1 Tà jò na̱chrjein chija-la̱ nga ki̱tjo s'eí Paxko̱ ts'e̱ xi̱ta̱ judío k'e̱ nga kjèn i̱nchra̱jín xi tsjìn-la̱ na̱'yo̱ san. Jñà xi̱ta̱ sko̱-la̱ no̱'miì ko̱ xi̱ta̱ xi okóya kjo̱tíxoma-la̱ Nainá xi kiskiì Moisés tsohótsji'nde-la̱ kós'ín si̱ìko̱ nga skóna̱cha̱n-la̱ nga tsobà'ñó Jesús, i̱kjoàn si̱ìk'en. 2 Tjín i'nga xi̱ta̱ xi kitsò: —Mì na̱chrjein-la̱ s'eí si̱k'eén nga mì ko̱ts'e̱n jñà xi̱ta̱ na̱xa̱ndá. 3 Jesús, k'e̱ nga tíjna ján na̱xa̱ndá Betania, ya̱ ni'ya-la̱ Simón, jngoò xi̱ta̱ xi tsindojno chrjoa̱ yijo-la̱ nga sa ítjòn, k'e̱ nga tíjnat'aà ími̱xa̱, ijchò jngoò chjo̱ón xi 'ya jngoò ndo̱jo̱ chi̱tsín xi tjíya-la̱ xkiì jne̱ ts'e̱ nardo, xi 'ñó chjí-la̱. Kiskíx'a̱ ndo̱jo̱ chi̱tsín, i̱kjoàn tsibíxten-jno sko̱ Jesús jè xkiì jne̱. 4 Tjín i'nga xi̱ta̱ xi ya̱ títsa̱jna, kòjti-la̱, kitsò-la̱ xíkjín: —¿Mé-ne kasíkits'ón-ne jè xkiì jne̱? 5 Tsà kasatíjna, tsotoò-la̱ jàn sìndo̱ to̱n denario chjí-la̱ koa̱ jè to̱n-la̱ ko̱ma ko̱chját'aà-la̱ xi̱ta̱ i̱ma̱. Kiìchja̱jno-la̱ jè chjo̱ón xi o̱kis'iìn. 6 Ta̱nga kitsò Jesús: —Kì k'oa̱á 'mì-là. ¿Mé-ne nìjti-là? Koni s'ín kàs'ín-ko̱-na, ndaà kàs'ín. 7 Jñà xi̱ta̱ i̱ma̱ kítsa̱jnako̱ kjit'aà-nò, ko̱ ma si̱chját'aà-là k'e̱ nga mejèn-nò. Ta̱nga an, mì i̱ tijnako̱ kjit'aà-nò. 8 Jè chjo̱ón jè, k'oa̱ás'ín kàs'ín koni kji ma xi kàs'ín. Kàsíkaàjno ítjòn xkiì jne̱ yijo-na̱ xi ts'e̱ nga si̱ijñà. 9 O̱kixi̱í xi xan-nò, ni̱ta̱ ñánda-ne nga tíjtsa i̱sò'nde nga kobísòn 'én ndaà-la̱ Nainá, ti̱koa̱á kobísòn-né koni s'ín kasìko̱-na mé-ne nga si̱ìkítsjeèn-ne xi̱ta̱ i̱t'aà ts'e̱ chjo̱ón jè. 10 Jè Judas Iscariote xi ya̱ itjojiìn-ne ts'e̱ xi̱ta̱ xi tejò ma-ne xi tsajmeiko̱ Jesús, kiìkon jñà xi̱ta̱ sko̱-la̱ no̱'miì nga si̱ìnga̱tsja Jesús. 11 Jñà xi̱ta̱ sko̱-la̱ no̱'miì, k'e̱ nga kiì'nchré, kjòtsja-la̱, kitsjaà-la̱ tso'ba nga to̱n tsjá-la̱. Jè Judas tsohótsji'nde-la̱ kós'ín siìnga̱tsja Jesús. 12 Jè na̱chrjein ts'e̱ s'eí xi mats'ia̱ ítjòn-ne k'e̱ nga kjèn i̱nchra̱jín xi tsjìn-la̱ na̱'yo̱ sàn jñà xi̱ta̱ judio, k'e̱ nga sík'en orrè xi ts'e̱ s'eí Paxko̱, jñà xi̱ta̱ xi kota'yàt'aà-la̱ Jesús kiskònangui-la̱; kitsò-la̱: —¿Ñánda mejèn-lè onguí-kinda-je̱n xi ki̱chiaá ts'e̱ s'eí Paxko̱? 