1 Xi komà jò jàn na̱chrjein, ijchò ìjngoò k'a Jesús ján na̱xa̱ndá Capernaum. Kiì'nchré xi̱ta̱ nga ya̱ tíjna Jesús ya̱ ni'ya jè. 2 Tik'ee-ne kjìn jchán xi̱ta̱ ijchò maxkót'aà-la̱ skanda mì ti kiì tsi'ndé-ne xòhotjoa̱ ni'ya. Jesús kiìchja̱ya-jiìn-la̱ 'én ndaà-la̱ Nainá. 3 Jngoò xi̱ta̱ j'iìko̱ xi mì kiì ma síhiníyá yijo-la̱. Ñijòn xi̱ta̱ yangui. 4 Nga mì kiì komà kitjoò'nde-la̱ nga jahas'en ya̱ xohotjoa̱ ni'ya, nga 'ñó kjìn xi̱ta̱ títsa̱jna, ya̱á kiskíx'a̱ i̱tsjá ni'ya ya̱ kixi̱-la̱ ñánda tíjna Jesús. Ya̱á kiskinìjen-ne jè xi̱ta̱ xi xk'én xi kjiya-la̱ yá. 5 Jesús, k'e̱ nga kijtseè nga jñà xi̱ta̱ koi mokjeiín-la̱ i̱t'aà tse, kitsò-la̱ jè xi̱ta̱ xi xk'én: —Ji̱ ndí na̱'èn, jé-lè jye kichàhat'aà-lè. 6 Ya̱ títsa̱jna i'nga xi̱ta̱ xi okóya kjo̱tíxoma-la̱ Nainá xi kiskiì Moisés nga nchisìkítsjeèn i̱jiìn ini̱ma̱-la̱. Kitsò: 7 “¿Mé-ne kos'ín chja̱-ne jè xi̱ta̱ jè nga Nainá chja̱jno-la̱? Nga ta̱jngoò Nainá síjchaàhat'aà-ná jé-ná.” 8 Ti̱k'e̱ kijtseèya-la̱ Jesús koni s'ín nchisíkítsjeèn i̱jiìn ini̱ma̱-la̱. Kitsò-la̱: —¿Mé-ne ko̱tsò-ne kjo̱hítsjeèn-la̱ ini̱ma̱-nó? 9 ¿Mé xi ìsa̱ chiba 'in tjín? Tsà xan-la̱ jè xi̱ta̱ xi xk'én: “Jé-lè jye kàchàhat'aà-lè”, o tsà xán-la̱: “Chjoí na̱chan-lè, ti̱sítji̱in, ti̱tjeí.” 10 Kokoò-nò nga 'an xi Ki'ndí-la̱ Xi̱ta̱ xan-la̱ yijo-na̱, tjí'ndeé-na nga siìjcha̱hat'aà-la̱ jé-la̱ xi̱ta̱ i̱ i̱sò'nde. K'e̱è kitsò-la̱ jè xi̱ta̱ xi xk'én: 11 —Ji, k'oa̱á xan-lè: “Ti̱sítji̱in, chjoí na̱chan-yá-lè, t'in-ne ni'ya-lè.” 12 K'e̱é tsasítje̱n jè xi̱ta̱ xk'én. Kiskoé na̱chan-la̱. Itjojiìn-la̱ ngats'iì xi̱ta̱ xi títsa̱jna. K'e̱ nga kijtseè kjoa̱ koi, tà kjòxkón-la̱ ngats'iì xi̱ta̱. K'e̱é jeya kisìkíjna Nainá. Kitsò: —Ni̱saá jngoò k'a 'yaá jngoò kjoa̱ xi ko̱s'ín ma. 13 Jesús, ìjngoò k'a itjo. Kiì ján i̱ndiì ndáchikon. Ngats'iì xi̱ta̱ ya̱á ijchòkon, i̱kjoàn tsakóya-la̱ 'én ndaà-la̱ Nainá. 14 K'e̱ nga nchífì, Jesús kijtseè jè Leví, ki'ndí-la̱ Alfeo. Tíjnat'aà ími̱xa̱ ya̱ ñánda síkíchjítji tsojmì ts'e̱ Roma. Kitsò-la̱: —Nchroòtji̱ngui-ná. K'e̱é tsasítje̱n Leví, kiìtji̱ngui-la̱ Jesús. 15 K'e̱ nga tíjnat'aà ími̱xa̱ Jesús nga tíkjèn ya̱ ni'ya-la̱ Leví, kjìn ma xi̱ta̱ xi síkíchjítjì tsojmì ko̱ xi̱ta̱ xi jé tjín-la̱ títsat'aàko̱ ími̱xa̱ Jesús ko̱ xi̱ta̱ xi kota'yàt'aà-la̱. Kjìn jchán ma xi̱ta̱ xi tji̱ngui-la̱. 