xi̱ta̱ ó'nchò'ñó-lè? Ngaji̱ si-né: “¿Yá xi kàtsobà'ñó nikje-na̱?” 32 Ta̱nga jè Jesús kotsejèn-jiìn-la̱ jñà xi̱ta̱ nga mejèn-la̱ skoe̱ yá xi kitsobà'ñó nikje-la̱. 33 Chjo̱ón jè tsí tíhotsé-ne nga kitsakjòn, nga jye tíjiìn-la̱ kós'ín komà ch'in-la̱; kiì, tsasèn-xkó'nchi-t'aà-la̱ Jesús; tsibeèno̱jmí kixi̱ yije-la̱ kós'ín komàtin. 34 Jesús kitsò-la̱: —Ndí nea̱, koi-né nga mokjeiín-lè i̱t'aà ts'a̱n nga kòmandaà-ne. T'in-là ndaà-ne. Jye kòmaxki-la̱ ch'in-lè. 35 Tákó ti̱ k'e̱ tíchja̱ ìsa Jesús nga j'iì i'nga xi̱ta̱ xi inchrobà-ne ni'ya-la̱ xi̱ta̱ ítjòn ts'e̱ ni'ya i̱ngo̱ sinagoga, kitsò-la̱: —Kitiki nìsiì-la̱ Maestro, ndí tsòti-lè jye k'en. 36 Ta̱nga jè Jesús, nga kiì'nchré koni kitsò o̱kixi̱ xi j'iìko̱, kitsò-la̱ jè na̱'èn-la̱ ndí tsòti: —Kì tsakjoòn-jèn; tà jè-né nga kàtakjeiín-lè. 37 Jesús mì kiì kitsjaà'nde nga kjìn xi̱ta̱ kiìko̱. Tà jè Pedro, Jacobo ko̱ Juan 'ntse̱ Jacobo. 38 K'e̱ nga ijchò ni'ya-la̱ jè xi̱ta̱ ítjòn ts'e̱ ni'ya i̱ngo̱ sinagoga, Jesús kijtseè nga fìjen fìkjá xi̱ta̱, 'ñó nchikjindáya ko̱ 'ñó nchisíkájno. 39 Jahas'en ni'ya Jesús, kitsò-la̱: —¿Mé-ne ko̱'nèe-nò nga ko̱ tà ndaà chìhindáya-nò? Jè ndí tsòti mì tsà kòbiyaà; ta kjinafè-né. 40 Jñà xi̱ta̱ xi títsa̱jna tà tsijnòkeè Jesús. K'e̱é tsachrje yije ni'ya kóho̱tjín xi̱ta̱; tà jñà tsibìtsa̱jna na̱'èn-la̱, nea̱-la̱, ko̱ xi̱ta̱ ts'e̱ xi tji̱ko̱. I̱kjoàn jahas'en ñánda kijna ndí tsòti. 41 Kiskoé tsja, kitsò-la̱: —Talita kumi, ('én xi tsòya-ne: Ji tsòti, k'oa̱á xan-lè, ti̱sítji̱in). 42 Jè ndí tsòti ni̱to̱n tsasítje̱n, tsajmeè-ne. Jye kjò tejò nó tjín-la̱. Jñà xi̱ta̱ xi títsa̱jna, 'ñó jchán kitsakjòn. 43 Ta̱nga Jesús 'ñó kitsjaà o̱kixi̱ nga mì yá xi̱ta̱ xi ke̱èno̱jmí-la̱. I̱kjoàn kitsò-la̱: —Tjiì-la̱ nga kàtakjèn ndí tsòti.