13 Jesús kisìkasén jò xi̱ta̱ xi kota'yàt'aà-la̱ ján Jerusalén, kitsò-la̱: —Tanguió ján i̱jiìn na̱xa̱ndá, ya̱ ska̱jñoò jngoò xi̱ta̱ xi 'yajen jngoò nisa nandá; tanguítji̱ngui-là. 14 Ya̱ ñánda kjoa̱has'en, k'oa̱á tìn-là nei-la̱ ni'ya: “K'oa̱á tsò Maestro: ¿Ñánda tíjna jè cuarto ñánda kókje̱n-koa̱a xi̱ta̱ xi kota'yàt'aà-na jè s'eí Paxko̱?” 15 Ya̱ ko̱kó jngoò-nò cuarto xi je kji xi tíjna i̱sò'nga ni'ya jye tjíndaà tso̱jmi xi ko̱chjeén. Ya̱ tìndaà xi ki̱chiaá. 16 Kiì jñà xi̱ta̱ xi kota'yàt'aà-la̱ ján i̱jiìn na̱xa̱ndá. K'oa̱ás'ín kisakò-la̱ koni s'ín kitsò-la̱ Jesús, ya̱á tsibíndaà tsojmì xi ko̱kje̱n kjoa̱ ts'e̱ s'eí Paxko̱. 17 K'e̱ nga jye kòjñò, Jesús, ijchòko̱ xi̱ta̱-la̱ xi tejò ma-ne. 18 K'e̱ nga títsa̱jnat'aà ími̱xa̱ nga nchikjèn, Jesús kitsò-la̱: —O̱kixi̱í xi xan-nò, jñò, i̱ tíjnajiìn jngoò-nò xi si̱ìnga̱tsja-na̱ i̱t'aà ts'e̱ xi̱ta̱ kondra̱-na̱. jngoò xi 'an tíkjènko̱-na. 19 Jñà xi̱ta̱ xi kota'yàt'aà-la̱ Jesús ta kjòba-la̱ k'e̱ nga o̱kitsò. K'e̱é jngójngó kiskònangui-la̱, kitsò-la̱: —¿A an-ná? 20 Jesús kitsò: —Jngoò xi ki̱tjokájiìn ts'e̱ xi̱ta̱-na̱ xi tejò ma-ne jè xi ti̱jè-ne chro̱ba̱ ts'a̱n tísíká'nchi̱-ne i̱nchra̱jín-la̱. 21 'An xi Ki'ndí-la̱ Xi̱ta̱ xan-la̱ yijo-na̱, k'oa̱á s'ín ko̱matian koni s'ín tíchja̱ Xo̱jo̱n-la̱ Nainá. ¡Ta̱nga i̱ma̱ xó-ne jè xi̱ta̱ xi si̱ìnga̱tsja-na! Ìsa̱á-là ndaà komà tsà mì kiì kits'iìn xi̱ta̱ jè. 22 K'e̱ nga nchikjèn, Jesús kiskoé i̱nchra̱jín, kiìchja̱t'aà-la̱ Nainá nga kisìchikon-tin, kisìxkoa̱ya i̱kjoàn kitsjaà-la̱ xi̱ta̱ xi kota'yàt'aà-la̱, kitsò-la̱: —Chjoé. Yijo-na̱ né. 23 I̱kjoàn kiskoé jngoò chi̱tsín, kitsjaà-la̱ kjo̱ndaà Nainá; k'e̱é kitsjaà-la̱ xi̱ta̱ xi kota'yàt'aà-la̱, ngats'iì xi̱ta̱ kits'iì vino xi tjíya chi̱tsín. 24 Kitsò-la̱: —Jè-né xi jní-na̱ xi síkixi̱ya jè kjoa̱ xi̱tse̱ xi bìndaàjiìn-ko̱-nò. Jè jní-na̱ xíxteèn xi kjo̱ndaà ts'e̱ nga kjìn xi̱ta̱. 25 O̱kixi̱í xi xan-nò, mì ti̱ kiì ski̱-na vino skanda jè na̱chrjein k'e̱ nga skia̱à vino xi̱tse̱, ján ñánda tíhotíxoma Nainá. 26 Jesús ko̱ xi̱ta̱-la̱, k'e̱ nga jye kis'eè jngoò-la̱ soò Nainá ts'e̱ Salmo, i̱kjoàn kiì ján i̱'a nindoò Yá Olivo. 