16 Jñà xi̱ta̱ xi okóya kjo̱tíxoma-la̱ Nainá xi kiskiì Moisés ko̱ xi̱ta̱ fariseo k'e̱ nga kijtseè Jesús nga tíkje̱enko̱ xi̱ta̱ xi tse jé tjín-la̱ ko̱ xi̱ta̱ xi síkíchjítjì tsojmì, kitsò-la̱ jñà xi̱ta̱ xi kota'yàt'aà-la̱ Jesús: —¿Mé-ne k'oa̱s'ín-ne Maestro-nò nga xi̱ta̱ xi síkíchjítjì tsojmì ko̱ xi̱ta̱ jé kjènko̱-ne? 17 K'e̱ nga kiì'nchré Jesús; kitsò-la̱: —Jñà xi̱ta̱ xi mì ch'in tjín-la̱, mì chji̱ne̱xkiì mochjeén-la̱; jñà-né xi̱ta̱ xi xk'én xi mochjeén-la̱ chji̱ne̱xkiì. 'A̱n, mìtsà koi xá j'i̱-na nga jñà kichjà-la̱ jñà xi̱ta̱ xi tsò-la̱ yijo-la̱ nga xi̱ta̱ kixi̱, koií xá j'i̱-na nga jñà kichjà-la̱ xi̱ta̱ xi beè-la̱ ikon nga jé tjín-la̱. 18 Jngoò k'a, k'e̱ nga jñà xi̱ta̱ xi kota'yàt'aà-la̱ Juan ko̱ jñà xi kota'yàt'aà-la̱ xi̱ta̱ Fariseo nchibìtsa̱jnachjan, kiì i'nga xi̱ta̱ koi nga kiskònangui-la̱ Jesús. Kitsò-la̱: —Jñà xi̱ta̱ xi kota'yàt'aà-la̱ Juan ko̱ xi kota'yàt'aà-la̱ xi̱ta̱ Fariseo bìtsa̱jnachjan-né. ¿Mé-ne jñà xi̱ta̱ tsi̱ji xi kota'yàt'aà-lè mì bìtsa̱jnachjan-ne? 19 Kitsò Jesús: —¿A bìtsa̱jnachjaán xi̱ta̱ k'e̱ nga xi̱ta̱ kòbixan k'e̱ nga ya̱ tíjnako̱ó isa jè xi̱ta̱ x'i̱n xi kòbixan? Majìn, mì kiì bìtsa̱jnachjan xi̱ta̱. 20 Ta̱nga ki̱jchò na̱chrjein k'e̱ nga tjáxìn-la̱ x'i̱n xi kòbixan; k'e̱-né nga kítsa̱jnachjan xi̱ta̱. 21 'Jngoò nikje i̱baà mì kiì ma sijto-ne ko̱ nikje xi̱tse̱; nga jè nikje xi̱tse̱, kjeènyó-né koa̱ ko̱tejnda-né jè nikje i̱baà. Ìsa̱á tse ko̱ma ñánda kixajnda kji. 22 Ti̱koa̱á mì tsà yá xi ko̱ma binchá xán ixiì ko̱ chrjoa̱ jchínga; tsà ko̱s'ín s'e̱en, k'e̱ nga jye ko̱jchá xán, si̱ìxajndá chrjoa̱ jchínga, i̱kjoàn chi̱ja xán ko̱ chrjoa̱. Jè xán ixiì, chrjoa̱ xi̱tse̱é si̱nchá. 23 Jngoò na̱chrjein nìkjáya ja Jesús ya̱ ñánda títje̱ trigo. Jñà xi̱ta̱ xi kota'yàt'aà-la̱ tsate chiba natín-la̱ trigo. 24 Jñà xi̱ta̱ Fariseo kitsò-la̱: —¿Mé-ne ko̱s'ín-ne xi̱ta̱-lè jè na̱chrjein nìkjáya? Mì kiì tjí'nde nga ko̱s'ín ko̱ma. 25 Kiìchja̱ Jesús kitsò-la̱: —¿Jñò, a mìtsà jye tíjiìn-nò koni s'ín tíchja̱ Xo̱jo̱n-la̱ Nainá koni kis'iìn xi̱ta̱xá ítjòn xi ki'mì David ko̱ jñà xi̱ta̱-la̱ xi kjihijtako̱ k'e̱ nga no̱'miì ítjòn tsibijna jè Abiatar? K'e̱ nga kjòhojò-la̱ nga nì mé tjín xi kine, jasen ni'ya-la̱ Nainá. Tsakjèn i̱nchra̱jín tsjeè-la̱ Nainá. Ti̱koa̱ kitsjaà-la̱ xi̱ta̱-la̱ xi tji̱ko̱. Mì kiì tjí'nde nga jñà ko̱kje̱n. Tà jñà na̱'miì tjí'nde-la̱ nga ko̱kje̱n. 27 Ìjngoò k'a kitsò Jesús: —Jè na̱chrjein nìkjáya, koi̱ì xá kisindaà-ne nga kjo̱ndaà ts'e̱ xi̱ta̱. Mìtsà koi xá kisindaà-ne xi̱ta̱ nga kjo̱ndaà ts'e̱ na̱chrjein. 28 K'oa̱á s'ín tjín, 'an xi Ki'ndí-la̱ Xi̱ta̱ xan-la̱ yijo-na̱, skanda jè na̱chrjein nìkjáya, 'aán otiìxoma-la̱.