27 Jesús kitsò-la̱ xi̱ta̱ xi kota'yàt'aà-la̱: —Ngats'ioò jñò, ki̱jneí takòn-ná jè ni̱tje̱n jè, nga k'oa̱ás'ín tíchja̱ Xo̱jo̱n-la̱ Nainá, nga tsò: “Ki̱yá jè paxtò koa̱ jñà orrè tsjohoya-né.” 28 Ta̱nga ko̱ma i̱skan, k'e̱ nga kjoa̱áya-na, kjín ítjòn-nò ján nangui Galilea. 29 Kitsò Pedro: —Na̱s'ín ngats'iì xi̱ta̱-lè xi i'nga tsjeiìn takòn-le, an, mì kiì tsjeiìn-takòn-lè. 30 Jesús kitsò-la̱: —O̱kixi̱ xi xan-le; ni̱tje̱n jé, k'e̱ nga ti̱kj'eè kjindáya jò k'a kóxtí, ngaji̱, jàn k'a tsómatin-ná. 31 Jè Pedro ìsa̱ 'ñó kiìchja̱; kitsò: —Na̱s'ín ya̱ ki̱yáko̱-lè, mì kiì kójna̱'matin-lè. Ngásòn kitsò yije xi̱ta̱ xi kota'yàt'aà-la̱ xi i'nga. 32 Kiì ján i̱'nde ñánda 'mì Getsemaní; Jesús kitsò-la̱ xi̱ta̱ xi kota'yàt'aà-la̱: —Titsa̱jnaà i̱jndé; an, Nainá kò-là kichjat'aà-la̱. 33 Jesús kiìko̱ Pedro, Jacobo, ko̱ Juan. I̱kjoàn tsibíts'ia̱ Jesús nga ba ko̱ma-la̱. 'Ñó kisìkájno. 34 K'e̱é kitsò Jesús: —Tsí ba ma-la̱ ini̱ma̱-na̱ koni tsà mejèn ki̱yá. Titsa̱jnaà i̱jndé, titsa̱jnaàkoòn. 35 Jesús kiìkjá chiba-ìsa. I̱kjoàn tsohojna skanda i̱t'aà nangui koa̱ kisìjét'aà-la̱ Nainá tsà ko̱ma, kjoa̱áxìn-la̱ kjo̱'in jè. 36 K'e̱ nga tíchja̱t'aà-la̱ Nainá, kitsò-la̱: —Na̱'èn xi Na̱'èn-na̱ xan-le, ma yije-lè ni̱ta̱ mé kjoa̱-ne i̱t'aà tsi̱ji. Chjaàxìn-ná kjoa̱ ts'e̱ kjo̱'in jè, ta̱nga mìtsà jè 'én ts'a̱n ki̱tasòn, jè kàtitasòn 'én tsi̱ji. 37 I̱kjoàn j'iì ìjngoò k'a-ne ya̱ ñánda títsa̱jna xi̱ta̱-la̱, ta̱nga jñà xi̱ta̱-la̱, kjiyijòfè-né. Jesús kitsò-la̱ Pedro: —Simón, ¿A titsa̱jnafè-né? ¿A mì kachíkjoa̱-lè tsà tà jngoò hora kòbíjnakoin? 38 Titsa̱jnaàkoòn, tijét'aà-là Nainá mé-ne nga mì si̱ikijnèe-nò kjoa̱ ts'e̱ jé. Xi o̱kixi̱, jè ini̱ma̱-nò tíjnandaà-né ta̱nga jè yijo-nò, indaá tjín, tsjìn-la̱ nga'ñó. 39 Jesús kiì kítsi'ba ìjngoò k'a. Tákó k'oa̱á ti̱ kitsò-ne koni kitsò nga sa̱ ítjòn. 40 K'e̱ nga j'iì ìjngoò k'a-ne, jñà xi̱ta̱ xi kota'yàt'aà-la̱, tákó kjiyijofè-né nga 'ñó nijñá-la̱. Mì kiì beè kó ki̱tso̱-la̱ Jesús. 41 Ko̱ma jàn k'a nga j'iì Jesús. Kitsò-la̱: —¿A tákó ti̱tsa̱nìkjáya-nò ko̱ ti̱tsa̱fè-nò? Kàtje kjoa̱. Jyeé i̱jchó hora-la̱, 'an xi Ki'ndí-la̱ Xi̱ta̱ xan-la̱ yijo-na̱, ya̱ ko̱nga̱tsja jñà xi̱ta̱ jé. 42 Ti̱sítje̱en, chítsejèn-là, tíkjiaán, jye nchrobá chrañà jè xi si̱ìnga̱tsja-na. 43 Tákó ti̱ k'e̱é tíchja̱-ìsa Jesús nga ijchò Judas, xi ya̱ itjojiìn-ne ts'e̱ xi̱ta̱-la̱ Jesús xi tejò ma-ne. Kjìn xi̱ta̱ tji̱ko̱ xi 'ya ki̱cha̱ ndojò ko̱ yá. Xi̱ta̱ koi, jñà kisìkasén xi̱ta̱ sko̱-la̱ no̱'miì ko̱ xi̱ta̱ xi okóya kjo̱tíxoma-la̱ Nainá xi kiskiì Moisés ko̱ xi̱ta̱ jchínga-la̱ xi̱ta̱ judío. 44 Judas, jè xi tsatíjna Jesús, ítjòn tsibìhichi̱ya-la̱ kós'ín ko̱kò-la̱ Jesús. Kitsò-la̱: —Jè xi skíne̱'a, jè-né xi ti̱ndoba'ñó; ndaà ti̱kinda̱a k'e̱ nga onguíko̱o. 45 K'e̱ nga ijchò Judas, kiì ndi̱yá-né ñánda tíjna Jesús, kitsò-la̱: —Maestro. I̱kjoàn kiskine'a. 46 Jñà xi̱ta̱ xi tji̱ko̱, ni̱to̱ón kitsobà'ñó Jesús. 47 Ya̱ tíjna jngoò xi̱ta̱ xi tsachrje ki̱cha̱ ndojò-la̱. Tsajá-la̱ jè xi̱ta̱ chi̱'nda-la̱ no̱'miì ítjòn, tsatet'aà jngoò líká-la̱. 48 Jesús kiìchja̱, kitsò-la̱ jñà xi̱ta̱: —¿Mé-ne ko̱s'ín kòf'iì ndobà'ñó-ná nga ko̱ ki̱cha̱ ko̱ yá kich'à koni tsà jngoò xi̱ta̱ chijé? 49 Na̱chrjein nchijòn tijna̱ko̱-nò ján i̱ngo̱ ítjòn nga okoòya-nò koa̱ mì kiì kindobà'ñó-ná. Koií k'oa̱ás'ín tíma-ne nga ki̱tasòn 'én xi tjít'aà Xo̱jo̱n-la̱ Nainá. 50 Ngats'iì xi̱ta̱ xi kota'yàt'aà-la̱ Jesús tsanga-nè, ya̱á kitsjeiìn-takòn. 51 Jngoò chíti tji̱ngui-la̱ xi tíjnajté jngoò nikje sabana. Jñà xi̱ta̱ kitsobà'ñó, 52 ta̱nga jè chíti kitsjeiìn nikje sabana-la̱; i̱kjoàn k'oa̱s'ín tsanga láká. 53 Jesús kiìko̱ ñánda tíjna no̱'miì ítjòn. Ya̱á chixoña kóho̱tjín xi̱ta̱ sko̱-la̱ no̱'miì, jñà xi̱ta̱ jchínga, ko̱ xi okóya kjo̱tíxoma-la̱ Nainá xi kiskiì Moisés. 54 Jè Pedro, tà kjiìn tà kjiìn tsajmètji̱ngui-la̱ skanda k'e̱ nga ijchò ya̱ ndi̱tsin ni'ya-la̱ no̱'miì ítjòn. Ya̱á tsibíjnat'aà-la̱ ñánda títsa̱jna xi̱ta̱ chi̱'nda xi síkinda̱ i̱ngo̱ nga títsa̱jna'ngui. 55 Jñà xi̱ta̱ sko̱-la̱ no̱'miì ko̱ ngats'iì xi̱ta̱xá xi ts'e̱ xi̱ta̱ Judío tsohótsji'nde-la̱ nga tsjátin 'én xi kondra̱ ts'e̱ Jesús mé-ne nga ko̱ma si̱ìk'en-ne ta̱nga nímé 'én kisakò-la̱. 56 Kjìn ma xi̱ta̱ xi tsjátin 'én ndiso xi kondra̱ ts'e̱ Jesús ta̱nga kj'ei̱í tsò nga jngoò ìjngoò; mì kiì mangásòn 'én xi tsjátin. 57 Chincha kixi̱ i'nga xi̱ta̱ xi tsibeèno̱jmí 'én ndiso. Kitsò: 58 —Ngaji̱n, kina'yà-la̱je̱n nga tsò: “'An siki̱xo̱ña i̱ngo̱ ítjòn xi tsja xi̱ta̱ kisindaà-ne ko̱ jàn na̱chrjein kìndaà ìjngoò-na xi mì tsà tsja xi̱ta̱ sindaà-ne.” 59 Ni̱ mì kiì kjòngásòn 'én-la̱ na̱s'ín o̱kitsò. 60 K'e̱é tsasítje̱n jè no̱'miì ítjòn; tsasíjnajiìn osen-la̱; kiskònangui-la̱ Jesús, kitsò-la̱: —¿A nì mé 'én nokjoì, koni tsò 'én xi tsjá xi̱ta̱ koi xi kondra̱ tsi̱ji? 61 Ta̱nga jè Jesús jyò tsibìjna, ni̱ mé 'én kiìchja̱. Jè no̱'miì ítjòn ìjngoò k'a kiskònangui-la̱, kitsò-la̱: —¿A ji-né xi Cristo, xi Ki'ndí-la̱ Nainá xi 'ñó jeya tíjna. 62 Jesús kitsò: —An-ná, jñò jcha̱-ná xi Ki'ndí-la̱ Xi̱ta̱ xan-la̱ yijo-na̱ nga kóti̱jnat'aà chrja kixi̱-la̱ Nainá xi 'ñó tse nga'ñó tjín-la̱, koa̱ kji̱nchrobàjñaà ifi ján ngajmiì. 63 Jè no̱'miì ítjòn tsatijndajno yijo-la̱ nikje-la̱ xi íkjá nga 'ñó kòjti-la̱. Kitsò: —¿Mé s'e̱én-ìsa̱-ná xi̱ta̱ xi kj'ei̱í xi tsjá 'én? 64 Jñá jye titsa̱na'yà koni s'ín chja̱jno-la̱ Nainá. ¿Jñò, kó bixón? ¿Mé xi si̱koa̱á? Ngats'iì xi̱ta̱ kisìjngóhikon nga tjín-la̱ jé koa̱ o̱k'ín-la̱ nga ki̱yá. —Ok'ìn-la̱ nga si̱k'en. 65 Jñà xi̱ta̱ tsibíts'ia̱ nga tsibìchrájnò koa̱ tsibíchjoà xko̱n, tsi'beé-la̱, kitsò-la̱: —K'oa̱á si, ¿yá xi tí'beé-lè? Jñà xi̱ta̱ xi síkinda̱ i̱ngo̱, kisijtsin-'an isén-la̱. 66 Jè Pedro ya̱á tíjna kangui ndi̱tsin ni'ya. Ijchò jngoò chjo̱ón xi chi̱'nda-la̱ no̱'miì ítjòn. 67 K'e̱ nga kijtseè Pedro, nga tíjna'ngui, kiskoòtsejèn-jno, kitsò-la̱: —Ti̱koa̱á ngaji̱, ya̱á tjaàkoi̱i Jesús xi Nazaret i̱'nde-la̱. 68 Ta̱nga jè Pedro tsoho'matin-né. Kitsò: —Mì kiì bexkoan. Mì kiì be mé 'én xi tínakjoì. Pedro itjo ni'ya ján xòhotjoa̱-la̱. K'e̱é kiskindáya jngoò kóxtí. 69 Jè chjo̱ón chi̱'nda-la̱ no̱'miì ítjòn kijtseè ìjngoò k'a jè Pedro. Kitsò-la̱ jñà xi̱ta̱ xi ya̱ títsa̱jna: —Jè xi̱ta̱ jè, xi̱ta̱ ts'e̱ Jesús. 70 Ta̱nga jè Pedro tsoho'matin ìjngoò k'a. Nga ko̱ma i̱skan, jñà xi̱ta̱ xi ya̱ títsa̱jna, ìjngoò k'a kitsò-la̱ Pedro: —Xi o̱kixi̱, ngaji̱, xi̱ta̱-la̱ Jesús-né nga Galilea i̱'nde-lè, k'oa̱á tsò 'én-lè xi nokjoì. 71 Ta̱nga ìsa̱ 'ñó kiìchja̱ Pedro kitsò: —¡Beè Nainá, na̱s'ín ti̱k'eèn-ná, mì kiì bexkoan jè xi̱ta̱ xi o̱'mì-là! 72 Ti̱k'e̱-ne nga o̱kitsò Pedro, jè xi ma-ne jò k'a kiskandáya kóxtí. K'e̱é tsibítsjeèn-la̱ Pedro koni kitsò-la̱ Jesús: “K'e̱ ti̱kj'eè kjindáya jò k'a kóxtí, ngaji̱, jàn k'a tsjá'matin-ná.” I̱kjoàn ndaà jchán kiskindáya.
